Yomka C'Comtne 3
3
Bitrus taask ka le̱m m'le̱me̱
1A̱n d'hwen Bitrus na Yohana havk a̱n buuk Na'Sil a̱n daava̱ s'cepko, s'ko̱m s'ta̱a̱c sa̱ ni'hwen. 2Na lak nan san a̱rmun na matin le̱m kooye̱ hweda na kin a̱n hutda̱n buuk Na'Sil da̱n nan po̱g huta̱d kasi. I rema̱n u emt kon baa an ta uv a̱n gwen un buuk Na'Sila̱. 3Au he̱ntin Bitrus na Yohanan ta uv-uv a̱nmin buuk Na'Sila̱, u konk na̱ kindi. 4An Bitrus na Yohana kekstain o swa̱a̱n, Bitrus zeta bo̱ o, “Kekksa co.” 5U ke̱e̱te̱ bo̱ na̱ is a̱n la̱gs az tu kum rihi baa na̱. 6Bitrus zet bo̱ o, “A̱m zatta kind da. Rina̱n m ciin la, i inya a̱n ta̱'m ne̱e̱ vo. A̱n dind Ye̱so Ka̱risti kan Nazarat, unu v em a'ha̱gcu.”
7Bitrus sipt bo̱ koma s'to̱o̱ a ru, u una̱ska̱ o. A̱ndaabe naas ceck o. 8U unuku cott u to̱o̱k na'ha̱gcu, u gabk ta̱m Bitrus na Yohana. A uvk a̱n gwen un buuk Na'Sil na'ha̱gc a̱n s'mak a̱n bo̱mc Na'Sila̱. 9Netnanan lain a̱n a̱n'a kwe̱, a he̱nk o na'ha̱gc a̱n bo̱mc Na'Sila̱. 10Aa naptin az i unwa a̱n lain tu soot a̱n kon baan huta̱d kasi da̱n buuk Na'Sila̱, a sipk a'nwa̱a̱. A ta la̱a̱ a̱n iga̱m da rema̱n rina̱n na emain a̱rmune.
Ba̱sa̱d Bitrus a̱n buuk Na'Sila̱
11An le̱muna̱n na taasin gaag bo̱ptin Bitrus na Yohanan ke̱kk, neta̱n sipk a'nwa̱a̱. A swema̱rta bo̱ a haka baa na̱ a̱nmin puge̱da̱n nan po̱g puge̱d So̱lmo̱n, a vedsta. 12An Bitrus he̱ntin bugda̱n netna, u zeka na̱, “Nwaa netnan Isra'ila, i rema̱n ye̱ a̱n retina̱n sipa̱m na'nwa̱a̱ rema̱n rihica̱ ha̱n alla ta̱m rem co? I rema̱n ye̱ ta̱m a̱n ke̱e̱te̱in co isa̱? I kaba-kaba no az i rema̱n kasi noc c co alla we̱sa̱m co a̱n de̱lin a̱rm uha̱n na'ha̱gci? 13I Sila Ibrahi, Isaaku, Yakubun a Sila ceta cinnan, a̱n ne̱in coka̱v na̱ Ye̱so k'gwin. I unwa la a̱n babine. A̱n savk ta̱m o baa Bilatu, go̱t la Bilatu to̱nk be̱ az u bat o.#3:13 Go̱t ta̱m: U'Rwa̱ 3:15.
14“A̱n ha̱lk nocuna̱n zattin ri d'reb da. A̱n konk na butva̱ no kan hweed netna.#3:14 Go̱t ta̱m: Mat 27:15-23; Mar 15:6-14; Luk 23:13-23. 15A̱n hok kan ciin u'po̱to. Sila po̱to̱sko̱ la o. Ca̱ he̱ne̱ke̱ d'hi. 16I rema̱n bata̱m d'ba̱t baan dind Ye̱so a̱n a̱rm uha̱n un rein nu'he̱no, a̱n napk ta̱m o, kumtin m'we̱se̱. I we̱sma̱n dind Ye̱so a bata̱m d'ba̱ta̱n da̱n nan kum lanma̱n baa Ye̱so, a̱n na taastin a̱rm uha̱n m'le̱m ho̱da̱na̱n he̱ntine.
17“Hyaarene, rina̱n nwaa a go̱mgo̱ma̱n non emain Ye̱so, a̱n em-em a̱n robamda̱ s'napa. 18I rihica̱ ha̱n la, ca̱n Sila vatin de̱ha̱nzo a̱n nwa̱a̱'a baranc na̱, az Ka̱risti tu ryaa d'koba. I ca̱nca a̱n Sila esasaine. 19Rema̱n taanlo, but na c'hwin rema̱n ko̱tc no a̱n getta d'hi baa Na'Sila̱, bat ta kwisi no c'ko̱to. 20A̱n kum kaa daava̱ d'hwera lanma̱n baa Kan Go̱mca̱n Kooye̱. Ta coma ta̱m Ka̱risti, Ye̱so, kan a baasin a de̱ge̱ke̱ no de̱ha̱nzo.
21“Ye̱so tu baa la soota a'con na cet daava̱n Sila ta vaaksta kooye̱ i pooya̱. I ho̱da̱na̱n Sila baastin a vatk a̱n nwa̱a̱'a neta̱n na̱ an zattin ri d'reb da de̱ha̱nzo, daav baranc na̱. 22Rema̱n Mosa zeka, ‘Kan Go̱mca̱n Kooye̱, Sila no, ta kwimi no k'barav Na'Sil ho̱d ri lanma̱n goov no. I ke̱ng a̱n gab rina̱n u zein no kwe̱.#3:22 Go̱t ta̱m: Rsgi 18:15,18. 23Koowe̱ a̱n ha̱lin a̱n gab rina̱n k'barav Na'Sil une vatine, nan ke̱e̱ o lanma̱n baa neta̱n Na'Sila̱.’#3:23 Go̱t ta̱m: Rsgi 18:15,18-19.
24“Baranc Na'Sil an emin s'lalk kwe̱, lanm Samwe̱l, a an gabain on kwe̱, a vatk az rihica̱ ha̱n ca̱n na rein nu'he̱n a̱nta̱ma̱, ca̱n ema. 25Coms Na'Sil sa̱n baranc Na'Sil vatin i rem no. I nwaa ta̱m a̱n ta̱n gaad lalkuna̱n Sila gigiin ceta no. Rema̱n Sila zeka Ibrahi, ‘I baad goov rov a̱n Sila ta ema netnan copun yanda̱ha̱n kwe̱ u'pusu.’#3:25 Go̱t ta̱m: D'Tak 22:18. 26Sila comka coka̱v na̱ Ye̱so Ka̱risti na̱m'e̱t baa no, u de̱le̱te̱ no u'pusu, au de̱ltin no kwe̱ a̱n lagk le̱vka̱ v'dumu.”
ទើបបានជ្រើសរើសហើយ៖
Yomka C'Comtne 3: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
