1 An Korinti 5
5
Vog na ka d'o̱mo̱
1A̱m hongk az o̱md rork baa no. Goon o̱mda̱n an zain Yahude̱n da ha̱line. Az noc el tu la̱v a hyub inu nu. 2A̱n el la a̱n c'ka̱ndi. I ta ge̱be̱se̱ be̱ az a̱n emk naam c'de̱be̱, a̱n vog ta̱m kan emin ri ha̱n baan kargad a s'gab da? 3Go̱t ge̱ a̱m za baa no a̱ngau da, a̱m el baa no a̱n d'hormo. A̱m baask ta̱m a̱m gedaka nocuna̱n emin rin lo lalko. I ho̱da̱na̱n ta̱'m emt be̱, awaz a̱m el baa no. 4Daava̱n ta̱n merata a̱n dind Kan buu cinna Ye̱so Ka̱risti, de̱bc ri el ta̱m baa no, ta̱m we̱sa̱m Kan buu cinna Ye̱so Ka̱risti el a̱n a̱n'a, 5badasa na A̱krimu nocun lo. A̱krimu hwaa we̱du ru un nocurimuca̱ c'ko̱to, bat nan gwa̱a̱ hora̱md ru a̱n hweda̱n Kanubu Ye̱so Ka̱risti tu doogta.
6Ka̱ndic no ta em d'ke̱m da cakk. A̱n ta nap az i yist ca̱nmi a̱n rein ti hwa̱a̱s m'hyun da? 7Vog na nocun lo baa no ho̱da̱na̱n nan ho̱lt yist utu. Bat ta̱n soot hyumma̱n a na de̱le̱in yist da, ho̱da̱na̱n i ge̱be̱ste̱in a̱n soota. Na baask na emk sakun kyo̱o̱mun he̱tda̱n Paska rem cinna. I unwa a̱n rein Ka̱risti. 8Rema̱n taanlo, ac em na la he̱tda̱n Paska a̱d cinna a̱n yist ut da. Yist utu, i v'dum a bo̱pa̱m neta̱n a̱n c'de̱b ne̱. Na em he̱tda̱n Paska a̱n be̱e̱re̱dida̱n hyumma̱n na de̱le̱in yist da. Be̱re̱e̱did kasi da̱ m'ga̱u.
9A̱m ge̱na̱vko no k'vaa az an sa̱ma̱nna̱ la a a d'o̱ma̱n da. 10Za la ai a̱m ze-ze az a̱n kwaa an copun yanda̱ha̱n an reina̱n d'o̱m da. Alla an ta zo̱lo̱ is baan rihic neta̱n hyann da. Alla a c'rum da. Alla an ta gab cepk da. A na ze taanlo, ti soot az na lag copun yanda̱hna. 11A̱nta̱ma̱, a̱m el a̱n ge̱nvom no az an sa̱ma̱nna̱ la a ka s'gab un rein ka d'o̱m da. Alla kan rein tu zo̱lo̱ is baan rihic neta̱n hyan da. Alla kan gabma̱n cepk da. Alla ka c'rebo alla so̱o̱ge alla ka c'rum da. An ryaak la a goon na̱nna da cakk.
12I pe̱ha̱n ho̱o̱m ri a̱n gedam an zain a s'gab da lalko? Za a s'gab a̱n ta̱n geda lalk da? 13An zain la a̱n s'gab da, i Silan ta geda na̱ lalko. Rema̱n taanlo, “Vog na kan emma̱n rihic naakun lo baa no.”#5:13 Go̱t ta̱m: Rsgi 13:5; 17:7.
ទើបបានជ្រើសរើសហើយ៖
1 An Korinti 5: driNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. and © The Nigeria Bible Translation Trust 2019