Yomka C'Comtne 14
14
An Iko̱niyum kabk d'ba̱sa̱
1Aa retin a̱nmin le̱in Iko̱niyum, ho̱da̱na̱n a vetastaine, Bulus na Barnabas a̱n uvk a̱nmin ka̱bda̱n kargad Yahude̱n d'kutu. A ba̱sk kasi lalk na̱m'we̱se̱. I de̱lk damran bugda̱n netna, Yahude̱n a an zain Yahude̱n da, a batk d'ba̱t baa Na'Sila̱. 2Yahude̱n nanan ta batin d'ba̱t da, a so̱vk an zain Yahude̱n da, a palkk ta̱m na̱ a ha̱l a s'gaba. 3Rema̱n taanlo, Bulus na Barnabas a̱n gosk a̱n a̱n'a a̱n ba̱sda̱n pusuu Kan Go̱mca̱n Kooye̱ za na̱v'gel da. Kan Go̱mca̱n Kooye̱ kwesaka ta̱m az ba̱sda̱n pusuu ru da̱n a retine, i m'ga̱u, au ne̱e̱tin na̱ we̱sma̱n emma̱n damra c'he̱te̱, a rihica̱n sipa̱m na'nwa̱a̱ na̱. 4Hid netnan le̱in Iko̱niyum wankske. Kabva̱ da̱nka̱ el a̱n dimd Yahude̱ ne. Kabv hyan el ga̱l c'comtne.
5An zain Yahude̱n da, a Yahude̱ne̱, a so̱dka̱n na̱n, se̱e̱pste̱ bo̱ az a ryeesa Bulus na Barnabas d'koba, a bonga̱l ta̱m na̱. 6An Bulus na Barnabas naptine, a somk a cek a̱n le̱e̱ma̱n Listra a Derbe ne, a̱nmin copun Liko̱niyum, a le̱e̱ma̱n paata̱n Iko̱niyum ne. 7A ryaak ta̱m hwic a̱n ba̱sda̱n kasi lalk a̱n a̱n'a.
An Listra to̱nk a se̱ke̱ neta̱n sako
8A̱n le̱in Listra, noc lak un na matin le̱me̱. U ta tak ta̱m a̱n em a'ha̱gc da. 9An Bulus latina̱n d'ba̱sa̱, le̱mune ge̱ne̱ke̱ o u'con. Bulus ke̱e̱te̱ bo̱ o isa̱. I kwesaz o az batma̱n ba̱ta̱d le̱m baa Na'Sil cek na taas o m'le̱me̱. 10Bulus zeta bo̱ o na̱m'we̱se̱, “Unu v esa.” Le̱m unuku la cott. U takaz a'ha̱gcu.
11An neta̱n he̱ntin rina̱n Bulus emine, a zek na̱m'we̱s v'daa v'da̱n a̱n remd an Liko̱niyum, “I cepk a̱n ciza̱in baa cinna a̱n hyo̱o̱m netna.” 12A cetk Barnabas din Ziyo̱s, Bulus ta̱m Hemes, ai retin i Bulus a̱n rein kan hwic baan lalko. 13Go̱m va̱ d'ka̱b u Ziyo̱s, un ka̱bd ru rein a̱n pangad ni'le̱e̱, noktta bo̱ naama̱n a c'pa̱r nu a̱n huta̱d ni'le̱e̱ rema̱n unwa, a bugda̱n neta̱n to̱nk a ema c'comta̱n sako.
14Daava̱n comta̱nc ne, Barnabas na Bulus hongtine, a sa̱tma̱lk kusa̱m na̱. A somk a duvk a̱nmin bugda̱n neta̱n a̱n c'kanksa. 15A zeka na̱, “Anba̱rini, i rema̱n ye̱ a̱n ya emt tan? I cwan neta̱nrima ho̱d no. Ca̱ la a̱n bisim no kasi lalk bat ta̱n laga rihica̱n ka̱ka̱la̱, a̱n vaaka baa Sila m'ga̱u. An emin a'con a copun yanda̱ha̱n ne, m'saa, a rihica̱n rein a̱nmin copun yanda̱ha̱n kwe̱.#14:15 Go̱t ta̱m: U'Rwa̱ 20:11; Zab 146:6. 16De̱hne, Sila lagk netnan kooye̱ copwa a gab rina̱n a he̱nin d'ke̱e̱ a gaba.
17“Puti a tan na, Sila lagk rina̱n ti kwesa neta̱n goon Sila nan a reine. A hyeeska no me̱nke̱. A de̱lk belc no em d'ke̱me̱. A ne̱e̱k no c'ryaak hwe̱di. A de̱lk no ta̱m a̱n c'za̱ngkta̱.” 18Puti a lalksa̱ ha̱n sa̱n Bulus na Barnabas vatine, ca̱nm a̱n kusin netnan lo emata na̱ sako.
19C'Hwenga̱n Yahude̱n hyan nokka lanma̱n Antiyo̱k a Iko̱niyum ne. A de̱lk neta̱n bonga̱lk Bulus, a huka̱ o a ceta pangad ni'le̱e̱. A el az u uku. 20An a s'gab rigtin o, u unuku u vaakk a̱nmi ni'le̱e̱. Ai zantaine, a to̱o̱k a̱n'a Barnabas a cek Derbe.
Bulus vaakka le̱in Antiyo̱k
21Bulus na Barnabas ba̱sk kasi lalk a̱n le̱in Derbe. A kumk neta̱n hwe̱di an gabin Kan Go̱mca̱n Kooye̱. A vaakt bo̱ ta̱m a̱n le̱e̱ma̱n Listra, Iko̱niyum, a Antiyo̱k ne. 22A setaska a s'gab c'de̱be̱. A swidiki ta̱m na̱ m'we̱s az a ryaa hwic a̱n bata̱m d'ba̱t baa Na'Sila̱. A zeka na̱, “I ke̱ng na ryaa d'kob hwe̱di na kumt a̱n uv a̱n go̱mc Na'Sila̱.” 23Bulus na Barnabas dagk c'hwenga̱n an ta gabt kooye̱ buga̱d a s'gab da. A emt bo̱ s'cepk a i'so̱o̱ti ni, az Kan Go̱mca̱n Kooye̱, kan a batin d'ba̱t baa ru, go̱t na̱ i kasi.
24A to̱o̱k a gedanka copun Pisidiya, a uvk ta̱m a̱n copun Pamfiliya. 25A emk d'ba̱s a̱n le̱in Pega. A to̱uz a caa le̱in Ataliya. 26I lanma̱n Ataliya a uvin a̱n bumbka̱ m'ho̱o̱ a caa le̱in Antiyo̱k, va̱na̱n na bain a kwena na̱ pusuu Na'Sil rema̱n yomkanan a taasaine.
27Aa cetin Antiyo̱k, a kargska a s'gab a ve̱ce̱ke̱ na̱ rihica̱n Sila de̱lin a emka̱lk kwe̱. A ho̱da̱na̱n Sila de̱ltin an zain Yahude̱n da, a batk d'ba̱t baa Na'Sila̱. 28A soott bo̱ baa a s'gab a gos hwe̱di a̱n a̱n'a.
ទើបបានជ្រើសរើសហើយ៖
Yomka C'Comtne 14: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019
