1 An Korinti 6
6
Sav na s'lalk baa a s'gaba
1A da̱nv no ci lalk a hyaaro no, au maak la u sav o baa an zain a s'gab da. Lag u sav o baa a s'gab a se̱e̱pse̱ na̱. 2A̱n ta nap az i a s'gab a̱n ta buka geda an copun yanda̱ha̱n lalk da? Awaz i nwaa a̱n ta̱n geda an copun yanda̱ha̱n lalko, a ta̱n la̱a̱ kaa a̱n ged lalk a̱m esma̱n da? 3A̱n ta nap ta̱m az i cinna a̱n nan geda comta̱nc Na'Sila̱ lalk da, daat bo̱ kaa lalkma̱n copun yanda̱hne?
4Awaz a̱n ci lalko, i rema̱n ye̱ a̱n ta̱n savt sa̱ baa an zattin k'gwin baa a s'gaba da? 5Ti ema az a̱n zatta ka s'ver un tu ged lalk baa a s'gab da? A̱m la nu'vat taanlo, m'e̱n bo̱ kaa baa no. 6Go̱t la ka s'gab savk hyaaro baa s'lalko. Ta̱m an zain a s'gab da ta he̱nte.
7Sava̱m hyannano a s'gab baan lalko, i d'hyaa baa no. I rema̱n ye̱ a̱n zattina̱n kab na ema no rihic naak da? I rema̱n ye̱ a̱n zain a̱n kab na hitksa̱ no da? 8Go̱t la i nwaa a̱n reina̱n emma̱n rihic naake. I nwaa a̱n reina̱n c'hitksa̱. Ta̱m i a s'gab a̱n rein ta̱n ema taanlo.
9A̱n ta nap az a v'dum a ta kum go̱mc Na'Sil da? An lag la na palk no da. A d'o̱mo̱, an gabma̱n cepko, a̱ra̱mnanan ta la̱v a hyann a̱ra̱mna̱, an ta em rihica̱ d'reb baa neta̱nrima, 10hivni, a c'zo̱rmo̱'isa̱, so̱o̱gne, a c'rebo, a a c'rum nu, a ta kum go̱mc Na'Sil da cakk. 11I ho̱da̱n lo bo̱ a̱n ahyan baa no latin a̱n emma̱n rihica̱n lo. A̱nta̱ma̱ la, na zolk no. Na ho̱lk no rihica̱ d'rebo. Na le̱gk ta̱m no a̱n dind Kanubu Ye̱so a Hora̱md Na'Sil na̱.
Guba̱sa̱ na A'Sil a̱n we̱du no
12“Na ne̱e̱k a̱m d'ke̱e̱ a̱m em kooye̱.” Za la kooye̱ rihiya a̱n ciin d'se̱e̱te̱ da. “Na ne̱e̱k a̱m d'ke̱e̱ a̱m em kooye̱.” A ta̱'m se̱s la a̱m ema rihi m'cok da. 13“C'Ryaak i rem d'ba̱ta̱, d'ba̱t ta̱m rem c'ryaako.” Sila ta toks la ca̱ kwe̱ a̱n d'hwen. Sila ta em u'we̱d rem d'o̱m da. I rem na guba̱sta̱ Kan Go̱mca̱n Kooye̱. Kan Go̱mca̱n Kooye̱ el ta̱m rem u se̱e̱tte̱ u'we̱de̱. 14Sila po̱to̱sko̱ Kanubu Ye̱so. Ta po̱to̱so̱ ta̱m cinna a̱n we̱sa̱m na̱.
15A̱n ta nap az we̱du no i yobca̱n we̱du Ka̱risti da? Ta̱'m o̱m bo̱ kaa yobun we̱du Ye̱so a̱m havt a̱n d'o̱me? Sila bita̱. 16A̱n ta nap az kan gammensein we̱du ru a neta zamse ne, az u vaakk u'we̱d uda̱n a unwan da? Lalks Na'Sil zeka, “Na̱nna i'il ta vaak u'we̱d uda̱n.”#6:16 Go̱t ta̱m: D'Tak 2:24. 17Koowe̱ la a̱n emin d'sa̱ma̱nc a Kanubu Ye̱so no, u vaakk rihi i'da̱n a unwan a̱n d'hormo.
18Som na d'o̱mo̱. Kooye̱ ko̱tda da̱n noc ko̱tine, i ta do̱v we̱du ru da. Koowe̱ la a̱n emin d'o̱mo̱, u emk ko̱tda̱n do̱vin we̱du ru. 19A̱n ta nap az we̱du no, i buuk Na'Sil da? Baada̱n sooca̱d Hora̱md Na'Sil da̱n rein a̱nmi baa no, da̱n Sila nesin no da? Za nwaa ta̱m a̱n ciin we̱sma̱n hid no da.#6:19 Go̱t ta̱m: 1Kor 3:16; 2Kor 6:16. 20Sila waak no a copka. Rema̱n taanlo, ne̱e̱ na A'Sil k'gwin a̱n we̱du no.
ទើបបានជ្រើសរើសហើយ៖
1 An Korinti 6: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019