Fɔʼɔ 2
2
LyʉʉhəNyiikə gwè
1Chibɛʼkə ndə bə kə́ tíi nə Bɛŋntaku#2:1 Chîkə-ɔ̄ŋ nɔ nə bɛ chîbə wuŋ taa lʉ̀ hə ndə be kə yú chî-Yíɛʼsii-kə. kʉ̂ʉ kʉ̀ʼnə, vâafɔʼɔ-Jiso chə̀ŋtə kəyəŋ kəmɔʼ. 2Kə kwɔnə nyíɛ, yəŋbə kə́ dùŋ gwè hə yuo nə fʉ̂əŋ, gwè lə́ŋhə mbʉ mu njaa-ghɔ̄ ndə bɔ̂ŋ kə dùʼtə chɔ le. 3Bɔ̂ŋ nyíɛ fɔbɛʼkə ndə i bɛ nə lɛɛŋhə-viʼi-bə, i gyʉ̀əhə ŋwɔŋ-ɛŋ tə́ŋtə kətʉ-bɔŋ bəmɔʼbəmɔʼ. 4LyʉʉhəNyiikə jyʉ́ʉhə bɔŋ, bɔ̂ŋ chʉ́ʉhə ndə məkwə́ʼ ŋgie-bətə̂ŋbɛʼ-bə ndə mbʉ kəLyʉʉhə kɔ́ chu-bɔŋ ndə məkwə́ʼ.
5Nduɔ, bʉə-Juu buŋmbi ndə bɔ̂ŋ nə kə́ fàa Nyii ndə bɔ̂ŋ lɔ̀ hə mu lɔʼɔ kətə̂ŋ təmiyɔŋ mu kəwʉʉnəmbi, nɔ kə́ chí mu Jɛlosalɛŋ. 6Ndə bɔ̂ŋ yʉ́ gyʉʉ-ɔ̄, bʉə buŋmbi chə̀ŋtə, chutə-ʉə chíe bʉʼka wotəmiyɔŋ nɔ kə yʉ́ ndə bɔ̂ŋ tʉʼ kwə́ʼ ŋgie-lɔʼɔ-kə-i.
7I nɔ kə chàa bɔŋ bənchəŋ, bɔ̂ŋ jínə, kə́ ghɔ̀ŋ tʉ ŋwɔŋtə-ʉə mbɔ, “B̈ii yʉ́, bʉə-bɔ̄ŋ bənchəŋ ndə bɔ̂ŋ tʉʼ kwə́ʼ nɔ, kaa bʉə-Galili fe? 8Chìi ka ndʉʉmɛ, bʉʼʉ bənchəŋ kə́ yʉ́ bɔŋ bə kəŋgie-lɔʼɔ-bə-ʉʼʉ? 9Bʉə nɔ bɛ fɛ̄ŋ ndə bɔ̂ŋ lɔ̀ hə Batia, Mɛdia, Elam, Mɛsobotemia, Judia, Kabadosia, Bɔŋtu leʼnə Esia, 10Filigia, Baŋfilia, Iji, bɔŋleʼ lɔ̀ hə mu via-Libiabɛʼ-kə nə Silɛŋ leʼnə bəntoʼŋgwe ndə bɔ̂ŋ lɔ̀ hə Luŋ, 11kə́ bɛ bʉə-Juu leʼnə bəbɛʼbʉə ndə bɔ̂ŋ bíe bɛ́ŋ Nyii-bʉə-Juu bɛ́ŋ. Bʉə-Klit ghɔŋbə bʉə-Alabia, bʉʼʉ yʉ́ ndə bɔ̂ŋ tʉʼ fʉ̀ʼtə kəŋgie lɔʼɔ-bʉʼʉ te fɔŋ-bənu ndə Nyii tʉʼ chìi.” 12I kə́ chàa bɔŋ, bɔ̂ŋ kə́ jínə, kə́ gìe tʉ ŋwɔŋtə-ʉə mbɔ, “Yɔ̄ŋ-yə tʉʼ dʉ̀ʼ ka?” 13Bəbɛʼbʉə kə́ dʉ̀ʉhə bɔŋ ghɔ̀ŋ mbɔ, “Bʉə-bɔ̄ŋ nɔʼ búu ndʉʼmə.”
Bita lɔ̀ʼ ŋgieNyiikə tʉ bʉə buŋmbi
14Bɔŋ Bita ndə ɔ kə tə́nə ghɔŋbə bəʼ-bʉə-njuɔ-mɔʼ-kə nə wuŋ, chɔ̀ʼhə gyʉʉ-i ghɔʼ, ghɔ̀ŋ tʉ mbʉ bʉə mbɔ, “Bənaa-bɔŋ, bətie-bɔŋ, bʉə-Judia leʼnə bʉə bənchəŋ ndə bɔ̂ŋ tʉʼ chí Jɛlosalɛŋ, mɔ nɔ tʉʼ kʉ́ʉ chìi b̈ii kínə yɔ̄ŋ-yə, b̈ii ŋɔ́ʼhə tyunəbə-ii yʉ́ nukə ndə mɔ tʉʼ kʉ́ʉ gìe tʉ bii. 15Bʉə-bɔ̄ŋ chʉʼ búu ndʉʼmə ndə bii tʉʼ kwɔ̀ʼtə fɛ, bɔŋ b̈ii nyíɛ, nɔ bíe haʼ bəchî bɔmɔʼ ndʉʉsɛŋkə. 16Nɔ bɛ nukə nɔ ndə Jɔɛ yʉkəŋgieNyii nə nyɔ̀ʼ mbɔ:
17Nyii ghɔ̀ŋ mbɔ, ‘Bu yi bɛ mu ndyiʼtəbə chîbə nɔ, mɔ tə́ŋ Lyʉʉhəkə-ɔŋ mu bʉə bənchəŋ.
Vâa-bii, vâabələŋ ghɔŋ vâabəke bu kə́ téʼ ntəŋ ndə bɔ̂ŋ yʉ́ hə kəghɔ-Nyii, vâakəyɔwo nyíɛ nubə ndə Nyii bu dʉ̀ʼ tʉ bɔŋ ntaa, njəŋhə chí bʉə-bənduɔŋ bɔ̂ŋ bɔŋleʼ nyíɛ nubə ndə Nyii bu dʉ̀ʼ tʉ bɔŋ.
18Mɔ bu buŋ kɔ́ Lyʉʉhəkə-ɔŋ mu vâafɔʼɔ-bɔŋ vâabələŋ ghɔŋbə vâafɔʼɔ-bɔŋ vâabəke mu chî-ghɔ̄-bə, bɔ̂ŋ bu téʼ ntəŋ ndə bɔ̂ŋ bu yʉ́ hə kəghɔ-mɔ.
19Mɔ bu chìi nuchíechubə yuo bɔŋleʼ chìi nubəcheʼbə kəchisê, kə́ bɛ fɔbʉəkə, viʼi leʼnə ndyʉʼkə.
20Chichi bu kíahə bə̀ŋ njəŋkə, chisuu kíahə ndəŋ fɔbʉəkə, chî-Tiekətʉ-kə buŋ yi gwè ndə bɛ chîkwɛʼtəŋ-ghɔ̄-kə ghɔŋ fɔŋ-kəchî.
21Ndʉʉmɛ, wotəmiyɔŋ ndə ɔ tíi Tiekətʉ mbɔ ɔ kwáa ɔ, bu kie ŋkwaaNyii.’#2:21 Joɛ 2:28-32.
22Bənaa-bɔŋ, bətie-bɔŋ, bʉə-Isilɛ b̈ii yʉ́ ŋgiebə-ɔ̄ŋ, Jiso ndə ɔ kə lɔ̀ hə Nasalɛ, Nyii nɔ kə bɛ́ŋ ɔŋ nə nufinəbə ghɔŋbə nuchíechubə leʼnə nubəcheʼbə ndə Nyii kə fɔ̀ʼ tíŋ hə bɔ̌ŋ mbəŋ-ɛŋ. Bii nə mbəŋ-yii nɔ kínə bʉʼka i nɔ kə fyú hə mu bii. 23Jiso-ɔ̄ ndə bə kə chɔ̀ʼhə ɔŋ kɔ́ haʼ ndə Nyii nɔʼ nə shʉ̀tə bɔŋleʼ kínə, bii lʉ̀ ɔ, kwɛ̀ŋ ɔŋ, yí nə ghɔ-bʉə-bʉ̂ʼʉ-kə. 24Nyii bɔŋ kə bʉ̀nə kóʼhə ɔŋ, fyúhə ɔŋ hə ndə məliŋ-kwu bʉʼka kwu kə mə yá ɔ nə ghʉəʼkə-i tʉ́ʼ fɛ. 25Dɛbi nɔ nə kwə́ʼ te ɔ mbɔ:
‘Mɔ nɔ nyíɛ Tiekətʉ, ɔ kə́ bɛ mbʉə mɔ təvɛʼtəvɛʼ,
Ɔ nɔ bɛ kwiiləŋ-mɔ, fɔkə mə nə ŋɛ̀hə mɔ fɛ.
26Bʉʼka yɔ̄ŋ-yə, tʉʉ-ɔ nɔ tʉʼ bʉ̀ʉ, mɔ kə́ kwə́ʼ nə tʉʉjyu.
Mɔ bu yʉ́əʼnə ndəŋ aŋ nə fyii-ɔ inchəŋ,
27bʉʼka mbɔ a kʉʉ nə lèʼnə mɔ ndʉʉ ndə mɔ kwú fɛ
byuunɔ mɛ̀ʼtə Wo ndə ɔ nɔʼ kɔ́ ŋwɔŋ-ɛŋ tʉ a ɔ fɛ̀ mu sê fɛ.
28A nɔʼ chìi mɔ kínə fia ndə mɔ kie ndə mə-yaʼ-tíŋ hə chɔ ndə məbʉ̀nə chí mbi.
A bu chìi tʉʉ-ɔ bʉ̀ʉ daa ndʉʉ ndə baʼa bu bɛ mɔʼɔ.’#2:28 Ŋwɔʼnə-təLyuu 16:8-11.
29Bəliŋ-bɔŋ, bəkɔ mɔ gìe tʉ bii nə fyii shʉ́əshʉ́ə te nə tietie-yʉʼʉ, Dɛbi ɔ nɔ nə kwú, bə tyúu ɔ, sě-e ndə bə kə tyúu ɔ chɔ kə́ bíe fɛ̄ŋ tə dàa laa. 30Bɔŋ bʉʼka mbɔ ɔ kə bɛ yʉkəŋgieNyii, kə́ kínə mbɔ Nyii nɔʼ kə gwìa ŋkaamə ghɔŋ ɔŋ mbɔ ɔ bu kə́ dùʼhə mbyu vaa ndə ɔ lɔ̀ hə kəlɔŋ-ɔŋ ndəŋ yetəkə-i, 31Dɛbi yíɛʼhə nyíɛ shʉbə, te nə məbʉ̀nə kóʼ Wo ndə Nyii Kùŋ Tə́ŋ, ghɔ̀ŋ mbɔ ɔ kʉʉnə lèʼnə ɔŋ ndʉʉ ndə ɔ kwú fɛ byuunɔ mɛ̀ʼtə ɔŋ ɔ fɛ̀ mu sê fɛ.
32“Nyii nɔʼ bʉ̀nə kóʼhə Jiso-ɔ̄, bʉʼʉ bənchəŋ nyíɛ nukə-ɔ̄ŋ nə shʉ-yʉʼʉ. 33Nyii nɔʼ chɔ̀ʼhə ɔŋ, dùʼhə kwiiləŋ-ɔŋ, kɔ́ ghʉəʼkə tʉ ɔŋ ndə mətə́ŋ Lyʉʉhəkə-i ndə ɔ nɔʼ kə kɔ̀ʼnə tʉ bʉə ndə bɔ̂ŋ bɛ́ŋ ɔŋ, nɔ bɛ yɔ̄ŋ-yə ndə bii tʉʼ nyíɛ laa bɔŋ-kə́-leʼ yʉ́ nɔ. 34Bʉʼka Dɛbi kə gɛ̀ yuo fɛ, bɔŋ ghɔ̀ŋ mbɔ,
‘Mbʉ Tiekətʉ nɔ nə ghɔ̀ŋ tʉ Tiekətʉ-ɔ mbɔ,
“Dùʼ kwiiləŋ-mɔ
35tə mɔ yi mɔ̀ʼ bʉə-bàa-ba sê bəshʉ a.” ’#2:35 Ŋwɔʼnə-təLyuu 110:1.
36“Nduɔ, b̈ii bʉə-Isilɛ bənchəŋ kínə mbɔ Nyii nɔʼ chìi Jiso-ɔ̄, ndə bii kə kwɛ̀ŋ ɔŋ yí nɔ, mbɔ ɔ bɛ Tiekətʉ bɔŋleʼ bɛ Wo ndə Nyii Kùŋ Tə́ŋ.”
37Ndʉʉ ndə mbʉ bʉə kə yʉ́ yɔ̄ŋ-yə, i chʉ̀ə fyiihə-ʉə, bɔ̂ŋ bíʼtə tʉ Bita ghɔŋbə bəbɛʼbə bəlɔntəŋNyii mbɔ, “Baʼa bu bɛ təka, bəliŋ-baʼa?”
38Bita bə̀ŋhə mbɔ, “Ẅotəmiyɔŋ mu bii shìe liɛŋ-ɛŋ hə ndəŋ bʉ̂ʼʉ, fí muu yie-Jiso Klai, ɔ chʉʼ sʉ̀fyii-i hə ndəŋ bʉ̂ʼtə-a. Nyii bɔŋleʼ kɔ́ Lyʉʉhəkə-i tʉ a. 39Mbʉ ŋkɔʼnə nɔ bɛ tʉ a, tʉ ŋgwie-wo-a, leʼnə bʉə ndə bɔ̂ŋ bɛ dɔdɔ ndə Nyii Tiekətʉ-yʉʼʉ bu kɔ̀ʼnə bɔŋ bənchəŋ.” 40Ɔ bìʼ shyùu tyunəkə-ʉə nə ŋgie-yɔ́ŋyɔ́ŋ-bə, kə́ fʉ̀ʉtə bɔŋ mbɔ, “B̈ii kwáa ŋwɔŋ-yii mu mbi-bʉəbʉə-ɔ̄.”
41Bʉə ndə bɔ̂ŋ kə bɛ́ŋ ŋgiekə-i, fí muu, bʉə bìʼ nuɔ-bɔŋ yɔ̂ŋ-ghɔ̄ tə kə́ gɛ̀ nə ŋkɔŋ-bʉə-hə itia.
Nchəŋtə-bʉə ndə bɔŋ nɔʼ bɛ́ŋ Nyii
42Bɔ̂ŋ kɔ́ ŋwɔŋ-yʉə ndə mə-kə́-yétə nubə ndə bəlɔntəŋNyii kə́ dàhə, ndə mə-kə́-yúnə, ndə mə-kə́-gyʉ̀ətə fɔyubə leʼnə mə-kə́-gháaNyii. 43Faakə yá bʉə bənchəŋ, mbʉ bəlɔntəŋNyii kə́ chìi nuchíechubə ghɔŋbə fɔŋ-bəcheʼ. 44Bʉə bənchəŋ ndə bɔŋ kə bɛ́ŋ Nyii kə́ chə̀ŋtə kəyəŋ kəmɔʼ bəchibəchi bɔŋleʼ kə́ gyʉ̀ə fɔbə ndə bɔ̂ŋ kie tʉ ŋwɔŋtə-ʉə nə mbyu wo-imɔʼ. 45Bɔ̂ŋ kə́ fɛ̀ŋ fɔbə-ʉə kə́ gyʉ̀əhə tʉ ŋwɔŋtə-ʉə bənchəŋ, ghʉə kənu ndə i bɛ liɛŋ-bɔŋ. 46Bɔ̂ŋ kə́ chə̀ŋtə bəchibəchi sêfu chunjaafɛ̀ʼndɛŋNyii. Bɔ̂ŋ kə́ gyʉ̀ətə fɔyubə ndəŋ futə-ʉə kə́ yú nə tʉʉjyu leʼnə fyii imɔʼ, 47kə́ lə̀ʼtə Nyii, tʉʉ bʉə bənchəŋ bʉ̀ʉ ndəŋ bɔŋ. Tiekətʉ kə́ bìʼ bʉə-nuɔ-bɔŋ bəchibəchi ndə bɔ̂ŋ nɔʼ bɛ́ŋ Nyii.
ទើបបានជ្រើសរើសហើយ៖
Fɔʼɔ 2: bvm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
