Yomka C'Comtne 4
4
Bitrus na Yohana baa an gedma̱n lako
1An Bitrus na Yohanan latina̱n emam neta̱n s'lalko, go̱mna d'ka̱b a Na'Sil a so̱dka̱v koolnanan rein ta rega̱d buuk Na'Sil a Sadusin, a nokka baa na̱. 2De̱bc naak na̱ hwe̱di rema̱n Bitrus na Yohana el a̱n emam neta̱n la̱a̱s a d'ba̱sa̱n az rema̱n Ye̱so po̱tko̱, i kwesaka az a na wa̱a̱, nan po̱t a̱n d'hwen. 3A sipt bo̱ na̱ a gweda i zante, rema̱n gyop baask u ribgka̱. 4Neta̱n hwe̱di an hongin la ba̱sa̱d ne, a batk d'ba̱ta̱. A s'gab cek s'kwe̱re̱ s'tan.
5Na̱m'zanta, go̱mgo̱mno̱, hwenga̱nc Yahude̱ne̱, a an la̱a̱sa̱m na s'giiran kargka a̱nmin le̱in Urisalima. 6Anas go̱m va̱ d'ka̱b u Na'Sil u so̱dke, Kayafa, Yohana, Ale̱gzanda, a̱n neta̱n hyan an buu go̱m va̱ d'ka̱b u Na'Sil a̱n kwe̱, a lak a̱n a̱n'a. 7Aa esastain Bitrus na Yohana na'te̱ke̱, a ipkk na̱, “I a̱n ye̱ we̱sma alla a̱n ye̱ dinda a̱n emtin rihica̱ hna?”
8A̱n daava̱n lo, Hora̱mda̱n zattin ri d'reb da ne̱e̱k Bitrus c'a̱ra̱m u se̱sk na̱. U zeka, “Nwaa go̱mgo̱mno̱ a hwenga̱nc Yahude̱ne̱, 9a̱n el a̱n ipka̱m co da̱n pusuun na emain le̱me̱, a ho̱da̱na̱n na taastin o gaag no. 10Nap na ta̱da̱ nwaa kwe̱ a netnan Isra'ila na. Ye̱so Ka̱risti kan Nazarat u'na̱n edgin a̱n k'kan a̱n hoka, Sila po̱to̱sko̱ la o. I a̱n we̱sma̱n dind ru a̱n a̱rmuna̱n a̱n he̱nin ha̱n a'es a̱n te̱ka no, kumtin m'ho̱o̱kno̱. 11I unwa a̱n lalks Na'Sil zein az,
“ ‘Taarda̱n lo da̱n nwaa maaga̱n ha̱line,
i da̱nda a̱n vaakin taara̱d d'kaak jimjimi.’
12“Gwa̱a̱ma̱d za ta̱m baa uhyan da. Dind hyan za ta̱m a̱nmin copun yanda̱ha̱n da̱n na nesin neta̱nrima, da̱n ta kumt d'gwa̱a̱m da.”
13Aa he̱ntin a̱ra̱mc Bitrus na Yohana, a nap ta̱m az a ta hav a̱n ka̱bca̱n la̱a̱si alla a kum la̱a̱s ga̱l hyan da, ta̱m i na̱nna kobnetna, a sipk a'nwa̱a̱. I bakta bo̱ na̱ az a emk d'sooc a Ye̱so no. 14Ai retin kan na taasin gaag lak a'es baa na̱, a ta kum ri s'lan da. 15A zeta bo̱ na̱ az a baa rwa̱a̱g baa ka̱nk an gedma̱n lalko. Aa rutine, a buut bo̱ s'lan a̱n a̱n'na̱n a̱n'na̱. 16A zeka, “Iye̱ a̱n nan em netna hna? Koowe̱ a̱n rein a̱n le̱in Urisalima napk da̱n damra c'he̱t ca emka̱lline. A ti ema na ze az i c'ko̱l da. 17Rema̱n na holt la ri ha̱n suda̱m nu'ba̱rg baa netna, lag na na kaag na̱ az aa sud la a̱n tanva noc da̱n dind Ye̱so da.”
18A po̱gto̱ bo̱ Bitrus a̱n a uva̱. A kaagt bo̱ na̱ az aa maak la c'he̱t a sud a̱n tana alla a la̱a̱sa̱ na a̱n dind Ye̱so da pakk. 19Bitrus na Yohana se̱st bo̱ na̱, “Go̱t na a̱n he̱nte. I hwennka bo̱ c hwenga no, c lag A'Sili? 20Baa co bo̱, i ke̱ng c vat rihica̱ c he̱nin a ca̱ c hongin ne.” 21Aa sudtin a̱n kaag na̱, a batk na̱ a to̱o̱. I ai retin a ta kum ho̱da̱na̱n ta vent na̱ da rema̱n neta̱n lak a̱n bo̱mc Na'Sil rema̱n rina̱n emine. 22A̱rmuna̱n taasma̱n le̱mm ru sootin ri c'he̱te̱, u to̱o̱k s'we̱e̱ c'kwe̱zc c'il nu'maco.
Bo̱mc Na'Sil a̱n ryaaka̱ d'koba
23An na battin Bitrus na Yohana, a vaakk baan bugd na̱, a ve̱ce̱ke̱ ta̱m na̱ rihica̱n c'hwengnan ka̱bd Na'Sil a hwenga̱nc Yahude̱n ve̱ce̱in na̱n kwe̱. 24An a s'gab hongtin taanlo, a ze̱lt bo̱ s'god ka̱mda̱nka̱ baa Na'Sil a zeka, “Kan Go̱mca̱n Kooye̱, i vo a̱n emin a'con a copun yanda̱ha̱n ne, m'saa, a rihica̱n rein a̱nmin ca̱ncan kwe̱. 25A̱v vatk a̱n we̱sma̱n Hora̱mda̱n zattin ri d'reb da a̱n nwa̱a̱'a coka̱v rov Dauda,
“ ‘I rema̱n ye̱ a̱n an zain Yahude̱n da
retina̱n taam c'gaago?
Neta̱n lat ta̱m a̱n keka̱bsa̱n
rihica̱n ka̱ka̱la̱?
26Go̱mgo̱mnan copun yanda̱ha̱n walgka d'gaago.
A c'go̱m kargka ta̱m d'baa d'da̱n
a̱n ha̱lc Kan Go̱mca̱n Kooye̱
a kan Sila dagin ne.’ ”#4:26 Go̱t ta̱m: Zab 2:1-2.
27“Ke̱ng, He̱ro̱d, a Bilatu Babunte ne, d'kut a an zain Yahude̱n da, a netnan Isra'ilan a kargka d'baa d'da̱n kwe̱ a̱nmin le̱in ha̱n a̱n ha̱lc coka̱v rovo. Ye̱so un zattin ri d'reb da, ka v kain c'go̱mo̱.#4:27 Go̱t ta̱m: Mat 27:1-2; Mar 15:1; Luk 23:1; Yoh 18:28-29. 28Rina̱n v walgin az na em de̱ha̱nzo, a emk e a̱nta̱ma̱. 29A̱nta̱ma̱ hna, Kan Go̱mca̱n Kooye̱, hong kaag na̱. Ne̱e̱ ta̱m coka̱n rov c'a̱ra̱m a ba̱st lalks rovo. 30Tapa koma rov a̱v taas netan gaago. Ne̱e̱ co ta̱m we̱sma̱n Hora̱md rov c emt rihica̱ c'he̱t a ca̱n sipa̱m na'wa̱a̱ na̱ a̱n dind Waav rov Ye̱so un zattin ri d'reb da.”
31Aa taastin s'cepko, baada̱n a kargtain viga̱mski. We̱sma̱n Hora̱mda̱n zattin ri d'reb da cizka̱ a̱n na̱nna, a emt bo̱ ba̱sda̱n lalks Na'Sil a̱n c'a̱rma̱.
A s'gab wanka̱lk kumu na̱
32An batin d'ba̱t kwe̱ baa Ye̱so, a sootk ka̱mda̱nka̱ ta̱m s'keka̱b s'da̱n. Noc za un zein az kumu nu ciini, iu ru c'taa da. Kooye̱ a ciin kwe̱, koowe̱ ci u'yobo.#4:32 Go̱t ta̱m: YCCo 2:44-45. 33Comta̱nc Ye̱so ba̱sk a̱n damra we̱sma̱n Hora̱mda̱n zattin ri d'reb da az Kanubu Ye̱so po̱tko̱. Sila de̱le̱te̱ bo̱ na̱ u'pusu kwe̱. 34Noc za ta̱m baa na̱ un robin rihi da. Rema̱n an ciin c'ke̱nge̱ alla c'buu, a be̱ba̱lk ca̱ a noktka kind 35a kink a̱n hwic comta̱nc Ye̱so. A wanka̱lk koowe̱ kumk ho̱da̱n kals ru.
36Isuhu goov Le̱vi un rwa̱in a̱n copun Saipros, un comta̱nc Ye̱so cetin Barnabas (rina̱n nan ze Barnabas, i waava̱n setasam c'de̱be̱), 37u ciki k'ke̱nge̱ ta̱m u babka ka̱. U noktka kind u kink a̱n hwic comta̱nc Ye̱so.
ទើបបានជ្រើសរើសហើយ៖
Yomka C'Comtne 4: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
