Yohana 12
12
Na bo̱ntsko̱ Ye̱so m'nev
(Mat 26:6-13; Mar 14:3-9)
1An he̱tda̱n Paska kustin c'hwe c'cihin, Ye̱so havk le̱in Betani va̱na̱n Lazaru, un Ye̱so po̱to̱so̱in rein a̱n d'sooco. 2Na emaka Ye̱so ryaakca̱n gyop a̱n a̱n'a. I Matta ta̱m a̱n wankine. Lazaru lak ta̱m baa an sootina̱n c'ryaak a Ye̱so no. 3A̱n daava̱n lo, Me̱e̱ri o̱mko̱ battaka̱n neva̱m d'ha̱ng ma̱n ceun nard, ma̱n kind hwe̱di. U bo̱ntsko̱ Ye̱so ma̱nma a̱n s'naa. U vaak u pink naas ru a̱n his ru. Buu ga̱ma̱nka̱ kwe̱ a̱n kosa̱n d'ha̱ngu.#12:3 Go̱t ta̱m: Luk 7:37-38.
4Da̱nv an la̱a̱s baa Ye̱so, un nan po̱g Yahuda Iskariyo̱ti, waav Simo̱n, un tu bab Ye̱so, ta hong d'ke̱m da. U zeta bo̱, 5“Iye̱ a̱n na babtin neva̱m d'ha̱ng ma̱ha̱n ko̱m pusin s'za̱ngu s'ta̱a̱c na we̱nke̱ kobneta̱nn da?” 6U vat-vat la taanlo za rema̱n u wassk a kobneta̱n da. I rema̱n i unwa hivi. I unwa ta̱m kan kinbuda̱n kindi, u el ta̱m tu kas tu hwaa.
7Ye̱so zeta bo̱, “Lag na o a̱n c ru. Lag na o. U kin-kin neva̱m d'ha̱ng ma̱ha̱n rema̱n walgca̱n hweda̱n nan sagt me. 8Kobneta̱n el baa no kooye̱ daava. Mi la a ta̱'m mal baa no da.”
Kwe̱e̱ma̱n hweed Lazaru
9Yahude̱n hwe̱di kumt bo̱ s'nap az Ye̱so el a̱n le̱in Betani. A hata bo̱, za rem ru c'taa da, i rema̱n ta̱m a he̱nt Lazaru kan u po̱to̱so̱ine. 10C'Hwengnan ka̱bd Na'Sil buut bo̱ s'lan az a hwaa Lazaru ta̱ma̱. 11A zek az i rem ru a̱n Yahude̱n hwe̱di rutin bugd na̱. A havt kaa a bat d'ba̱t baa Ye̱so.
Ye̱so uvk ni'le̱e̱ ho̱d go̱mo̱
(Mat 21:1-11; Mar 11:1-11; Luk 19:28-40)
12Na̱m'zanta, neta̱n hwe̱di an hain baan he̱tda̱n Paska hongk az Ye̱so tu uva̱ le̱in Urisalima. 13A o̱mko̱ za̱tsa̱n cesa̱n hyan a havk ta̱m a gwaanta o. A ze̱lk s'god a zeka,
“C'Bo̱m baa Na'Sila̱!
Sila emaka un lain na̱m'han
a̱n dind Na'Sila̱!
Sila emaka go̱m va̱ Isra'ila!#12:13 Go̱t ta̱m: Zab 118:25,26.
14An Ye̱so kumtin d'waa janka, u sakk a̱n da̱nda. I ho̱da̱na̱n i retin a'ge̱ne̱,
15‘An hong la v'gel da
nwaa an Zaayo̱n,#12:15 Go̱t ta̱m: Zak 9:9.
go̱t bo̱ go̱m va̱ no na̱m'han
a sak a̱n d'waa janka.’ ”
16Daava̱n rihica̱ ha̱n emtine, an la̱a̱s baa Ye̱so ta ke̱e̱se̱ ca̱ da. I daava̱n Ye̱so kumtin k'gwin an Sila po̱to̱sto̱in o, i baktain na̱ az na ge̱nk rihica̱ ha̱n ca̱n tanin o. Na emaka ta̱m o ca̱nca kwe̱.
17Netnanan lain baa ru daava̱n u po̱to̱sto̱in Lazaru, u po̱gto̱ o u rwa̱n lanm nu'sago, a ryaak hwic a̱n ba̱rgsa̱ma̱n lalks ne. 18Neta̱n hwe̱di an hongin u emk he̱tca̱ hna, a haka baa Ye̱so. 19An ba̱tksa̱m na s'giira zeta bo̱ hyannana̱, “Rihica̱ ha̱n za bo̱ a̱n sava̱m na d'baa da. Go̱t ho̱da̱na̱n an copun yanda̱ha̱n gabtin o kwe̱.”
An zain Yahude̱n da hobk Ye̱so
20A̱n daava̱n lo, ahyan an zain Yahude̱n da lak baa an hain a emt c'hwiipsa̱ baan he̱ta̱d ne. 21A haka baa Filip kan Be̱tsaida a̱n copun Galili. A konk o, “Kanubu, c to̱nk he̱na̱m Ye̱so.”
22Filip havt bo̱ u ve̱ce̱ Andarawus. Andarawus na Filip havt bo̱ ta̱m a ve̱ce̱ Ye̱so. 23Ye̱so se̱st bo̱ na̱, “Ho̱ra̱v ceka va̱n nan ne̱e̱t Waav Noc k'gwin. 24Lag na a̱m ve̱ce̱te̱ no m'ga̱u. A za yaanva̱n hii hek nu'cop a̱v wa̱a̱ da, ta̱'v mal va̱nva v'da̱n. Av wa̱a̱ la, ta̱'v mat yaan hwe̱di. 25Koowe̱ a̱n to̱nin po̱tu ru, tu rob o. Koowe̱ la a̱n ha̱lin po̱tu ru a̱nmin copun yanda̱hna, tu kin o caama̱n po̱tu d'kala.#12:25 Go̱t ta̱m: Mat 10:39; 16:25; Mar 8:35; Luk 9:24; 17:33. 26Koowe̱ a̱n tu ema m m'coko, i ke̱ng u gaba me. Va̱na̱n m rein ta̱ma̱, i a̱n a̱n'a a̱n coka̱n ri ta soota. Koowe̱ ta̱m a̱n reina̱n ema m ri m'coko, Cet me tu ne̱e̱ o k'gwin.”
Ye̱so tanka wa̱a̱'a ru
27“Horma̱d el a̱n buga̱m ri a̱nta̱ma̱. Iye̱ la a̱n ma ze? Ma ze-ze, ‘Cet me, gwa̱a̱ m baan ho̱rva̱n kobda̱n lavain me?’ A̱'a̱. I rema̱n ryaaka̱n kobda̱ ha̱n a̱m cetain ho̱rva̱ hna. 28Cet me, ne̱e̱ dind rov k'gwin.”
A̱n daava̱n lo, na hongk s'lalk lanm na'cona. Na zeka, “A̱m baask a̱m ne̱e̱k da̱ k'gwin. Ta̱'m sud ta̱m a̱n ne̱e̱ da̱ k'gwin.”
29Netnanan lain a'es a̱n a̱n'a an hongin godva̱ ne, a zeka, i v'te̱no. Ahyan zeka, i k'comta̱v Na'Sil a̱n iga̱msin o.
30Ye̱so zeka na̱, “Lalksa̱ ha̱n ta rwa̱n rem ri da, i rem no. 31A̱nta̱ma̱ a̱n na gedvain an copun yanda̱ha̱n lalko. I a̱nta̱ma̱ a̱n nan vog kan go̱mca̱n copun yanda̱ha̱n u rwa̱a̱ na'isa̱. 32Mi la, a na ze̱l a̱m lanm nu'copo, ta̱'m karga̱vsa neta̱n kwe̱ baa ri.” 33U vatk taanl u kwesata goon wa̱a̱'anan tu wa̱a̱.
34Bugda̱n neta̱n se̱st bo̱ o, “C hongk lanma̱n giira az Ka̱risti tu mal d'kala. I'le̱e̱le̱ kaa a̱n va zeta, ‘Ke̱ng na ze̱l Waav Noco?’ Iwe̱ a̱n rein Waav Nocune zo?”#12:34 Go̱t ta̱m: Zab 110:4; Isa 9:7; Izi 37:25; Dan 7:14.
35Ye̱so zeka na̱, “I v'daa ca̱nmi a̱n za̱nd rein baa no. Em na a'ha̱gc daava̱n citin d'za̱n, a cumunkunni han la i biti no da. Rema̱n koowe̱ a̱n rein na'ha̱gc ni'cumunkunnu, a tu nap va̱na̱n tu hav da. 36Bat na d'ba̱t baa d'za̱n daava̱n a̱d retin baa no, bat ta̱n soot akna d'za̱n.” Daava̱n Ye̱so vattin rihica̱ hna, u to̱o̱k u havk u hokk na̱.
Yahude̱n ta bat d'ba̱t da
37Go̱t ge̱ u emk c'he̱t hwe̱di a̱n hwic na̱, v'daa ge̱, Yahude̱n ta bat d'ba̱t baa Ye̱so da. 38I em-em taanl bat nan esasa rina̱n Isaaya k'barav Na'Sil vatine. U zeka:
“A'Sila̱, iwe̱ a̱n kabin rina̱n c vatine?
I baa we̱ ta̱m a̱n Sila kwesain we̱sa̱m na̱?”#12:38 Go̱t ta̱m: Isa 53:1.
39Rema̱n taanl a ta la̱a̱ a̱n bat d'ba̱t baa Na'Sil da. Rema̱n Isaaya sudk ta̱m a̱n ze:
40“U pomsk na̱.#12:40 Go̱t ta̱m: Isa 6:10.
U celaska ta̱m de̱bc na̱
rema̱n aa he̱n la a̱n is na̱n da.
Alla ta̱m a ke̱e̱se̱ a̱nmin de̱bc na̱,
a panka baa ri bat ta̱'m taas na̱ gaag na̱ da.”
41Isaaya vat-vat rihica̱ ha̱n rem u he̱nk gwink Ye̱so, u tanka ta̱m o.
42Puti a tan na, neta̱n hwe̱di d'kut a damra-damran go̱mgo̱mno̱, a batk d'ba̱t baa Ye̱so. Rema̱n gela̱v Farisin la, a ta vat az a batk d'ba̱t baa Ye̱so da. A el na̱v'gel az Farisin ta vog na̱ d'kal a̱n ka̱bda̱n kargad Yahude̱ne̱. 43A pa̱tk nu'to̱n az neta̱n bo̱m na̱, a̱n Sila bo̱m na̱.
44Ye̱so ze̱lt bo̱ v'god u zeka na̱, “Koowe̱ a̱n be̱sse̱in m d'ba̱ta̱, za mi u be̱sse̱in d'ba̱t c'taa da. I ta̱m a kan comain me ne. 45Koowe̱ a̱n he̱nin me, u he̱nk kan comain me. 46A̱m uvka̱ ho̱d d'za̱n a̱nmin copun yanda̱ha̱n bat koowe̱ a̱n batin d'ba̱t baa ri, a tu soot a̱nmi ni'cumunkun da.
47“Koowe̱ a̱n hongin lalks ri, u ha̱l a̱n kaba, a ta̱'m geda o lalk da. Rema̱n a̱m ta han a̱m gedata an copun yanda̱ha̱n lalk da, i rema̱n a̱m gwa̱a̱t na̱. 48Koowe̱ a̱n ha̱lin me, u ha̱l ta̱m a̱n kab lalks ri, u ci un tu geda o lalko. Lalksa̱ m vatine, i sa̱nsa ge̱ a̱n sa̱n geda o lalk buka, a̱n hweda̱ d'be̱se̱. 49Rema̱n za a̱n we̱sma̱n hid ri a̱m vattin lalksa̱ ha̱n da. Cetoka̱n comain me, i unwa a̱n tu ve̱ce̱ m rina̱n ta̱'m vata a ho̱da̱na̱n ta̱'m vatt e ne. 50A̱m napk la az giira ru tu de̱l noc kum po̱tu d'kala. Rema̱n taanlo, kooye̱ a̱m vatine, i rina̱n Cetok zein az a̱m vata.”
ទើបបានជ្រើសរើសហើយ៖
Yohana 12: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
