Luka 1
1
Obweébeembezi
1Owi isima Teofiilo, abaantu béenzi beégumisiliize kwaandika aha buteéka amagaambo áago gakabaho omuli íichwe. 2Amagaambo ago tukagaambilwa na abaantu áabo yaábeesuululukiize amagaambo ago nyini habwa améeso gáabo kuluga aha bubaandizo bwe emilimo ya Yeézu, na abaantu abo nibo bakaba nibasuúgaanisa empola za Yeézu. 3Neenye káandi, nnyetegeeliíze amagaambo ago góona kulugiilila aha bubaandizo. Naábona kuzima nkwaandikile, kuba 4íiwe neewe omanye mazima amagaambo áago okeégeswa.
Obubáasi bwo kuzaalwa Yohana Omubatiza
5Herode obuchilo akaba ali omukáma we éensi ya Yudea, akaba aliho omugabe#1:5 Omugabe: Habwo obusoomboozi bwooli, osome echigaambo cha Abagabe omu Obusoomboozi habwa Amagaambo Agagumile. oómo, izíina lyoómwe Zakaria, we embága yo obugabe ya Abiya. Mukazíwe náwe akaba ali owo olugaanda lwo omugabe Haruni,#1:5 Haruni: Akaba ali mudugu wa Musa, akaba ali omugabe mukúlu owo kubaanza. Okuluga 28:1-3. izíina lyoómwe Elizabeti. 6Bóona bábili bakaba bali abagololoke omu méeso go Omukáma Múungu. Bakaba beekomya ebilagilo byoómwe byóona, omu kubigomookela hatéena amabála goóna góona. 7Bakaba batazeéle omwaana, habwo kuba Elizabeti akaba ali omuguumba, na bakaba baákokweele bwooli.
8Chilo chimo, lukaba luli olubo lwe embága ya Zakaria kukola emilimo ya abagabe omu méeso ga Múungu. 9Kwiingana no obuteéka bwo obugabe, Zakaria akatoozibwa kuza omu nzu yo Omukáma Múungu,#1:9 Omu nzu yo Omukáma Múungu: Habwo obusoomboozi bwooli, osome echigaambo che Éenzu ya Múungu omu Obusoomboozi habwa Amagaambo Agagumile. amwoóteze omwo obubáani. 10Zakaria obuchilo yaataahilemo kwoóteza obubáani, abaantu béenzi bakaba bakobile ahéelu, abalikusaba Múungu.
11Entúlo eémo, Zakaria yaásuululukilwa na maléeka#1:11 Maléeka: Habwo obusoomboozi bwooli osome Obusoomboozi habwa Amagaambo Agagumile. wo Omukáma Múungu. Maléeka ogwo, yaáyemeelela olubazu lwo obúlyo lwi itaámbilo lyo kwoóteza obubáani. 12Zakaria obuchilo káyaamubwéene, yeétimwa. Yaátíina bwooli.
13Náho maléeka ogwo yaámugaambila aáti, “Íiwe Zakaria, otatiina! Aga áago waásaba Múungu, yaágahulila. Mukaawe Elizabeti alaakuzaalila omwaana wo obukwaáta, olyamwéeta Yohana. 14Omwaana ogwo niwe alileetelela mube na amanulilwa bwooli. Abaantu béenzi balaánulilwa kuzaalwa kwoómwe. 15Naába mukúlu omu méeso go Omukáma Múungu. Atanywa evíini#1:15 Evíini: Habwo obusoomboozi bwooli osome Obusoomboozi habwa Amagaambo Agagumile. nali choóna chóona éecho chilikutamiiza. Aleezuzwa no Omwooyo Mutakatíifu, nóobu achili omuunda ya nyina. 16Alaasubya abaantu béenzi ba Iziraeli aha Mukáma Múungu wáabo. 17Alaámweebeembelela Omukáma, aloónze abaantu kumunyegeza, ayina amagala no Omwooyo gwa Múungu nko óokwo akaba ayinágo Eliya.#1:17 Eliya: Abayahudi bakaba nibategeza kwíiza káandi omubáasi Eliya, kuloonza kwíiza kwa Masihi. Malaki 3:1; 4:5-6. Alyaábakwaátanisa abazéele na abáana báabo, na abazilwa alyaábakola babe na amasala go kumugomookela Múungu.”
18Zakaria yaámubúuza aáti, “Íinye na mukaanze twaákokweele! Ndaachimanyaho iínta echigaambo echo?”
19Maléeka yaágaamba aáti, “Níinye Gaburieli, óogwo ndikweémeelela omu méeso ga Múungu. Ansiindikile kunu, nnyize kukugaambila amagaambo ago amazima. 20Náho tokakuunzile amagaambo gaanze, áago mazima galaákolwa. Mbwéenu, kubaandiza óobu noóba omutita. Tolihicha kugaamba kuhicha kuhika obuchilo óobwo amagaambo ago galikolwa.”
21Mbwéenu, abaantu abaabeele nibamuliindilila Zakaria, baásobelwa habwo kubona óokwo yeéliilwe omwo omu nzu ya Múungu. 22Káyaalugilémo, talahikize kuhooya nábo. Baámanya abweene ameezaho omu nzu ya Múungu. Akaba naabooleka ne ngalo, náwe yaázeendelela kuba omutita.
23Ebilo byoómwe byo kuheéleza omu nzu ya Múungu obuchilo byaáhwéele, yaázeenda omúka. 24Aheezile, mukazíwe Elizabeti yeemucha éenda. Yaámala améezi ataanu bweeseléke, yaágaamba nka nikwo, 25“Omukáma Múungu niwe yaánkolela aátyo no kuúmpweela. Yaanyiháho ensóni omu baantu.”
Obubáasi bwo kuzaalwa Yeézu
26Éenda ezo obuchilo yaáhikize améezi mukáaga, Múungu yaásiindika maléeka Gaburieli omu muzihwa gwi izíina lilikwéetwa Nazaréeti omu nsi ya Galiláaya, 27ahíke aha muhalakazi oómo óogwo akaba atakamumanyile omuséeza, izíina lyoómwe Mariamu. Omuhalákazi ogwo akaba asuumbikilwe no omukwaáta oómo, izíina lyoómwe Yozéfu, wo olugaanda lwo omukáma Daudi.#1:27 Daudi: Habwo obusoomboozi bwooli osome Obusoomboozi habwa Amagaambo Agagumile. 28Maléeka ogwo yaázeenda ahali Mariamu, yaámugaambila aáti, “Niinkusúula, íiwe oyina omugisa bwooli! Omukáma Múungu ali hamo neewe.” 29Náwe yaázululukilwa bwooli habwa amagaambo ago, yaáteekuza omu muganya, “Echi chisuulo chiina nsoonga chi?”
30Náho maléeka ogwo yaámugaambila aáti, “Íiwe Mariamu, otatiina, Múungu yaákubonesa embabazi. 31Léeba, olaatwáala éenda, olaazáala omwaana wo obukwaáta, olyamwéeta Yeézu. 32Alyáaba mukúlu, alyaáyétwa Mutábani wa Múungu Óogwo Ali Olugulu ya Byóona. Omukáma Múungu alaamuha echitébe chi ikuzo lyo obutégeki bwo omukáma Daudi, iíse enkúlu. 33Alyáaba mukúlu we enzáalwa za Yakobo ebilo byóona. Obukáma boómwe tibulihwa nakáti.”
34Mariamu yaámubúuza maléeka aáti, “Aga galaákolwa gáta kunu íinye ntakumumanya omuséeza?” 35Maléeka yaámugalulila “Omwooyo Mutakatíifu alyaákwiizáho, no obuhicha bwa Múungu Óogwo Ali Olugulu ya Byóona bulyaákusweeka. Bityo, omwaana óogwo olizaála aláaba omutakatíifu na alyaáyétwa Mutábani wa Múungu.#1:35 Mutábani wa Múungu: Habwo obusoomboozi bwooli osome Obusoomboozi habwa Amagaambo Agagumile. 36Léeba! Mudugu waawe Elizabeti, óogwo bakaba bamweéta omuguumba, omu bukeékulu bwoómwe atweele éenda yo omwaana wo obukwaáta. Okwéezi oku no kwa mukáaga. 37Ensoonga Múungu tichiliho éecho alikulemwa kukola.” 38Mariamu yaámusubiza, “Íinye ndi omuzaánakazi wo Omukáma Múungu, bibe hali íinye nko óokwo waágaamba.” Ahonyini, maléeka ogwo yaázeenda.
Mariamu naazeénda kumwaángalucha Elizabeti
39Omu nchilo ezo nyini, Mariamu yaáloonza oluzeendo, yaázeenda bwaangu omu muzihwa gúmo omu nsi ya amabaanga ga Yuda. 40Yaátaaha omu nzu ya Zakaria, yaámwaángalucha Elizabeti. 41Elizabeti obuchilo yaáhuliile echisuulo cha Mariamu, omwaana óogwo akaba ali omuunda yoómwe yaáguluka. Ahonyini, Elizabeti yeezuzwa no Omwooyo Mutakatíifu. 42Niho yaágaamba ahi iláka liháango aáti, “Omu bakázi bóona, íiwe níiwe ófuuhilwe! No omwaana óogwo olaazáala, náwe ayina omugisa. 43Íinye ndi oóha, nóobu nyina wo Omukáma wéetu yéeza kuunyaangalucha? 44Obuchilo naáhulila echisuulo chaawe, ahonyini omwaana óogwo ali omuunda yaanze yaáguluka habwa amanulilwa. 45Íiwe ófuuhilwe, habwo kuba weékiliza amagaambo áago Omukáma Múungu yaákugaambila galaákolwa!”
Oluzina lwa Mariamu
46Mariamu yaágaamba aáti,
“Omuganya gwaanze nigumusíima Omukáma Múungu,
47no omwooyo gwaanze nigumunulilwa Múungu, Omuchuúnguzi waanze.
48Habwo kuba abubweéne obulemwa bwo omuzaánakazi woómwe.
Kuluga óobu abaantu be enzaalwa zóona balyaányéta owo omugisa.
49Múungu owo obuhicha bwóona yaánkolela amahano,
ni izíina lyoómwe ne elitakatíifu.
50Naazeendelela kubazilila echiganyizi abaantu be enzaalwa ne enzaalwa áabo abalikumukoondookela.
51Akozile amagaambo mahaango habwa amagala goómwe,
abanagile abeene ihagi.
52Abagwiisize abakúlu kuluga aha bitébe bi ikuzo lyáabo lyo obutégeki,
abafula abeenamwiile.
53Abeena enzala abahaagisize kuzima,
abahíte ababiingile engalo zili busa.
54Azunile Abaiziraeli abazáana boómwe,
habwo kwiizuka kubazilila echiganyizi.
55Nko óokwo yaalagéene na Ibrahímu isíichwe enkúlu ne enzaalwa zoómwe zóona, ebilo byóona.”
56Niho Mariamu yeékala owa Elizabeti améezi asatu, yaámala yaásuba owoómwe.
Kuzaalwa kwa Yohana Omubatiza
57Echilo cho kweéchuungula kwa Elizabeti káchaahikile, yaázáala omwaana wo obukwaáta. 58Abatúuzi boómwe na abanyalugaanda, obuchilo baáhuliile okwo Omukáma Múungu yaámuziliile echiganyizi, baánulilwa hamo náze.
59Ogwo mwáana, káyaahikize echilo cha munáana, beeza kumusála ikóba,#1:59 Kumusála ikóba: Habwo obusoomboozi bwooli osome Obusoomboozi habwa Amagaambo Agagumile. baáyeenda bamuluke izíina lya Zakaria, nke iíse. 60Náho, nyina yaáyaanga, yaágaamba, “Mmahi! Naalukwa izíina Yohana.” 61Baásubya, “Kási! Tihaliho mudugu wéenyu óogwo alikwéetwa izíina elyo!”
62Baámubúuza iíse habwo kumwoóleka ne ngalo, kuba abagaambile izíina éelyo alikweenda kumwéeta omutábani. 63Yaábasaba echibaáho, yaáchaandika aáti, “Izíina lyoómwe nilyo Yohana.” Bóona baásobelwa.
64Ahonyini akanwa kaákomoololwa, olulími lwaágololoka, yaábaanza kuhooya káandi, yaámukúza Múungu. 65Abatúuzi bóona baátíina bwooli. Echigaambo echo chaakumuuka bwooli omu nsi yóona ya mabaanga ga Yudea. 66Bóona áabo bahuliile, baaba nibeebuúza báti, “Omwaana ogwo naába omuuntu wa kazeendele chi?” Bakagaamba bátyo habwo kuba mazima, Omukáma Múungu akaba ali hamo náze.
Oluzina lwa Zakaria
67Zakaria iíse wo omwaana ogwo, yeezuzwa Omwooyo Mutakatíifu. Yaásohoza obubáasi nka nikwo,
68“Omukáma Múungu wéetu wa Iziraeli akuzibwe,
habwo kuba ayizile no kubachuúngula abaantu boómwe.
69Atuheéle Omuchuúnguzi owo obuhicha
kuluga omu lugaanda lwo omuzáana woómwe Daudi,
70nko óokwo yaabeele agaambile aho kala
habwo omuháanda gwa ababáasi boómwe abatakatíifu.
71Akatugaambila nka nikwo, alaátuchuúngula kuluga aha babisa béetu,
no kuluga omu ngalo za abo abalikututamwa.
72Yaágaamba nka nikwo alaábazilila echiganyizi besiichwe enkúlu,
no kwiizuka endagano#1:72 Endagano: Habwo obusoomboozi bwooli osome Obusoomboozi habwa Amagaambo Agagumile. yoómwe entakatíifu éezo yaalagéene nábo.
73Endagano ezo niyo akamulahilila isíimwe enkúlu Ibrahímu,
74nkokwo atubonesa íichwe,
atuchuúngule kuluga omu ngalo za ababisa béetu,
tube nitumugomookela obutazila butíini,
75tuli omu kukola amazima omu méeso goómwe
omu butakatíifu ebilo byéetu byóona.
76Íiwe mwáana waanze, olyáaba nooyétwa omubáasi wa Múungu Óogwo Ali Olugulu ya Byóona,
olyaámwiibeembelela Omukáma, kumuloongeza omuháanda.
77Mala olyaábamanyisa abaantu boómwe nka nikwo balichuúngulwa,
habwo kuganyilwa ebiheno byáabo,
78kwiingana ne chiganyizi chiháango cha Múungu wéetu.
Obuchuúnguzi obwo bulyaátwiizila nko omwaanga gwi izóoba lilikusohola,
79na gulyaábamulikila abali omu nsiimbaazi,#1:79 Abali omu nsiimbaazi: Ensoonga yaáho ne eéti áabo abatakumumanya Múungu.
abali omu lwaágalalo no obutíini bwo olufu.
Alaátweebeembelela, tuzeénde omu muháanda gwo obuhóolo.”
80Bityo omwaana ogwo Yohana yaákula, yaábonesa amagala aha Mwooyo Mutakatíifu. Yaázeenda kwíikala omu nsi yo obwoóma, kuhicha obuchilo óobwo yeéyolekile aha Baiziraeli.
ទើបបានជ្រើសរើសហើយ៖
Luka 1: ZIN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 Wycliffe Bible Translators, Inc.
