Matoosa Mishiraachcho 22
22
Sarges Xeygettida Asata Leemiso
(Luqa 14:15-24)
1Qasseka Yesusi hara leemiso, 2«Salo Kawoteththi ba naas sarge giigsida issi kawo misatawus. 3Kawoykka diggisas yootidayta xeyganaas ba ashkarata yeddides; xeygettidaytikka, ‹Nu bookko› gida.
4«Qasseka hara ashkarata, ‹Kase isttas yootidayta hekko ta sanga booratanne modhdhida meheta shukkada diggisa giigsadis; wurikka giigettida gishshas sargeso haa yiite!› giidi yootite. 5Xeygettidayti gidikko iza xeyssaa wudan yeggontta aggidi issoy ba goshshasoho, issoy ba zal7eso bides. 6Hankko attidayta ashkarati oykkidi daro waayisidi wodhida.
7«Kawoykka hanqettidi wottadarata yeddidi ashkaraza wodhidayta dhayssides; istta katamaa xuuggides. 8Ba ashkaratakka, ‹Sargeza diggisay giigides; gido attiin sargezaso xeygettidayti sarges bessizayta gidibeettenna. 9Gede oge bolla kezidi intte demmida as ubbaa haa diggisaso xeygite› gides. 10Ashkaratikka oge bolla kezidi ba demmidayta lo7otakka iitatakka ubbaa shiishshidi sargezaso imath kunththida.
11«Kawoykka xeygettida imaththaa beyanaas soo geliza wode sarge may7o may7ontta as demmides. 12‹Haysso! Sarge may7o may7ontta waanada haa gelanaas dandayadii?› gi oychchiin addezas zaarana qaalay dhaydes. 13Kawoykka ba ashkarata, ‹Hayssa addeza tohonne kushe shiishshi qachchidi heen karen diza dhumaan kessi olite; heen yeehonne achcha garccech gidana.›#Mato 8:12; 25:30; Luqa 13:28
14«Xeygettidayti darota; doorettidayti gidikko guuththata» gi yootides.
Giira Qanxxanaas Shiiqida Oysho
(Mar 12:13-17; Luqa 20:20-26)
15Hessafe guye Farsaaweti kezi bishe, «Iza doonappe bala qaala wostti demmi oykkinoo?» giidi zorettida. 16Bana kaallizayta Herdoosa asatara izakko kiittidi, «Astamaaree! Neni tumanchchanne Xoossa oge tumappe tamaarsizaade gididayssanne oonaska dumma maado ooththontta ubbaaka issi mala ne xeellizayssa nu eroos. 17Nees ay misatizaakko ane nuus yoota; Qeesaares giira qanxxanaas bessizee? Bessennee?» gida.
18Yesusikka istta gene qofaa eridi, «Intteno qoodheppe qommon hanizaytoo! Tana yo7on baleththi oykkanaas aazas koyeetii? 19Intte giira qanxxiza miishshaa ane tana bessite» giin isttika issi dinaare geetettiza miish izas ehida. 20Izikka, «Hayssa miishshaa bolla diza misleynne xaafettida sunththay oonayssee?» gides.
21Isttika izas, «Qeesaareyssa» gida. Izikka isttas zaaridi, «Qeesaareyssa Qeesaares, Xoossayssa Xoossas immite» gides. 22Hessa siyidi istti malalettidi iza aggi bida.
Hayqqidayta Denththa Gishshas Shiiqida Oysho
(Mar 12:18-27; Luqa 20:27-40)
23«Hayqqidaytas dendoy baa» giidi ammaniza Saduqaaweti he gallas Yesusaakko shiiqidi,#Hawa 23:8 24«Astamaaree! Musey, ‹Issaadey machcho ekkidi naa yelontta hayqqiko iza ishay hayqqidayssa machcho ekkidi ba ishaa laattiza naa izas yelo› gides.#Zaare 25:5 25Nu achchan laappun ishati deettes shin koyro ishay machcho ekkidi naa yelontta hayqqida gishshas kaalo ishay iza machcheyo ekkides. 26Nam7anththo ishaykka hayqqida ishaaththo naa yelontta hayqqides; hessaththoka hanishin maccassaya laappunththa ishaa geladus. 27Wurseththan maccassaya hayqqadus. 28Hessa gishshas laappunati wurikka izo ekkidashin hayqoppe denththa gallas maccassaya laappunatappe awayssa machcho gidanee?» gida.
29Yesusikka isttas zaaridi, «Geeshsha Maxaafatanne Xoossa wolqqa intte erontta gishshas baletteeta. 30Hayqoppe dendidaappe guye asay salo kiitanchchata mala gidana attiin eketettenanne gelettenna. 31-32Hayqqidayta denththa gishshas gidikko Xoossi, ‹Tani Abrahaame Xoossa, Yisaaqa Xoossa, Yaaqoobe Xoossa› giidi inttes yootoyssa nababibeekketii? Xoossi paxata Xoossa attiin hayqeththata Xoos gidenna» gides.#Kessa 3:6 33Derezikka hessa siyidi iza timirtezan malalettides.
Ubbaafe Aadhdhiza Azazo
(Mar 12:28-34; Luqa 10:25-28)
34Yesusi Saduqaaweta co7u histtidayssa siyidi Farsaaweti issi bolla shiiqettida. 35-36Istta giddofe issi Muse wogaa lo7eththi erizaadey Yesusa paaccanaas koyidi, «Astamaaree! Muse wogata giddon ubbaafe aadhdhizay awayssee?» giidi oychchides.#Luqa 10:25-28
37Izikka zaaridi, « ‹Ne Godaa Xoossa ne kumeththa wozinappe, ne kumeththa shemppofe, ne kumeththa qofappe dosa.›#Zaare 6:5 38Hayssi koyronne ubbaafe aadhdhiza azazo. 39Nam7anththoyka iza misatees, hessika, ‹Ne shooro ne hu7e mala dosa› gizayssa.#Lewe 19:18 40Muse wogaynne nabeta timirtey wurikka hayta nam7u azazotan qashettees» gides.
Kirstoosa Gishshas Shiiqida Oysho
(Mar 12:35-37; Luqa 20:41-44)
41Farsaaweti issi bolla shiiqetti dishin Yesusi istta, 42«Kirstoosa gishshas intte ay geetii? Izi oona naa?» gi oychchides; isttika izas zaaridi, «Izi Dawite naa» gida.
43-44Izikka isttas,
«Histtiin Dawiti
Xillo Ayana wolqqan,
‹Xoossay ta Godaa›
giidi waani xeygidee?
‹Ta ne morkketa ne toho garsan
gulbatissana gakkanaas
ne ta ushachchan utta!› gides.#Maza 110:1
45Hessa gishshas Dawiti iza, ‹Ta Godaa› giidi xeygikko waanidi izas naa gidana dandayzee?»
gides. 46Izas issi qaala zaarana dandayda asi woykko he gallassafe simmiin iza oysho oychchana xalida asi oonikka beettibeenna.
ទើបបានជ្រើសរើសហើយ៖
Matoosa Mishiraachcho 22: GM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word for the World International
