Rumi 3
3
1Halai Jihudirokni imwtwijar tama hamdal tong jebw kothe borogrokni kwrwi? Sunnotni phwng morok tama?
2Wk, jotho aita Jihudirokni kabang hamdal tongo. Bokni bisingni jothoni nangru kothoy imo: Kaitor Bini sirwngnw pwila Jihudiroknw rwjak. 3Matwr bokni bisingw bagsa borogrok paitokjaya jar ongjak, Omobai tama? Bok paitokjaya jar ongkha hinwi ta Kaitorbw paitokjayajar ongthai? 4Kaje ya. Jotho borog misaiya ongphwng Kaitor jwnwmni kwbwi kok sanai. Kathar elembagw suijak tongw, "Nwng nini kokbai thi majri ongnw, tei nalchirni joragw nwng kaplai ongnai." 5Matwr chini beraidia samung jwtini Kaitorni raidia samung arw prai prai khlaywi saplangw, hai chini ta satai tong? Jephini Bw chwnw senji rwnw halai chwng aiphini ta sathai Bw benirai khalayo? I koknw chwng borog hinwi sadok. 6Chwng imwnw oaisabw sase samaya! Kaitor jwtini benirai khalayo hingkhlai Bw ta khalayoi borogni nalchir khalaitai?
7Kaisaswk sanwna, "Jwtini ani misani bisingtwi arw gam khalayoi sijagw Kaitor kwbwi kok sanaisa, halai omobai jwtini Kaitor chwngsacha manw aiphuo anw tamani sumsok ganang hinwi nalchir khalai?
8Iswkhlai chini tama i koknw sathai kalayw je, "Himdi, chwng chaya samung tangwi thangana o chayani bisingtwi gam phaimanaitwi?" Twmwi himba kaisa kainwi borog chini mwngwi misa yakumu rwgwi imwtwijar kok sagw je, chwng bwrwphw o phwrwngma roknw rwgw. Bokni manthai senjinw bok mannai.
Kaisabw raidia ya
9Iswkhlai chwng Jihudirok tama Bejihudi rokni naywi gam habago tongo? Whwi oaisabwya, twmwi himba chwng imwni aguo sajak Jihudi eba Bejihudi jothobw baksa. Bok jothobw sumsokni pharanni buikhila. 10Kathar elembakgw suijak tongw:
"Raidia, Kaisabw kwrwi,
11Imwtijar kaisabw kwrwi jebwni bijinai phranba tong. Imwtwijar kaisabw kwrwi jebw Kaitornw naitub. 12Jothobw Kaitorni daini kachalw kwnwgwi thangka, jothobw morok kwrwi ongwi thangka, kaisabw gam samung tangya, kaisabwya!" #3:12 Gitsonghita 14: 1-3
13Bokni bukhok phiyokjak mangkhor,
Salaibai bok phemlokmani kok sagw. #3:13 Gitsonghita 5:9
Bokni kok dayo chibokni bis lujakni kosol. #3:13 Gitsonghita 140:3
14Bokni bukhok keber sraimung tei kakha kokbai kwplwng.
15Borognw buthalni bagwi bokni yathwi dogwi dogwi thangw,
16Bokni yathwi je lamatwi thang, o lamagw bok nachra tei baikhrupma kalangw.
17Bok khachangmani lama siya,
18Bok Kaitornwbw kiriya. 19Chwng sio Mosini kerongnal bokni bagwi jebwrok o kerongnalni tolagw. Aithani Jihudi Bejihudi kaisanibw mwngsa sathai kwrwi, jotho borog Kaitorni nalchirni sakangw kalainw. 20Kerongnalni mote tongkhlaise Kaitor borognw raidia hinwi yachaknw omoya, matwr kerongnalni bisingtwi borog sakni sumsokni kothoyw chetwn manw.
Kaitor borognw raidia hinwi yachagw
21Matwr tabok Kaitor borognw kerongnalni bade takhalaywi raidia hinwi yachagwi la omo saplangjakha. Mosini kerongnal tei diyarirok o kothoyw yakumu rwgwi thangjak. 22Jebwrok Jisu Khristoni sakago paitok bokni o paitokmani bisingtwi Kaitor boknw raidia hinwi yachagwi lagw. Jihudi tei Ojihudi jotho baksa. 23Twmwi himba jotho sumsok khalaikha tei Kaitorni chwngsacha jurakni phariniya.
24Jisu Khristoni bisingtwi Kaitorni mangana khakhamma ruaini bagwi Kaitorbai chini barke thi ongkha. 25Kaitor Khristoni thwi boynai ni bisingtwi Bwnw sumsokni dali hinwi phunokha, chwng o dalinw paitokmani bisingtwi yachagwi lagw. Kaitor i samungni bisingtwi phunugo je Bw jwnwmni raidia. Aguobw Bw khalokma phunokjak tei borogroknw bokni sumsokni maping senji rwjiya.
26Tabok Bw obw khalaika imo majra ongnaitwi je Bw sakbo raidia, arw jebwrok Jisunw paitok boknw raidia hinwi yachagwi lamannaitwi.
27Halai borogni borai karithai ta tong? Mwngsabw kwrwi. Tani kwrwi? Omo ta imwni bagwi je chwng kerongnal paleo? Omoni bagwiya, matwr chini paitokmani bagwise. 28Twmwi himba chwng sio, borog bokni paitokmani bisingtwi Kaitorni dayo yachakjuai ongmanw, kerongnal palemani bisingtwiya.
29Kaitor ta iswkhlai keber Jihudirokni, Bejihudi rokniya? Omoya, Bw Bejihudi roknibw Kaitor. 30Twmwi himba Kaitorlai kaisase. Bw Jihudirokni paitokmani bagwi jekhalaywi boknw raidia hinwi yachaknw imwtwijar Bejihudi roknwbw yachaknai. 31I paitokmani bagwi ta chwng kerongnal yakhakdok? Ohwi oaisabwya, Kerongnalni kok kwbwi omose chwng majra khalaidok.
ទើបបានជ្រើសរើសហើយ៖
Rumi 3: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
