Matoosa Mishiraachcho 27
27
Yuhuda Kaqeteth
(Mar 15:1; Luqa 23:1-2; Yoha 18:28-32)
1Maalado wonttara qeeseta halaqatinne dere cimati wurikka Yesusa wodhana oge zorettida. 2Yesusa qachchi efidi dere haariza Philaxoosas aaththi immida.
3-4Iza aaththi immida Yuhudaykka Yesusa bolla pirdettidayssa be7idi, «Ta iza aaththa immontta aggarkina» giidi ba ekkida heedzdzu tammu biraa qeeseta halaqatassinne dere cimatas zaari immidi, «Xillo as aaththa immida gishshas ta mooradis» gides. Isttika, «Histtiin nuus ay metoo! Ne era ekka!» gida. 5Hessa gishshas Yuhuday biraa efidi Xoossa Keeththa giddon yeggidi kezi biidi cuuletti hayqqides.
6Qeeseta halaqati biraa denththidi, «Suuththa waaga gidida gishshas Xoossa Keeththa miishshan gujjanaas bessenna» gida. 7Ba giddon zorettidi imath gidida asatas duufo gidana mala issi urqqa miish medhdhiza hiillaza gade shammida. 8Hessa gishshas he gadey hach gakkanaas suuththa gade geetettees.
9-10Izas waaga gidana mala, «Isra7eele nayti heregida heedzdzu tammu bira qoodi ekkida. Xoossi tana azazida mala urqqa medhdhiza hiillaza gades immida» geetettidi nabe Ermaasa doonan yootettidayssi polettides.
Philaxoosa Sinth Yesusa Shiiqo
(Mar 15:2-5; Luqa 23:3-5; Yoha 18:33-38)
11He wode Yesusi dere haarizayssa sinth shiiqides. Dere haarizayssika, «Neni Ayhuda kawoo?» giidi iza oychchides. Yesusikka, «Ne gida mala gido» gides. 12Qeeseta halaqatinne dere cimati iza mootishin Yesusi isttas aynne zaaribeenna. 13He wode Philaxoosi Yesusa, «Aappun yo7on nena mootizaakko siyikkii?» gides. 14Dere haarizayssi keehi malalettana gakkanaas Yesusi issi qaalakka zaaribeenna.
15Dere haarizayssas ba7aale gallas derey qasho asaappe, «Ebeloy nuus birshetto!» gi oychchiko issaade birshiza wogay dees. 16He wode gene ooson erettida Barbaane geetettiza issaadey qashoson dees. 17Derey shiiqida mala Philaxoosi, «Barbaaneppenne Kirstoosa geetettiza Yesusappe ta inttes oona birshana mala koyeetii?» gides. 18Philaxoosi istta coo qanaates aaththi immidayssa erishe oychchides.
19Izi pirda alga bolla utti dishin iza machcheya, «Iza gaason hach tani agumora daro metotadis; hessa xillo addeza bolla ne aykkoka ooththontta mala» giza kiita Philaxoosas yeddadus.
20Gido attiin qeeseta halaqatinne cimati isttas Barbaaney birshettana malanne qasse Yesusa wodhana mala woossanaas dereza qaalay gaaggana mala ooththida. 21Dere haarizayssi, «Nam7atappe oona birshana mala koyeetii?» gi oychchiin istti, «Barbaane birsha!» gida.
22Philaxoosikka, «Histtiko Kirstoosa geetettiza Yesusa wosttoo?» gides. Intte wurikka, «Kaqetto!» gida.
23Philaxoosikka aazas? «Izi ay iita ooththidee?» giidi istta oychchides. Isttika qasse keehi waassidi, «Kaqetto!» gida. 24Philaxoosi hanizayssi wurikka asay ba giddon bul7aketeththafe attiin hara ay go7ay bayndayssa yuushshi xeellidi, «Hayssa addeza suuththaa gomeppe ta geeshsha; hayssafe guye intte shene» giidi haath ehisidi dereza sinththan ba kushe meecettides.#Zaare 21:6-9
25Derey wuri, «Iza suuththi nu bollanne nu nayta bolla gakko» giidi zaarides. 26He wode Barbaane isttas birshidi Yesusa garafissidaappe guye kaqqana mala aaththi immides.
Yesusa Bolla Wottadarata Qilcca
(Mar 15:16-21; Yoha 19:2-3)
27Hessafe wottadarati Yesusa gede dere haarizayssa gibbe ekki biidi wuri shiiqidi Yesusa giddo aaththida. 28Iza may7o qaaridi hara zo7o may7o mayzida. 29Agunththa akilile xaaxidi giigsida; iza hu7e bolla woththida; shomboqo guufe ushachcha kushen oyththidinne iza sinththan gulbatidi, «Ayhuda kawoo! Inttes too!» giidi iza qidhida. 30Iza bolla cuttida; shomboqo guufeza iza kusheppe ekkidi Yesusa hu7en zaari zaaridi shocida. 31Iza bolla qidhi kaa7idaappe guye qasseka zo7o may7oza qaari ekkidinne kase iza may7oza zaari mayzidi kaqqanaaso ekki bida.
Yesusa Kaqeteth
32Istti ekki bishin Qareena geetettizasoppe yida Simoona geetettizayssa demmidi masqaleza iza wolqqara toossida. 33-34Birsheththay, «Hu7e guugge» geetettiza Golgota gakkishin ciyera walakettida woyne cajje, «Uya» giidi immida; gido attiin izi ganxi ekkidi uyana koyibeenna.#Maza 69:21 35Iza kaqqidaappe guye iza may7oza bolla saama yeggidi gishettida. 36Heen uttidi iza naagida. 37«Hayssi Ayhuda kawo Yesusa» giza mooto qaala iza hu7eppe bollara woththida. 38Nam7u pangatappe issoy Yesusappe ushachcha baggara, issoy hadirsa baggara izara issife kaqettida.
39-40Ogera aadhdhi biza asay cayishenne hu7e qaaththishe,#Maza 22:7; 109:25; Mato 26:61; Yoha 2:19 «Xoossa Keeththaa laallada heedzdzu gallassan zaara keexxana gizayssoo! Ane nena ashsha; ne Xoossa Naa gidikko ane masqaleza bollafe wodhdha» gida.
41Qeeseta halaqati dere cimatara gididi iza bolla qidhishe; 42«Hara asaa ashshides shin bana ashshanaas dandaybeenna; izi Isra7eele kawo gidikko ane ha7i masqale bollafe wodhdho; nunikka iza ammanana. 43Xoossan ammanettides; bana Xoossa Naa gida mala Xoossi iza dosizaa gidikko ane ha7i iza ashsho» gida.#Maza 22:8 44Izara issife kaqettida pangatikka hessaththo cashsha qaala iza bolla qoqofida.
Yesusa Hayqo
(Mar 15:33-41; Luqa 23:44-49; Yoha 19:28-30)
45Gallas usuppun saateppe biidi uddufun saate gakkanaas kumeththa biittay dhumides. 46Uddufun saate gidishin Yesusi qaalaa dhoqqu histtidi, «Eelohe! Eelohe! Lama sabaqitane» giidi waassides. Hessa guussas birsheththay, «Ta Xoossoo! Ta Xoossoo! Tana ays aggadii?» guussa.#Maza 22:1 47Heen eqqida asaappe issi issi asati iza waasoza siyidi, «Eelaasa xeygees» gida. 48Isttafe issaadey woxxi biidi zandza misatiza safinege geetettiza miish ekkidi caalida woyne cajjen yeggi caphisidinne shomboqo geetettiza miththa xeeran qaaphidi uyana mala Yesusa doonaakko shiishshides.#Maza 69:21 49Hankko asay qasse, «Aggaagite ane, Eelaasi yiidi iza ashshishin beyana» gida. 50Yesusi qasseka dhoqqa qaalan waassidi shempo kezides.
51He wode Xoossa Keeththaa magalashay bolla hu7era duge simmi daakettidi nam7u kezides; biittay qaaxxides; zaallati za7ida.#Kessa 26:31-33 52Duufoti doyettida; kase hayqqida Xoossa asaappe dariza baggay dendides. 53Duufoppe kezidi Yesusa denththaafe guye geeshsha katama gelidi darota ayfen beettida. 54Mato halaqaynne izara issife Yesusa naagizayti biitta qaaththaanne hanidayssa ubbaa be7idi daro babbida. Qasse, «Hayssi tumappe Xoossa Naakko!» gida. 55Galilappe yiidi Yesusa koshshizaazan ooththi maaddanaas kaalliza daro maccassati hanizayssa wursika haahora xeellishe heen deettes. 56Istta giddon Magdaleppe yida Maaramiranne, Yaaqoobenne Yooseefe aayo Maaramira, qasseka Zabdoosa nayta aayeyra issife deettes.
Yesusa Moogeteth
(Mar 15:42-47; Luqa 23:50-56; Yoha 19:38-42)
57Gadey omarsishin Yooseefe geetettiza issi dure adde dayssi Armatiyase geetettizasoppe yides. Izikka ba baggara Yesusa kaallizaade. 58Izi Philaxoosa sinththi shiiqidi Yesusa aha izas immana mala woossiin Philaxoosikka izas immana mala azazides. 59Yooseefey ahaa ekkidi geesh gidida moogo afalan xaaxides. 60Shuch woocidi baas giigsida duufon efi woththidi gita shuch genderisi duufoza gordides. 61He wode Magdale Maaramiranne hankko Maaramira duufoza ginan uttida.
62Sambatas giigettiza wonteththa gallas qeeseta halaqatinne Farsaaweti Philaxoosa sinth shiiqidi, 63«Godoo! He wordoy kase paxa dishe, ‹Heedzdzu gallassafe guye ta dendana› gida qaalay nu wozinan turchchu gides.#Mato 16:21; 17:23; 20:19; Mar 8:31; 9:31; 10:33-34; Luqa 9:22; 18:31-33 64Hessa gishshas iza kaallizayti iza ahaa kaysoti ekkidi deraas, ‹Izi hayqoppe dendides› giidi woresontta mala heedzdzanththo gallas gakkanaas duufoy naagettana mala azaza; akkay giikko kaseyssafe guye balay aadheth gidana» gida. 65Philaxoosi, «Inttes naagizayti deettes; biidinne inttes erettida mala naagisite» gides. 66Isttika biidi duufoza doona maatamen gordidi naagana zabe essida.
ទើបបានជ្រើសរើសហើយ៖
Matoosa Mishiraachcho 27: GM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word for the World International
