Matoosa Mishiraachcho 13
13
Zereth Zerizaade Leemiso
(Mar 4:1-9; Luqa 8:4-8)
1He gallas Yesusi keeththafe kare kezidi abbaa lanqen uttides. 2Daro derey iza yuuyi aadhdhi giddoththida gishshas asaa abbaa gaxan aggidi wogolo giddo geli uttidi,#Luqa 5:1-3 3daro yo7o leemisora, «Issi goshshanchchay zereth zeranaas kezides. 4Izi zerishin issi issi zereththi oge doonan wodhdhiin kafoti yiidi maxi mida. 5Issi issi zereththi melanne shuchchatiza biitta bolla wodhdhiin biittay mela biitta gidida gishshas elle caarides. 6Gido attiin away awattiin shullidinne xapho yeddontta aggida gishshas melides. 7Issi issi zereththay agunththa giddon wodhdhides; agunththayka diccidi caarechchaa cuullides. 8Hara zereththika aradda biittan wodhdhidi ayfekka ayfides; issoy xeetu, issoy usuppun tammu, issoy heedzdzu tammu ayfe immides. 9Siyiza hayththi dizaadey siyo!» gi yootides.
10Hessafe guye iza kaallizayti izakko shiiqidi, «Ne aazas leemisora yootay?» gida.
11Izikka isttas, «Salo Kawoteththa xuura eroy inttes imettides; isttas gidikko imettibeenna. 12Dizaades dizayssa bolla gujettananne darana shin bayndaadefe hinna dizaarakka ekettaychchana.#Mato 25:29; Mar 4:25; Luqa 8:18; 19:26 13Ta hayssaththo leemisora yootizay istti siyishe ezgontta gishshassinne xeellishe demmontta gishshassa.
14-15«Isayaasi,
‹Intte sis siyana shin
yuushshi qoppeketa;
xeelo xeellana shin
wozinan woththeketa;
dereza wozinay muumides;
istta hayththayka siyenna;
xeellontta mala
ba ayfe qilim7ida;
hessa mala gidonttaakko
istti ba ayfera be7idinne
ba hayththara siyidi
ba wozinan yuushshi qoppidi
taakko haa simmiin
ta istta paththanashin›
gida tinbite qaalay
isttan polettides.#Isa 6:9-10
16«Intte ayfey xeelliza gishshassinne intte hayththati siyiza gishshas intte anjjettidayta. 17Ta inttes tumu gays; daro nabetinne daro xillo asati ha7i intte be7izayssa beyanaassinne ha7i intte siyizayssa siyanaas amottida shin isttas hanibeenna.
18«Histtiko ha7i zereththaa leemisoza birsheth siyite. 19Kawoteththa qaala siyidi yuushshi qoppontta ay asa wozinappeka Xala7ey yiidi zerettida zereththaa eeson maxichchana. Hessika oge bolla wodhdhida zereththa. 20Shuchcha bolla zerettidayssi qaala ufayssan siyidi heerakka ufayssan ekkizaade misatees. 21Gido attiin xapho yeddanaas dandayontta aggida gishshas daro gam7ontta qaalaa gaason metoynne goodeteththi yiza wode eleli dhuphettees. 22Agunththa giddon zerettida zereththay qaala siyidi hayssa ha alamezas daro metoteththaninne dureteththa qofan balettidinne cuulettidi ayfe immontta asa mala. 23Lo7o biittan zerettida zereththay qasse qaala siyidi yuushshi qoppizaade misatees; lo7o ayfe ayfees; issoy xeetu, issoy usuppun tammu, issoy heedzdzu tammu ayfe immides» gides.
Leeshsho Leemiso
24Yesusi qasseka hara leemiso isttas, «Salo Kawoteththi ba goshsha gaden lo7o zereth zeridaade misatees. 25Gido attiin asi wuri ichchida wode morkkey yiidi gistteza giddon leeshsho zeridi bides. 26Gisttezi diccidi ayfe ayfiza wode leeshshoyka izara issife beettides.
27«Kaththaa godaza ashkarati godazaakko shiiqidi, ‹Godoo! Neni ne goshshan lo7o zereth zerabeekkii? Hayssi leeshshoy awappe yidee?› gida.
28«Izikka isttas, ‹Hessa morkkey ooththides› gides. Ashkaratikka, ‹Nu biidi leeshshoza shoddana mala koyay?› gi oychchida.
29«Izikka isttas, ‹Akkay hanenna; gaasoykka intte leeshshoza shoddishe gisttezara gaththi shoddana; 30aggite! Maxa wodey gakkanaas issife dicco; he wode maxizayti leeshshoza kasetidi qori maxidi taman xuugganaas mirqqen mirqqen qachchite; gistteza qasse shiishshidi gootaran gelththite› gaada ta inttes yootana» gi yootides.
Miththa Ayfe Leemisonne Irsho Leemiso
(Mar 4:30-32; Luqa 13:18-19)
31Hara leemiso isttas, «Salo Kawoteththi issi asi ba gade giddon zerida barzaafe miththa ayfe mala. 32Barzaafe miththa ayfey hara miththa ayfe ubbaafe daro laafa gidikkoka diccada miththa ubbaafe gita gidawus. Salo kafotikka izi hagga bolla keexxidi daana gakkanaas gita mith gidawus» gides.
33Ha7ikka hara leemiso isttas, «Salo Kawoteththi maccassi bukeesoy dendana mala bukeeso giddon gujjida guuththa irsho misatawus» gides.
34Yesusi hayssa ubba asaas leemisora yootides. Leemisoy baynda issinokka yootibeenna. 35Hessika kase nabe doonan,
«Ta doona leemison ta doyana;
alamey medhettoosoppe
haa simmiin
qotettidayssa ta haasayana»
geetetti yootettidayssi polettides.#Maza 78:2
Leeshsho Leemisoza Birsheth
36Hessafe Yesusi asaa aggidi soo gelides. Iza kaallizayti izakko shiiqidi, «Kaththa giddon diza leeshshoza gishshas ne yootida leemisoza birsheth nuus yoota» gida.
37Izikka isttas zaaridi, «Lo7o zereth zeriday Asa Naa. 38Goshshay hayssa alameza; lo7o zereththay Kawoteththa nayta gididayssa bessees; leeshshoy qasse Xala7e nayta. 39Leeshshoza zeridi bida morkkey Daabulosa. Maxa wodey alame wurseth gidishin maxizayti Xoossa kiitanchchata.
40«Leeshshoy qorettidi taman xuugettiza mala alame wurseththan hessaththo hanana. 41Asa Nay ba kiitanchchata kiittana; isttika nagaras gaaso gididaytanne iita ooththizayta iza Kawoteththa giddofe ubbaa qori kessana. 42Yeehoy dizasoninne ach garccizason daro wolqqama taman istta yeggana. 43He wode xilloti ba Aawaa Kawoteththan arshe mala poo7ana. Siyiza hayththi dizaadey siyo!
Qotan Diza Haaronne Inqqu Geetettiza Worqqa Leemiso
44«Salo Kawoteththi gade giddon qotettida miishshe misatees. Issi asi he miishshayo demmidi zaari qottides. Ufayssafe dendidayssan biidi baas dizaaz ubbaa bayzidi he miishshiya diza biitta shammides.
45«Hessaththoka Salo Kawoteththi al7o worqqa koyza zal7anchcha misatees. 46Daro al7o gidida inqqu geetettiza shuch demmida mala biidi baas diza ubbaa bayzidi shammides.
Mole Gite Leemiso
47«Qasseka Salo Kawoteththi abba giddon yegettidi dumma dumma mole oykkida mole gite misatees. 48Mole oykkizayti gitey kumiin goochchidi abba lanqe kessida. Heen uttidi lo7o lo7o mole qoridi keeshen gujjida. Iita moleta wora yeggida. 49-50Alame wurseththan hessaththo hanana. Kiitanchchati yiidi nagaranchchata xillotappe shaakkidi yeekkizasonne ach garccizaso gede to7ontta taman yeggana.
51«Yesusi istta hayssi wuri inttes gelidee?» gides. Isttika «Ee» gida.
52Izikka zaaridi, «Hessa gishshas Salo Kawoteththa xuuray gelida Muse wogaa tamaarsizaadey oonikka izas minjji woththida al7o miishshafe ooraththinne gal7a miish kessizaade misatees» gides.
Nabey Ba Deren Bonchchettenna
(Mar 6:1-6; Luqa 4:16-30)
53Yesusikka hayta leemisota yooti wursidi heeppe haraso bides. 54Ba dere biidi Ayhudata Woosa Keeththan asaa tamaarso oykkides. Isttika malalettidi, «Hayssi addezi hayssa erateththaanne hayta malaatata ooththana wolqqa awappe demmidee? 55Hayssi anaaxeza naa deennee? Iza aayey sunththi Maaramo gidennee? Iza ishati Yaaqoobe, Yooseefe, Simoonanne Yuhuda gidettennee? 56Michcheti nunara dizayta gidettennee? Histtiin hayssi addezi hayssa ubbaa awappe ekkidee?» gida.
57Hessa gishshas istti izi gizayssa ekkibeettenna.
Yesusikka isttas, «Nabey ba dereninne ba keeththan bonchchettenna attiin harason bonchchettees» gides. 58Istti ammanontta aggida gishshas daro malaatata heen ooththibeenna.
ទើបបានជ្រើសរើសហើយ៖
Matoosa Mishiraachcho 13: GM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word for the World International
