Jɔŋ 18
18
Bə fɛ̀ŋ Jiso bɔŋleʼ yá ɔ
(Matia 26:47-56; Mak 14:43-50; Luk 22:47-53)
1Ndʉʉ ndə Jiso nɔʼ kə gìe ŋgiebə-ɔ̄ŋ liʼ, ɔ lɔ̀ ghɔŋbə vâafɔʼɔ-bi gɛ̀ dàa ghuu ndə bə tíi nə Kidilɔŋ, gɛ̀ kəyəŋ ndə mutɔbɛʼ kə bɛ chɔ, ndə ghɔŋbə vâafɔʼɔ-bi ŋíi muŋgɔ. 2Juda ndə ɔ kə fɛ̀ŋ ɔŋ nɔ nə kínə mbʉ mutɔ, bʉʼka Jiso nɔ nə kə́ chʉʼ fə́nə chɔ ghɔŋbə vâafɔʼɔ-bi. 3Ndʉʉmɛ, Juda lʉ̀ nuɔ bəsɔge, leʼnə bʉə chyìi njaafɛ̀ʼndɛŋNyii ndə tə́ŋ bətiefɛ̀ʼndɛŋNyii ghɔŋbə bʉə-Falasi tə́ŋ bɔŋ, ghɔŋ bɔŋ gɛ̀ chɔ yá fɔ-kyʉ̀hə-kənduu-bə ghɔŋbə kɛʼtə leʼnə fɔ-chɔ̂-bə kəghɔ-bɔŋ. 4Jiso kə́ kínə nchəŋnchəŋ bənu ndə i bu fyú tʉ ɔŋ, fyú gwè bíʼtə tʉ bɔŋ mbɔ, “Bii tʉʼ kʉ́ʉ nda?” 5Bɔ̂ŋ bə̀ŋhə tʉ ɔŋ mbɔ, “Jiso ndə ɔ lɔ̀ hə Nasalɛ.” Jiso ghɔ̀ŋ tʉ bɔŋ mbɔ, “Mɔ nɔ bɛ ɔ.” Juda ndə ɔ kə fɛ̀ŋ ɔŋ nɔ nə tə́nə chɔ ghɔŋ bɔŋ. 6Ndʉʉ ndə Jiso kə ghɔ̀ŋ tʉ bɔŋ mbɔ, “Mɔ nɔ bɛ ɔ,” bɔ̂ŋ shùʼtə gɛ̀ bɔ̌ŋbɔ̌ŋ gwùtə sê. 7Ndʉʉmɛ, ɔ bìʼ bíʼtə tʉ bɔŋ mbɔ, “Bii tʉʼ kʉ́ʉ nda la?” Bɔ̂ŋ ghɔ̀ŋ mbɔ, “Jiso ndə ɔ lɔ̀ hə Nasalɛ.” 8Jiso bə̀ŋhə mbɔ, “Mɔ nɔʼ shyíi bii mbɔ mɔ la bɛ ɔ. Nɔ, kaʼ bii kə́ kʉ́ʉ mɔ, b̈ii mɛ̀ʼtə bʉə-bɔ̄ŋ bɔ̂ŋ gɛ̀.” 9Yɔ̄ŋ-yə nɔ bɛ ndə məchìi ŋgiekə ndə ɔ nɔʼ kə gìe fyú shʉəŋ, ndə ɔ kə ghɔ̀ŋ mbɔ, “Ndə bʉə ndə a kə kɔ́ tʉ mɔ, mɔ chʉʼ bɛ́ mbyu imɔʼ fɛ.”
10Ndʉʉmɛ, Samu Bita kə́ kie setəkə, sʉ̀ʉ gwìa tyunə-fʉə-tiefɛ̀ʼndɛŋkwɛʼtəŋNyii-kə hə kwiimɔʼnə nə yɔŋ chʉ̀ə. Yie mbʉ fʉə-ghɔ̄ nɔ bɛ Malaku. 11Ndʉʉmɛ, Jiso ghɔ̀ŋ tʉ Bita mbɔ, “Sʉ́ʉhə setəkə-a mu ŋkwo-e, mɔ kʉʉ nú hə mu ndʉ̂ʉ ŋgʉəʼ ndə mbʉ Tie nɔʼ kɔ́ tʉ mɔ fe?”
Jiso mu njaa-tiefɛ̀ʼndɛŋkwɛʼtəŋNyii
12Ndʉʉmɛ, mbʉ nuɔ bəsɔge ghɔŋbə wokwɛʼtəŋ-yʉə leʼnə bʉə chyìi njaafɛ̀ʼndɛŋNyii-bʉə-Juu, yá Jiso kɔ́ʼ ɔ. 13Bɔ̂ŋ fəŋ lʉ̀ ɔ gɛ̀ nə nɔŋ tʉ Anashi, bʉʼka ɔ nɔ nə bɛ tie-vi-Kaifa, ndə ɔ bɛ tiefɛ̀ʼndɛŋkwɛʼtəŋNyii ŋgʉʼʉ-ghɔ̄. 14Nɔ kə bɛ Kaifa ndə ɔ kə tʉ́ʼ bəntəŋbəshʉ-bʉə-Juu mbɔ i la bu bʉ̀ʉ mbɔ mbyu ẅo-imɔʼ kwú yie-bʉə bənchəŋ.
Bita tɛ́ŋ Jiso fəŋ
(Matia 26:69-70; Mak 14:66-68; Luk 22:55-57)
15Samu Bita ghɔŋ ibɛʼ-yə vaafɔ̀ʼ nɔ nə kə́ gɛ̀ hə bɔ̌ŋ Jiso. Bʉʼka tiefɛ̀ʼndɛŋkwɛʼtəŋNyii kə kínə mbʉ vaafɔ̀ʼ-ghɔ̄, mbʉ vaafɔ̀ʼ ŋíi ghɔŋ Jiso sêfu-tiefɛ̀ʼndɛŋkwɛʼtəŋNyii, 16bɔŋ Bita káa mbi chulɔŋ. Ndʉʉmɛ, mbʉ vaafɔ̀ʼ ndə tiefɛ̀ʼndɛŋkwɛʼtəŋNyii kə kínə ɔŋ le, fyú gɛ̀ mbi kwə́ʼ tʉ vaabəke ndə ɔ kə́ chyìi chulɔŋ-chunjaa-ghɔ̄, lʉ̀ Bita ŋíi nə nɔŋ. 17Mbʉ vaabəke ndə ɔ kə bɛ vaafɔ̀ʼ le ghɔ̀ŋ tʉ Bita mbɔ, “Yá mbəŋ kaa mbyu vaafɔ̀ʼ-wo-ɔ̄ ghɔ fɛ, mɛ?” Ɔ bə̀ŋhə mbɔ, “Mbee.”
18Fəʼə nɔ nə bɛ mbi, mbʉ vaafɔ̀ʼ ghɔŋbə bənchyii-njaafɛ̀ʼndɛŋNyii nɔʼ chìi viʼi nə nchʉʼkyʉʉbə, tə́nə mbʉə ghɔ kə́ yóʼ. Bita gɛ̀ tə́nə ghɔŋ bɔŋ mbʉə ghɔ kə́ yóʼ.
Tiefɛ̀ʼndɛŋkwɛʼtəŋNyii bíʼtə nubə tʉ Jiso
(Matia 26:59-66; Mak 14:55-64; Luk 22:66-71)
19Tiefɛ̀ʼndɛŋkwɛʼtəŋNyii bíʼtə nubə tʉ Jiso te vâafɔʼɔ-bi leʼnə nubə ndə ɔ kə́ dàhə. 20Jiso bə̀ŋhə tʉ ɔŋ mbɔ, “Mɔ nɔʼ kwə́ʼ tʉ bʉə bənchəŋ ntaa. M̃ɔ nɔ dàhə təvɛʼtəvɛʼ mu-njaagháaNyii-hə leʼnə njaafɛ̀ʼndɛŋNyii, kəyəŋ ndə bʉə-Juu bənchəŋ kə́ chə̀ŋtə chɔ. Mɔ chʉʼ nə gìe nukə bɔ̌ŋbɔ̌ŋ fɛ. 21Chìi ka a kə́ bíʼtə tʉ mɔ? Bíʼtə tʉ bʉə ndə bɔ̂ŋ nɔʼ kə yʉ́ mɔ, nə nukə ndə mɔ kə gìe tʉ bɔŋ, bɔ̂ŋ nɔ kínə nubə ndə mɔ nə kə gìe tʉ bɔŋ.”
22Ndʉʉ ndə ɔ kə gìe nubə-ɔ̄ŋ, ibɛʼ-yə mbyu wo mu bʉə chyìi njaafɛ̀ʼndɛŋNyii ndə ɔ kə tə́nə mbʉə-Jiso, gwúu ghɔkə shʉ-ɔ, bíʼtə tʉ ɔŋ mbɔ, “Bɛ ntɛ nɔ ndə a tʉʼ bə̀ŋhə tʉ tiefɛ̀ʼndɛŋkwɛʼtəŋNyii mɛ?”
23Jiso bə̀ŋhə tʉ ɔŋ mbɔ, “Kaʼ nubə ndə mɔ kə gìe gòʼ təmə bʉ̀ʉ fɛ, shyíi bʉə nə mbʉ kənu bʉəbʉə, bɔŋ kaʼ nukə ndə mɔ kə gìe kʉ̀ʼnə, a gwúu mɔ mbuka?”
24Anashi ndʉʉghɔfii, tə́ŋ ɔŋ, ɔ kə́ bíe nə ghyʉʉtə ndəŋ ɔŋ, kɔ́ tʉ Kaifa, tiefɛ̀ʼndɛŋkwɛʼtəŋNyii.
Bita tɛ́ŋ Jiso tə bìʼ tɛ́ŋ
(Matia 26:71-75; Mak 14:69-72; Luk 22:58-62)
25Ndʉʉmɛ, Samu Bita kə́ tə́nə yóʼ viʼi. Bɔ̂ŋ ghɔ̀ŋ tʉ ɔŋ mbɔ, “Yá mbəŋ ghɔ kaa mbyu vaafɔ̀ʼ-ɛ fɛ, kaa yɔŋ fe?” Ɔ bɛ́ŋ ghɔ̀ŋ mbɔ, “Ɔŋ, mɔ kaa mbyu vaafɔ̀ʼ-ɛ fɛ.” 26Mbyu vaafɔ̀ʼ mu vâafɔʼɔ-tiefɛ̀ʼndɛŋkwɛʼtəŋNyii ndə ɔ kə́ bɛ wo-kəlɔŋ wo ndə Bita kə gwìa tyunəkə-i chʉ̀ə le, bíʼtə mbɔ, “Mɔ kə nyíɛ aŋ mutɔ bii ɔ fe?” 27Bita bìʼ tɛ́ŋ, haʼ ndʉʉmɛ, ŋkʉəʼə tʉʉ.
Jiso kwɛ̀ fɛʼɛ-i bəshʉ Bale
(Matia 27:1-2,11-25; Mak 15:1-14; Luk 23:1-5,13-25)
28Kʉ̂ʉ bɛ ndʉʉsɛŋkə bətyuʼbətyuʼ, bɔ̂ŋ lʉ̀ Jiso hə mu njaa Kaifa gɛ̀ nə nɔŋ ntoʼ-gɔməna. Təmə bɔ̂ŋ sʉ́ʉ mbʉ mu ntoʼ-gɔməna fɛ, bʉʼka mə bʉ́əhə ŋwɔŋ-yʉə, təmə yi yú fɔ-Yíɛʼsii-bə fɛ. 29Ndʉʉmɛ, Bale fyú gɛ̀ mbi bíʼtə tʉ bɔŋ mbɔ, “Bɛ ka ndə bii kie ndə məgìe kətʉ wo-ɔ̄?”
30Bɔ̂ŋ bə̀ŋhə mbɔ, “Wo-ɔ̄ kʉ̌ʉ gòʼ təmə kə chìi bʉ̂ʼʉ fɛ, təmə baʼa mə gwè nə nɔŋ tʉ a fɛ.” 31Bale ghɔ̀ŋ tʉ bɔŋ mbɔ, “B̈ii lʉ̀ ɔ nə mbəŋ-yii, kwɛ̀ fɛʼɛ-ɛ nə yii-yə nuʼ.” Bəntəŋbəshʉ-bʉə-Juu bə̀ŋhə tʉ ɔŋ mbɔ, “Bə kə bɛ́ŋ mbɔ baʼa yí wo ndə ɔ nɔʼ gwù fɛʼɛ fɛ.” 32Yɔ̄ŋ-yə nɔ nə bɛ ndə məchìi nukə ndə Jiso nɔʼ kə gìe fyú shʉəŋ te ntɛ kwú ndə ɔ bu yi kwú.
33Bale bʉ̀nə bìʼ sʉ́ʉ mu njaa-ɔ tíi Jiso, bíʼtə tʉ ɔŋ mbɔ, “A bɛ mbʉ Fɔŋ-bʉə-Juu mɛ?”
34Jiso bə̀ŋhə mbɔ, “A tʉʼ gìe yɔ̄ŋ-yə nə ya-yə ŋkwɔʼtə mɛ, kə bəbɛʼbʉə nɔʼ kwə́ʼ tʉ a te mɔ?”
35Bale bə̀ŋhə mbɔ, “Mɔ bɛ wo-Juu mɛ? Nɔ chɔ̀ʼhə ya-yə bʉə-lɔʼɔ ghɔŋbə bətiefɛ̀ʼndɛŋNyii chɔ̀ʼhə a kɔ́ kəghɔ-mɔ. A nɔ̂ʼ chìi ka?” 36Jiso bə̀ŋhə mbɔ, “Yɔ̄ŋ-yə məsɔ́ʼ-Fɔŋ kaa ntɛ yi-kəwʉʉnəmbi-yə fɛ. Kaʼ məsɔ́ʼ-Fɔŋ-ɔŋ kʉ̌ʉ bɛ ntɛ yi-kəwʉʉnəmbi-yə təmə vâafɔʼɔ-bɔŋ tʉʼ gwúu byuʼu mbɔ mɔ mə gwù kəghɔ-bəntəŋbəshʉ bʉə-Juu fɛ. Bɔŋ sɔ́ʼ-ɔ kaa ntɛ yi-kəwʉʉnəmbi-yə fɛ.” 37Ndʉʉmɛ, Bale ghɔ̀ŋ tʉ ɔŋ mbɔ, “Lɛ bɛ mbɔ a bɛ Fɔŋ?” Jiso bə̀ŋhə mbɔ, “A nɔ ghɔ̀ŋ mbɔ mɔ la bɛ Fɔŋ. Bə nɔ kə bí mɔ, mɔ gwè kəwʉʉnəmbi mɔ̀ʼ luu-i mbɔ mɔ shyíi wʉʉnəmbikə nə shʉəŋ. Wotəmiyɔŋ ndə bɛ wo-shʉəŋ nɔ bu yʉ́ gyʉʉ-ɔ.”
38Bale bə̀ŋhə tʉ ɔŋ mbɔ, “Shʉəŋ bɛ ka?”
Ndʉʉ ndə ɔ nɔʼ kə gìe yɔ̄ŋ-yə liʼ, ɔ bʉ̀nə bìʼ gɛ̀ tʉ bʉə-Juu ghɔ̀ŋ tʉ bɔŋ mbɔ, “Mɔ nyíɛ fyùufyùu kəghɔ-ɔ fɛ. 39Bɔŋ bʉʼka nuʼ-yii ndə i dʉ̀ʼ mbɔ mɔ yaʼ fyúhə mbyu wo hə chaŋ ndʉʉ ndə bii tʉʼ yú Yíɛʼsii, bii kʉ̀ʉ mbɔ m̈ɔ fyúhə Fɔŋ-bʉə-Juu kɔ́ tʉ bii mɛ?” 40Bɔ̂ŋ bìʼ tíitə nə ghʉəʼkə mbɔ, “Kaa wo-ɔ̄ fɛ, fyúhə bə Balaba!” (Balaba nɔ nə bɛ lʉʼ shùɔ wo.)
ទើបបានជ្រើសរើសហើយ៖
Jɔŋ 18: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
