Genèse 14
14
1Nè nou‐pè kè Amraphel, ouane kè Schinear, dè Arjoc, ouane kè Ellasar, dè Kedorlaomer, ouane kè Élam, dè Tideal, ouane kè Gojim, 2ko ouo̱ ma guènè biboulo dè Béra, ouane kè Sodome, dè Birscha, ouane kè Gomorrhe, dè Schineab, ouane kè Adma, dè Schémeéber, ouane kè Tseboïm, dè ouane kè Béla, nè nè Tsoar hi. 3Nè ba doko ouo̱‐o nè oli to di‐jou‐ma o ko bo̱bo̱‐nou Siddim, nè nè ba di̱ngguè nana‐to̱n hi. 4Nè pè boua‐pome‐nè‐joua‐litou hi, ndo ouo̱ é Kedorlaomer nè di̱ngguè ouane ko‐ouo̱‐o; kè pè boua‐pome‐nè‐jou‐tara hi, ndo ouo̱ ma ango̱ne guènè biboulo do a o. 5Nè pè boua‐nè‐joua‐nara hi, nè Kedorlaomer do ouane no d’è o hi, ndo ouo̱ a liouara o guènè nèno hè biboulo o dè Rephaïm sarli̱ Aschteroth‐Karnaïm, do Zuzim o sarli̱ Ham, do Émim o sarli̱ Schavé‐Kirjathaïm, 6do Horien o ngo kara da ouo̱‐o Séir hi, iyaaa mono nè di ti chêne kè Paran, nè hèdè nè do̱ko jo hi. 7Kè ol’a hi ndo ouo̱ jiki to ouo̱‐o, ouo̱ pi̱li da di sarli̱ En‐Misch‐path, nè nè Kadès o hi, ndo ouo̱ chi guènè biboulo do Amalécite o di sènè nou da ouo̱‐o hi nè oli, do Amoréen o nè o̱ sarli̱ Hatsatson‐Thamar hi. 8Ndo ouo̱ gui̱ssi̱ jou ouo̱‐o, ouo̱ é bè ouane kè Sodome, dè ouane kè Gomorrhe, dè ouane kè Adma, dè ouane kè Tseboïm, dè ouane kè Béla, nè nè Tsoar hi; ndo ouo̱ nèno ouo̱ bèn li boulo o guènè bia do ouo̱‐o, 9di bo̱do̱‐nou Siddim hi, ouo̱ bi dè Kedorlaomer, ouane kè Élam, dè Tideal, ouane kè Gojim, dè Amraphel, ouane kè Schinear, dè Arjoc, ouane kè Ellasar: o ma ouane o nara hè biboulo do ma o mo̱ro. 10Kè bo̱do̱‐nou Siddim hi, nè gono ko̱‐li nè lo̱rlo̱r ouinè hè sènè o hi; nè ouane kè Sodome dè ouane kè Gomorrhe o zada‐you, ndo ouo̱ lônou aï o; ndo koliè o you ko‐lo‐o di ka kara mè. 11Ndo ino‐o nè ndaka ouo̱‐o hi, kara ba doko mo‐dèmè sènè nou Sodome dè Gomorrhe hi, do ba doko mo‐yongo o nè oli; ouo̱ kara o, ouo̱ chi nè. 12Ndo ouo̱ ba Lot, bi̱‐oui‐ouili kè yan Abram, nè o̱ Sodome hi, do ba doko mo ko‐a o nè oli; ouo̱ kara o, ouo̱ chi nè. 13Nè ma pome nè you ouara boulo mè hi tèno, k’è toda k‐a hè Abram, nè nè Hébreu: nè o̱ bo̱bo̱ ti‐chêne o kè Mamré hi, nè nè Amoréen hi, yan Eschcol dè yan Aner, nè noa dono dè Abram hi. 14Nè Abram zili nè nè y’an nè oui‐kanga hi, n’a kara o ngaïli oui‐tome da k‐a o, nè nè pome ouili ko toa ko‐a hi, pèlè‐tara nè boua‐pome‐nè‐joua‐pakana hi, a ndaka nè pata ouane no‐o hi iyaaa a mono nè di sarli̱ Dan. 15N’a kèkosan nou guili‐ouili ko‐a o, oui̱ne lô ouo̱‐o̱ nè zè, a do oui‐tome ko‐a o; ndo ouo̱ lô ouo̱‐o, ouo̱ ndaka ouo̱‐o iyaaa mono nè di Choba, nè o̱ di ouara galè ouara Damas mè hi. 16N’a kara ba doko mo‐dèmè ko‐ouo̱‐o nè oli; a ba Lot, y’an hi, do ba doko mo ko‐a o bo nè oli, do ouiko o, do oui‐ouili o nè oli. 17Nè Abram hoa nè li Kedorlaomer do ouane no‐o do a hi, nè ouane kè Sodome ho zane yèlè ti a, p’a nè ko bo̱do̱‐nou Siddim Schavé, nè nè bo̱do̱‐nou kè ouane hi. 18Nè Melchisédek, ouane kè Salem hi, ba mapa dè vin nèno: k’a nè oui‐ara‐mo kè Nzapa Dingo̱ne‐Ouinè. 19N’a chi guènè to dé oui̱ne jou a, ègui̱: Kè Nzapa Dingo̱ne‐Ouinè nè nè ouaïli li‐zane mè dè nou hi, to dé oui̱ne jou Abram! 20Ko ouo̱ to dé oui̱ne jou Nzapa Dingo̱ne‐Ouinè, nè a oui‐sène ko‐mè o ko éli mè o hi! Nè Abram ha dîme ba doko mo no‐o nè oli h’a. 21Nè ouane kè Sodome to oui̱ne hè Abram, ègui̱: Mè ha ko‐m’ ho‐m’ ndo ouili o, no mè kara ko‐mè nè ba doko mo‐dèmè o nè oli. 22Nè Abram pikifiè hè ouane kè Sodome, ègui̱: Mi yèfè éli‐m’ dida Seigneur, Nzapa Dingo̱ne‐Ouinè, nè nè ouaïli li‐zane mè dè nou: 23mi tè ba ma mo ko‐mè pome go, sèba solobi pèlè bo mi tè ba go, dè pèlè ndakara pome go, da mè dè to, ègui̱: N’è h’è iè dèmè jou Abram ouo̱ nè. Mi ko tèmo pome go. 24Mo pome‐iè, mè kèkosan mo‐yongo ho boulou‐bi̱me o, dè mo‐boulo o ho ouino‐o nè néèno do‐m’ o hi, nè Aner, dè Eschcol, dè Mamré: è ho ouo̱ kara mo bo‐ouo̱‐o.
ទើបបានជ្រើសរើសហើយ៖
Genèse 14: GBANU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Published by the British and Foreign Bible Society 1932-1939