Luke 3
3
Jɔhn Ɔluɔk-Onwi-Mmɔŋ Atam Ɔkpɔ-Odighi Ɔnɔ Jisɔs
(Mattiu 3:1-6; Mark 1:2-6; Jɔhn 1:19-23)
1Ogonu ku ɔyɨghɔ izughe evuh ku esi ugra onu Tiberius Caesar ala-ubughu ugra Rome, Pontius Pilate onu agrigra ikpeghe Judea, Herɔd onu Ɔfɔŋ ku ikpeghe Galilee, oyoeke onu Herɔd, Filip, onu Ɔfɔŋ ku ikpeghe Ituraea ma Trachonitis, kini Lysanias onu Ɔfɔŋ ku ikpeghe Abilene,
2kini Annas ma Caiaphas egenu ima ikiŋi-ikoŋ ikɔuw Abazi, Abazi ozughu nsiŋi ɔnɔ Jɔhn oyo onu Zakrayah ku mkpakaŋa-izɔŋ.
3Onu Jɔhn azaŋa ɔluk ku ovid ngan-ŋguk uduŋ Jordan, ɔtɔŋɔ idikwrɔ ogu, “Egɨbare-ogid enɔŋ ebɔghɔ uluɔk-mmɔŋ man Abazi okime idilagha-inɔ udiɔk-kpɔ evu.”
4Jɔhn egene zom man ozu ma ima nsiŋi omu prɔved Izaya owid ku ŋwid izighi ku ɔnjiɔŋ odighi ini ogu, “Onwi ma ɔkpɔk ku mkpakaŋa-izɔŋ, ‘Ediɔŋ odighi enɔ Ɔfɔŋ ededi, ene onyi onu nnenen enɔ onyi.
5Ovid-evid utughu-utɨghe izɔŋ ma edɔŋ ɔyɔghɔ. Ovid-evid ukuaŋa-ukuaŋa odighi ma eneŋe; enɔŋ ene ima ŋkpotok-ŋkpotok ɔkpɔ-odighi edrɔ.
6Ndien ovid enwi ma egid anyiŋ-inyiaŋa omu Abazi ɔgɔdɔŋ.’”
Jɔhn Ɔkwrɔ Nsiŋi Abazi Ɔnɔ Enwi
(Mattiu 3:7-12; Mark 1:8; Jɔhn 1:24-28)
7Ene Jɔhn ɔdɔghɔ otu enwi omu egewuŋɔ edi ebine onyi idibɔghɔ uluɔk-mmɔŋ ma onyi, “Evu eyontighitek ɔnyiɔŋɔ! Niŋi su ɔgɔtɨnɔ evu ogu ebiak efɔghɔ uje-ogid omu odidi?
8Man evu ede efɔghɔ ubiom ikpe, ana evu edu uwem ku odighi omu ɔwuɔ ogu ku evu eneŋere egɨbare-ogid ekpɔŋ udiɔk-kpɔ eliek egɔŋ Abazi. Eguzughu ku ile evu, ‘Abazi edimgbmayn enyin uven sia ku inu eyo onu Abraham.’ Ku onu Ami ndɔghɔ evu ŋgu ku Abazi okɨme idine ndiyoŋ ntɨghe omu eliek enu eyo onu Abraham idide ikpughɔ evu.
9Ku akpanikwɔ, Abazi onim igid ku atak etuh. Ene, etuh sugi omu numewin edɨghe mvri, ma ekpɨghe onyi edio ku egaŋ.”
10Ene ndizuk enwi ku otu enwien ebid Jɔhn “Nzi ku Abazi ɔluŋɔ enyin ineh?”
11Jɔhn ɔbrɔ emu ogu, “Onogu onwi ku otu evu onji use-ile iba, yak onyi ayak ki ɔnɔ onwi omu nume enji sugi. Onugu onji ŋkilie, nɔ onyi emu nume enji sugi.”
12Ene, ima ndizuk ɔbɔghɔ utib egedi ebine Jɔhn edenim emu uluɔk-mmɔŋ. Emu ebid onyi ogu, “Eti, nzigu enyin idine?”
13Onu onyi ɔdɔghɔ emu ogu, “Eguke enwi ubɔk ubɔghɔ ufei uyak su ugra Rome ewɔu evu ebɔghɔ-ou!”
14Kpa su onu ŋgo ku ima ukiɔ ebid onyi ogu, “Nzi ku enyin idine?” Onyi ɔdɔghɔ emu ogu, “Eyɔu ku ŋkpɔ-oyo-uto evu, egunɔŋ ude ulu ubɔghɔ enwi unji emu ku ŋke-ubɔk, egunɔŋ ubiom onwi ikpeku ŋkpɔ omu onyi numene.”
15Ovid enwi egetei ku uduonji, ebi onyi omu egezighi edɔŋ ogu odi ulagha-ulaghan, emu egenɔŋ egre ebaŋa Jɔhn, su onu onyi omonu Krais.
16Jɔhn ɔbrɔ ovid emu ogu, “Ami nde mmɔŋ nnim evu uluɔk-mmɔŋ; onu onwi mmɔgodi omu okpo oke mi. Omu omi numa-ondo iditra ikpeku izighi sughu oyo-uvɔk omokeme idine. Onyi mma ɔluɔk enwi mmɔŋ ku Elile Spirit ma nɔŋ ede egaŋ osi enwi eleh.
17Krais alazu ɔtɔ-ukɔ omu aga okpɨno ugeŋ-kpɔ. Onyi ma nɨŋere egeŋ mkpogro izighi ɔzuŋɔ ku mfuu, ɔnɔŋ ataŋ mkpogro izighi ɔdɔŋ ku ize, onu Onyi ma ɔvɔuw mfuu onu ku egaŋ omu nume-dinɨme-nɨme.”
18Ku utɔ ntakan, Jɔhn ogozughu edɨghe etu ɔnɔ enwi, ɔnɔŋ ede awak-iwak ukpiek-kpɔ ɔnɔ emu itei edegɨbare ogid.
19Onugu ndisuk ini Jɔhn etei ezughe ɔnɔ Ɔfɔŋ Herɔd, ku ntak omu onyi egebei ŋwa oyo-eke izighi Filip ɔlɔ, omu egere nwa-nu Herɔd. Jɔhn ŋgo ɔnɔŋ ezughe ɔnɔ Herɔd ku ima udiɔk-kpɔ ogu omu onyi ene.
20Ŋgo ku idibei idian gu ovid su Herɔd ene omu ɔdiɔk oken, onyi ididio Jɔhn ku uvɔk ŋkpɔgɨbɔ.
Jɔhn Ɔluk Jisɔs Mmɔŋ
(Mattiu 3:13-17; Mark 1:9-11; Jɔhn 1:29-34)
21Sughu Jɔhn ɔluɔk enwi mmɔŋ, Jisɔs ŋgo ɔgɔŋ odi uluɔk-mmɔŋ; onu kini Jisɔs ɔbɔŋ agam, heaven ɔkwuɔŋɔ.
22Ene, Elile Spirit etɨghe ku mbied ibiom odidu onyi ku ile, usi ɔnɔŋ osi ku heaven odi omu ɔdɔghɔ ogu, “Ovu onu emime Oyo Omi; ku ovu ku ami ŋgei uni-ogid.”
Mbuk Emina Onu Jisɔs Krais
(Mattiu 1:1-16)
23Ku ini omu Jisɔs onu ŋkpɔ su izughe edib-olughu, Onyi ɔtɔŋɔ idikpiek enwi kpɔ anwa-nwa. Egevag Jisɔs su oyo onu Josef, oyo onu Heli,
24oyo onu Mattathiah, oyo onu Levi, oyo onu Melchi, oyo onu Jannai, onu Josef,
25oyo onu Mattathias, oyo onu Amos, oyo onu Esli, oyo onu Naggai,
26oyo onu Maath, oyo onu Mattathias, oyo onu Semei, oyo onu Josef, oyo onu Judah,
27oyo onu Joannas, oyo onu Rhesa, oyo onu Zerubbabel, oyo onu Shealtiel, oyo onu Neri,
28oyo onu Melchi, oyo onu Addi, oyo onu Cosam, oyo onu Elmodam, oyo onu Er,
29oyo onu Joshua, oyo onu Eliezer, oyo onu Jorim, oyo onu Mattat, oyo onu Levi,
30oyo onu Simiɔn, oyo onu Judah, oyo onu Josef, oyo onu Jonan, oyo onu Eliakim,
31oyo onu Melea, oyo onu Menan, oyo onu Mattatha, oyo onu Nathan, oyo onu David,
32oyo onu Jesse, oyo onu Obed, oyo onu Boaz, oyo onu Salmon, oyo onu Nashɔn,
33oyo onu Amminadab, oyo onu Ram, oyo onu Hezron, oyo onu Perez, oyo onu Judah,
34oyo onu Jacob, oyo onu Aizik, oyo onu Abraham, oyo onu Tera, oyo onu Nahor,
35oyo onu Serug, oyo onu Reu, oyo onu Peleg, oyo onu Eber, oyo onu Shelah,
36oyo onu Cainan, oyo onu Arphaxad, oyo onu Shem, oyo onu Noah, oyo onu Lamech,
37oyo onu Methuselah, oyo onu Enoch, oyo onu Jared, oyo onu Mahalalel, oyo onu Cainan,
38oyo onu Enosh, oyo onu Seth, oyo onu Adam, oyo Abazi.
ទើបបានជ្រើសរើសហើយ៖
Luke 3: ORX
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oro Bible by Beyond Translation is licensed under Creative Commons Attribution-ShareAlike 4.0 License.
