Markus 6
6
An Nazarat ha̱lk Ye̱so
(Mat 13:53-58; Luk 4:16-30)
1Ye̱so a an la̱a̱s baa run lagka va̱na̱n a lain a vaakka Nazare̱t, le̱i ru. 2An hweda̱n hwerad Yahude̱n cetaine, Ye̱so takaz la̱a̱sa̱m na a̱nmin ka̱bda̱n kargad Yahude̱ne̱. Neta̱n hwe̱di an hongin o, a sipk a'nwa̱a̱. A zeka, “I lanma̱n pe̱ a̱n a̱rm uha̱n kuma̱in goon rihica̱ hna? Ipe̱ u kuma̱in goon versa̱ ha̱n tu emt goon damran he̱tca̱ hna? 3Za ho se̱bgun lo, waav Me̱e̱ri da? Za Yakub a Isuhun a Yahuda a Simo̱n a̱n rein ha̱nun da? Za taha̱n a̱n ha̱nun yaa'yantan rein baa cinna da?” A ha̱lt bo̱ Ye̱so ta bato m'lade.
4Ye̱so zeta bo̱ na̱, “K'Barav Na'Sil ci k'gwin koope̱, a za a̱n le̱i ru, a baa an ba̱na̱ na̱, a buu run ta̱m da.”
5Rema̱n a ta bat d'ba̱t baa ru da, Ye̱so ta em rihica̱ c'he̱t hwe̱di a̱n a̱n'a da. Neta̱n i'hona an zattin m'ho̱o̱ka̱n da u do̱vin a̱n koma ru c'taa, u taask ta̱m na̱ s'malse. 6Robamda̱n batma̱n ba̱ta̱d na̱ baa ru de̱lk u sipk a'nwa̱a̱.
Ye̱so comk an la̱a̱s baa ru
(Mat 10:5-15; Luk 9:1-6)
Ye̱so to̱o̱t bo̱ u havk u paak c'bel a̱n la̱a̱sa̱m netna. 7U po̱gko̱ ta̱m oopa ni'il nanlo, u comk na̱ i'il-i'ila̱. U ne̱e̱k ta̱m na̱ we̱sma̱n vogma̱n rinnas'ce.
8Ye̱so zeka na̱, “An ze u'noko, an o̱m la rihi a za d'kyur da. An o̱m la k'bai alla d'gaa alla kind ta̱m da. 9To̱p na c'kaata, an o̱m la ta̱m kusa̱m hyan da a za ma̱n ciin a'to̱p da. 10Kooye̱ le̱e̱ya a̱n cetine, buuna̱n ciltine, soot na a̱n a̱n'a i caa no lagma̱n le̱ine. 11Aa ta marssa la no daat a ge̱ne̱te̱ no u'con da, to̱o̱ na. An ze u'to̱u, pezg na budgda̱n naas no, bat ti kwesa na̱ az Sila ta geda na̱ lalko.”
12A ruk la a emk d'ba̱s az neta̱n bita̱l c'hwin a lag c'ko̱to. 13A vega̱lk rinnas'ce hwe̱di. A swikiki ta̱m neta̱n hwe̱di an zattin m'ho̱o̱ka̱n da m'neve, a taasuz ta̱m na̱ s'malse.
Wa̱a̱'a Yohana
(Mat 14:1-12; Luk 9:7-9)
14Dind Ye̱so cek koope̱, i cek He̱ro̱d go̱m hongk da̱n da̱nda. Ahyan lak na̱m'ze az Ye̱so i Yohana kan emam na baptisma un wa̱in a̱n vaakaine. Az i rina̱n de̱lin bo̱ u lat a̱n emma̱n damran rihica̱ c'he̱te̱.
15Ahyan zeka az, “I Iliya.” Ahyan zek ta̱m, “I k'barav Na'Sil alla ta̱m da̱nv baranc Na'Sil an de̱hne.”
16An He̱ro̱d hongtin la rihica̱ hna, u zeka, “I Yohana, a̱rmuna̱n m de̱lin na gedk hid ru, a̱n vaakain u po̱tko̱.” 17He̱ro̱d vatk taanlo rema̱n u rumk Filip, kan dim va̱ ru, neta un nan po̱g Hiridiya. Yohana zeka la o az i ta ge̱be̱se̱ u rum kan dim va̱ ru neta da. Rema̱n taanlo He̱ro̱d de̱lt bo̱ na sipk o. Na de̱lk ta̱m o a̱nmin buu s'ko̱m bat tu pusa̱sa̱ Hiridiya c'de̱be̱.
18He̱ro̱d emk taanlo rema̱n Yohana ve̱ce̱ke̱ o m'ga̱u. U zeka o, “Giira ta ze az noc rum ha̱nu neta da.” 19I rina̱n de̱lin bo̱ Yohana ha̱lsta̱ Hiridiya, u to̱nt bo̱ u hwaa o. I ta ema la da a za He̱ro̱d se̱sk da. 20He̱ro̱d lak a̱n gela̱v Yohana, ai retin u napk az i noc kan gela̱v Na'Sil ta̱m kan zattin ri d'reb da. Rema̱n taanlo, u gadgk o. Kooye̱ daava u hongtin Yohana, de̱bc el ca̱n naa o. Puti a tan na, u el ge̱ tu ge̱ne̱ o u'con.
21A̱n d'be̱se̱, Hiridiya kumk d'ke̱e̱. I a̱n hweda̱n He̱ro̱d bantin go̱mgo̱ma̱n a so̱dka̱n koola̱n, a a nu'kuma̱n kwe̱ a̱nmin copun Galili, a han baa c'ryaak rema̱n za̱ngkta̱ca̱n bakasama̱n hweda̱n na mattin o. 22Waa'wantad Hiridiya hyoto bo̱ a̱n s'geta. I hot bo̱ He̱ro̱d a an sootin a unwan kwe̱ a̱n d'ke̱m hwe̱di d'kala.
He̱ro̱d zeta bo̱ d'waa'wanta, “Kon a̱m kooye̱ v to̱nine, mi la ta̱'m ne̱e̱ vo.” 23U be̱se̱ke̱ ta̱m u cwenkka o. U zeka, “Kooye̱ v konin me, ta̱'m ne̱e̱ vo. A to̱n i caa wankda̱n copun go̱mc ri.”
24Waa'wantad rut bo̱ da̱ havk da̱ ipkka̱ inu, “Iye̱ a̱n ma kona?”
Inu zeta bo̱ o, “Ze az na ne̱e̱ v hid Yohana kan emam na baptisma.”
25Waa'wantad ne ta naasa v'daa da. Da̱ uvka̱ a̱ndaabe baa go̱m da̱ zeka o, “A̱m to̱nk a̱v ne̱e̱ m hid Yohana kan emam na baptisma a̱nmi ni'sin a̱nta̱ma̱.”
26Go̱m emt bo̱ a̱m napka be̱ hwe̱di d'kala. Puti a tan na, rema̱n conko a e̱nm hamca̱n ru nu, u ta hol o da.
27Go̱m ta naas v'daa da, u comt bo̱ da̱nv an rega̱ds ru u geda hid Yohana a̱n buu s'ko̱mo̱. 28U dodka hid ne ni'sin u noktka u nesk waa'wantad ne. Waa'wantad nest bo̱ la ba̱da̱ inu. 29Daava̱n an la̱a̱s baa Yohana hongtin rihica̱ hna, a haka a o̱mk wa̱a̱d Yohana a havk a sagka.
Ye̱so ryaakska d'bugu
(Mat 14:13-21; Luk 9:10-17; Yoh 6:1-14)
30An c'comtnanan Ye̱so comin vaaktaine, a ve̱ce̱ke̱ o c'rihi kwe̱ ca emka̱llaine a rina̱n a la̱a̱sa̱in neta̱n na. 31Ye̱so zeta bo̱ na̱, “Na rwa̱a̱g taanz va̱na̱n neta̱n zain da na hwera.” U vat-vat taanl rema̱n neta̱n el na̱m'he̱e̱le̱ hwe̱di baa ru a an la̱a̱s baa ru nu. I de̱lk a ta kum ke̱e̱da̱n ryaam c'ryaak da. 32A to̱o̱t bo̱ a̱n bumbka̱ m'ho̱o̱ a rwa̱a̱gk a cek va̱na̱n neta̱n zain da.
33An neta̱n he̱ntin na̱ ta to̱o̱-to̱o̱, a napk la va̱na̱n ta hava, a somt bo̱ a baa na̱ u'cau. I neta̱n lanma̱n koope̱ a̱n nokain a̱n a̱n'a. 34An Ye̱so ruta̱in u he̱nk damran bugka̱n netna, u hongk za̱im na̱ rema̱n a el ho̱d kyo̱o̱mnanan zattin kac'go̱te da. U takaz la̱a̱sa̱m na̱ c'rihi hwe̱di.
35An hwed taatine, an la̱a̱s baa ru haka. A zeka Ye̱so, “I d'kad hna, hwed taak ta̱ma̱. 36Pya̱a̱ksa̱ neta̱n bat ta hav a̱n s'e̱se̱ a c'bel na a kum rina̱n a ryaine. Rema̱n a zatta rina̱n ta ryaa taha̱n da.”
37Ye̱so se̱sk la na̱, “Ryaaksa na na̱.”
A zeta bo̱ o, “Nan em yomkan we̱e̱ u'biri na kumt kindina̱n nan ryaaksta netna ha̱n d'hwe d'da̱n!” 38U ipkt bo̱ na̱, “I c'be̱re̱e̱di c'nai a̱n ciini? Nok na a̱n go̱to̱.”
Aa naptine, a zeka o, “I c'be̱re̱e̱di c'tan a̱n ge̱nn i'ila̱.”
39Ye̱so zek an la̱a̱s baa ru az a ze neta̱n a sweeta̱l a̱n c'gwe̱e̱ c'kasi c'ka̱n-c'ka̱n. 40A sweeta̱lk la c'ka̱n-c'ka̱n. Ka̱nc hyan neta̱n kwe̱zc c'il a̱n oopa-oopa, c hyan v'za̱ngu-v'za̱ngu. 41Au kabtin be̱re̱e̱dica̱n lo c'tan a̱n ge̱na̱n i'ila̱, u wa̱lkk a'con u emaka A'Sil c'bo̱mo̱. U bosa̱mt bo̱ ca̱ u nesk an la̱a̱s baa ru a nesa̱l netna. U we̱nka̱lke̱ ta̱m na̱ ge̱nnan lo i'il kowe̱ kumku. 42Na̱nna kwe̱ a ryaakk a cigka̱. 43An la̱a̱s baa Ye̱so kargsta bo̱ yatrana c'be̱re̱e̱di a ge̱na̱n an neta̱n ka̱ltin a hiisk c'gyo̱b oopa a̱n c'ila̱. 44Baan bugda̱n an ryain be̱re̱e̱dic ne, a̱rma̱n i s'kwe̱re̱ s'tan.
Ye̱so emk a'ha̱gc na̱m'ho̱o̱
(Mat 14:22-33; Yoh 6:15-21)
45A̱ndaabe Ye̱so de̱lk an la̱a̱s baa ru a uv a̱n bumbka̱ m'ho̱o̱ a pas a baa o a̱n caa le̱in Be̱tsaida. Unwa la tu baa soot u pya̱a̱ksa̱ netna. 46An Ye̱so pya̱a̱ksta̱in netna, u elk a̱n k'se̱m u cepkte. 47Gyop gedanta bo̱ an la̱a̱s baa Ye̱so lak a̱n bumbka̱ m'ho̱o̱ a̱n te̱ka m'saa. Ye̱so lak la a̱n k'bil unwa v'da̱n.
48Ye̱so he̱nto bo̱ na̱ a̱n ryaaka̱ d'kob a̱n cukma̱n bumbka̱ m'ho̱o̱, rema̱n e̱nc lak a̱n hwe̱e̱kse̱m na̱ a'ha̱gcu. Nu'Pun ga̱l s'ko̱m s'naase, Ye̱so nokk baa na̱ na'ha̱gc a̱n cona m'saa, u lak ai tu to̱o̱ na̱. 49Aa he̱ntin o na'ha̱gc a̱n cona m'saa, a el az i a̱ku, a kant bo̱. 50Gelk ryaak na̱ kwe̱ aa he̱nte̱in o.
A̱ndaabe, Ye̱so zeka na̱, “La̱ta̱sa̱ na c'de̱be̱, i mi, a gelk ryaa la no da.” 51U uvt bo̱ baa na̱ a̱nmi bumbka̱ m'ho̱o̱. E̱nc resuz la te̱kk a̱ndaabe. Na̱nna kwe̱ a sipk a'nwa̱a̱ rema̱n rihica̱ hna. 52I rema̱n a ta ke̱e̱se̱ rina̱n Ye̱so to̱nin la̱a̱sa̱m na̱ baan he̱tca̱n ryaaksam bugca̱n neta̱n a̱n be̱re̱e̱dica̱n lo c'hona da, a ta bat ta̱m d'ba̱t baa ru da.
Ye̱so taask neta̱n gaago
(Mat 14:34-36)
53An Ye̱so a an la̱a̱s baa run pastin m'saa a cek copun Janasare̱t, a gagk bumbka̱ m'ho̱o̱ a̱n k'bila̱. 54Aa ruta̱in a̱n bumbka̱ m'ho̱o̱, a̱ndaabe neta̱n napuz az i Ye̱so. 55A swema̱rta bo̱ lanma̱n e̱ssa̱n rigin ke̱e̱ca̱n lo kwe̱. A o̱mko̱ an gaag a̱n c'zega a noktka na̱ va̱na̱n a hongin az Ye̱so ello. 56Le̱e̱ma̱n u havin kwe̱ a s'herg ne a baad s'yo̱p no, neta̱n la̱ta̱lska̱ an gaag a̱n s'le̱ve̱. A konk ta̱m az u lag a do̱v, ai to̱n be̱, nwa̱a̱da̱n kusi ru. Geda̱n an kumin a do̱vk o kwe̱, gaag taak na̱.
ទើបបានជ្រើសរើសហើយ៖
Markus 6: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019