Prerit 9
9
Solni kha phirokma
1-2Ijang aita Sol Subraini sagri roknw buthalni hinwi sikridok. Damesko aulini thumnok rokni Jihudi roknw phunokni bagwi bw hakra chontaini dayw thangwi kwrwngsa ongmiti koktun bikha. Jeswk borog Jisuni lamao him, bok chala ongthwk eba birok ongthwk, bw boknw mangkhalai Jirusalemw khagwi twbwni bagwi juaima bikha. 3Lamao thangtwi thangtwi jephuo bw Dameskoni koreyo sukhphaikha aiphuo chukha daini atakkiya khalaywi bwnw kitingwi por kalaikha. 4Bw hao kalaikha arw khanakha kaisaswk bwnw sadok, "Sol, Sol, nwng tamani Anw iswk satokma khalaidok?"
5Sol swngkha, "Subrai, Nwng swrw?" Bw sakha, "Ang Jisu, jebwnw nwng satokma khalaidok."
6"Tabok nwng bachagwi aulio thangdi. Tamanw khalaijanai obwnw nwnw sagwi rwnw." 7Je borogrok Solbai baksa thangdok bok amok chagwi bachagwi tonglaikha. Bok kok khanajak matwr kaisanwbw nungjiya. 8Jerw Sol ha daini bachakha, matwr mokol phiyokhalai mwngsabw nungliya. aiphuo bini logisongrok yak rumwi bwnw Dameskogw tilangkha. 9Saltham jora Sol mokol nungniya arw mwngsabw chaniya.
10Damesko aulio Ononiyo mwngni sagri kaisa tongw. Subrai bini dayw nungjagwi bwnw sakha, "Ononiyo!"
Bw sakha, "Subrai ibile ang."
11Subrai bwnw sakha, "Bachadi, tei 'Uju' mwngwi je lama tong nwng o lamagw thangdi. Odayw Jihudani nok rutubdi. Odayw Tarso daini phainai Sol hinwi borog kaisa tongw, bwnw naitubdi, tamni hinba bw suri sandok. 12Sol suri sanphini nungkha je, Ononiyo mwngni borog kaisa phaywi bini basagw yak rwkha, bw arwbw nungnaitwi."
13Ononiyo sakha, "Subrai, ang kodur borogni dayw i borogsani kothoyw khanajak. Jirusalemw Nini kathar borogrokni sakao bw je satokrok khalaijak obwnwbo ang khanajak. 14Tei irw jeswk borog nwnw paitok, boknw rumwi tilangni bagwi bw chontai ojarokni daini baithak juaima lagwi phaijak."
15Matwr Subrai bwnw sakha, "Nwng thangdi, tamni hinba Bejihudirokni tei bokni bugrarokni arw Israyelrokni dayw Ani kothoyw pirni bagwi Ang i borogsanw saywi lajak. 16Ani mwngni bagwi bw bwswk tekto masoinw, Ang bwnw obwnw phunugwi rwnai."
17Aiphuo Ononiyo o nogw thangka arw bisingw hapkha tei Solni basak sakao yak rwgwi sakha, "Takhuk Sol, irw phainai lamagw jebw nwngbai nungjakha Bw Subrai Jisu. Bwse anw homani nwng nini nungnai phran philwi mannaitwi arw Phala Katharbai kwpwlwng ongnaitwi. 18Loge loge bini mokol daini aa bwphwrni kosol mwngsaswk kalaikha, tei Sol arwbw nungkha. Jerw bw bachakha tei baptismo lani bagwi thangkha. 19Obwni jerw bw mwngsaswk chagwi bini phran philwi mangkha.
Sol Dameskogw pirkha
Sol Dameskoni sagrirokbai baksa salnwi saltham tongkha. 20Tei bw jatejar thumnogw thangni rumkha arw Jisuni kok pirni rumkha. Bw saba, "I Jisu ongkhadwi Kaitorni Sajla." 21Bini kok khanagwi jothobw amok chalaikha. Bok saba, "Imw tama o borogyadwi jebw Jirusalemw jebwrok Jisuni mwngnw paitoklai boknw satokma khalaiyw? Tei idayw bw Jisunw paitoknai roknw rumwi chontai ojarokni dayw tilangni bagwi idayw phaiyadoi? 22Sol matwr arw pharan ganang ongwi kani nangkha arw Jisuse je Mosiho obwnw majra khalaikha. Bini pirmungni bagwi, Dameskoni Jihudirok tanw paitokthai omonw bujiywi manliya. 23Obwni kabang salni jerw Jihudirok Solnw buthalni bagwi kokchap khalaikha. 24Matwr Sol bokni kokchapni kok sikha. Bwnw buthalni bagwi Jihudirok aulini jotho haplamw salbai horbai mwrwkni nangkha. 25Matwr oaisa horw Solni sagrirok Solnw kwrwngsa khoparao budok khagwi chukdebalni hakor kwrwngsatwi phatarw akhorwkha.
Jirusalemw Sol
26Sol Jirusalemw thangkha tei sagrirokbai baksa daljani chaitokha, matwr bok jotho bwnw kiriyw. Bok paitok laimanliya je Sol daijw kaisa sagri ongkha. 27Matwr Barnoba Solnw goseywi lagwi pirisairokni dayw tilangwi thangkha. Dameskoni lamao Sol tama khalaywi Jisunw nungkha tei Subrai Jisu je bwbai kok sajak tei tama khalaywi bw Dameskogw kharagwi Jisuni mwng pirkha, o jotho kok boknw sakha. 28Sol Khristo paitoai rokbai baksa Jirusalemw tongw, bw odaini jotho jegao thangwi kharagwi Subraini mwng pirni nangkha. 29Bw Grik kok sanai Jihudi rokbai tokra rwjak hinwi bok bwnw buthalni bagwi chaitokjak. 30Paitoairok i kok khanagwi bwnw Kwisoriya aulio tilangkha arw bwnw Tarso aulio hoka. 31O jorao Jihudiya, Galil tei Somoriya amchoini mothagw khakchangma tongw, tei o motha karak ongwi kajak. Paitoairokni remthaibo bangwi thangdok twmwi himba bok Subrainw kiriywi tongthangw arw Phala Katharni khabaja manw.
Ludda kami tei Japho aulio Pitor
32Pitor jotho jegao berektwi berektwi Ludda kamio Kaitorni je borogrok tong bokni dayw phaikha. 33O kamio Pitor Oiniyo hinwi kaisa borogbai malaikha. Bw boya biyaramw bisi char twtwi thuyamw kalaywi tongjak. 34Pitor bwnw nungwi sakha, "Oiniyo, Jisu Khristo nwnw hamrwkha. Bachadi, nini thuyamnw tisagwi ladi." Tei aiphuo Oiniyo bachakha. 35Aiphuo Ludda kamini tei Saron jilani jotho borog Oiniyonw nungwi Subraini aita philkha. 36Japho aulio Tabitha mwngwi sagrijwk kaisa tongw. Grik kokbai bini bwmwngni sema ongkha Dorka. Bw jwnwmbiti kotherokni hamkar khalaiyw tei bigra roknw chubao. 37Pitor jephuo Luddao tongdok aiphuo Tabitha haya kalaywi thwikha; aithani bok bini mang gwdanw twi kurwgwi sakani khadalw mokholwi tonkha. 38Japho ongkha Luddani koriyw. Aithani bagwi sagrirok jephuo khanakha je, Pitor Luddao tongw aiphuo bok borog kainwinw bini dayw hogwi bwnw ai hinwi kabokkha, "Nwng dodogwi kisa chini dayw phaidi." 39Aiphuo Pitor bokbai baksa thangkha. Bw odayw suikhalai bwnw o sakani khadalw tilangkha. Tei jotho randirok aiphuo Pitornw kitingwi bachagwi karapni nangkha arw Dorka kathang tongphini je richum takjak obwnw Pitornw phunokni nangkha. 40Pitor jothonw nokni phatarw akhorwgwi yesu mokromwi suri sankha. Obw paywi o mang aita naikhogwi bw sakha, "Tabitha, bachadi!" Obwbai bw mokol phiyokkha tei Pitornw nungwi bachagwi achukha. 41Aiphuo Pitor bini yak rumwi bwnw bachani chubakha. Obw paywi bw Kaitorni borogroknw tei randi roknw ringkhogwi boknw phunokha je, Dorka thangwi bachakha. 42I kok Japho aulini jothobw silaikha arw kabangma borog Subrainw paitokkha. 43Japhogw Simon hinwi kaisa tongw, bw mwikurni samung tangw. Pitor bini nogw kabangma sal tongjak.
ទើបបានជ្រើសរើសហើយ៖
Prerit 9: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
