Johanesa 1
1
Nkango zomwenyo
1Nkango yizo za hovere kukara po. Ano ozo Nkango kwa kere naKarunga, ano Nkango yizo Karunga. 2Azo kwa kere pomuhoverera naKarunga. 3Yininke nayinye yizo za yi sita. Patupu sininke nampili simwe esi va sita pwa hana azo. 4Mwazo yimo mwa kere mwenyo, ano mwenyo kwa kere uzera wovantu. 5Ano uzera kuminikira momundema, nye mundema kapi gwa u tambura.
6Pwa wizire mugara gumwe ogu ga tumine Karunga, edina lyendi yige Johanesa. 7Age kwa wizililire undipo wokuhamena uzera asi a pulise navenye. 8Age kapisi yige uzera, nye kwa wizililire undipo wokuhamena uzera. 9Uzera wosili, ou au minikire nkenye muntu, pokuwiza mouzuni wa kere.
10Age kwa kere mouzuni. Age yige ga u sitire, nye uzuni kapi wa mu divire. 11Age kwa wizire kwavendi, nye vendi kapi va mu tambwire. 12Nye navenye ava va mu tambwire, ava va pura edina lyendi, age kwa va pere nonkondo, asi va vhure kukara vana vaKarunga. 13Ava yiwo va dira kuretera mohonde ndi pasintu, ndi meharo lyomugara, nye mwaKarunga va va hampurukira.
14Nkango yiyo za kara muntu, makura yiyo za tungire mokatji ketu. Ose yiyo twa mona uyerere wendi, awo yiwo uyerere waMunwaKarunga a huru ou ga gwana mwaGuhwe, age ana zura nkenda nosili.
15Johanesa yiyo ga gavere undipo wokumuhamena, makura ta zigire asi: “Ogu nga kwama nge, yige ga pita nge mekuto, yeeyi age kwa hoverere kukara po, ame simpe patupu.”
16Natuvenye twa tambura konkenda zendi zonzi za hana kupwa, ezi a tu paape. 17Yeeyi Veta kwa zi gava zi gendere mwaMosesa, nye nkenda nosili kwa gendera mwaJesus Kristusa. 18Nagumwe si ga mona Karunga nampili rumwe. Munwendi gelike a huru, ogu ga kara mevha lyaGuhwe, yige ga mu divisa.
Johanesa Mukuhwi ta gava undipo wokuhamena Kristusa
19Undipo waJohanesa yimo wa gendere ngesi, apa va tumine kwendi Vajuda womoJerusarema vapristeli noVarevhi, va ka mu pure asi: “Nyovelye?” 20Age makura ta litongonona, kapi ga patanene, nye ta litongonona asi: “Kapisi nyame Kristusa.” 21Awo makura tava mu pura asi: “Nyove yilye no? Nyove Eliya ndi?” Age ta tanta asi: “Hawe, kapisi nyame.” “Ndi nyove Muporofete ogu twa zuvha?” Age ta limburura asi: “Hawe.” 22Awo makura tava mu tantere asi: “Nyove yilye no, tu ka gave elimbururo kwava vana tu tumu. Nyamoge ngapi omu o litumbura?” 23Age ta limburura asi: “Nyame ezwi lyokuzigira momburundu asi, ‘Wapekereni Hompa nzira!’ moomu ga tente muporofete Jesaya.”
24Ano ava va tumine kwa tundire koVafalisayi. 25Awo makura tava mu pura asi: “Yinke nye o kuhwire, ove wa hana si nyove Kristusa, ndi Eliya ndi muporofete ogu twa zuvha?” 26Johanesa ta va limburura asi: “Ame kukuhwa tupu nomema, nye mokatji keni mweli ogu mwa dira kudiva. 27Age yige nga kwama nge monyima, nye ame kapi na wapera kuditura tuliva tononkaku dendi.”
28Yininke eyi kwa horokerere moBetani, mesinya mwina lyaJorodana, omu nga kuhwire Johanesa.
Nzwigona zaKarunga
29Eyi kwa sa, Johanesa ta mono Jesus age ta wiza kwendi. Makura ta tanta asi: “Tareni, Nzwigona zaKarunga ezi azi gusa po nonzo douzuni. 30Yige googo kani tantere asi, ‘Monyima zange tamu wiza mugara, ogu ga pita nge mekuto, yeeyi yige ga hova kukara po, ame simpe patupu.’ 31Name kapi na mu divire, nye ame kwa wizira ni ya kuhwe nomema asi, nkumwe a divikwire po koVaisraeli.”
32Johanesa yiyo ga gavere undipo asi: “Nina mono Mpepo azo kuna kuhumburuka meguru ngwendi nkutji, makura tazi ya mu tembere. 33Name kapi na mu divire. Nye ogu ga tuma nge, ni ya kuhwe nomema, yige ga tanterere nge asi, ‘Ogu ngo mona, Mpepo azo kuna kumutembera zi kare pwendi, yige googo a kuhwisa koMpepo zoKupongoka.’ 34Ame na yi mona, makura yiyo na gava undipo wokuninka asi, age yige MunwaKarunga.”
Varongwa vaJesus wokuhova
35Eyi kwa sa, Johanesa ta zi ko hena novarongwa vendi vavali. 36Eyi ga mona Jesus age kuna kugenda, ta tanta asi: “Tareni, Nzwigona zaKarunga ozo!” 37Varongwa ava vavali eyi va zuvha nonkango dendi, makura tava kwama Jesus. 38Ano Jesus eyi ga setuka konyima, a tare tava mu kwama, ta va pura asi: “Yinke muna kupapara?” Awo tava limburura asi: “Rabi,” (kuninka asi murongi) “oku wa kara kupi?” 39Age ta va tantere asi: “Wizeni, mu ya tare.” Awo tava zi ko, tava ka mona apa ga kere, ezuva olyo makura tava zuhwara nendi. Siruwo oso kwa kere poyiha yovili zaune kositenguko.
40Powo vavali ava va yi zuvhire kwaJohanesa, makura yiyo va kweme Jesus, gumwe po edina lyendi yige Andiliyasa, mumbyaSimoni Peturusa. 41Age kwa hovere kugwanekera namukurwendi Simoni, makura ta mu tantere asi: “Ose tuna gwana Mesiyasa.” (Kuninka asi Kristusa, Mugwavekwa). 42Makura ta twara Simoni kwaJesus. Jesus ta mu tara, ta tanta asi: “Nyove Simoni zaJohanesa. Ngava ku tumbura asi Kefasa” (kuninka asi Peturusa, emanya).
Jesus ta zigida oFilipusa naNatanayera
43Eyi lya sire ko, Jesus kwa here kuza koGalireya. Ta gwana Filipusa, makura ta mu tantere asi: “Kwama nge.” 44Filipusa kwa tundire moBetesaida, mositata soAndiliyasa naPeturusa. 45Filipusa makura ta ka gwana Natanayera, ta mu tantere asi: “Ose tuna mono ogu ga tjanga Mosesa moVeta, nogu va tjanga vaporofete nawo. Edina lyendi yige Jesus gomoNasareta, munwaJosefa.” 46Natanayera ta mu pura asi: “MoNasareta nani kuvhura kutunda mo yoyiwa?” Filipusa ta mu limburura asi: “Wiza o ya tare!”
47Jesus apa ga mwene Natanaera ta wiza kwendi, ta uyunga asi: “Muisraeli mwene‐mwene ga hana umbudi.” 48Natanayera ta mu pura asi: “Kupi oku wa divira nge?” Jesus ta limburura asi: “Age Filipusa simpe nokukuzigida si, ame nare nina ku mono, ove moukuzu.” 49Natanayera ta limburura asi: “Murongi, ove MunwaKarunga, ove o hompa gwaIsraeli.” 50Jesus ta tanta asi: “Amesi ove kuna kupulira, yeeyi na tanta asi, ame kuna ku mono moukuzu. Nye eyi ngo mona komeho yinene, ya pita eyi.” 51Age makura ta va tantere asi: “Yosili na kumutantera: ngomu mona eguru kuna zeguruka, ano vaengeli vaKarunga awo kuna kuninka, va ronda va humburukira MunwaMuntu.”
ទើបបានជ្រើសរើសហើយ៖
Johanesa 1: KWN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Egwanekerobibeli Lyanamibia 1987, 2003
© Bible Society of Namibia 1987, 2003
