Matay 12
12
na kiyaumalran kana katalaulepan na wari
(Maruko 2.23-28; Luka 6.1-5)
1likuzan lra a 'azi sawariyan mu, ulra a saya katalaulepan na wari makalrang kana emi na 'uma i Yēsu. savelaw lra tu temakesi, zi hemitri za pidaya kana emi mekan. 2ulra papida na Palisay na trau mena'u lra, marengay kani Yēsu: <<na'uwi i inu, nannu temakesi kemakuda lra kana 'azi ta maruwa kemakuda na lremak nu katalaulepan na wari!>>
3temuvang i Yēsu: <<i Davidē zi nantu pakarunan nu kazu za savavelawan lra mu kemakuda za eman ziyamaw, 'azi mu miip ziyamaw? 4musavak i intaw kana ruma' na Viruwa i itras, i intaw salrangan kanantu pakarunan mekan kana ipatavang kana Viruwa i itras na pang; izu maw pamelri za kuret ('alrana kemazu na pang mu mawmau na rahan na kararuwa mekan). 5kamelriya lra 'azi mu ziyan miip tu vinavalrayan na kuret ni Mosē? kana katalaulepan ziya na wari, na rahan kazu kana vangesar ruma' kemuwatreng lra kana kakuwayanan na katalaulepan na wari, mawmu nazu 'azi pamelri za kuret. 6marengaya ku kanmu, i kani ulra marapazangal kana vangesar ruma'. 7marengay na Sēsiyo: <ku niranger mu maw na kemalawas melraman, amelri na patavangan.> anu tatena' mu malrazam tu pauwayan kanini na ngay mu, 'azi mu pupamelri kana 'azi mipamelriyan na trau. 8'alrana Alrak na trau maw a Luzu kana katalaulepan na wari.>>
paka'inava kana mikuwalengan za marum i lima
(Maruko 3.1-6; Luka 6.6-11)
9muveruk lra i Yēsu i kazu kana kinazuwan, mukuwa kanantu waazukan ruma' i Yodaya na trau. 10i kazu ulra sasa a trau, marum lra tu lima na saya. ulra papida a trau maranger za miya' tu pamelriyan ni Yēsu, zi kiyumalr kantaw: <<kazu kana katalaulepan na wari paka'inava za kuwalengan maw pamelri za kuret?>>
11temuvang i Yēsu: <<nu kanmu i savak ulra a trau ulra tu siri a saya, i ini na saya na siri kazu kana katalaulepan na wari mutani kana kerutr i savakan, kudakudayaw awa? 'azi tu i kakezengi puitras ziyamaw? 12na trau marapazangal lra za sazu kana siri! semeneng, kana katalaulepan na wari nu kemakuda za 'inavayan mu muwai paturus na kuret.>> 13kemazu mu, marengay i Yēsu kanizu na trau: <<lrayatru papatezelr na lima!>>
a melrayatr za lima i intaw mu, mareveliyas 'inava lra na lima, maresan kana lima na saninin. 14mupatraran na Palisay na trau, maranganger za kima'etrev kani Yēsu, piyanatray kantaw.
na pakarunan tu pinalimi' kana Viruwa i itras
15kinger i Yēsu kanini na vati, zi muveruk i kazu, kazuwan na trau kurelrang kantaw. i intaw tu paka'inavayaw lra nazu tu kuwalengan peniya, 16marengay patalru kanazu irarengay pu'ivat pupatraran kanantu kinakuda. 17i ini penauwa pula'esi lra kanantu nirengayan na patralritralri i Isaya:
18na'uwi a, i intaw maw ku pinalimi' na pakarunan;
pakamelri ku lraman kantaw, sahar kantaw.
ku i vaverayanay ku Lu'em kantaw;
vavati i intaw pakalrazam kana tratrautrau ziyan kananku sayvang.
19'azi kimasaki i intaw, 'azi zemaza'ung,
zi 'azi 'emuway'uy makadadalan.
20na kitre'etre' na ka'ilayan mu, 'azi meraritru' i intaw;
uri 'a'evut na lrawlraw mu, 'azi 'ema'evut i intaw.
meruwakezang 'azi muwavalis kana patezelran i intaw,
palru za kisker na patezelran.
21na trau ziyan i punapunan
talrima kantaw mapiya!
i Yēsu zi Bēlēzēbu
(Maruko 3.20-30; Luka 11.14-23)
22a azu mu, ulra a trau tu pilralrangaw a sasa kipalrar, mavutri' zi ma'umuy na trau zuwa kani Yēsu i ngawayan. tu paka'inavayaw ni Yēsu, maruwa marengay i intaw, zi maruwa mena'u. 23salaw mare'alav na zinekalranan, marengay: <<kamelriya lra i intaw mu maw nintaw Alrak ni Davidē ziyamaw?>>
24Palisay na trau a kinger kanini na ngay mu marengay: <<maruwa venawi kana palrar i intaw, nu 'azi kuretalrima kana yawan na palrar i Bēlēzēbu.>>
25malrazam i Yēsu kanazu za kemianganger za eman, zi marengay kanazu: <<na i iyan lra na kanatal nu maziyakuzikul nazu mu, 'azika'azi muranak; na sazekalran na saruma'enan nu maziyakuzikul mu, kuwaazu 'azika'azi mutepi'. 26na satang nu venawi kana satang, mawna maziyakuzikul, nantu kanatal kuwadakuda arekez matikezir awa? 27anu kuretalrima ku kani Bēlēzēbu venawi kana palrar, nu kemazu mu, nu venawi kana palrar nanmu temakesi kuretalrima kani i eman ziyamaw? nanmu temakesi uwasay kanmu za maw pamelri mu! 28mawmu, nu kuretalrima ku kanantu Lu'em na Viruwa i itras venawi kana palrar mu, i ini mu uwasay lra kana Viruwa i itras za ulra demikes za kezang i savak kanmu.
29<<ulra a trau maruwa musavak kana ruma' na samuray 'emaraw kanantu piniemanan ziyamaw? nu amelri iyanguwayan demadikus kana samuray mu karuwa lra 'emaraw kanantu ruma'.
30<<izu na 'azi kurekasa kaninku mu, mawna semuveli kaninku; izu na 'azi kurekasa kaninku puwalrang mazuwazuk mu, mawna patatepi'. 31semeneng, marengaya ku kanmu, tu pinamelriyan ziya na trau zi na semiri na ngay ziya mu karuwa kilapus peniya; mawmu na semiri kana Vangesar Lu'em na trau mu 'azi karuwa kilapus. 32izu na marengay semuveli kana Alrak na trau mu, karuwa kilapus; mawmu na semiri kana Vangesar Lu'em mu, nu harem lra zi nu aziyu lra, 'azi kararuwa kilapus peniya.>>
na kawi zi na vuwa'
(Luka 6.43-45)
33<<nu 'inava na kawi mu, 'inava na vuwa'; nu kuwatreng na kawi mu, kuwaazu kuwatreng na vuwa'. kemay kana vuwa' maruwa ta mena'u kana kawi za 'inava za kuwatreng. 34i inmu nanni na mipadawak na unan, maw mu a kuwaatrengan a mawziyan, kemuda marengay pupana za 'inava na ngay ziyamaw? 'alrana matemuy i anger mu, marengay lra pupana na udung. 35na 'inava na trau kemay kanantu anger i savakan na inepetr na 'inavayan mupana a 'inava; na kuwatreng na trau kemay kanantu anger i savakan na inepetr na kuwatrengan mupana a kuwatreng.
36<<marengaya ku kanmu, kazu kana kasayvangan na wari, tu nirengayan na kurisaesa na amelri karengayngayan mu tatuluzen peniya. 37'alrana, na Viruwa i itras mimanay kanannu nirengay marengay pakalrazam za ulra nu pinamelriyan, zi mimanay kanannu nirengay marengay pakalrazam za iniyan u za pinamelriyan.>>
kiyami za karepalripalri
(Maruko 8.11-12; Luka 11.29-32)
38a azu, ulra papida na sinsi kana Sēsiyo zi na Palisay na trau zuwa marengaya kani Yēsu: <<sinsi, maranger mi za pupanaya u za karepalripalri pana'u kaniyam.>> 39marengay i Yēsu: <<kanini na ziday na trau kemuda kana kuwaatrengan, kemuda kana 'azi penatezelr! zi kemazu mu kiyami kaninku pupana za karepalripalri! 'azi, nu amelri tu karepalripalri na patralritralri i Yona mu, iniyan lra za zuma na karepalripalri za panana'u kanmu. 40i Yona kazu lra tu tiyalr kana ma'izang na vulraw i savakan za teluwa wariyan teluwa 'esungan, Alrak na trau kuwaazu kaazu kana dare' i savakan teluwa wariyan teluwa 'esungan. 41kazu kana kasayvangan na wari mu, i Ninivē na trau kararahan kokso kanmu kanini na ziday na trau, 'alrana kinger nazu kanantu i palenak na vati ni Yona mu 'ematelr kana kuwatreng zi muwasalr patezelr lra. marengaya ku kanmu, i kani ulra a marama'izang kani Yona na lremak ziyanay! 42kazu kana kasayvangan na wari, na vavayan na yawan i kedet kararahan kokso kanmu kanini na ziday na trau, 'alrana i intaw kemay dawilr zuwa kingera kanantu vati na misayhuwan ni Solomon yawan. marengaya ku kanmu, i kani mu ulra a marama'izang kani Solomon na lremak ziyanay!>>
mareveliyas zuwa na palrar
(Luka 11.24-26)
43<<na palrar muveruk lra kana pinalrar na trau, paketrep lra kemakawang kana maruwarum na dare', maaya' kana talaulepan za kaazuwan mu, 'azi pakaaya'. 44zi marengay: <uwaveliyas ku mukuwa kana ruma' na mawziya.> a muruma' mu, mena'u za 'azi mikinazuwan za trau, pawnung 'inelresapan mukirungetr zi inepetran. 45kemazu zi mupatraran ziya i intaw, murung za papitu na marakuwatreng kantaw na palrar zuwa, mukasa kantaw kikazu. izu na trau i likuzan mu marakuwatreng lra nantu nirekudayan kana aziyu ziyan. ini na kuwatreng na ziday na trau tu nirekudayan kemazu maw kemani.>>
tainataw zi waditaw ni Yēsu
(Maruko 3.31-35; Luka 8.19-21)
46i Yēsu a kazu ziyan kimazazayar kana zinekalranan mu, i tainataw zi na waditaw mu zuwa lra; matikezir i patraran nazu, maranger kimazayar kantaw. 47ulra a trau marengay kani Yēsu: <<uy, i taina zi na wadiyu ulra i matikezir i patraran, maranger kimazayar kannu a!>>
48temuvang i Yēsu: <<i eman i inani? i eman nanku wadiyan?>> 49kemazu zi temuzu' kanantu temakesi marengay: <<na'uwi i inmu, nanni na trau mu maw i inani, ninku wadiyan! 50na miturus ziya kanantu nirangeran ni Amalri i itras mu, mawna nanku wadadiyan, zi i inani.>>
ទើបបានជ្រើសរើសហើយ៖
Matay 12: TPN
គំនូសចំណាំ
ចែករំលែក
ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© The Bible Society in Taiwan, 2023