Mothi 22
22
Kaijala barini panani naisrwng
(Luk 14:15-24)
1Phwrwngni bagwi Jisu arwbw o raida ojaroknw i naisrwngnw sakha, 2"Chukha auar imwtwi jar bugrani kosol jebw bini basalani kaijalabari pana jugalkha. 3O panagw naroai ringni bagwi bw bini seleng roknw hokha, matwr bok phaini nailiya. 4Aiphuo bw arwbw kothe selengrokni dayw ringjajak borogroknw imwnw sagwi hokha, 'Naidi, ang ani damararok tei baithak dega roknw tanwi pana jugaljak. Tabok jotho jugalwi paikha, nokh phaidi.'
5"Matwr o ringjajak nagorairok selengrokni kok gelan rwyagwi kaisa bini bario thangkha tei arw kaisa bini sakni samungw thangkha. 6Arw jebwrok turokjak bok jotho bugrani selengroknw rumwi lachi phunukkha tei buthalwi pairwkha. 7Aiphuo bugra thamchi kasukkha tei bini birindia roknw hogwi o buthalnai roknw nachra khalaikha arw bokni aulinw sogwi pairwkha. 8Jerw bw bini selengroknw sakha, 'Kailabarini pana jugaljak, matwr naroai ringjajakrok imwni chogya. 9Obwni naikhlai nokh lama langtri thangdi tei jeswk borog malai jothonw kaijalabarini panao ringwi twbwdi.' 10Aiphuo o selengrok phatarw thangwi lama lamao thangwi gam chaya jenw mangkha jotonw ringwi twbwkha. Obwbai kaijalabari nok o nagoraibai kwplwng ongwi thangkha.
11"Obwni jerw bugra nagorairoknw naini bagwi bisingw phaywi nungkha, borog kaisa kaijalabarini ri chum chumya karwi orw phaijak. 12Bugra bwnw swngkha, 'Aphaksa, kaijalabarini rini bader tama khalaiywi irw habkha?' Bw mwngsa joba rwmanliya. 13Aiphuo bugra selengroknw sakha, 'Imwni yak yathwi khagwi phatarw andarw kokholwi hodi. Odayw borogrok karablainw tei tentrokmabai buabai bua ullainw.'"
14Omw paikhlai Jisu sakha, "Kabangma borog ringjajak matwr kisasa borogse chongjajak."
Rom habugranw ol rwnai kothoyw
(Mark 12:13-17; Luk 20:20-26)
15Aiphuo Jisunw tama khalaywi Bini kokni khwiyw khibimannw obwnw lagwi Phorisirok thangwi rainal khalaikha. 16Bok Herodiyo#22:16 Herodio Herodiyorok ongkha bok jebwrok sakwlpha tei Romiyo habagra hinwi Herodni bosongrokni phaisingw tongw rokbai baksa bokni sakni kainwi kaitham sagrinw Jisuni dayw hokha. Bok Jisunw sakha, "Elim, chwng siyw Nwng kaisa khajua borog. Kaitorni lamani kothoyw Nwng kwbwi phwrwngma rwgw. Borog tama bakha kanw kaya, obwbai Nini mwngsa thangya, twmwi hinba Nwng kaisani makhang naywi samung tangya. 17Halai Nwng sadi Mosini kerongni maping Romni habugranw ol rwthai kalayw na kalaiya? Nwng ta bakha ka?"
18Bokni khani chaya bachung siywi manwi Jisu sakha, "Phatrarok, tamani bajaywi naidok? 19Je rangnw ol rwthai obwni kwrwngsa Anw phunukdi." Bok Jisuni dayw dinar#22:19 dinar dinar khoksa ongkha kaisa mula tangnai ni salsani rang. lepsa twbwkha. 20Aiphuo Jisu boknw swngkha, "Imwni sakagw i mangpli bai bwmwng swrwni?"
21Bok sakha, "Koisorni."
Jisu boknw sakha, "Hai jebw Koisorni obwnw Koisornw rwdi, tei jebw Kaitorni obwnw Kaitornw rwdi."
22I koknw khanagwi bok amok chakha tei bok Bwnw yakarwi thangkha.
Teisakthani kothoyw salailaima
(Mark 12:18-27; Luk 20:27-40)
23O salw kainwi kaitham Sodduki#22:23 Soddukirok ongkha bok jebwrok phwrwngw Mosini kangba bijap Elembakni jothoni naikhalai nangru. Bok suari, phala tei teisakthang tongw hinwi paitokya. Jisuni orw phaikha. Matwr Soddukirok borogrok thwinai jerw arwbw langma mannw hinwi paitokya. Aithani bok Bwnw swngkha, 24"Elim, Mosi sajak, jwtini kaisaswk borog basamanya karwi bihiknw kalangwi thwywi thangw hai o thwijakni takhuk khamka o randinw lagwi basa lathai tei o basanw thwijak takhukni bosongcheng hinwi hinjanw. 25Bok takhusini tongw. Jothoni okara bwrwi lagwi basa ongyakho suni thwywi paikha aithani bini bophoyong o randinw lakha. 26Arai khalaywi jotho takhukrok o randinw lakha arw basa ongyakho suni thwiywi paikha. 27Paithakgw o birimabw thwywi paikha. 28Jephini thwijak borogrokni teisakthang ongnw aiphuni bw swrwni bihik ongnai? Boklai jotho bwnw lajak."
29Jisu boknw sakha, "Nokh krodok, twmwi hinba nokh elembakbw siya, Kaitorni pharannwbw siya. 30Twmwi hinba teisakthang ongnairok bok labw laiya tei kaibw kaiya, arai khalaywi bok chukhao suarirokni kosol ongnw. 31Matwr Kaitor nokhnw teisakthang lagwi jebw sajak, obwnw ta nokh elembakgw pokrejiya? 32Bw sajak, 'Ang Abrahamni Kaitor, Isohakni Kaitor tei Jakobni Kaitor.' Matwr Kaitorlai thwijakrokni Kaitorya Bwlai kathangroknise Kaitor."
33I koknw khanagwi borogrok bini phwrwngmabai amok chalaikha.
Jothoni naikhalai gara tholmwng
(Mark 12:28-34)
34Phorisirok jephuo khanaka Jisu Soddukirokni bukhok phwngwi rwjak ephuo bok thumjalaikha. 35Bokni bisingni raida ikimni phwrangsa kaisa Jisunw bajaywi naini bagwi swngkha, 36"Elim, Moshini kerong nalni bisingw jothoni naikhalai gara tholmwng bwbw?" 37-38Jisu bwnw sakha, "Jothoni naikhalai manchuk tei nangru tholmwng ongkha, 'Nokh nokhni jotho kha, singli tei bakha rwgwi Subrai Kaitornw hamjakdi.' 39Obwni jerwni nangru tholmwng ongkha pwilani kosol 'Nini nokarinw nini sakni kosol hamjakdi.' 40Mosini jotho kerong nal tei diyarirokni jotho phwrwngma i kwrwngnwi tholmwngni sakagwse khatonw."
Jisu raida phwrangsa roknw swngkha
(Mark 12:35-37; Luk 20:41-44)
41Phorisirok thumjalaikhai Jisu boknw kok khoksa swngkha, 42"Khristoni kothoyw nokh ta bakha ka? Bw swrwni bosongni basa?" Bok sakha, "Dayudni bosongni basa."
43Aiphuo Jisu boknw sakha, "Hai Dayud tama khalaywi Bwnw phala katharni twidulmung bai Subrai hinwi ringkha? Bw sakha,
44'Subrayung ani Subrainw sakha,
Nini kenaroknw ang nini yathwi tolagw tonyasak nwng Ani yagara aita achukdi.'
45Hai Dayud jwtini Bwnw Subrai ringw halai Bw takhalaywi Dayudni bosongni ongman?" 46Imwni jobagw bok Bwnw kok khoksabw samanliya tei o salni jimin Bwnw mwngsachwk swngni kaisanibw sagwn ongniya.
ទើបបានជ្រើសរើសហើយ៖
Mothi 22: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
