Fɔʼɔ 27
27
Bɔɔ té buukwɛʼtəŋkə gɛ̀ Luŋ
1Ndʉʉ ndə bə shʉ̀tə mbɔ b̈aʼa ŋíi mu kəbuukwɛʼtəŋ gɛ̀ Itali, bə chɔ̀ʼhə Bɔɔ ghɔŋbə bəbɛʼbʉə njaa-chaŋ kɔ́ mu kəghɔ-Juliɔ ndə ɔ bɛ wokwɛʼtəŋ-bəsɔge ghyʉʉ, kə́ fɔ̀ʼ ndə nuɔ-bəsɔge-Fɔŋ-Luŋ. 2Baʼa kóʼ mu buukwɛʼtəŋkə ndə i lɔ̀ hə Adalamituŋ ndə i kie ndə mətə́nə chʉʉ-kəbuukwɛʼtəŋ-tə ndə i bɛ ŋgwuu-muu-Esia, ndə baʼa kə kóʼ mu mbʉ kəbuukwɛʼtəŋ, baʼabə wobɛʼ ndə bə kə́ tíi ɔ nə Alistaku kə́ bɛ wo Masɛdonia ndə ɔ lɔ̀ hə Tɛsalonika, 3baʼa té buukwɛʼtəŋkə, mbi kʉ̂ʉ sɛŋ kə́ fíi, baʼa shùɔ Sidɔŋ. Juliɔ dʉ̀ʼ buuŋjyu tʉ Bɔɔ, mɛ̀ʼtə ɔŋ mbɔ ɔ̈ gɛ̀ nyíɛ bətieŋkɔŋ-bi bɔ̂ŋ chʉʼ kɔ́ fɔbə tʉ ɔŋ ndə ɔ tʉʼ byúu. 4Baʼa ŋíi mu muukwɛʼtəŋmə té gɛ̀ mbʉə kwɔŋ Siblɔ, kəyəŋ ndə fʉʉkə shʉ́ə chɔ fɛ, bʉʼka mbʉ kəfʉʉ nɔ kə́ bə̀ŋhə baʼa. 5Ndʉʉ ndə baʼa té tɔ̀ɔnə mbʉ muukwɛʼtəŋmə tíŋ ŋgwuu-muu-Silisia ghɔŋ Baŋfilia, baʼa gwè dàa Mila ndə i bɛ mu Lisia. 6Mbʉ wokwɛʼtəŋ-bəsɔge nyíɛ buukwɛʼtəŋkə ndə i lɔ̀ hə Alɛsaŋndia kə́ gɛ̀ Itali, ɔ sʉ́ʉhə baʼa muŋgɔ.
7Baʼa kə́ té buɔbuɔ tə i kə́ gɛ̀ chîbə, baʼa kɔ̀ɔtəkɔ̀ɔtə buŋ dàa Kinidu. Bʉʼka fʉʉkə kə́ mɛ̀ʼtə mbɔ b̈aʼa gɛ̀ nə shʉbə fɛ, baʼa bìa gɛ̀ hə mbʉə kwɔŋ Klit, kəyəŋ ndə fʉʉkə kə shʉ́ə chɔ fɛ, gɛ̀ tíŋ hə kəyəŋ ndə bə kə́ tíi nə Samɔni. 8Baʼa kɔ̀ɔtəkɔ̀ɔtə tíŋ hə ŋgwuu-muu chɔ, gɛ̀ dàa kəyəŋbɛʼ ndə bə shùɔ buukwɛʼtəŋkə chɔ təmə kə́ fàa fɛ. Bə kə́ tíi nə Chʉʉkəbuu Yùtə, ndə i kə́ŋhə mbʉə Lasia ndə bɛ yəŋkwɛʼtəŋkə. 9Bʉʼka ŋgwɔʼmbi nɔʼ kə gɛ̀, mbʉ fia bìʼ shʉ́ə daa, buŋ ndə nɔ mbʉ kəChî Jì Muukwɛʼtəŋ#27:9 Chîkə-ɔ̄ŋ nɔ nə kə́ bɛ mu ŋgʉʼʉmbibɛʼ nɔ, i gwù liʼ chi Bəŋchi byuunɔ ndə nchʉʉhə chi Kʉʼkəbyii ndʉʉ ndə mbi nɔʼ byʉ́ʼ ndə mətòʼ mu muu. nɔʼ kə tíŋ ghɔ, Bɔɔ mɔ̀ʼ tʉ̂ʼ tʉ bɔŋ, 10ghɔ̀ŋ mbɔ, “Bətie-bɔŋ, mɔ nɔ tʉʼ nyíɛ mbɔ toʼo-ɔ̄ nɔ bu kɔ́ ləŋtə tʉ bʉʼʉ ghɔŋbə bɛ́ yɔ́ŋyɔ́ŋ daa, kaa haʼ fɔbə ghɔŋbə mbʉ kəbuukwɛʼtəŋ ndə i bu bɛ́ fɛ, bɔŋ leʼnə məchimbi-yʉʼʉ ghɔ.” 11Bɔŋ mbʉ wokwɛʼtəŋ-bəsɔge yʉ́ chu-mbʉ-wo-té-kəbuukwɛʼtəŋ ghɔŋbə wo ndə ɔ kie mbʉ kəbuukwɛʼtəŋ, chàa nukə ndə Bɔɔ tʉʼ gìe tʉ ɔŋ. 12Bʉʼka mbʉ chʉʉ-kəbuukwɛʼtəŋ kə bɛ yʉʼ kəyəŋ ndə məbɛ chɔ mu shyʉʉ-fəʼə fɛ, bʉə buŋmbi lìʼ mbɔ b̈ə la gɛ̀ nə shʉbə, kə́ kwɔ̀ʼtə mbɔ bəkɔ bɔ̂ŋ kɔ̀ɔtə tə dàa Fɔni, kə́ bɛ chʉʉ-kəbuukwɛʼtəŋ ndə i bɛ Klit, bə̀ŋhə ntəŋntəŋ byûumbɔŋ ghɔŋ kwii ndə chichi sʉ́ʉ chɔ chusii-ɔ leʼnə ntəŋntəŋ byûukwe ghɔŋ kwii ndə chichi sʉ́ʉ chɔ mbɔ bɔ̂ŋ chʉʼ chí chɔ.
Fʉ̂əŋ mu muukwɛʼtəŋmə
13Ndʉʉ ndə fʉʉ-byûumbɔŋ-kə kə́ chʉ́ʉhə mətíŋ buɔbuɔ, bɔ̂ŋ kwɔ̀ʼtə mbɔ nukə ndə bɔ̂ŋ kə́ kwɔ̀ʼtə la bu kʉ̀ʼnə, bɔ̂ŋ chɔ̀ʼhə mbʉ kətəŋ ndə i yá buukwɛʼtəŋkə, kə́ té gɛ̀ mbʉə ŋgwuu-muu kəvia Klit. 14Kʉʉkə məniʼ fʉ̂əŋ shʉ́əshʉ́ə ŋɛ̀nə ntəŋntəŋ byûukwe ghɔŋbə kwii ndə chichi sɔ́ʼ chɔ, shíʼ gwè hə njəŋmbi. 15Ndʉʉ ndə i yá mbʉ kəbuukwɛʼtəŋ, təmə baʼa mə leʼ bə̀ŋhə mbʉ fʉ̂əŋ fɛ, baʼa ke ŋwɔŋ-yaʼ, i kə́ té baʼa gɛ̀ nə yɔŋ.
16Ndə baʼa tʉʼ tíŋ hə tiɛŋ vaaŋkoʼbɛʼ ndə i bɛ mu mbʉ muu ndə bə kə́ tíi nə Kuda, ndə fʉʉkə kə shʉ́ə chɔ fɛ, baʼa kɔ̀ɔtəkɔ̀ɔtə buŋ kɔ́ʼtə vaakəbuu#27:16 Vâabəbuu nɔ nə bɛ vâabəbuu tîetîe ndə bə kə kɔ́ʼ bɔ̌ŋ kəbuukwɛʼtəŋ byuunɔ bə bɛ̀ʼ mu kəbuu. Bə kə shíʼ hə mu kəbuukwɛʼtəŋ nɔ tíŋ muŋgɔ byuunɔ kóʼ muŋgɔ ndʉʉ ndə bə tʉʼ kʉ́ʉ chyúu buukə kəmbia. ndəŋ mbʉ kəbuukwɛʼtəŋ. 17Ndʉʉ ndə baʼa chɔ̀ʼhə mbʉ vaakəbuu kɔ́ ghɔʼ, baʼa kɔ́ʼtə tiɛŋ mbʉ kəbuukwɛʼtəŋ nə ghyʉʉtə. Ndʉʉmɛ, bʉʼka bɔ̂ŋ kə́ fàa mbɔ i la bu gɛ̀ kóʼ ndəŋ yʉʉ-kəsɛ Sɛti, bɔ̂ŋ shúʼhə təŋkə ndə ĩ yá buukwɛʼtəŋkə mɔ̀ʼ muu, mɛ̀ʼtə mbɔ m̈bʉ fʉ̂əŋ kə́ bɛ̀ʼ gɛ̀ nə yɔŋ.
18Bʉʼka mbʉ fʉ̂əŋ kə́ gháhə baʼa shʉ́əshʉ́ə kɔ́ bəviabəvia, mbi kʉ̂ʉ sɛŋ fíi, bɔ̂ŋ chʉ́ʉhə mətɛ́ʼtə bɛʼkə, mɛ̀ʼ mu muu. 19Kʉ̂ʉ bɛ ndə chîbə itia, bɔ̂ŋ chɔ̀ʼhə fɔ-fɔʼɔ-mbʉ-mu-kəbuukwɛʼtəŋ-bə yíɛʼhə, mɛ̀ʼ mu muu. 20Ndə baʼa kə bɛ mu kəbuu ndə chîbə təmə baʼa mə nyíɛ chichi fɛ təkɔmə bəlɔʼɔ, mbʉ fʉ̂əŋ bìʼ shʉ́ə, təmə baʼa leʼ kə́ kwɔ̀ʼtə mbɔ baʼa bieleʼ bìi fɛ.
21Bʉʼka i nɔʼ kə chí dɔ̀ŋnə təmə b̈ɔ̂ŋ yú fɔbə fɛ, Bɔɔ lɔ̀ tə́nə mu bɔŋ ghɔ̀ŋ mbɔ, “Bəliŋ-bɔŋ, bii kʉ̌ʉ kə yʉ́ chu-ɔ təmə bʉʼʉ kə lɔ̀ hə Klit fɛ, təmə bʉʼʉ leʼ nyíɛ buŋmbi ŋgʉəʼ-ɔ̄ leʼnə bɛ́-ɔ̄ fɛ. 22Nduɔ, mɔ nɔ tʉʼ fʉ̀ʉtə bii mbɔ b̈ii yá fyiihə-ii, bʉʼka mbyu nyu kətʉ wo mu bii bu bɛ́ fɛ yaʼkɛŋ mbʉ kəbuukwɛʼtəŋ, 23bʉʼka nɔ kə bɛ bətyuʼ-ɔ̄, wontəŋNyii ndə ɔ lɔ̀ hə bəshʉ-Nyii ndə mɔ bɛ yi-yə bɔŋ kə́ lə̀ʼtə ɔŋ, tə́nə bəshʉ mɔ, 24gìe tʉ mɔ mbɔ, ‘Bɔɔ, kə a mə leʼ fàa fɛ. A bu yaʼ tə́nə bəshʉ Fɔŋ-Luŋ, Nyii bɔŋ-nɔʼ-leʼ kɔ́ bʉə-bɔ̄ŋ bənchəŋ mu kəbuukwɛʼtəŋ-fɛ̄ŋ nɔ mu kəghɔ-a.’ 25Bəliŋ-bɔŋ, b̈ii yá fyiihə-ii bʉʼka mɔ nɔ mɔ̀ʼfyii-ɔ ndəŋ Nyii mbɔ nubə ndə ɔ gìe tʉ mɔ bu fyú shʉəŋ. 26Bɔŋ bʉʼʉ bu nyʉ́ʉ kóʼ ndəŋ yʉʉ-kəsɛ mbʉə kwɔŋ ndə i bɛ ntəŋntəŋ muu.”
Məkuunə-mbʉ-kəbuukwɛʼtəŋ
27Kʉ̂ʉ bɛ nə ndʉʉkwɔnəmbi mu chîbə njuɔ kwii nə wuŋ ndə fʉ̂əŋ kə́ gháhə baʼa mu muukwɛʼtəŋ-Adala-mə, bʉə ndə bɔ̂ŋ kə́ té mbʉ kəbuu kwɔ̀ʼtə mbɔ bɔ̂ŋ la nɔʼ kə́ŋhə kwɔŋlɔʼ. 28Ndʉʉmɛ, bɔ̂ŋ kɔ́ʼ ŋgoʼ nə ghyʉʉ, fʉ̀ʼ tyʉ mbʉ muu nə yɔŋ, nyíɛ mbɔ la bɛ bəghǔu wuŋ bûu. Kʉʉkə məniʼ, bɔ̂ŋ bìʼ mɔ̀ʼ mbʉ ghyʉʉ muu, nyíɛ mbɔ i la bɛ bəghǔu njuɔ taa nə wuŋ. 29Bɔ̂ŋ chʉ́ʉhə kə́ fàa mbɔ bɔ̂ŋ la bu kóʼ ndəŋ ŋgoʼ, ndʉʉghɔfii, bɔ̂ŋ shúʼhə təŋkwɛʼtəŋbə kwi bɔ̌ŋ mbʉ kəbuukwɛʼtəŋ, mɔ̀ʼ mu muu ndə məyá mbʉ kəbuu tʉ́ʼ, kə́ gháaNyii mbɔ mbi chʉʼ fíi. 30Ndə bʉə té mbʉ kəbuukwɛʼtəŋ kə́ kʉ́ʉ ndə mənyʉ́ʉ mɛ̀ʼ mbʉ kəbuu, bɔ̂ŋ fyúhə vaakəbuu mɔ̀ʼ mu muu, kə́ làhə shʉ mbɔ bɔ̂ŋ la tʉʼ kʉ́ʉ shúʼhə təŋkə mɔ̀ʼ ndə məyá mbʉ kəbuukwɛʼtəŋ bəshʉ chɔ tʉ́ʼ. 31Bɔɔ gìe tʉ mbʉ wokwɛʼtəŋ-bəsɔge mbɔ, “Kaʼ bʉə té kəbuu-bɔ̄ŋ gòʼ təmə káa mu buukwɛʼtəŋkə-ɔ̄ŋ fɛ, bii kwútə bənchəŋ.” 32Ndʉʉmɛ, mbʉ bəsɔge chʉ̀ə ghyʉʉ ndə i kə yá mbʉ vaakəbuu mɛ̀ʼtə i gɛ̀.
33Kʉ̂ʉ bɛ ndʉʉ fíi mbi, Bɔɔ fʉ̀ʉtə bɔŋ mbɔ b̈ɔ̂ŋ la yú fɔkə, kə́ ghɔ̀ŋ mbɔ, “Laa nɔ bɛ chîbə njuɔ kwi nə wuŋ təmə fɔkə nyíɛ chu-yii fɛ. 34Nduɔ, mɔ nɔ tʉʼ fʉ̀ʉtə bii mbɔ b̈ii yú fɔkə, bʉʼka i bu kɔ́ ghʉəʼkə tʉ bii, bɔŋ mbyu nyu kətʉ wo mu bii kʉʉ bɛ́ fɛ.” 35Ndʉʉ ndə ɔ gìe nubə-ɔ̄ŋ liʼ, ɔ lʉ̀ bele kɔ́ ndɔ chɔ tʉ Nyii bəshʉ bʉə bənchəŋ, bə́ʼtə chʉ́ʉhə ndə məkwó. 36Ndʉʉmɛ, tʉʉ-yʉə bʉ̀ʉ bənchəŋ, b̈ɔ̂ŋ yú fɔbə. 37Baʼa nɔ nə bɛ mu mbʉ kəbuukwɛʼtəŋ bənchəŋ, bʉə təghyʉʉ təbuu nə bʉə njuɔ ntʉʼʉ nə wuŋ təkwiitia. 38Ndʉʉ ndə bɔ̂ŋ nɔʼ yú tə yuo, bɔ̂ŋ chìi mbʉ kəbuu i yùhə ndə məfyúhə bəʼ-bəkwô-bəfɔyu-bə, mɛ̀ʼ muu.
39Kʉ̂ʉ bɛ ndʉʉsɛŋkə, bɔ̂ŋ nyíɛ kwɔŋlɔʼ təmə bɔŋ chèʼnə mbʉ kəyəŋ fɛ, bɔŋ bɔ̂ŋ kʉ̂ʉ nyíɛ ŋgəŋkə ndə ŋgwuu-i shíʼ sê, kə́ shʉ̀tə mbɔ kaʼ i yùhə bɔ̂ŋ kíahə mbʉ kəbuukwɛʼtəŋ gɛ̀ shùɔ chɔ. 40Ndʉʉmɛ, bɔ̂ŋ shúʼhə təŋkə ndə ĩ yá buukə tʉ́ʼ, mɔ̀ʼ muu. Haʼ ndʉʉmɛ, bɔ̂ŋ yɔ̀ʼ ghyʉʉtə ndə ĩ kɔ́ʼ fɔ-kíahə-mbʉ-kəbuukwɛʼtəŋ-kə. Bɔ̂ŋ leʼ chɔ̀ʼhə chʉəʼ-ndyi-kə ndə ĩ yá fʉʉkə kɔ́ ghɔʼ, fʉʉkə tʉ́ʉhə mbʉ kəbuu gɛ̀ shùɔ kəmbia. 41Mbʉ kəbuu gɛ̀ kwɔ̀ŋ ndəŋ yʉʉ-kəsɛ, shʉbə-i lɔ́ʼtə sê bɔŋ bʉʼka lɛɛŋhə-muu-shʉ́əshʉ́ə-kə ndə i kə́ kwɔ̀ŋ mbʉ kəbuu, bɔ̌ŋ-bi bə́ʼnə.
42Mbʉ bəsɔge kə́ shʉ̀tə ndə məyítə mbʉ bʉə-njaa-chaŋ bʉʼka wofuu məyíɛʼ muu nyʉ́ʉ gɛ̀ nə wi. 43Bɔŋ mbʉ wokwɛʼtəŋ-bəsɔge kə́ kʉ́ʉ ndə məkwáa Bɔɔ, ɔ byùutə bɔ̂ŋ ndəŋ nukə ndə bɔ̂ŋ kə kwɔ̀ʼtə. Ɔ kàhə wotəmiyɔŋ ndə bəkɔ ɔ yíɛ́ʼ muu ndə mə-fəŋ-sɛ́ʼ fyú yíɛ́ʼ kóʼ mbi. 44Bəʼkə lʉ́ʉ ndəŋ bəblaŋ byuunɔ ndəŋ via-mbʉ-kəbuukwɛʼtəŋ-bə. Nɔ bɛ nɔ ndə bɔ̂ŋ bənchəŋ kə kɔ̀ɔtə buŋ kóʼ njəŋmbi.
ទើបបានជ្រើសរើសហើយ៖
Fɔʼɔ 27: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
