Jɔŋ 17
17
Jiso gháaNyii tʉ ŋwɔŋ-ɛŋ
1Ndʉʉ ndə Jiso nɔʼ kə kwə́ʼ ŋgiebə-ɔ̄ŋ liʼ, ɔ chɔ̀ʼhə shʉ-i lɛ́nə yuo ghɔ̀ŋ mbɔ, “Tie-ɔ, mbʉ ŋgwɔʼmbi nɔʼ kʉ̀ʼnə, kɔ́ məgʉ́ə tʉ Vaa-a, mbɔ Vaa-a chʉʼ kɔ́ məgʉ́ə tʉ a, 2haʼ ndə a nɔʼ kɔ́ ghʉəʼkə tʉ ɔŋ ndə məgìe hə kətʉ bʉə bənchəŋ, mbɔ ɔ chʉʼ kɔ́ məchímbi təmə liʼ-i ghɔ fɛ, tʉ bʉə ndə a nɔʼ kɔ́ tʉ ɔŋ. 3Nɔ bɛ mbʉ məchímbi təmə liʼ-i ghɔ fɛ nɔ, mbɔ b̈ɔ̂ŋ kínə aŋ, mbyu Nyii shʉəŋ imɔʼ, leʼnə Jiso Klai ndə a nɔʼ tə́ŋ ɔŋ. 4Mɔ nɔʼ kɔ́ kuŋhə tʉ a kəchisê ndə məmìʼtə fɔʼɔ ndə a kə kɔ́ tʉ mɔ mbɔ mɔ fɔ̀ʼ. 5Nduɔ, Tie-ɔ, lʉ̀ mɔ mu məgʉə-a ndə ntɛhə ndə baʼa nə kie wʉʉnəmbikə buŋ nə chʉ́ʉhə.
Jiso gháaNyii tʉ vâafɔʼɔ-bi
6 “Mɔ nɔʼ chìi bʉə ndə a kə kɔ́ tʉ mɔ mu kəwʉʉnəmbi, kínə yie-a. Bɔ̂ŋ nɔ nə bɛ bʉə-ba, a kɔ́ bɔŋ tʉ mɔ, bɔ̂ŋ bɔŋ-nɔʼ-leʼ tʉ́ʼ ŋgiekə-a. 7Nduɔ, bɔ̂ŋ nɔ kínə mbɔ fɔbə inchəŋ ndə a nɔʼ kə kɔ́ tʉ mɔ, nɔ lɔ̀ hə kəghɔ-a. 8Bʉʼka mɔ nɔʼ kɔ́ ŋgiebə tʉ bɔŋ ndə a nɔʼ kɔ́ tʉ mɔ, bɔ̂ŋ bɔŋ-nɔʼ-leʼ lʉ̀ mbʉ bəŋgie, nɔʼ kínə shʉəŋ nduɔ mbɔ mɔ la gwè hə kəghɔ-a bɔ̂ŋ bɔŋ-nɔʼ-leʼ bɛ́ŋ mbɔ la tə́ŋ aŋ tə́ŋ mɔ. 9Mɔ nɔ tʉʼ gháaNyii tʉ bɔŋ. Mɔ tʉʼ gháaNyii tʉ wʉʉnəmbikə fɛ, bɔŋ mɔ tʉʼ gháa bə haʼ tʉ bʉə ndə a nɔʼ chɔ̀ʼhə kɔ́ tʉ mɔ, bʉʼka bɔ̂ŋ nɔ bɛ bʉə-ba. 10Bʉə bənchəŋ ndə mɔ kie nɔ ya-yə, bʉə bənchəŋ ndə a kie kə́ bɛ yɔŋ-yə, mɔ bɔŋ-kə́-leʼ kie məgʉ́ə bʉʼka bɔŋ. 11Mɔ leʼbie kəwʉʉnəmbi fɛ, bɔ̂ŋ bɔŋ kə́ bɛ kəwʉʉnəmbi, mɔ bɔŋ-kə́-leʼ gwè tʉ a. Tie-ɔ ndə ɔ bɛ ŋkʉʉ, yá bʉə-ba tʉ́ʼ nə yie-a, yie ndə a nɔʼ kə kɔ́ tʉ mɔ, mbɔ b̈ɔŋ chʉʼ bɛ mbyu wo-imɔʼ, haʼ ndə baʼa bɛ mbyu wo-imɔʼ 12Ndʉʉ ndə baʼa bɔŋ kə bɛ mɔʼɔ, mɔ nɔ kə́ tʉ́ʼ bɔŋ nə yie-a, yie ndə a kə kɔ́ tʉ mɔ. Mɔ nɔ kə kə́ chyìi bɔŋ, təmə mbyu wofuu bɛ́ fɛ, yaʼkɛŋ wo ndə ɔ kə kie ndə məkwú bɛ́, mbɔ ŋgieNyiikə chʉʼ fyú shʉəŋ. 13Bɔŋ nduɔ mɔ nɔ tʉʼ gwè tʉ a, mɔ nɔʼ kə kwə́ʼ nubə-ɔ̄ŋ mu kəwʉʉnəmbi, mbɔ bɔ̂ŋ chʉʼ kie tʉʉjyu-ɔ mu bɔŋ ilə́ŋnə. 14Mɔ nɔʼ kɔ́ ŋgiekə-a tʉ bɔŋ, wʉʉnəmbikə bɔ̂ŋ bàa-bɔŋ bʉʼka mbɔ bɔ̂ŋ kaa tʉ wʉʉnəmbikə fɛ, haʼ ndə mɔ gòʼ təmə bɛ tʉ wʉʉnəmbikə fɛ. 15Mɔ tʉʼ gháa a mbɔ ä fyúhə bɔŋ mu kəwʉʉnəmbi fɛ, bɔŋ mɔ nɔ tʉʼ gháa a mbɔ ä kyʉ̀hə bɔŋ hə kəghɔ-Wo-Bʉəbʉə. 16Bɔ̂ŋ kaa tʉ wʉʉnəmbikə fɛ, haʼ ndə mbəŋ-ɔŋ bɛ tʉ wʉʉnəmbikə fɛ. 17Chìi bɔ̂ŋ kɔ́ ŋwɔŋ-yʉə tʉ a tíŋ hə ndəŋ shʉəŋ-aŋ. Ŋgiekə-a nɔ bɛ shʉəŋ. 18Haʼ ndə a kə tə́ŋ mɔ mu kəwʉʉnəmbi, mbəŋ-ɔŋ nɔʼ tə́ŋ bɔŋ mu kəwʉʉnəmbi. 19Mɔ nɔʼ kɔ́ ŋwɔŋ-ɔŋ tʉ a bʉʼka bɔŋ, kə mbɔ bɔ̂ŋ bu leʼ kɔ́ ŋwɔŋ-yʉə ndə ŋgie-shʉəŋ-kə.
Jiso gháaNyii tʉ bʉə ndə bɔ̂ŋ bu yi bɛ́ŋ ɔŋ
20 “Mɔ tʉʼ gháa a bə haʼ yie-vâafɔʼɔ-bɔ̄ŋ fɛ, bɔŋ mɔ nɔ tʉʼ leʼ gháa a yie-bəbɛʼbʉə ndə bɔ̂ŋ bu yi bɛ́ŋ mɔ tíŋ hə bɔ̌ŋ ŋgiekə-ʉə, 21mbɔ bɔ̂ŋ bənchəŋ chʉʼ bɛ fɔkə imɔʼ, haʼ ndə mbəŋ-aŋ, Tie, bɛ mu mbʉə-mɔ, mbəŋ-ɔŋ kə́ bɛ mu mbʉə-a, mbɔ bɔ̂ŋ ghɔ chʉʼ bɛ mu bâʼa, mbɔ wʉʉnəmbikə chʉʼ bɛ́ŋ mbɔ la tə́ŋ aŋ tə́ŋ mɔ. 22Məgʉ́ə ndə a nɔʼ kə kɔ́ tʉ mɔ, mɔ nɔʼ kɔ́ tʉ bɔŋ, mbɔ bɔ̂ŋ chʉʼ bɛ fɔkə imɔʼ haʼ ndə bâʼa bɛ fɔkə imɔʼ. 23Mbəŋ-ɔŋ bɛ mu bɔŋ, mbəŋ-aŋ bɛ mu mɔ, mbɔ bɔ̂ŋ chʉʼ kɛŋ bɛ nukə imɔʼ, wʉʉnəmbikə bɔŋleʼ chʉʼ kínə mbɔ a la kə tə́ŋ mɔ bɔŋleʼ kə kʉ̀ʉ bɔŋ haʼ ndə a kə kʉ̀ʉ mɔ. 24Tie-ɔ, mɔ nɔ kʉ̀ʉ mbɔ mbəŋ-yʉə ghɔ, ndə a nɔʼ kɔ́ bɔŋ tʉ mɔ, bɛ baʼa bɔŋ ndə yəŋkə ndə mɔ bɛ chɔ, ndə mənyíɛ məgʉ́ə ndə a nɔʼ kɔ́ tʉ mɔ, bʉʼka a nɔ nə kʉ̀ʉ mɔ wʉʉnəmbikə buŋ nə chʉ́ʉhə.
25 “Tie-ɔ ndə ɔ bɛ ndyʉndyʉ, wʉʉnəmbikə gòʼ təmə kínə aŋ fɛ nɔ, mɔ bɔŋ kínə aŋ, bʉə-bɔ̄ŋ bɔŋleʼ kínə mbɔ la kə tə́ŋ aŋ, tə́ŋ mɔ. 26Mɔ nɔʼ chìi bɔŋ kínə yie-a, bɔŋ-bu-leʼ bìʼ kə́ chìi bɔ̂ŋ kínə, mbɔ ntɛ ŋkʉ̂ʉ ndə a kʉ̀ʉ mɔ nə yɔŋ bu bɛ mu bɔŋ, mbəŋ-ɔŋ bɛ mu mbʉə-bɔŋ.”
ទើបបានជ្រើសរើសហើយ៖
Jɔŋ 17: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
