Luk 2
2
Məbí-Jiso
(Matia 1:18-25)
1Ndʉʉ ndə Agostu kə bɛ Fɔŋ-lɔʼɔ-Luŋ, ɔ bʉ́ mbɔ b̈ə la súu bʉə bənchəŋ nyɔ̀ʼ yietə-ʉə mu ŋwɔʼnə-gɔməna. 2Nɔ bɛ fəŋ vɛʼ nɔ ndə bə kə́ súu bʉə, nyɔ̀ʼ yietə-ʉə mu ŋwɔʼnə, kə́ bɛ ndʉʉ ndə Kwilinu kə́ sɔ́ʼ bie Silia. 3Bʉə bənchəŋ bʉ̀nə gɛ̀ lɔʼɔbə-ɔŋ ndə mənyɔ̀ʼ yietə-ʉə mu ŋwɔʼnə-ghɔ̄. 4Jɔsɛ ghɔ nɔ nə bɛ vaa-fu-Dɛbi. Bʉʼka yɔ̄ŋ-yə, ɔ lɔ̀ hə Nasalɛ mu Galili gɛ̀ Bɛtələhɛŋ mu Judia, bʉʼka mbɔ nɔ nə bɛ lɔʼɔ-bətietie-e ndəŋ yuhəbə buŋmbi. 5Ɔ kə́ gɛ̀ ndə mənyɔ̀ʼ yie-e mu ŋwɔʼnə-gɔməna ghɔŋ Mɛli ndə bə nɔʼ bíʼtə ɔŋ ndə vi-i. Ɔ kə́ bɛ gʉʼnə.
6Vɛʼ ndə bɔ̂ŋ kə bɛ Bɛtələhɛŋ, mbʉ ndʉʉ kʉ̀ʼnə ndə yɔʼ-Nyii-kə byùu ɔ. 7Ɔ bí fəŋ vaa-ɛ, kə́ bɛ vaabələŋ, bɔ́nə ɔŋ mu ndyihə, mɔ̀ʼ ɔ mu ŋkyʉʉ-bihə-kə bʉʼka mbɔ yəŋkə kə bɛ ghɔ tʉ bɔŋ mu njəŋ-njaa-bʉə-mətòʼ fɛ.
Bənchyii-binjyʉʉhə ghɔŋbə bʉəntəŋNyii
8Mu kəyəŋbɛʼ mbʉə lɔʼɔ-ghɔ̄, bʉəbɛʼbə nɔ kə bɛ chɔ kə́ chyìi binjyʉʉhə-ʉə ndʉʉbətyuʼ-ghɔ̄. 9WontəŋTiekətʉ kwɔnə fyú mu bɔŋ, məgʉə-Tiekətʉ báa yə̀ŋhə bɔŋ, faa-kwu-kə yá bɔŋ shʉ́əshʉ́ə. 10Mbʉ wontəŋNyii ghɔ̀ŋ tʉ bɔŋ mbɔ, “Kə bii mə leʼ fàa fɛ, mɔ nɔ gwè nə ntəŋjyujyu tʉ bii, ndə i bu gwè nə tʉʉjyu tʉ bʉə-lɔʼɔ-bii bənchəŋ. 11Laa mu yəŋkwɛʼtəŋ-Dɛbi-kə* bə nɔʼ bí Ŋkwaa-yii, ɔ kə́ bɛ Wo ndə Nyii Kùŋ Tə́ŋ bɔŋ-kə́-leʼ bɛ Tiekətʉ. 12Yɔ̄ŋ-yə bu bɛ cheʼkə tʉ bii, bii bu nyíɛ vaa mu ŋkyʉʉ-bihə-kə tʉ bə nɔʼ bɔ́nə ɔŋ mu ndyihə.”
13Kə kwɔnə nyíɛ, nuɔ-bʉəntəŋNyii fyú gwè hə yuo, bìa mbʉ wontəŋNyii, bɔ̂ŋ kə́ lə̀ʼtə Nyii ghɔ̀ŋ mbɔ,
14“Tə məgʉ́ə bɛ tʉ Nyii tə dàa liʼ yuo,
kəchisê fyiighʉ́ənə mu bʉəməsʉʉ, ndə tʉʉ-i bʉ̀ʉ tʉ bɔŋ.”
15Ndʉʉ ndə mbʉ bʉəntəŋNyii bʉ̀nə gɛ̀ yuo, mbʉ bənchyii binjyʉʉhə ghɔ̀ŋ tʉ ŋwɔŋtə-ʉə mbɔ, “B̈ʉʼʉ lɔ̀ haʼ nduɔnduɔ gɛ̀ Bɛtələhɛŋ, gɛ̀ nyíɛ nukə-ɔ̄ŋ ndə i fyú, Tiekətʉ chìi bʉʼʉ kínə nɔ.”
16Bɔ̂ŋ lə̀ŋnə gɛ̀ nyíɛ Mɛli ghɔŋ Jɔsɛ leʼnə mbʉ vaa, ɔ kə́ nʉ̀ʉ mu ŋkyʉʉ-bihə-kə. 17Ndʉʉ ndə bɔ̂ŋ nyíɛ ɔŋ, bɔ̂ŋ chìi bə kínə nubə ndə bʉəntəŋNyii kə shyíi bɔŋ te nə mbʉ vaa-maa-ɔ̄ŋ. 18Bʉə bənchəŋ ndə bɔ̂ŋ kə yʉ́ nubə-ɔ̄ŋ, i nɔ kə chíe chu-yʉə, te nə nubə ndə mbʉ bənchyii binjyʉʉhə kə shyíi bɔŋ. 19Bɔŋ Mɛli mɔ̀ʼ nubə-ɔ̄ŋ inchəŋ mu fyii-ɔ kə́ tíetə. 20Mbʉ bənchyii binjyʉʉhə bʉ̀nə gɛ̀, kə́ kɔ́ kuŋhə bɔŋleʼ kə́ lə̀ʼtə Nyii ndəŋ nubə ndə bɔ̂ŋ kə yʉ́ bɔŋleʼ nyíɛ, kɛŋ haʼ ndə mbʉ bʉəntəŋNyii kə shyíi bɔŋ.
Bə gɛ̀ nə Jiso mu njaafɛ̀ʼndɛŋNyii
21Wyuu kʉ̂ʉ kə̀ŋ, ndʉʉ kʉ̀ʼnə ndə bə kie ndə məfɔ̀ʼ ɔ, bə tyú yie-e nə Jiso, kə́ bɛ yie ndə wontəŋNyii kə tyú bə buŋ gʉ̀ʼ ɔ.
22-23I kʉ̂ʉ tíŋ nə chi, Mɛli ghɔŋ Jɔsɛ lʉ̀ ɔ gɛ̀ nə nɔŋ Jɛlosalɛŋ ndə məgɛ̀ dʉ̀ʼ ɔ mu njaafɛ̀ʼndɛŋNyii, haʼ ndə nuʼ-Tiekətʉ ghɔ̀ŋ mbɔ, “Fəŋ vaabələŋ təmiyɔŋ ndə ɔ bɛ nchoʼkətʉ, bu bɛ tʉ Tiekətʉ.” Ndʉʉ bɔŋleʼ kʉ̀ʼnə ghɔ tʉ bɔŋ ndə məsʉ̀ ŋwɔŋ-yʉə, gháaNyii haʼ ndə nuʼ-Mushi ghɔŋ. 24Bɔ̂ŋ bɔŋleʼ bɛ ndə məfɛ̀ʼndɛŋ haʼ ndə nuʼ-Tiekətʉ ghɔ̀ŋ, kɔ́ “vâabəŋgwɔŋ-tambʉətə ibûu, byuunɔ byuunətə ibûu.”
Simiɔŋ kɔ́ ndɔ Nyii ndə mbʉ vaa, Jiso
25Nɔ nə bɛ ndʉʉ-ghɔ̄ Jɛlosalɛŋ, wobɛʼ kə́ bɛ chɔ bə kə́ tíi ɔ nə Simiɔŋ kə́ bɛ wo ndə ɔ bɛ ndyʉndyʉ bɔŋ-nɔʼ-leʼ kɔ́ ŋwɔŋ-ɛŋ tʉ Nyii. Ɔ kə́ chyìi ndə mənyíɛ ndə Nyii bu yá fyii bʉə-Isilɛ ndə məfyúhə bɔŋ mu ŋgʉəʼ. Ɔ nɔ kə bɛ wo ndə LyʉʉhəNyiikə kə bɛ mu mbʉə-ɔ. 26Mbʉ kəLyʉʉhəNyii nɔʼ kə kɛ̀ʼ tʉ ɔŋ mbɔ ɔ la bu nyíɛ mbʉ Wo ndə Tiekətʉ Kùŋ Tə́ŋ, buŋ kwú. 27LyʉʉhəNyiikə chóʼ ɔ, ɔ lɔ̀ gɛ̀ mu chunjaafɛ̀ʼndɛŋNyii ndʉʉ ndə bətie-Jiso gwè nə nɔŋ ndə məgwè chìi nubə ndəŋ ɔŋ ndə nuʼ dʉ̀ʼ. 28Simiɔŋ bɛ̀ʼ ɔ kəghɔ-ɔ, kə́ lə̀ʼtə Nyii, ghɔ̀ŋ mbɔ,
29“Tiekətʉ, a nɔʼ fɔ̀ʼ nukə ndə a kə kɔ̀ʼnə,
lʉ̀ fʉə-a nduɔ hə kəwʉʉnəmbi nə fyiighʉ́ənə,
30shʉ-ɔ nɔʼ nyíɛ wo ndə ɔ bu kwáa wʉʉnəmbikə,
31ndə a nɔʼ shʉ̀tə mbɔ bʉə bənchəŋ nyíɛ.
32Nɔ bɛ kɛʼɛ ndə mədʉ̀ʼ fia tʉ bʉə ndə bɔ̂ŋ gòʼ təmə bɛ bʉə-Isilɛ fɛ,
kə́ bɛ məgʉ́ə tʉ bʉə-ba Isilɛ!”
33Mbʉ tie-vaa ghɔŋ ŋkwê-i, i chíe chu-yʉə ndə nukə ndə ɔ gìe te mbʉ vaa. 34Simiɔŋ gháaNyii mbɔ ɔ̈ bìʼ bɔŋ, leʼ ghɔ̀ŋ tʉ Mɛli ŋkwê-i mbɔ, “Vaa-ɔ̄ŋ, Nyii nɔʼ séʼ ɔ, bʉʼka ɔ, bʉə-Isilɛ buŋmbi bu gwù fɛʼɛ, bəbɛʼbə yú. Ɔ bɔŋ bu bɛ cheʼkə ndə bə bu kə́ dʉ̀ʉhə. 35Nyii bu chìi yɔ̄ŋ-yə mbɔ i kɛ̀ʼ nubə ndə i bɛ mu fyii-bʉə-hə, bɔŋ ndə məbìʼ chɔ bə bu chʉ̀ə fyii-a mɔ̀ʼ muŋgɔ.”
Ana núhə nubə ndə Nyii dʉ̀ʼ tʉ ɔŋ
36Vɛʼ-ghɔ̄, wokebɛʼ nɔ kə bɛ ghɔ ndə yie-e kə bɛ Ana kə́ bɛ yʉkəŋgieNyii bɔŋ-kə́-leʼ bɛ vaa-Fanuɛl, lɔ̀ hə kəlɔŋ-Asha. Tʉ Ana nɔʼ kɛŋ shʉ̀tə dùɔŋ, ɔ nɔ kə kie ləŋ-ɛŋ, ghɔŋ ɔŋ chí ŋgʉʼhə təkwiitia, ɔ kwú. 37Ɔ nɔ nə bɛ ŋgʉʼhə njuɔ kwi nə wuŋ fɔŋ, gòʼ mu njaafɛ̀ʼndɛŋNyii ŋgɔŋŋgɔŋ, kə́ fɔ̀ʼ tʉ Nyii ndʉʉnəchî ghɔŋbə ndʉʉbətyuʼ, kə́ gháaNyii, tə kə́ leʼ jì muu. 38Haʼ ndʉʉmɛ, ɔ kwɛ̀ʼtə gwè mbʉə bɔŋ kə́ kɔ́ ndɔ ghɔ tʉ Nyii, bɔŋleʼ kwə́ʼ te mbʉ vaa tʉ bʉə bənchəŋ ndə bɔ̂ŋ kə́ lɛ́nə fia mbɔ Nyii chʉ̀ʼ tʉ-bʉə-Jɛlosalɛŋ-kə.
39Ndʉʉ ndə Mɛli ghɔŋ Jɔsɛ lìʼ nubə ndə nuʼ-Tiekətʉ ghɔ̀ŋ, bɔ̂ŋ bʉ̀nə gɛ̀ lɔʼɔbə-ɔŋ Nasalɛ mu Galili. 40Mbʉ vaa kə́ kʉ̀ʼ shʉ́ətə, kie mukətʉ súunə yɔ́ŋyɔ́ŋ, buuŋ-Nyii bʉ̀ʉ ndəŋ ɔŋ.
Vɛʼ ndə Jiso kə bɛ vaambuɔ, ɔ kə́ kwə́ʼ ghɔŋbə bʉə dàhə nuʼ-Mushi mu njaafɛ̀ʼndɛŋNyii
41Ŋgʉʼʉ tə mì ŋgʉʼʉ, bətie-bi gɛ̀ ndə nchəŋtə Yíɛʼsii Jɛlosalɛŋ. 42Jiso kʉ̂ʉ dàa ŋgʉʼhə njuɔ bûu nə wuŋ, bɔ̂ŋ kóʼ gɛ̀ ndə mbʉ nchəŋtə ndəŋ nuʼ. 43Bə kʉ̂ʉ yú mbʉ nchəŋtə liʼ, bətie-bi kʉ̂ʉ kə́ bʉ̀nə chunjaa, Jiso shi káa Jɛlosalɛŋ, bɔŋ təmə bɔ̂ŋ kínə fɛ. 44Bɔ̂ŋ tòʼ ndəŋ chîmbi-ŋkwɔŋ-kə, kə́ kwɔ̀ʼtə mbɔ ɔ la bɛ haʼ mu bʉə-nuɔ-bɔŋ. Ndʉʉmɛ, bɔ̂ŋ chʉ́ʉhə məkʉ́ʉ ɔ mu bʉə-bʉə ghɔŋbə bətieŋkɔŋ-bʉə.
45Bɔ̂ŋ kʉ̂ʉ kʉ́ʉ ɔ kəŋkaa, bʉ̀nə gɛ̀ Jɛlosalɛŋ ndə məlɛ́nə ɔŋ. 46Tə kʉ̂ʉ bɛ chîbə itia, bɔ̂ŋ nyíɛ ɔŋ mu chunjaafɛ̀ʼndɛŋNyii, ɔ kə́ dùʼ mu bəchicha kə́ yíe nubə ndə bɔ̂ŋ tʉʼ gìe, bɔŋ-kə́-leʼ bíʼtə nubə tʉ bɔŋ. 47Wotəmiyɔŋ ndə ɔ̈ yʉ́ ɔ, i chàa ɔ ndə ntɛ ndə ɔ tʉʼ bə̀ŋhə nubə nə ndaa.
48Bətie-bi kʉ̂ʉ nyíɛ ɔŋ, i chàa bɔŋ. Ŋkwê-i ghɔ̀ŋ tʉ ɔŋ mbɔ, “Ŋaʼ, a yì ka nə baʼa nɔ? Baʼa tie-a nɔʼ kʉ́ʉ a ŋgwɔŋgwɔhə kəŋkaa.”
49Ɔ bíʼtə tʉ bɔŋ mbɔ, “Bii kə́ kʉ́ʉ mɔ mbuka? Bii kínə mbɔ mɔ kie ndə məfɔ̀ʼ fɔʼɔ-Tie-ɔ fe?” 50Bɔŋ təmə bɔ̂ŋ kínə nukə ndə ɔ tʉʼ gìe tʉ bɔŋ fɛ.
51Ndʉʉmɛ, ɔ shíʼ gɛ̀ ghɔŋ bɔŋ Nasalɛ, gɛ̀ kə́ yʉ́ chu-yʉə. Mbʉ ŋkwê-i mɔ̀ʼ nubə-ɔ̄ŋ mu fyii-ɔ kə́ bíehə tíetə. 52Jiso kə́ kóʼ nə mukətʉ-súunə ghɔŋbə mbʉə-e. Buuŋ-Nyii bʉ̀ʉ ndə ɔŋ, bʉə bənchəŋ kʉ̀ʉ ɔ.
ទើបបានជ្រើសរើសហើយ៖
Luk 2: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
