I Kô-rir-tô 3
3
Masalah mưkavôm
1Pathau dei ai, nôk dahlak, dahlak ôh mưda đôm thong dei ai yau dôm mưnuix bha nưbi ginrơh, min yau đôm thong mưnuix rilo darah, yau dôm anưk kamar dalam Dê Krist. 2#Hê 5:12,13.Dahlak krung hu rong dei ai mưng ia tathau, mih ôh mưng kaya ƀang khang, kaywa dei ai jang ô ka lek ligeh bihu. Êng tal urak ni dei ai jang ô ka lek ligeh bihu, 3kaywa dei ai jang dok bha di rilo darah. Kaywa dalam dei ai jang hu gruk jhak hatai, mưrak gaup; yau nan, ôh njaup dei ai bha di rilo darah thong dok dang yau dunya ô? 4#I Kô 1:12.Tuk urang ni đôm: “Dahlak bha di Phao-lô.” Mưnuix pakan laic: “Dahlak bha di A-pô-lô.” Yau nan, dei ai ôh njaup nạn dunya ô? 5Yau nan, A-pô-lô nạn thei? Phao-lô nạn thei? Khol nhu lijang nạn dôm halun min, bloh tapa khol nhu nạn dei ai krung hu dial, yau Pô Lingik kamưnrat ka yāup urang. 6#Bruk 18:4-11. Bruk 18:24-28.Dahlak krung hu pala, A-pô-lô krung hu tuh ia min Pô Lingik krung hu ngak ka prong tagôk. 7Yau nan, mưnuix pala, ra tuh ia jang ôh nạn haget trah, min ciêt hu Pô Lingik nạn Dê ngak ka prong tagôk. 8Mưnuix pala, ra tuh ia jang yau gaup; yāup urang mưca tôk bihu jiên kong patui pak prưn drei. 9Kaywa khol dahlak nạn mưnuix ngak bruk thubik ka Pô Lingik;#3:9 mưnuix ngak bruk thubik ka Pô Lingik: Ngan nạn mưnuix harung ngak anưd Pô Lingik. dei ai nạn blang hamu Pô Lingik, nạn thang Pô Lingik.
Dê Krist nạn tathar Nhom Nưbi
10Tui karun hanim Pô Lingik krung hu ƀai brei ka dahlak, dahlak krung hu padok tathar drơh tha urang danok ragei ghơh, dok mưnuix pakan yơ darap di ngok, min yāup urang xang ajut ka ganap drei darap ngok tathar nan. 11Kaywa ôh thei hu mưda padok tha tathar pakan, lingiu di tathar krung bihu padok nạn Pô Yê-su Krist. 12Mưyah thei angui mưh, pariak, patau duri, kayau, harơk thu ngan pông nrang piêh darap ngok tathar nan 13yơ bruk ngak di yāup urang mưca bihu bhat tabiak. Harei bican inư mưca ngak pajip bruk ngak nan; mưca nhu gok parang tabiak dalam apui, thong apui mưca long iơk lingai bruk ngak di yāup urang. 14Mưyah bruk ngak thei darap ngok tathar bihu dok kadong, yơ mưca urang nan tôk bihu kaya alin. 15Dok mưyah bruk ngak urang halei gok cuh klāk yơ mưca lihik kaya alin; dok nôk urang nan, mưca bihu thi dong, min mưda yau tapa apui.
Mưnuix dial Pô nan huji Pô Lingik
16 #
I Kô 6:19; II Kô 6:16. Dei ai ôh thau laic dei ai nạn huji Pô Lingik, thong Nưbi Ginrơh Pô Lingik biđang dalam dei ai ô? 17Mưyah urang halei thantik huji Pô Lingik yơ mưca Pô Lingik thubang urang nan; kaywa huji Pô Lingik nạn likam, thong huji nan êng nạn dei ai. 18Jôi thei palwô pagat êng drei. Mưyah urang halei dalam dei ai đaka drei nạn jag karag tui ganap rai ni yơ xang gilaic jiơng gila gilit piêh bihu jag karag. 19Kaywa gruk jag karag lôg ni nạn hanrôi taba di anak Pô Lingik, yau hu vak laic:
“Pô mưk dôm urang jag karag
Mưng êng gruk lor kator khol nhu.”
20Thong:
“Pô thau laic dôm thangka mưnuix jag karag
Jang nạn ôh hu hanim.”
21Yau nan, jôi thei mưyeh ka mưrôxak. Kaywa abih gruk jang bha di dei ai; 22kanê Phao-lô, A-pô-lô ngan Sê-pha; kanê dunya gruk diup ngan gruk mưtai, urak ni ngan harei hadei; abih jang bha di dei ai, 23dei ai bha di Dê Krist, thong Dê Krist bha di Pô Lingik.
ទើបបានជ្រើសរើសហើយ៖
I Kô-rir-tô 3: CJM2024
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 Bible Society Vietnam. All rights reserved.