An Roma 10

10
1Anba̱rini, rina̱n de̱bc ri hatin na̱m'to̱n kwe̱, a cepks rin baa Na'Sila̱, i netnan Isra'ila kum d'gwa̱a̱ma̱. 2Rema̱n a̱m napk a ci za̱ksa̱n gaba̱m Na'Sila̱. A zatta la kaa s'nap da. 3Ai retin a ta nap le̱vka̱n hob d'le̱g baa Na'Sil da, a hobk a be̱le̱ hid na̱ le̱vk hyan ka̱n hob d'le̱g baa Na'Sila̱. Rema̱n taanlo, a ta kalasa hid na̱, a hob le̱vka̱n Sila balin da. 4I Ka̱risti a̱n sain be̱se̱da̱n gabma̱n giiras Mosa. I bat Sila ta le̱g koowe̱ a̱n batin d'ba̱t baa na̱.
D'Gwa̱a̱ma̱ i rem koowe̱
5Mosa ba̱tkska̱ ho̱da̱na̱n noc tu kumt d'le̱g baa Na'Sil a̱n gabma̱n giiras Mosa ho̱d uhna. U zeka, “Nocuna̱n gabin rihica̱ hna, tu po̱t rema̱n gabma̱n ca̱n.”#10:5 Go̱t ta̱m: Ggdk 18:5. 6Lalks Na'Sil vatk da̱n le̱gda̱n nan kum rema̱n bata̱m d'ba̱t baa Na'Sila̱. Sa̱ zeka, “Av ze la a̱n de̱bc rovo, ‘Iwe̱ a̱n tu el a'cona?’ ” Az u citta̱ Ka̱risti.#10:6 Go̱t ta̱m: Rsgi 30:12-14. 7“Alla a̱v ze, ‘Iwe̱ a̱n tu uv nu'copo?’ ” Az u po̱ta̱vsto̱ Ka̱risti da. 8Iye̱ la a̱n lalks Na'Sil zeine? Sa̱ zeka, “Lalks Na'Sil el d'viivi baa rovo. A̱n nwa̱a̱'a rov a de̱bc rov no.” Lalksa̱ ha̱n la, i lalkun bata̱m d'ba̱t baa Na'Sil u'na̱n c reina̱n d'ba̱sa̱.
9Awaz ge̱ ta̱'v vat a̱n nwa̱a̱'a rov az Ye̱so, i Kan Go̱mca̱n Kooye̱, a̱v bat ta̱m d'ba̱t baa Na'Sil a̱nmin de̱bc rov az Sila po̱to̱sko̱ o, ta̱'v kum d'gwa̱a̱ma̱. 10Rema̱n i a̱n c'de̱b a̱n noc tu batt d'ba̱t baa Na'Sil, Sila le̱gt o. I na'nwa̱a̱ ta̱m a̱n noc tu vat batma̱n ba̱ta̱d ru baa Na'Sil, Sila gwa̱a̱t o. 11Ho̱da̱na̱n ge̱nsa̱n lalks Na'Sil zetine, “Koowe̱ a̱n batin d'ba̱t baa Na'Sila̱, a tu ryaa m'e̱n da.”#10:11 Go̱t ta̱m: Isa 28:16. 12Kan Go̱mca̱n Kooye̱ za tu ka̱a̱ka̱nsi Yahude̱n a an zain Yahude̱n da. Kan Go̱mca̱n Kooye̱, i uda̱n. I unwa a̱n reina̱n go̱mca̱n kooye̱. Tu ne̱e̱ ta̱m koowe̱ a̱n po̱gin o u'pusu u rorke. 13Ho̱da̱na̱n lalks Na'Sil vattine, “Koowe̱ a̱n tu po̱g dind Kan Go̱mca̱n Kooye̱, nan gwa̱a̱ o.”#10:13 Go̱t ta̱m: Jo̱w 2:32.
14I'Le̱e̱le̱ kaa a̱n ta po̱gt kan a ta batin d'ba̱t baa ru da? I'Le̱e̱le̱ a̱n ta batt d'ba̱t baa kan a ta hongin da̱n unwa da? I'Le̱e̱le̱ a̱n ta hongte, awaz ka d'ba̱s za da? 15I'Le̱e̱le̱ a̱n ta emt d'ba̱sa̱, a za a na comk na̱ da? I ho̱da̱na̱n i retin a'ge̱n a̱n lalks Na'Sila̱, “Go̱t na ho̱da̱n hanm an ba̱sda̱n kasi lalk citin d'ke̱me̱.”#10:15 Go̱t ta̱m: Isa 52:7.
16Za la netnan Isra'ila kwe̱ an kabin kasi lalk da. Rema̱n Isaaya k'barav Na'Sil zeka, “Kan Go̱mca̱n Kooye̱, iwe̱ a̱n batin d'ba̱t u kabk rina̱n c vatine?”#10:16 Go̱t ta̱m: Isa 53:1. 17Rema̱n taanlo, bata̱m d'ba̱t baa Na'Sil lan baan honga̱m d'ba̱sa̱. Ba̱sa̱d ne, i ba̱sda̱n lalk Ka̱risti.
18A̱m ipkk la a̱m zeka, “An Isra'ila ta hong-hong d'ba̱s da?” Ke̱ng! A hongka. Rema̱n lalks Na'Sil zeka,
“Ba̱sa̱d na̱ cek koope̱
a̱n copun yanda̱hna.
Lalks na̱ cek ta̱m be̱se̱da̱n
copun yanda̱hna.”
19A̱m sudk ta̱m a̱n ipk a̱m zeka, “Netnan Isra'ila ta pamasa-pamasa bo̱ kaa da?” Na̱m'e̱te̱, a̱n daav Mosa, Sila zeka,
“Ta̱'m de̱l no a̱n em hyubud
netnanan rein nu'he̱n
az a ta gub a kum rihi i d'kau da.
Ta̱'m ko̱o̱ ta̱m no s'le̱b
a̱n netnanan rein kipni.”#10:19 Go̱t ta̱m: Rsgi 32:21.
20Isaaya k'barav Na'Sil sudk ta̱m a̱n vat a̱n c'a̱rma̱. U zeka,
“An ta laina̱n hob ri da,
a̱m de̱lk a he̱nk me.
An ta takina̱n hob a nap a̱m da,
a̱m kwesaka na̱ hid ri.”#10:20 Go̱t ta̱m: Isa 65:1.
21Da̱n tanin la netnan Isra'ila, u zeka, “A̱m tapk komc ri d'hwe d'biri rema̱n a̱m gwa̱a̱t netna c'honga̱mzan a an kandin ne.”#10:21 Go̱t ta̱m: Isa 65:2.

ទើបបានជ្រើសរើសហើយ៖

An Roma 10: driNT

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល