Luke 7
7
Jisɔs Ɔgɔk Oyo-uvɔk Onwi-ukiɔ Rome
(Mattiu 8:5-13)
1Kini Jisɔs egre ovid ukpiekpɔ ma otu-enwi, Onyi ɔluk uduŋ Capernaum.
2Ene, oyo-uvɔk onwi-ukiɔ gi omu ɔgɔduŋ ku uduŋ onu, omu onyi eme eti-eti, ɔlɔŋɔ ɔnɔŋ okpɨne idikpa.
3Ku ini onwi-ukiɔ Rome egei abaŋa Jisɔs, onyi ɔdɔŋ ikpɨno enwi Jew ega ebɨne Onyi, ekpe onyi ubɔk yak onyi azaŋa ma emu odi odigɔk oyo-uvɔk izighi.
4Ku ini emu edizim Jisɔs, emu ekpeh onyi ubɔk eke-eke omu ogu, ku okpɨno onwi-ukiɔ omu odo su ovu ɔnɔ onyi uwam,
5“sia ku onyi eme enwi ima Jew enyin, ɔgɔnɔŋ ɔfuɔ Synagogue ɔnɔ enyin.”
6Ene Jisɔs azaŋa ma emu aga uvɔk okpɨno onwi-ukiɔ Rome onu. Ku ini omu Onyi okpine uvɔk, onwi-ukiɔ onu ɔdɔŋ ima nzaŋ izighi ɔnɔ Jisɔs egedɔghɔ Onyi ogu, “Ɔfɔŋ, kufɨna ile ovu idiluk idi uvɔk ɔmi-ou sia gu omi numa ondo su ovu ɔzɔu ubughu ɔluk ku uvɔk ɔmi-ou
7ɔmi ondo ididi ibɨne vi-ou. Onu kap nɔ usi kpughu ovu ala onu, ku oyo-uvɔk omi ma ɔsɔ egei ntu-ile.
8Nzughu omu ku ntak omu omi ŋgo nnu onwi omu mbak ku idak ugra onuŋ enwi, nnɔŋ nji ima ukiɔ omu ebak ku idak omi. Ndɔghɔ ki ku otu emu, ‘Ka kogu,’ onyi aga; ndɔghɔ ki onuŋ, ‘Di mu,’ onyi odi; nnɔŋ ndɔghɔ oyo-uvɔk omi, ‘Ne uto omu,’ onyi ene.”
9Ile akpa Jisɔs kini omu onyi egei nsiŋi onwi-ukiɔ onu. Onyi eliek ese otu enwi omu egegɔŋ Onyi ku adai ɔdɔgɔ, “Ami ndɔghɔ evu ŋgu ku onwi Gentile omu ɔbuɔd-ile ku omi oke enwi omu ŋkid ku Izruel!”
10Onu kini omu ima nzaŋ okpɨno onwi-ukiɔ onu esɔ enyɔŋɔ ega uvɔk izighi, emu egid ku oyo-uvɔk omu ɔgɔlɔŋɔ onu ɔsɔ egei ntu-ile.
Jisɔs Ene Oyo Ebi-Ukpa Ezed
11Ku ima use ama egefei, Jisɔs aga uduŋ gi omu eku Nain. Mbed Izighi ma awak-iwak otu-enwi ezaŋa ma Onyi.
12Onu sughu Onyi azaŋa ozɨm inue nniŋi-edighi ɔkɔ uduŋ, emu egid sughu ebio okpu uyo ulap-oyo ewɔ edi idika iluɔk, ŋgugre oyo onu eke izighi; ndien enwa onu ebi-ukpa. Awak-iwak enwi omu esi uduŋ onu enɔŋ ezaŋa ma onyi eka idiluɔk oyo izighi.
13Ku ini omu Ɔfɔŋ Jisɔs ogid enwa onu, Onyi efei onyi isɨghe. Nu ɔdɔghɔ-dɔghɔ onyi ogu, “Kusɔ ufei-ou.”
14Jisɔs azaŋa okpine ɔnɔŋ ɔtɔu okuu-on. Ima omu egebio okuu onu etuakela. Jisɔs ɔdɔghɔ, “Ulap-oyo, ndɔghɔ vi ŋgu Laghala.”
15Ulaga-ulaga onu, onyi omu agakpa onji uwem alagha etei ɔnɔŋ ɔtɔŋɔ idizughu nsiŋi. Jisɔs ebei onyi ɔsɔk eke izighi.
16Ku ini enwi egid su Jisɔs ene, ovid enwi ebak ku ubighe ma mkpaile. Emu etro Abazi ogu, “Onji-ulu prɔved mmɔgu abak ma enyin; Abazi odi idi-inyiaŋa enwi izighi.”
17Ene, etu omu abaŋa Jisɔs atra ɔyɨghɔ ovid Judea ma ovid-evid ŋgan-ŋguk ikpɨghe onu.
Jɔhn Ɔluɔk-Onwi-Mmɔŋ Obid Abaŋa Jisɔs
(Mattiu 11:2-19)
18Ku ini Jɔhn Ɔluɔk-onwi-mmɔŋ ozug abak ku uvɔk-mkpɔkɨbɔ, Mbed izighi ezughu enɔ onyi ovid-kpɔ su Jisɔs ene.
19Ene, Jɔhn okuh mbed izighi iba edi, ɔnɔŋ ɔdɔŋ emu ega ebɨne Ɔfɔŋ Jisɔs egebid Onyi ogu, “Ovu onu Krais omu Abazi ɔgɔnwɔŋɔ odidi-em, numa enu itei ibi onuŋ onwi?”
20Ku ini mbed iba onu edizim Jisɔs, emu edɔghɔ onyi, “Jɔhn Ɔluɔk-onwi-mmɔŋ ɔdɔŋ enyin idibɨne vi ilaga ibid vi, ‘Su ovu onu Mezaya omu Abazi ɔgɔwɔŋɔ odidi-en, numenu itei ibi onuŋ onwi?’”
21Ku ata ini onu mbed onu Jɔhn edizim, Jisɔs ɔgɔk awak-iwak ulɔŋɔ, ma ima omu ndiɔk spirit ɔtughɔre; alagha ene awak-iwak ima nsie emɔ kpɔ.
22Non ku Jisɔs ɔbrɔ mbed onu Jɔhn iba onu ogu, “Ega, enɔŋ egezughu enɔ Jɔhn ima kpɔ su evu egid enɔŋ egei omi nne: sughu ima nsie emɔ kpɔ, ukughɔ ezaŋa izaŋ, ima akpa-mvia ele, ɔtɔŋ esɔ egei kpɔ, ima akpa-mkpa esɔ enji uwem, mmɔgu ŋkwrɔ edɨghe etu nnɔ ima ufei.
23Nɔŋ dɔghɔ Jɔhn ogu ku Abazi ma ɔdiɔŋ ima omu nume enji eyighe ku ntak Omi.”
24Ku ini omu nzuŋ-uto iba onu Jɔhn esɔ enyɔŋ, Onyi ɔtɔŋɔ idizughu inɔ otu enwi ibaŋa Jɔhn. “Ku ini Jɔhn ɔkwrɔ-ikwɔ nzi ku evu egewuŋɔ ega ku mkpakaŋa-izɔŋ idise? Onu ebɨne omu ovum enyiŋe?”
25“Numenu zon, egre ebaŋa nzutɔ onwi omu evu egewuɔ ega idise. Onu onwi omu ɔdɔŋɔ ntu-urue use? Sia ima omu edɔŋɔ ntu-urue use elagha edu idɨghe ndu ebak ku ikpino uvɔk ifɔŋ.
26Numenu zon, egre ebaŋa nzutɔ onwi omu evu egewuŋɔ ega idise. Egega idigid prɔved? Inh, ku akpanikwɔ Jɔhn ogonu prɔved. Onu ndɔghɔ evu ku onyi onu okpe-okpe ku otu ima proved.
27Jɔhn onu nzuŋ-uto omu prɔved ki egewid ebaŋa ku ŋwid Abazi ogu: ‘Se, Ami ndɔŋ nzuŋ-uto omi efei vi onji, Ɔfɔŋ ma awra odi, ediɔŋ eke-odighi omu onyi idizaŋa ifei,’
28Ami ndɔghɔ evu, ku otu ovid su emina ku iso izɔŋ ebak omu okpo oke Jɔhn Ɔluɔk-onwi-mmɔŋ-ou. Onu onyi-omu ɔsugɔre oke ku uduŋ ufɔŋ ugra Abazi okpo oke onyi.”
29Ku ini ovid enwi egei omu, kpa ma ima ɔbɔghɔ utip, enyime ku Abazi enen, sia emu egebɔghɔ uluɔk-mmɔŋ esi ubɔk onu Jɔhn.
30Onu ima Farisi ma ima ekpiek-ibed ekɨn uduak Abazi ku abaŋa emu, sia emu egin idibɔghɔ uluɔk-mmɔŋ isi Jɔhn.
31Onu Jisɔs aga-onji ɔdɔghɔ ogu, “Su ndide enwi emina omu ndɨme ma nzi? Se sughu emu ela onom.
32Emu ela su eyontighitek omu etei ebre-ubre ku ufɨne urue enɔŋ ekpɔk eku ima ogu, ‘Enyin igifid oni-ini ikwɔ ku ukpɔŋ inɔ evu, onu evu ineŋ-uneŋ-ou. Enyin isɔ ikwɔ ikwɔ mvughɔ inɔ evu, onu evu ifei-ou.’
33Evu ela su eyo-ntighitek onu sia kini omu Jɔhn Ɔluɔk-onwi-mmɔŋ ogodi, elie utuk-utak ŋkilie-o enɔŋ enwɔŋ mmi-ou. Onu evu edɔghɔ ku ‘onyi onji ndiɔk spirit.’
34Onu omi, Oyo Onwi ndi, nlie su onwi elie nlagha ŋwɔŋ mmi, onu evu egin mi egu, ‘Seseh, onwi omu elikpɔ alagha ɔnwɔŋ kpɔ ku inue ɔdiɔk alagha onu nzaŋ ima ɔbɔghɔ utip ma ima ene-udiɔk-kpɔ!’
35Onu mvuvak Abazi ɔwuɔ alasu akpan-ikwɔ ku ile onu ima omu egɔŋ onyi.”
Jisɔs Alagha Ɔnɔ Enwa Ene-Udiɔk
36Use ki, Saimɔn omu ogonu ki ku otu ima Farisi okuh Jisɔs odi uvɔk izighi odilie ŋkilie mbresi ma onyi, Onyi ɔnɔŋ aga uvɔk izighi aga atuak etei idiliekpɔ.
37Ku uduŋ onu onyi enwa ki omu odu ndiɔk ndu, kini omu onyi egei ku Jisɔs mmɔ etei elie kpɔ ku uvɔk onwi Farisi omu. Onyi ebei ntu-urue otu omu ede utighe alabaster ene omu ɔdɔŋɔ oni-ulu ara aga nonu.
38Onyi ala abina uku onu Jisɔs ɔtɔŋɔ idifei esi. Sughu onyi osu ku izɔŋ, mmɔŋ-esi izighi ɔtɔŋɔ idibid onyi uku, onyi ɔnɔŋ ede idi ubughu izighi ɔkwuɔk Onyi uku; onyi ku ukpono, azam uku izighi inue, alagha ede oni-ulu ara onu ɔviɔŋɔ onyi ɔnyɔŋ uku.
39Onu kini Farisi omu ogoku Jisɔs odi ogid kpɔm, onyi ozughu ku ɔvɔghɔ ogid izighi ogu, “Onugu onwi omu omonu ata prɔved, onyi ama avak nzutɔ enwa onu enwa omu ɔtɔu onyiem, onyi amavak ido izighi ku onyi onu ene-udiɔk-kpɔ.”
40Jisɔs ɔbrɔ ogugre izighi ogu, “Saimɔn, nji su ndinzughu nnɔ vi.” Onyi ɔbrɔ, “Ɔfɔŋ, sughu iseh.”
41Jisɔs ozughu mbuk omu ɔnɔ onyi, “Ku ini gi ku, onji enwi iba omu ɔbuɔd-ɔkɔuk ɔgɔbuɔd emu ɔkɔuk. Onwi gi ɔgɔbɔghɔ onyi ɔkɔuk use uto ikie-itiŋ onyi ogu ɔbɔghɔ okuk use uto aba-lughu.
42Onu kini enwi iba onu egebɔghɔ ɔkɔuk onu numegɔd esɔ ekpei ezighi, onyi abiad izɔŋ onu ozighi ɔnɔ emu onwi-iba. Sughu nɔ mi ise, nuŋonwi ku otu emu onu odime onwi onu ike?”
43Saimɔn ɔbrɔ, “Ŋgre ku onu onyi onu ɔgɔbuɔd ɔkɔuk okpo oke-n odime onyi ike.” Jisɔs ɔbrɔ Saimɔn, “Ibrɔ ovu onu nnen-nen.”
44Jisɔs eliek onji ose enwan ɔnɔŋ ɔdɔghɔ Saimɔn, “Ogid su enwa omu enem? Kini omu ŋgundi uvɔk ovu, ovu unɔ mi mmɔŋ nsi ntɔŋ ku uku-ou. Onu enwa omu osi mi uku ma mmɔŋ-esi izighi alagha ede idiih ubughu izighi ɔkwɔk ɔzighi.
45Ovu ugukɔ mi ku asaŋa-zaŋa odighi su nzaŋ-o, onu enwa omu etre idizam uku omi inue tɔŋɔ kini omu nluk ndi-ou.
46Ovu ugu ukpono mi ku idide ara isi mi ku ubughu-ou, onu enwa omu ede oni-ulu ara ɔviɔŋɔ mi ku uku.
47Ndɔghɔ vi ku akpanikwɔ ku Abazi eme idilagha-inɔ onyi ovid-evid udiɔk-kpɔ izighi, ntak onu ene onyi ɔwuɔ mi ɔtuŋituŋ ima ma ogid-ekɔ. Ku ukpughɔre, onwi omu ogre ku Abazi odiven ntiti udiɔk izighi onyi odiwuɔ ntiti ima.”
48Ene Jisɔs ɔdɔghɔ enwa onu, “Nne, ami nyime idilagha-inɔ vi ku ovid-evid udiɔk-kpɔ omu ovu ene.”
49Onu ima omu egetei ma Jisɔs elie kpɔ ebid ile emu, “Nzi ku onwi omu ogre imu inu? Onyi ogre ku imu inji ulu ugra idilagha-inɔ onwi ku udiɔk-kpɔ omu onu Abazi onyi-unɔgi okime idinyiaŋa enwi.”
50Onu Jisɔs aganji ɔdɔghɔ enwa onu, “Mbuɔd-ile ovu ku omi ene vi ɔfɔghɔ ku ima udiɔk-kpɔ ovu. Ka, yak Abazi aganji idinɔ vi emem izighi.”
ទើបបានជ្រើសរើសហើយ៖
Luke 7: ORX
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oro Bible by Beyond Translation is licensed under Creative Commons Attribution-ShareAlike 4.0 License.
