Fɔʼɔ 26
26
Bɔɔ túu chu-i bəshʉ Fɔŋ Agliba
1Ndʉʉmɛ, Agliba ghɔ̀ŋ tʉ Bɔɔ mbɔ, “Bəkɔ a kwə́ʼ nə mbəŋ-aŋ.” Ndʉʉmɛ, Bɔɔ mɔ̀ʼ ghɔkə-i túu chu-i ghɔ̀ŋ mbɔ, 2“Tʉʉ-ɔ nɔ bʉ̀ʉ ndə mɔ tə́nə bəshʉ a, Fɔŋ Agliba, mɔ nɔ bu túu chu-ɔ laa tʉ a te nubə inchəŋ ndə bəntəŋbəshʉ-bʉə-Juu tʉʼ gìe kətʉ-mɔ. 3Bʉʼka mɔ nɔ kínə mbɔ a nɔ kínə jyujyu te mbʉ nuʼ-bʉə-Juu inchəŋ leʼnə bəŋʉʉ ndə bʉə-Juu kie. Nɔʼ m̈ɔ tíŋ hə bɔ̌ŋ ghɔ, fʉ̀ʉtə a mbɔ ä yá fyii-a yʉ́ kwəʼ-ɔ.
4“Ŋkoʼnə sê-ɔ lʉ̀ hə vaambuɔ, ndə mɔ chʉ́ʉhə nə yɔŋ mu lɔʼɔ-baʼa tə gɛ̀ dàa mu Jɛlosalɛŋ, bəntəŋbəshʉ-bʉə-Juu bənchəŋ nɔ kínə. 5Bɔ̂ŋ nɔʼ kə kínə mɔ lʉ̀ hə mbibɛʼ, kaʼ bɔ̂ŋ kʉ̀ʉ, bəkɔ bɔ̂ŋ fʉ̀ʼtə mbɔ, ndə nuɔ-bʉə ndə bɔ̂ŋ tʉ́ʼ nuʼ-Nyii jyujyu, mɔ nɔ bɛ nuɔ-ghɔ̄, kə́ bɛ bʉə-Falasi. 6Nduɔ, mɔ nɔ tə́nə fɛ̄ŋ kə́ túu chu-ɔ bʉʼka mɔ nɔ yʉ́əʼnə ndəŋ nukə ndə Nyii kə kɔ̀ʼnə tʉ bətie-baʼa, 7ndə lɔŋ-lɔʼɔ-bə-aʼ njuɔ bûu nə wuŋ kə́ gháaNyii ndʉʉnəchî ghɔŋbə ndʉʉbətyuʼ, kə́ yʉ́əʼnə ndəŋ ɔŋ ndə mə-nə-sɛŋ nyíɛ ndə i bu fyú shʉəŋ. Bʉə-Juu nɔ tʉʼ yá nubə-ɔ̄ŋ kətʉ-mɔ nɔ bʉʼka ndə mɔ yʉ́əʼnə ndəŋ nubə-ɔ̄ŋ, Oo Fɔŋ! 8Chìi ka təmə wo mu bii mə bɛ́ŋ mu fyii-ɔ mbɔ bəkɔ Nyii bʉ̀nə kóʼhə wo ndə ɔ nɔʼ kwú fɛ?
9“Mbəŋ-ɔŋ, nə mbəŋ-ɔŋ nɔ nə kwɔ̀ʼtə mbɔ mɔ kə kie ndə məfyúhə ghʉəʼkə-ɔŋ ndə məbyùutə yie-Jiso ndə ɔ lɔ̀ hə Nasalɛ. 10Mɔ nɔ nə fɔ̀ʼ nɔ mu Jɛlosalɛŋ. Kaa haʼ mbɔ mɔ kə fʉ̀əŋ bʉə-Nyii ndʉʉ ndə mɔ kə fí ŋwɔʼnə hə kəghɔ-bətiefɛ̀ʼndɛŋNyii fɛ, bɔŋ ndʉʉ ndə bə kə́ yítə bɔŋ, ghɔkə-ɔŋ nɔ kə bɛ chɔ. 11Mɔ kə́ kɔ́ ŋgʉəʼ tʉ bɔŋ təvɛʼtəvɛʼ mu-njaagháaNyii-hə inchəŋ bɔŋleʼ kə́ kɔ̀ɔtə ndə məchìi bɔ̂ŋ bʉ́əhə yie Nyii. Mɔ nɔ kə kie tʉʉbʉə tʉ bɔŋ daa, chɔ́ŋhə bɔŋ tə buŋ gɛ̀ hə bɔ̌ŋ bɔŋ mu yəŋkwɛʼtəŋ-bədɔŋ-bə.
12“Nɔ luu-i nɔ ndə mɔ kə fyú fia Damasiko, mɔ nɔʼ kə fí hə ghʉəʼkə kəghɔ-bətiefɛ̀ʼndɛŋNyii, bɔ̂ŋ kɔ́ fia mbɔ m̈ɔ gɛ̀. 13Kʉ̂ʉ bɛ ndʉʉbeʼ, Oo Fɔŋ, mɔ nyíɛ kɛʼɛ sêfia ndə i báa hə yuo, báa chàa chichi, ndə i báa yə̀ŋhə mɔ baʼabə bʉə ndə baʼa bɔŋ kə́ tòʼ mɔʼɔ. 14Ndʉʉ ndə baʼa bənchəŋ gwùtə sê, mɔ yʉ́ gyʉʉ ndə i gìe tʉ mɔ kəŋgie Hibulu mbɔ, ‘Sɔɔ, Sɔɔ, a tʉʼ chɔ́ŋhə mɔ mbuka? A mə sʉ́ʉhə ghɔkə-a mu viʼi fɛ.’ #26:14 Jiso nɔ nə ghɔ̀ŋ yɔ̄ŋ-yə tʉ Bɔɔ mbɔ kaʼ ɔ tɛ́ŋ nu-fefe-kə ndə ɔ tʉʼ gwè nə yɔŋ təmə i bu lə́ŋhə bə mbəŋ-ɛŋ, Bɔɔ.
15“Mɔ bíʼtə mbɔ, ‘A buŋ bɛ nda lɔɔŋ, Tiekətʉ?’
“Mbʉ Tiekətʉ bə̀ŋhə mbɔ, ‘Mɔ nɔ bɛ Jiso ndə a tʉʼ chɔ́ŋhə ɔŋ. 16Lɔ̀ hə sê tə́nə təfʉəŋ-aŋ bʉʼka mɔ nɔ kɛ̀ʼ ŋwɔŋ-ɔŋ tʉ a mbɔ mɔ chʉʼ dùʼhə a ndəŋ vaantie-ɔ leʼnə wo ndə ɔ bu nú gwù bənu ndə a nɔʼ nyíɛ kəghɔ-mɔ leʼnə bibə ndə mɔ bíe ndə məkɛ̀ʼ tʉ a. 17Mɔ bu shyùu a fí hə kəghɔ-bʉə-ba ghɔŋbə bʉə ndə gòʼ təmə bɛ bʉə-Juu fɛ, ndə mɔ bu tə́ŋ aŋ tʉ bɔŋ. 18A bu ŋɔ́ʼhə shʉtə-ʉə, mbɔ bɔ̂ŋ chʉʼ shìe liɛŋtə-ʉə hə ndə njəŋkə gwè ndə mbi súunə, hə ndə ghʉəʼ-Sata-kə gwè tʉ Nyii, bə chʉʼ sʉ̀fyii hə ndəŋ bʉ̂ʼtə-ʉə, bɔŋleʼ kie yəŋkə mu bʉə ndə bə nɔʼ sʉ̀ bɔ̂ŋ bʉʼka bɔ̂ŋ mɔ̀ʼfyiihə-ʉə ndəŋ mɔ.’
19“Ndə nɔ, Oo Fɔŋ Agliba, mɔ kə kwɛ̀ŋhəkwɛ̀ŋhə ndə nukə ndə mɔ nyíɛ bəshʉ-Nyii fɛ. 20Mɔ fəŋ lɔ̀ʼ mbʉ ntəŋ tʉ bʉə-Damasiko, leʼnə bʉə-Jɛlosalɛŋ ghɔŋbə bʉə bənchəŋ ndə bɔ̂ŋ bɛ mu bie Judia leʼnə bʉə ndə bɔ̂ŋ gòʼ təmə bɛ bʉə-Juu ghɔ fɛ, mbɔ bɔ̂ŋ la shìe liɛŋtə-ʉə hə ndəŋ bʉ̂ʼʉ, bʉ̀nə gwè tʉ Nyii, kə́ fɔ̀ʼ nubə ndə i dʉ̀ʼ mbɔ bɔ̂ŋ nɔʼ shìe liɛŋtə-ʉə hə ndə bʉ̂ʼʉ. 21Nɔ nukə nɔ ndə i chìi bʉə-Juu yá mɔ mu chunjaafɛ̀ʼndɛŋNyii, kə́ kʉ́ʉ yí mɔ. 22Tə gwè dàa laa-ɔ̄ nɔ, nɔ tʉʼ kwáa Nyii kwáa mɔ, mɔ kə́ tə́nə fɛ̄ŋ kə́ fʉ̀ʼtə tʉ vâa-fɔŋ ghɔŋbə vâaŋgwehə təmə kə́ gìe nu-kədɔŋ-kə fɛ, yaʼkɛŋ nukə ndə bʉəyʉkəŋgieNyii ghɔŋbə Mushi kə ghɔ̀ŋ mbɔ i bu nə gwè, 23mbɔ mbʉ Wo ndə Nyii Kùŋ Tə́ŋ bu yaʼ nyíɛ ŋgʉəʼ bɔŋ bʉʼka ɔ leʼ bɛ fəŋ wo ndə ɔ bʉ̀nə kóʼ hə ndəŋ kwu, ɔ bu lɔ̀ʼ ntəŋ te kɛʼɛ tʉ bʉə-baʼa ghɔŋbə bʉə ndə bɔ̂ŋ gòʼ təmə bɛ bʉə-Juu fɛ.”
24Ndə ɔ kə́ túu chu-i gìe nubə-ɔ̄ŋ, Fɛsto tíi nə ghʉəʼkə ghɔ̀ŋ mbɔ, “Bɔɔ, a nɔʼ bɛ́ ndaa-a, ŋwɔʼnə yɔ́ŋyɔ́ŋ nɔʼ lʉ̀ ndaahə-a gɛ̀ nə yɔŋ.”
25Bɔŋ Bɔɔ ghɔ̀ŋ mbɔ, “Mɔ chʉʼ bɛ́ ndaahə-ɔŋ fɛ, tie-ɔ Fɛsto, mɔ nɔ tʉʼ kwə́ʼ shʉəŋ-ɔŋ nə mukətʉ súunə. 26Nɔ bɛ bʉʼka mbʉ Fɔŋ nɔ kínə nubə-ɔ̄ŋ ndə mɔ tə́nə bəshʉ ɔ kə́ kwə́ʼ nə fyii shʉ́əshʉ́ə nɔ. Bʉʼka mɔ nɔ kínə jyujyu mbɔ mbyu kənu-ɔ̄ŋ bɛ ghɔ ndə ɔ gòʼ təmə kínə fɛ, bʉʼka mɔ kə chìi nubə-ɔ̄ŋ mu bəliinə fɛ. 27Fɔŋ Agliba, a bɛ́ŋ nukə ndə bʉəyʉkəŋgieNyii kə ghɔ̀ŋ mɛ? Mɔ nɔ kínə mbɔ a nɔ bɛ́ŋ.”
28Ndʉʉmɛ, Agliba bə̀ŋhə tʉ Bɔɔ mbɔ, “Haʼ ndə vaa kəkʉʉ mbi-ɔ̄, a bu lóʼtə mɔ, mɔ bə̀ŋ Kʉlʉtɛŋ mɛ?”
29Bɔɔ bə̀ŋhə mbɔ, “Kə bɛ haʼ nduɔ, kə bɛ yɔŋbɛʼ, mɔ nɔ tʉʼ gháaNyii mbɔ mə bɛ haʼ mbəŋ-aŋ fɛ, bɔŋ mbɔ bʉə bənchəŋ ndə bɔ̂ŋ tʉʼ yʉ́ mɔ, b̈ɔ̂ŋ bɛ haʼ ndə mɔ, tə shi káa haʼ bəchaŋ-bɔ̄ŋ ndə bə fʉ̀əŋ mɔ nə yɔŋ nɔ.”
30Ndʉʉmɛ, mbʉ Fɔŋ dyìnə kəyetə, ghɔŋbə mbʉ gɔməna ghɔŋ Bɛni leʼnə bʉə ndə ghɔŋ bɔŋ kə dùʼ mɔʼɔ. 31Ndʉʉ ndə bɔ̂ŋ kə fí ŋwɔŋ-yʉə bɔ̌ŋ, bɔ̂ŋ kə́ kwə́ʼ tʉ mbəŋtə-ʉə mbɔ, “Wo-ɔ̄ chʉʼ chìi nukə ndə bəkɔ bə yí ɔ chɔ byuunɔ fʉ̀əŋ ɔŋ chaŋ bʉʼka yɔŋ-yə fɛ.” 32Ndʉʉmɛ, Agliba gìe tʉ Fɛsto mbɔ, “Bə nɔ kə kə́ kʉ̌ʉ nɔʼ kə yɔ̀ʼ ghɔkə ndəŋ wo-ɔ̄, kaʼ ɔ kʉ̌ʉ gòʼ təmə nɔʼ kə fʉ̀ʉtə mbɔ b̈ə lʉ̀ fɛʼɛ-ɛ tʉ Fɔŋ-Luŋ fɛ.”
ទើបបានជ្រើសរើសហើយ៖
Fɔʼɔ 26: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
