မၢ်ကူး 7
7
ယ့ၣ်ရှူးကၱာ်ဖၤရံၤၡဲဖဳးတစီာ်
(မး ၁၅:၁-၉)
1ဖၤရံၤၡဲဖဳးကၱာ်အဝှ့းစဲာ်အအီၣ်ဒဳ ယရူၤၡလ့ၣ်တစီာ်လ့ၤအီၣ် ခွဲဘးကဲၤယ့ၣ်ရှူး. 2ဘ့စစာ်ထၱးယ့ၣ်ရှူးအပျဲၢ်အဘီာ် တစီာ်အၣ် ဘီာ်စူး ဘီာ်ခၣ်ကၱာ်တရူတရီၤနီးဒဳၣ်, စဝၢ်လှဲးကဲၤလၢ်ဝၤအတဲၤကမဲာ်.
3(မၤနဲၢ်ကဒီၣ်ဓဳၤဒဳၣ်, ဖၤရံၤၡဲဖဳး ကၱာ် ယူဒၤဖဳးလဳစါစဲးနဳၤတဆဲကၱာ်စအၣ်စအီနှၱနီး, စဟူ စဘါအူဆူးစစူးခီးအီၣ်အဲပျာ်, အီၣ်အံာ်မဳၤ စဲာ်ဖဲဓဳၤ အနူၤအဒီ, 4ဘ့စအီၣ်ဇ့ၤနၤပူၤ ကၱာ်စဓဳၤက့ၤ ၡံၣ်ဖါနဳၤ, စတဟူစဘါဝှါစစူးခီးနီးအသူသရ့, စတအၣ်တအီနီး. အနူၤအဒီအယဳၤ ကၱာ်အလဝ့ၤ အီၣ်ဝ့ၤ အစာ်ဘိတဲၤဟူစဘါစီးချ့းစီးလီး, ကျ့းကပဳၤကၱာ် လ့ၤမံ ခဳးတစီာ်နဳၤ.)
5မဲၤကနဳၤဒဳၣ်, ဖၤရံၤၡဲဖဳးကၱာ်အသဲာ်စဲာ် တစီာ်ဒဲကဲၤစဲာ်, “နပျဲၢ်နဘီၣ်တစီာ် တအီၣ်အံာ်မၤဖံဖူ အနူၤအဒီနီး, မၱာ်အၣ်အီဘီာ်စူးဘီာ် ခၣ်မၤနဲၢ်.”
6မၱာ်စဒီၣ်က့ၤလၢ်ဝၤတစီာ်အလံၢ်, “ဝံယၡါယၤဒီၣ်တီၤလီၤ သံဝၱၤသံကဲမၱာ်အဘဲာ်နံၤ ပီၤနံၤဟဳ. သံအတပီးခဳးတစီာ်အဝၱၤအကဲအဝှ့း လၤတီၤလီၤအဒီၣ်,
ကဘၱာ်စဲာ်ဒီၣ်, ‘ပၠၤအယဳၤတခွံယဳၤ, ယးဘဲာ်တပွဲးယဲၤကၱာ်စလီၤ မီၤ,
ပရၤဆါစသးမၱာ် အအီၣ်ယၱၤကၱာ်ယဲၤ.
7စသဘဲထာ်ယဲၤမၱာ်အနှးနှါလီၤ. စသဲာ်လှိပၠၤအတဲၤသိၣ် တဲၤသီ အစာ်ဘိအမၱာ်ယတဲၤမှဲးလၤအခီနဳၤ.’
8“မၤနဲၢ်, သံလဲၢ်လၤကဲဝှါ ကဘၱာ်စဲာ် အတဲၤမှဲးလၤဒဳၣ်, သံ ဖၱးကျဳၤမၱးတကျ့းတပွဲး ပၠၤအနူၤ အဒီထဲၢ်အဟူစဘါကျ့းကပဳၤ, စီၤချ့းစီး လီးကၱာ် တဲၤအလဝ့ၤတဇဲၢ်နဳၤလီၤတခီ.”
9ကၱာ်စဒီၣ်ကဲၤလၢ်ဝၤတစီာ်, “သဳထိဘါ ကဘၱာ်စဲာ်အတဲၤမှဲး လၤစာ်ဘိထဲၢ်သံကမဲၤအံာ်ပီၢ် သံအဲအနူၤအဒီနဳၤ. 10စီၤမိၤၡ့ဒီၣ် ကဲၤ, ‘ဒဳဘဲာ်ယးဘဲာ်ပီၢ်နမဳၤကၱာ်နပာ်,’ ကၱာ် ‘ကယါပၠၤထဲၢ် အဟိးအဟီ အမဳၤမၱတမၱာ်နီးအပာ်တပွဲၤနဳၤ ကဘဲာ်ကီတဲၤသံ.’ 11ပရၤဆါသံ နဳၤသံဒီၣ်, ‘ပၠၤတပွဲၤကဒီၣ်စမဳၤစပာ်, “ကယါတဲၤ မဲၤဇဳၤ နမီၤနံၤ ဘဲာ်ဒဳ ယအီၣ်တစီာ်မၱာ်ကီၤဘၣ် (အထာ်ပဳၤထာ်ဘါမၱာ် အဘဲာ်လှူၣ်ထာ်အံာ် ဘၱာ် စဲာ်).”’ 12ကၱာ်သံလဲၢ် လှိတပွဲး စကမဲၤဘဲာ်အမဳၤအပာ်အနံၤခံ တမံၤမံၤနဳၤ. 13သံမဲၤဖဳတပွဲး ကဘၱာ်စဲာ်အတဲၤမှဲးလၤ ဒဳသံလဲၢ် ဓဳၤလဲၢ်မူၤသံအဲအနူၤအဒီ ကၱာ်တဲၤအနဳၤတဇဲၢ်နဳၤ.”
တဲၤအမဲၤဖၱထာ်ပၠၤအစံးပိးစံးသဳ
(မး ၁၅:၁၀-၂၀)
14မဲၤဝှါယ့ၣ်ရှူးယဳၤပျာ်ပၠၤကၱာ်စဒီၣ်, “သံ လဳစါစဲးဆီးခ့န့းပီၢ် ယဲၤကၱာ်သၱာ်ဟဲပီၢ်. 15တဲၤ အချဳအသဝါ ကၱာ်အလ့ၤနံၢ်ပၠၤပူၤနဳၤ အမဲၤစဘၱစဘီာ် ဇၤစဲာ်နဳၤတအီၣ်တပွဲးတမံ နီး, မၱာ်အအီၣ်စပူၤအဟဲး ထာ်တစီာ်နဳၤတခီ. 16ပၠၤတပွဲၤပွဲၤအနံၤကူၤ နၱၤကၱၢ်ကအီၣ်ဒဳၣ်, စသၱာ်ဟဲဒီဧဲၤ.”
17ကၱာ်ဒီဘ့စလ့ၤနံၢ်ၡံၣ်ပူၤကၱာ်အီၣ်တပီၤ ကဲၤပၠၤအပဳၤအဟီးဒဳၣ်, စပျဲၢ်စဘီၣ်တစီာ်ဒဲစာ်ကဲၤစဲာ် တဲၤကလဲၤအထာ်ပဳၤထာ်ဘါ. 18မၱာ်စဒီၣ်ကဲၤ လၢ်ဝၤတစီာ်, “သံတဲၤထၱနံၤကိၢ်နံၤတအီၣ်ကဲၤနီးဧါ. တဲၤဒဳအချဳအသဝါနဳၤလ့ၤနံၢ်ဝှါ ပၠၤအဟၱးကျဲဒဳၣ်, အမဲၤစဘၱစဘီာ်စဲာ်နဳၤ တအီၣ်ကဲၤတမံနီးနဳၤ. 19အတလ့ၤနံၢ်စသးအပူၤနီး. အလ့ၤနံၢ်စဖူပူၤဝှါအဟဲး ထာ်ကဲတပွဲးဒဳပီၤပူၤနဳၤ.” (အထာ်ပဳၤထာ်ဘါမၱာ် တဲၤအၣ် လဳစါစဲးမၱာ်အဝၱၤအၣ်ဘဲာ်တပွဲး.)
20စဒီၣ်ဝ့ၤဒီ, “တဲၤအမဲၤစဘၱစဘီာ်ပၠၤမၱာ် တဲၤအအီၣ်ဒဳ စပူၤ အဟဲးထာ်တစီာ်နဳၤ. 21တဲၤ အအီၣ်ဒဳပၠၤသးပူၤအဟဲးထာ်တစီာ် မၱာ်တဲၤကမဳၤ အကၱ ကဲာ်ကၱာ်တဲၤလၤသူးလၤကမဲာ်, တဲၤအၣ်ဟူၣ်အၣ် တကျဳ, တဲၤမဲၤသံအၣ်ဆဲ, တဲၤခဲဘးယၢ်ဘး, 22တဲၤသးအဲးနံၤ ပၠၤအတၱၢ်အတဲၤ, တဲၤစၱးပိးစၱးသဳ, တဲၤ ကၱကဲာ်မဲၤလှီ, တဲၤလှီးလှၱလှီးပျဲး, တဲၤဇီၤလီၢ်အိးအဲ, တဲၤသးကျးသးဆဲ, တဲၤဟိးပ့ၢ်ဆ့းဒါ, တဲၤပဲၢ်ထာ်ထိ အန့ၤ, တဲၤသဳးခဳးတစီာ်နဳၤလီၤ. 23တဲၤအကၱကဲာ်တစီာ်ယဳၤအီၣ်ဒဳ ပၠၤအပူၤကၱာ်အမဲၤစံးဘၱစဘီာ် တပွဲးစဲာ်တခီ.”
အမံၤမှူးတပွဲၤအတဲၤဘူၣ်
(မး ၁၅:၂၁-၂၈)
24ယ့ၣ်ရှူးဝဲၢ်ထဳးလ့ၤကဲၤဒဳ စိၢ်ကၱာ် စံဒိၣ်က့ၤပူၤတခီ. စလ့ၤ နံၢ်ကဲၤဒဳၡံၣ်တဝၤအပူၤ, မၱာ် စတသးအဲးနံၤပၠၤသၱာ်ဟဲကိာ်တဗွဲနီး, ပရၤ ဆါအတဘံာ်တပွဲးနီး. 25အမံၤမှူးထဲၢ်အဖဳးမူၤအီၣ်အံာ် တဲၤနှဲး အကရၢ်သၱာ်ဟဲဘဲာ် စလ့ၤဒဳၣ်လ့ၤနံၢ်ၡံၣ်ပူၤကၱာ် ကီၢ်လၤဘၱးတဒဲးကဲၤစခၣ်ထၱး. 26အမံၤမှူး အယဳၤတပွဲၤမၱာ်ပၠၤဟ့းလ့ၣ်ဖဳး, ပွဲၤသူကူာ်ဖဳး, က့ၤစူၤရံဖံးနံဖဳးအခွံ. စတၤမီၤယ့ၣ်ရှူးအကနှးဟဲးထာ်ဖျီးမံတဲၤၡံး တဲၤ နှဲးဒဳစဖဳးမူၤအဟၱးကျဲနဳၤ.
27ပရၤဆါစဒီၣ်ကဲၤလၢ်ဝၤ, “အပံၤစဖဳး တစီာ်ကအၣ်ကဳးမိၢ် ကိာ်, ကတမီၤဖၱးဝှါအပံၤစဖဳး တကဳာ်ဒဳၣ်ဝှ့လါတ့ၢ်နံၤထွံၣ်အၣ်နီး.”
28စဒီၣ်က့ၤလၢ်ဝၤ, “ဘဲာ်တပွဲးဘၱာ်စဲာ်, ပရၤဆါထွံၣ်အအီၣ် တဓၢ်လဲၢ်တစီာ်အၣ်ဘဲာ်တပွဲး အပံၤစဖဳးတစီာ် အတကဳာ်အကနၱးကနိး.”
29မဲၤကနဳၤဒဳၣ်ယ့ၣ်ရှူးဒီၣ်စဲာ်, “နတဲၤဒီၣ် ၡံက့ၤအယဳၤတဓဲ အခဳးအစဲ, က့ၤဒီဧဲၤ. တဲၤၡံးတဲၤနှဲး ဟဲးထာ်ထဳဒဳနဖဳးမူၤအဟၱးကျဲနဳၤ.”
30ဘ့စဓဳၤ က့ၤ စၡံၣ်နဳၤ, စကဲာ်ထၱးကဲၤ စဖဳးမူၤအီၣ်ဆီးမံ လါ လ့ၤမံခဳးကၱာ်တဲၤၡံးတဲၤနှဲး ဟဲးထာ်ကဲသ့ပွ့ၤကဲၤ.
ယ့ၣ်ရှူးမဲၤလှဲမဲၢ်အနံၤကူၤတအဳတမူၢ်တအး
31ယ့ၣ်ရှူးဟဲးထာ်ဝှါစိၢ်ကၱာ်စံဒိၣ်က့ၤဒဳၣ်, စက့ၤလၤကီဒဳ ကၤလံၤလဲပဲာ်လဲာ်ဝ့ၤနဳၤ, စလ့ၤကိာ် ဘဲာ်ဒဳ ဒ့းကးပလံၣ်က့ၤအသကျါမဲ ဗူနဳၤ. 32ပၠၤလ့ၤအံာ်ကဲၤစဲာ်အနံၤကူၤတအဳတမူၢ်တအးတပွဲၤ ကၱာ် တၤမီၤစဲာ် အကထဲးလၤ အစူးခီးလၢ်ဝၤအခဳးနဳၤ.
33စယဳၤဖျီးမံဝှါလၢ်ဝၤဒဳပၠၤအပဳၤအဟီး အကျဲ, စစဝၱနံၢ်လၢ် ဝၤအနံၤကူၤပူၤကၱာ်စစူးကနဳ, စထွၱးဘီာ်ဝှါစတီးဘဲာ်လၢ်ဝၤအပျၱၤ, 34စစာ် ထာ်ဒဳမီၢ်ခဳးလဲၢ်, စကအဳကၱာ်ဒီၣ်ကဲၤ, “အ့ၤဖးသါ.” အထာ်ပဳၤ ထာ်ဘါမၱာ် “ဘါထာ်ခး.”
35စနံၤကူၤဖျီထာ်က့ၤ, စပျၱၤအဝံၤ အထြိးလၤသရူကၱာ်ယၱၢ် ဘဲာ်ထာ်ကဲၤ. 36ယ့ၣ်ရှူးမှဲးလၤကဲၤစဲာ်တစီာ် အကပိၤလၤဘံာ် အလီၤမီၤ. ပရၤဆါ, ဒၱဒၱစဲာ်တစီာ်ဟဲးပီၢ်အံာ်တပွဲးကဲၤတခီ. 37ပၠၤတစီာ်ထဲး တမိၢ်တမှါဒဳၣ်ချဳ ကဲၤကၱာ်ဒီၣ်ကဲၤ, “စမဲၤသအူသအဲးတဲၤ ကိမံၤမံၤလီၤ. စမဲၤဖျီက့ၤအနံၤကူၤတအဳတစီာ်အနံၤကူၤ ကၱာ် စအံာ် အပျၱၤကျဳၤ တစီာ်ယၱၢ်ဘဲာ်.”
ទើបបានជ្រើសរើសហើយ៖
မၢ်ကူး 7: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.