Yomka C'Comtne 17
17
Ba̱sa̱d Bulus a̱n Tasalonika
1An Bulus na Se̱las gedantain le̱e̱ma̱n Amfipolis a Appolloniya na, a cek le̱in Tasalonika. Ka̱bda̱n kargad Yahude̱n el ta̱m a̱n a̱n'a. 2Ho̱da̱na̱n Bulus vetastain tu ema, u uvk a̱nmin ka̱bda̱n kargad Yahude̱ne̱. U emk taanl c'hwe c'ta̱a̱c ca̱n hweca̱n hwerad Yahude̱n, bat tu go̱t ge̱nsa̱n lalks Na'Sil d'kut a na̱nna na. 3Bulus ba̱tkska̱ ta̱m u kwesaka na̱ az i ke̱ng Ye̱so ryaa d'koba, u wa̱a̱, u vaak ta̱m u po̱to̱. U zeka, “Ye̱so unlo bo̱, um reina̱n bisim no, i unwa a̱n rein Ka̱risti.” 4Yahude̱n hyan baa na̱ kabk rina̱n Bulus vatine, a gabk Bulus na Se̱las. Bugda̱n an Giris an gela̱v Na'Sila̱, a̱n netan hyan hwe̱di an na rein nan he̱nt k'gwin a̱n a̱n'a, a batk d'ba̱t a kabk lalkune.
5Yahude̱n hyan emk la d'hyubu. A havk a karga̱vska netnan ka̱ka̱la̱ an rein ta soot baa s'yo̱po. A bo̱lk i'le̱e̱ a̱n d'gudgu. A uvk ta̱m a̱n s'kwe̱e̱v a̱n buu Jason a̱n hob Bulus na Se̱las, bat ta ruta̱ na̱ baa netna. 6Aa ta gitta̱in Bulus na Se̱las a̱n a̱n a̱n'a da, a sipka̱ Jason a a s'gab hyan na. A saka na̱ baa go̱mgo̱mna ni'le̱e̱ a̱n d'gudgu. A zeka, “Netna ha̱n gosk a̱n rukksa̱m nu'cop koope̱. Go̱t ta̱m a ceka tahna, 7Jason cila̱ska̱ ta̱m na̱. A el ta̱m a̱n ha̱lca̱n giiras Kaisar. A el na̱m'ze az go̱m hyan el un nan po̱g Ye̱so.” 8I gagt bo̱ go̱mgo̱ma̱n a netna ni'le̱e̱n d'hi aa hongtin rihica̱ hna. 9Aa kabtin kindi c'to̱ve baa Jason a neta̱n hyan na, a batk na̱ a to̱o̱ko̱.
Bulus na Se̱las a̱n le̱in Be̱riya
10A̱n gyopun lo, a s'gab ho̱ttk Bulus na Se̱las a caa le̱in Be̱riya. Aa cetin a̱n a̱n'a, a uvk a̱n ka̱bda̱n kargad Yahude̱ ne.
11An le̱in Be̱riya pa̱tk an le̱in Tasalonika a̱n d'kau. A kabk kasi lalk c'kom c'ila̱. A kya̱a̱k d'hi a̱n go̱tma̱n lalks Na'Sil kooye̱ hweda a napt ga̱uma̱n rihica̱n Bulus ve̱ce̱in na̱. 12Rema̱n taanlo, Yahude̱n hwe̱di batk d'ba̱t baa Na'Sila̱. A̱rma̱n hwe̱di, a netan an na rein nan hwenga, an rein ta dam C'Girik, a batk d'ba̱t baa Na'Sila̱.
13An Yahude̱n an le̱in Tasalonika hongtin az Bulus el a̱n ba̱sda̱n lalks Na'Sil a̱n le̱in Be̱riya, a havk ta̱m a̱n a̱n'a a de̱lk neta̱n una̱ska̱ d'gudgu. 14A s'gab ta e̱vk da, a cukk Bulus u havk a̱n paat m'saa. Se̱las na Timoti la, a sootk a̱nmin le̱in Be̱riya. 15Netnanan swiin Bulus, a cetk o le̱in Ate̱ns, a vaakk Be̱riya. Bulus comta bo̱ na̱ az a ze Se̱las na Timoti, az aa e̱vko la da, a gabo o.
Bulus a̱n le̱in Ate̱ns
16An Bulus soottin a̱n le̱in Ate̱ns a̱n vala̱m Se̱las na Timoti, de̱bc naak o hwe̱di au he̱ntin baaca̱n cepk hwe̱di a̱n le̱in lo. 17Rema̱n taanlo, kooye̱ hweda, u el tu iga̱ms Yahude̱n a an hain a̱n c'hwiipsa̱ a̱nmin ka̱bda̱n kargad Yahude̱ne̱. U iga̱ms ta̱m au gitin kwe̱ baa s'yo̱po. 18A̱n daava̱n lo, an la̱a̱sa̱m na rina̱n Epikuriya#17:18 Epikuriya: Netnanan gabin la̱a̱s kan nan po̱g E̱pikurus, un la̱a̱sa̱in na az i he̱nu d'ke̱m a̱n rein hwic kwe̱ a̱n c'nocurimu. na Sto̱yik la̱a̱sa̱ine, takka s'lan a unwa na.
Ahyan zeka, “Iye̱ a̱n kan horma ha̱n rein nu'vato?” Ahyan zeka ta̱ma̱, “I saak az i unwa kan ba̱sda̱n cepk hyan un a na napin da.” A vat-vat taanl rema̱n Bulus lak a̱n ba̱sda̱n kasi lalk Ye̱so. Ta̱m az a noc wa̱a̱, a̱n d'hwen tu po̱to̱. 19A savt bo̱ Bulus baan kargad c'hwengne, da̱n nan po̱g Ariyo̱pagus. Va̱na̱n a zein o, “Ve̱ce̱ co la̱a̱s uha̱n u poune, u'na̱n v reina̱n la̱a̱sa̱m netna. 20Rema̱n c hongk a̱v vatk rihica̱n a̱c ta takina̱n hong da. C to̱nk az c nap ca̱.” 21(Netnan le̱in Ate̱ns a hamcnanan rein a'soot a̱n a̱n'a kwe̱, a el ta hwaa v'daa a̱n gana̱m nu'con alla vatma̱n rihic c'pooca̱n ca̱n uva̱in c'taa.)
22Bulus unutu bo̱ a̱n hwic c'hwengne. U zeta bo̱ na̱, “Nwaa netnan le̱in Ate̱ns, i kwesaka me az a̱n ci za̱ksa̱n hwiipsa̱ca̱n baaca̱n cepko. 23Rema̱n am latina̱n paam c'baa, a̱m he̱nk baaca̱n cepk no. A̱m he̱nk ta̱m d'saka va̱na̱n na ge̱nin az, BAAD Cepkuna̱n A na napin da. Silan lo an a̱n reina̱n emam c'hwiipsa̱, a̱n ta nap la na̱ da, i na̱nna a̱m reina̱n ba̱tksa̱m no. 24Sila nan main copun yanda̱hna a rihica̱n rein a̱nmin kwe̱, a za ta soot a̱n buuca̱n cepk ca̱n na main a̱n c'kom da. Ai retin i na̱nna an rein kan go̱mc na'con a copun yanda̱ha̱n ne.
25“A za a̱n hob noc te̱pe̱ na̱ a'kom baan yomka na̱ zai a la a̱n hoba̱n rihi da. Rema̱n i na̱nna an rein ta ne̱e̱ neta̱n c'rihi kwe̱. U'Po̱to a s'hobo no, a rihic hyan ta̱m kwe̱. 26I lanma̱n d'bebo d'da̱nka̱ a emtin goosa̱n neta̱nrima kwe̱ a soot a̱nmin copun yanda̱hna. A se̱e̱pske̱ ta̱m daav na̱ a geda̱n baada̱n ta soott ne. 27Kan Go̱mca̱n Kooye̱ em-em taanl rema̱n neta̱n hobt o a kum ta̱m o. U ta nak baa kooye̱ da̱nv cinna wa da. 28Ai retine,
“ ‘I rem ru a̱n na retin a po̱tke,
nu'nokso, a̱n c'nocurimu ta̱ma̱.’
Ho̱da̱na̱n a nu'vat baa no zetin a̱n sepc na̱,
‘I cinna goov na̱.’
29“Ai retin i cinna goov na̱, i ta ge̱be̱se̱ na hwennsa A'Sil a̱n zo̱n alla ko̱m pusin alla a v'taara̱n da. A nan hwennsa na̱ ta̱m a̱n hyo̱o̱ma̱n rina̱n neta̱n se̱bin a̱n vers na̱, a la̱a̱m na̱n da. 30De̱ha̱n, daava̱n robamda̱ s'napa, Sila go̱tk a̱d neta̱n u'ka̱ka̱la̱. A̱nta̱ma̱ la, a zek neta̱n koope̱ az a bita̱l c'hwin a lag ko̱tc na̱. 31Rema̱n Sila bank hweda̱n noc kan u dagin tu gedata an copun Yanda̱ha̱n lalk na̱m'ga̱u. A kwesaka neta̱n az lalk uha̱n i m'ga̱u, aa po̱to̱sto̱in nocune.”
32Aa hongtin na tanka lalk nu'po̱to, ahyan na̱mska̱. Ahyan zeka la, “Ca̱n to̱n c sud a̱n hong da̱n rihica̱ hna.” 33Bulus to̱o̱t bo̱ u lag na̱. 34Neta̱n hyan de̱pe̱ke̱ la o, a batk ta̱m d'ba̱t baa Na'Sila̱. Diyonisiyus kan bugd c'hwengne, a netauna̱n nan po̱g Damaris, a neta̱n hyan na, a el baa an gabin o.
ទើបបានជ្រើសរើសហើយ៖
Yomka C'Comtne 17: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
