Genèse 12
12
1Nè Seigneur to oui̱ne hè Abram, ègui̱: Mè yoko to mè sènè nou ko‐mè o, dè toa kè sème ko‐mè dida, mè chi sènè nou no‐m’ tè oussou ho mè hi. 2No mi dè ba di̱ngguè nouli̱ ho mè, mi é démo jou mè; no mi é yini mè houlou ouinè, ko mè tè dè jou‐zili démo. 3No mi é démo jou o ino‐o nè tè é démo jou mè o hi, no mi dan o ino‐o nè tè dan mè o hi; ndo ba doko bala ouili o nè oli di sènè nou h‐è, mi é démo jou ouo̱‐o nèda oui̱ne ko‐mè. 4Nè Abram kilingo̱ne nèno, hèmo nè Seigneur toa nè h’a higo, nè Lot nèno do a. Pè Abram boua‐mbéa‐pome‐kè‐pakana‐nè‐joua‐mo̱ro, n’è koulou nè Charan hi. 5Nè Abram mbo Saraï, ko n’è, dè Lot, bi̱ nè y’aïn hi, do ba doko démo ko‐lo‐o nè oli, do oui‐tome ndo ouo̱ pa Charan hi. Ndo ouo̱ a liouara guènè nèno di nou Canaan mè, ndo ouo̱ nèno ouo̱ ma o sènè nou Canaan hi. 6Nè Abram hèkè nè sènè nou hi iyaaa ma sènè olo ma yara nè yin’a nè Sichem hi, iyaaa a mono nè di sènè chêne o kè Moré mè. Ko Cananéen o hè sènè nou hi. 7Nè Seigneur tèno oussou t’è hè Abram, to oui̱ne h’a, ègui̱: Mi ha nou h‐è ho bala‐pata bi̱ no‐mè o. Nè Abram tosso bambossi sènèmo̱ mè hi hè Seigneur, nè téèno bè oussou t’è h’a hi. 8N’a mbo té a di ka kara mè, di ouara danga‐ouichi Béthel hi, n’a mba toa‐tente da k‐a o sènè hi, nè Béthel nè ouara liè‐ouichi, nè Aï di iyaaa mono nè di ouara danga‐ouichi mè. N’a tosso bambossi sènèmo̱ hi bo hè Seigneur, k’a toro nè Seigneur di sèn’a hi. 9Nè Abram mono guènè nèno di ouara ka‐baka‐zane mè da hi.
10Kè di̱ngguè dangba hè sènè nou hi; nè Abram zili chi di sènè nou Égypte mè oui̱ne o̱ dou mè, nèdaka nè dangba sènè nou hi ouinè. 11N’a hèdè nè dè ma nè di Égypte mè hi, n’a to oui̱ne hè Saraï, ko n’a hi, ègui̱: Mè joko, mi i̱ngi tana no mè hoa nè jongo nè li mè ouinè hi. 12Ndo Égyptien o tè joko no mè o hi, ndo ouo̱ to oui̱ne o, ègui̱: Nè ko n’a ouo̱! Ko ouo̱ tè gbè‐m’, ndo ouo̱ é no mè o. 13Mi to ho mè, hè déè no mè to, ègui̱: È nè yan‐boko‐m’ ouo̱, sè ko ouo̱ golom’ nèda mè diouinè, sè kè dana‐m’ passa nèda mè. 14Nè Abram ma nè di Égypte mè hi, ndo Égyptien o joko ouiko k‐è hi, k’a hoa jongo ouinè. 15Ndo nga‐oui kè Pharaon o jok’a bo, ndo ouo̱ chi guènè to oui̱ne hoa‐jong’a hè Pharaon; ndo ouo̱ mbo a, ouo̱ chi nè di ko toa da Pharaon mè. 16N’a dè démo dè Abram nèda k‐a ouinè; nè Abram pa badoua o, do nda o, do tolofou o, do oui‐tome o, do ouiko‐tome o, do ko‐tolofou o, do chameau o. 17Nè Seigneur mbèlè Pharaon do ouili ko toa ko‐a o nè di̱ngguè daïnli, nèda Saraï, ko nè Abram hi. 18Nè Pharaon samo hè Abram ak’a, ègui̱: Nè gui̱ ho mè déè nè mo do‐m’ hègo hi gui̱ndi? Nè gui̱ no mè biè to nè ho‐m’, ègui̱: Nè ko n’è ouo̱ gui̱ndi? 19Nè oui̱ne gui̱ ho mè toa nè ho‐m’, ègui̱: Nè yan‐bok’è ouo̱ gui̱ndi? Ko‐m’ ba n’a nè ko no‐m’ hi. Kinè, mè joko ko no‐mè nomo, mè b’a mè you to mè ka to‐m’ dida! 20Nè Pharaon to oui̱ne ho ouili k’è o oui̱ne ndak’a, h’a chi di ol’a mè dè ko n’a, do ba doko mo bo‐a o nè oli.
ទើបបានជ្រើសរើសហើយ៖
Genèse 12: GBANU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Published by the British and Foreign Bible Society 1932-1939