Mark 5
5
Jisu chaya pholanw akhorwgwi hokha
1Aithani, Jisu bai Bini sagrirok Galil twithunw balwi Geraseni rokni amchoyo thangkha. 2Jisu rungni akhonai loge loge chaya phalabai rumjajak borog kaisa mangkhor lwngni akhogwi Bini sakangw phaika. 3O borogsa mangkhor lwngw tongw, bwnw kaisabw arw khagwi tonmaya obw tama sigwlbai hoda khagwi larwkmaya. 4Borogrok bwnw sigwlbai pala pala khagwi tonjak, matwr bw sigwl mochogwi pairwgw arw yathwini beri sapaywi pairwgw. Bwnw rumwi larwk mannai jar pharan kaisanibw kwrwi. 5Bw salbai horbai mangkhor mangkhorw arw hapong hapongw chirigwi bereyo tei binibai bw holongbai bini basak ragw.
6-7Kachalni Jisunw nungkhogwi bw khalwi phaiywi Jisunw khulumkha arw chirigwi Bwnw sakha, "O Jisu, kotor Kaitorni Sajla, Nwngbai ani tama dai? Kaitorni mwngwi kabogwi sadok Nwng anw tentrokma tarwdi." 8Bw i koknw sakha twmwi himba Jisu bwnw sajak, "Chaya phala i borogsani bisingni akhogwi thang."
9Jisu bwnw swngkha, "Nini bwmwng tama?"
Bw sakha, "Ani bwmwng jaksa, twmwi hinba chwng kabangma tongw." 10Jisu boknw o jilani kariywi hoyatwi bw Jisunw kodur khabomwi kabokha.
11O joragw o jega koreni hapong koreyw oak jaksa cherogwi chadok. 12Chaya phalarok Jisunw kabogwi sakha, "O oak jak dayw chwnw hodi, bokni bisingw chwnw hapni rwdi."
13Jisu boknw thangdi hinwi sakhalai, o chaya phalarok akhogwi oakrokni bisingw habkha. Omobai jotho oak hapong halaptwi khabrungwi thangwi twithugo kalaikha arw odayw kwlwgwi thwikha. O oak jak dayw akkhoni mak nwi sai oak tongw.
14Eiphuo o oak bengnai rok khalwi thangwi bokni kami arw kore karani borog roknw o kothonw saitangkha. Aiphuo tama ongkha obwnw naini bagwi borogrok oro phailaikha. 15Bok Jisuni dayw phaywi nungkha, jenw kabangma chaya phala rumjak, o borogsa ri chum kanwi gam ongwi achugwi tongjak. Obwnw nungwi borogrok kirilaikha. 16Tama ongjak obonw nungnairok o chaya phala rumjak borog bai oak jaksani koknw boknw sagwi khanarwkha. 17Obwbai borogrok Jisunw bokni jilanw yakarwi thangdi hinwi kabokni nangkha.
18Jisu jephuo rungw kadok aiphuo je borogsa chaya phala rumjajakni hamjak bw Jisubai baksa thangni bagwi Jisunw kabokni nangkha. 19Matwr Jisu goseliya. Bw bwnw sakha, "Nwng nini nugo philwi thangdi. Kaitor nini bagwi bwswk kotor samung khalaikha, nwnw bwswk khairokha obonw nokni borog roknw saitangdi."
20Aiphuo o borogsa thangwi paikha tei Jisu bini bagwi bwswk kotor kotor samung tangkha obonw Dikapoli#5:20 Dikapoli jebani mane khung chi aolini amchoi jegao bereywi bereywi sani nangkha. Obwnw khanagwi jotho amok chalaikha.
Jayirni baschwk tei birokma kaisa hamkha
(Mothi 9:18-26; Luk 8:40-56)
21Jerw Jisu rungbai arwbw twithu balwi uijang narw thangkha. Eiphuo Bini koreyw kodur borog phaywi thumjakha. Bw aiphuobw twithu kandao tongkho. 22O joragw Jayir hinwi Jihudi thumnokni kaisa oja odayo phaikha arw Jisunw nungwi Bini yathwyo kalaikha. 23Bw Jisunw kabangma kabogwi sakha, "Ani basa birok thwini ongdok, Nwng phaywi bini sakagw Nini yaknw tonkhai bw hamwi painw."
24Aiphuo Jisu bwbai baksa thangkha. Kabangma borog Jisubai baksa thangni nangkha arw Bini korekara sunglaini nangkha. 25O borog beser bisingw birokma kaisa tongw, bini ri thwi sunai haya ongmani chinwi bisi kaha. 26Kodur daktwr rokni dayw thang phai khalaitwi khalaitwi bw kodur tekto manjak arw bini ja rang mai tong obwrok jotho pairwgwi pairwjak, matwr bw gamlai ongniya arwse salni sal haya bangkha. 27Bw Jisuni kothoyw khanajak aithani bw Bini ukhumw phaika tei borog beser bisingw Jisuni ri kisa khalaywi rumkha. 28Twmwi hinba bw oansokjak je, Jisuni rinwphwng kisa khalaywi marumkhlai bw gam ongnai. 29Jisuni ri rumnai loge loge bini ri thwi sunai thakkha, bw bini basak bisingwse bijimankha bini haya gam ongwi paikha.
30Jisubw loge loge bijimankha Bini daini pharan akhogwi thangkha. Obwni bagwi Bw borog beserw ijang uijang naikhogwi swngkha, "Swrw Ani ri rumkha?"
31Jisuni sagrirok sakha, "Nini kore kara bwswk borog sungjalaidok Nwnglai nungdok bile, hekphwng Nwng swngdok swrw Nwnw rumkha?"
32Matwr hekphwng Jisu, i kamnw swrw khalaikha obwnw naini bagwi ijang uijang naikhoni nangkha. 33O birokma siyw bwbai tama ongjak arw bw kiriywi kwlwitwi kwlwitwi Jisuni yathwyw kalaiphaikha arw bw tama khalaijak obwnw Bwnw sakha. 34Jisu bwnw sakha, "Ma, nwng paitokha thanise nwng hamkha. Khachang mabai thangdi, nini arw i haya ta ongthwk."
35Jisu o kokroknw sagwi tongphini thumnokni oja, Jayirni nokni kainwi kaitham borog phaywi Jayirnw sapaikha, "Nasachwk thwywi paikha, Elimnw arw tekto tarwdi."
36O borogrokni koknw khanagwi Jisu Jayirnw sakha, "Takiridi, keber paitokdi."
37Jisu keber Pitor, Jakob arw Jakobni takhuk Johonnw Bwbai baksa lakha. 38Jisu jephuo Jayirni nogw sokpaikha Bw nungkha phatarw hurumuru ongdok. Borogrok chirik chirigwi karaplaidok. 39Jisu bisingw thangwi borogroknw sakha, "Nokh tamani hurumuru tei chirigwi karaplaidok? O charai thwijiya, thuse thudok."
40I koknw khanagwi borogrok Bwnw minilaini nangkha. Ephuo Jisu boknw jothonw nokni phatarw thangdi hinwi sakha. Jerw Jisu, o birokbasani boma bopha arw Bini logeni sagrirokbai baksa o birokbasani khadalw habkha. 41Jerw Jisu o birokbasani yak rumwi sakha, "Talitha kum," obwni sema ongkha "Birokbasa, Ang nwnw sadok bachadi." 42Obwbai o birokbasa loge loge bachagwi bereni nangkha. O birokbasani cha, bisi chinwi kajak. Obwbai bok kabang amok chalaikha. 43Jerw Jisu boknw karak khalayoi sakha, i koknw kaisabw siyatwi, arw o birokbasanw mwngsachwk charwdi hinwi sakha.
ទើបបានជ្រើសរើសហើយ៖
Mark 5: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh