Matoosa Mishiraachcho 18
18
Salo Kawoteththan Ubbaafe Aadhdhanay Oonee?
(Mar 9:33-37; Luqa 9:46-48)
1He wode Yesusa kaallizayti izakko shiiqidi, «Salo Kawoteththan nu garsan ubbaafe aadhdhanaadey oonee?» gi oychchida.#Luqa 22:24 2-3Yesusi issi naa xeygi ehidi istta giddon essidi, «Ta inttes tumu gays; intte simmontta ixxikonne guuththa nayta mala hanontta ixxiko mulekka Salo Kawoteth gelekketa.#Mar 10:15; Luqa 18:17 4Hessa gishshas ha naaza mala bana ziqqisizaadey Salo Kawoteththan ubbaafe aadhdhana. 5Hayssa mala guuththa naa ta sunththan ekkizaadey tana ekkees.#Mar 9:42-48; Luqa 17:1-2
6«Gido attiin tana ammaniza guuththatappe issaade dhupheththizay deexo woxa shuchchi iza qoodhen qashettiin abba ciimman yegettidi mitettiko izas lo7o gidana. 7Hanna alameya as dhuphana gaaso gidida gishshas izis aayye ana! Dhuphey yuus aggenna shin dhuphezas gaaso gidizaades aayye ana!
8«Ne kushey woykko ne tohoy nena dhuphanaas gaaso gidikko neeppe qanxxa digga! Neni nam7u kushera woykko nam7u tohora gede mernaa taman yegettanaappe wobbe woykko toho sila gidada hee gede de7oy dizaso geloy nees lo7ana. 9Hessaththoka ne ayfey nees dhuphe gidikko neeppe kessa yegga! Nam7u ayfera gede Gaanname taman ne yegettanaappe issi ayfera de7oy dizaso ne gelizayssi nees lo7o.#Mato 5:29
10«Hayta guuththata giddofe issineyokka intte kadhontta mala naagettite! Ta inttes tumu gays; salon diza istta kiitanchchati salon ta Aawa ayfeso ubbaa gallas xeelleettes. 11Asa Nay dhaydayta ashshanaas yides.#Luqa 19:10#18:11 Issi issi Geeshsha Maxaafati taybo tammanne issaa bolla diza qofa gujjeettes; izikka Luqaasa shempo 10 bolla dizayssa mala.
Dhayda Dorsa Leemiso
(Luqa 15:3-7)
12«Ane taas yootite, issaades xeetu dorsi diikko qasse isttafe issina dhaykko, hankko uddufun tammanne uddufunata zuma bolla yeggidi dhaydaaro koyana bi erennee? 13Ta inttes tumu gays; hankko dhayontta attida uddufun tammanne uddufun dorsatappe aaththidi beettida dorsayn ufayettees. 14Hessaththoka ha guuththata giddofe issoy dhayana mala salon diza intte aawaa shene gidenna.
Qohidaades Ay Ooththana Bessizaakko
15«Ne ishay nena qohikko izakko baada iza xalala nenara ekkada iza mooro izas yoota; izi ne gizaa siyikko ne ishaa ne as histtaasa.#Luqa 17:3 16Izi ne gizayssa siyontta ixxiko yo7oy wuri nam7u markkan woykko heedzdzu markkan ladhdhiza gishshas issaade woykko nam7u as nenara ekka baada iza haasayssa.#Zaare 19:15 17Izi isttaka siyontta ixxiko Woosa Keeththas yoota; Woosa Keeththayokka siyontta ixxiko izaade ne ammanonttaade malanne yootiin simmontta iita asa mala qooda.
18«Ta inttes tumu gays; biitta bolla intte qachchiday wuri salonkka qashettidaa gidana; biitta bolla intte birshidaazi salonkka birshettidayssa gidana.#Mato 16:19; Yoha 20:23 19Qasseka ta inttes tumu gays; biitta bolla intte nam7u gididi ay miishshika issife dosan intte oychchiko salon diza ta Aaway inttes immana. 20Nam7u woykko heedzdzu gididi ta sunththan intte shiiqizason heen intte giddon ta daana» gides.
Maaro Gishshas
21He wode Phexroosi Yesusaakko shiiqidi, «Godoo! Ta ishay tana qohikko ta izas aappunto atto goo? Laappunto atto goo?» gides.#Luqa 17:3-4
22Yesusikka izas zaaridi, «Laappun tammuto laappun attiin laappunto xalla ga giikke;#Medhe 4:24
23«Hessa gishshas Salo Kawoteththi ba ashkarata bolla diza miishshe shiishshana koyida kawo misatawus. 24Miishshaa qooda oykkida mala iza ashkaratappe daro miloone bira#18:24 Daro miloone bira: Daro miloone bira geetettizayssi Amaraththo Maxaafan, «Meklite» gees; issi meklitey he wode issi asas tammanne ichchashu layththa damozappe bolla gididayssa bessees. acoy iza bolla dizaade ekki yida. 25Ashkarazikka ba bolla diza acoza qanxxoy xoonida gishshas izikka iza machchiyakka iza naytinne izas dizaazi wuri bayzettidi miishshay qanxxettana mala iza goday iza azazides. 26He wode ashkarazi godaza toho bolla kundidi, ‹Tani ta bolla diza acoza wursa nees qanxxana gakkanaas taas guuththa wode immarkkii!› giidi woossides. 27Iza godaykka izas mishettidi iza acoza ubbaa maaridi yeddides.
28«He ashkarazikka ba godaa achchafe kezida mala guuththa acoy#18:28 Guuththa acoy: Guuththa acoy gizayssa Amaraththo maxaafan, «Xeetu dinaare» gees; he wode issi asas issi gallassa ooso damoza bessees. iza bolla diza ba lagge demmidinne, ‹Ne bolla diza ta miishshayo ha7i hannin qanxxa› giidi cuulli oykkides. 29He iza lagge ashkaray, ‹Taas guuththa wode immarkkii! Ta nees qanxxana› giidi iza toho bolla kundidi woossides.
30«Gido attiin izas guuththa wode immanaas koyontta ixxidi iza laggezi ba bolla diza acoza qanxxana gakkanaas qasho keeththan yeggides. 31Izi hessa ooththishin be7ida asaynne hankko iza lagge ashkarati daro mishettida. Biidikka hanidayssa ubbaa ba godaas yootida.
32-33«He wode godazi he ashkaraa xeygisi ehidi, haysso nenoo! Iitazoo, ne tana woossiin ne bolla diza acoza ta nees aggadisi shin ta nena maarida mala nenikka ne laggeza maaranaas bessennee? 34giidi iza bolla diza acoza izi ubbaa qanxxana gakkanaas qachchana mala qachchizaytas aaththi immides. 35Hessa gishshas intte issoy issaa wozinappe maarontta aggiko salon diza ta Aawaykka inttena maarenna» gides.
ទើបបានជ្រើសរើសហើយ៖
Matoosa Mishiraachcho 18: GM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word for the World International
