မၢ်ကူး 2
2
ပၠၤအစူးသံခၣ်သံဒဳကပ့းရနီၣ်အူးတပွဲၤ
(မး ၉:၁-၈, လူၤ ၅:၁၇-၂၆)
1တအီၣ်ယၱၢ်နံၤအီၣ်ယၱၢ်သဲနီး, ယ့ၣ်ရှူးလ့ၤနံၢ်ဒဳကပ့းရနီၣ် အူးပူၤ, ကၱာ်စအီၣ်ကဲၤဒဳၡံၣ်တဝၤအပူၤနဳၤ. 2ပၠၤတစီာ်သၱာ်ဟဲဘဲာ် ဒဳၣ်, ပၠၤအီၣ်အဲး အီးအီးလၤတ့ၢ်ပျဳာ်လၢ်ဝၤအခဳးအစဲ, ပွ့အစာ်ဘိခးကျဲၢ် ထၱးနှီနူၤအလ့ၤတအီၣ်ပ့ၤနီးနဳၤ. ယ့ၣ်ရှူးဒီထိးလၤကဲၤပၠၤအပဳၤအဟီး ကဘၱာ်စဲာ်အလ့ၢ်အဝှဲးလီၤ. 3ဘ့နဳၤပၠၤလွံၢ်ပွဲၤ ယးလ့ၤကဲၤ ပၠၤအစူး သံခၣ်သံတပွဲၤ. 4စဲာ်တစီာ် တလ့ၤနံၢ်အံာ်ဇၤကဲၤ လၢ်ဝၤဒဳယ့ၣ် ရှူးအီၣ်နီးဒဳၣ်, စထာ်ဘးဖျီဝှါၡံၣ်ခဳး ဘ့ယ့ၣ်ရှူးအီၣ်အလ့ၤအကီၢ်ထာ်နဳၤ, စဇဲၤလၤတ့ၢ်ကဲၤ အစူးသံခၣ်သံတပွဲၤကၱာ်အလ့ၤမံဒဳယ့ၣ်ရှူးအလှီ မီၢ်နဳၤ. 5ယ့ၣ်ရှူးစာ်ထၱးကဲၤစဲာ်တစီာ် အတဲၤဘူၣ်ဒဳၣ်, စဒီၣ်ကဲၤအစူးသံ ခၣ်သံတပွဲၤ, “အဖဳးခဳ, နတဲၤခီၣ်ဝဲၤဘဲာ်ဘးလှိထဳ.”
6ဘ့နဳၤ အဝှ့းစဲာ်အဆးနါလါအီၣ်ဒဳနဳၤ အီၣ်ကဲၤတစီာ်ကၱာ်ကမဳၤကဲၤ ဒဳအသးအဳးပူၤကယဳၤ, 7“ပၠၤအယဳၤတပွဲၤစဒီၣ်မါကနဳၤနဲၢ်. စထာ်ဒ့ဒီၣ်ကဲၤကဘၱာ်စဲာ်. ကဘၱာ်စဲာ်ကဝှါ, ပီၢ်ပွဲၤကဘါပျဲးဇၤဒီပၠၤတဲၤခီၣ်ဝဲၤပွဲၤ.”
8ဒဳစသးပူၤယ့ၣ်ရှူးသၱာ်ဟဲတနၢ် စတဲၤကမဳၤနဳၤဒဳၣ်, စဒီၣ် ကဲၤလၢ်ဝၤတစီာ်, “သံကမဳၤတဝၱၢ်တဝ့ၤမၤတဲၤဒဳသံအဳးလၢ်သးပူၤနဳၤနဲၢ်. 9ကဒီၣ် တဲၤယၱၢ်ဘဲာ်နဳၤအၡဳဒဳၣ်ဆဲးမၱာ် ဒီၣ်လဲၢ်တမဳၤမဳၤ. ‘နတဲၤ ခီၣ်ဝဲၤတစီာ်ဘဲာ်ဘး လှိထဳဧါ,’ မၱာ် ‘ဖၱးနၡံၣ်ဒဳဝှၱယၢ်ကၱာ်ဟဲးပီၢ်ဧါ.’ 10ပရၤဆါသံကသၱာ်ဟဲဒီဧဲၤထဲၢ်ပၠၤအဖဳးခဳနဳၤ, စဖျူ စသရ့းအီၣ်ဒဳလၢ် ခဳးယဳၤအကဘါပျဲးပၠၤအတဲၤခီၣ် ဝဲၤနဳၤ,” စဒီၣ်ကဲၤအစူးသံခၣ်သံ အနဳၤ တပွဲၤနဳၤကယဳၤ, 11“ယဒီၣ်နဲၤ, ဝဲၢ်ထဳး, ဖၱးနလ့ၤမံကၱာ်က့ၤပီၢ် နၡံၣ်.”
12ဝှၱစကး, စဝဲၢ်ထဳးဖၱးနံၤကဲၤစလ့ၤမံ ကၱာ်က့ၤတပွဲးကဲၤဒဳပၠၤ လဳစါစဲးအလှီမီၢ်နဳၤ. ပၠၤတစီာ်ထဲးတမိၢ်တမှါဆိးကဲၤကၱာ်ထါထာ်အံာ် ကဘၱာ်စဲာ်ကၱာ်စဒီၣ်, “ဝၤတစာ်ထၱးကဲၤတဲၤကယဳၤ တခါနီး.”
စီၤလ့ၤဝံအတဲၤယဳၤ
(မး ၉:၉-၁၃, လူၤ ၅:၂၇-၃၂)
13ကၱာ်ဒီစဟဲးကိာ်ကဲၤပဲာ်လဲာ်ဝ့ၤကၱာ် ပၠၤ အပဳၤအဟီးလ့ၤ ထၱးကဲၤစဲာ်ဒဳၣ်စသိၣ်အံာ်သီအံာ်ကဲၤ လၢ်ဝၤတစီာ်. 14ဘ့စလ့ၤ ကိာ်ကျဲးနဳၤစကဲာ်ထၱး စီၤအၤလဖဲအဖဳး စီၤလ့ၤဝံ, ဆးနါလါအီၣ် ဒဳပၠၤတၤ အံာ် တဲၤမှူအလ့ၤနဳၤဒဳၣ်, စဒီၣ်လၢ်ဝၤ, “လ့ၤကိာ်ပီၢ်ယလ့ၤ.” စဝဲၢ်ထဳး ကၱာ်လ့ၤကိာ်ကဲၤလၢ်ဝၤအလ့ၤ.
15ဝှါဒဳၣ်ဘ့ယ့ၣ်ရှူးအၣ်အီဒဳစီၤလ့ၤဝံ အၡံၣ်ပူၤအခၠၱးနဳၤ, ပၠၤ အတၤအံာ်တဲၤမှူ ကၱာ်တဲၤခီၣ် ဝဲၤဖဳးတစီာ်ကၱာ်စပျဲၢ်စဘီၣ်တစီာ်အၣ်အီ ယံၢ်ပျဳာ်ကဲၤ လၢ်ဝၤ, မၤနဲၢ်ပၠၤလိၤကိာ်စလ့ၤအီၣ်အဲးအီးအီးအခဳး အစဲနဳၤ. 16အဝှ့းစဲာ်တစီာ်ကၱာ်ဖၤရံၤၡဲဖဳးတစီာ် စာ်ထၱးတဲၤအယဳၤဒဳၣ်, စဒီၣ် ကဲၤအပျဲၢ်အဘီၣ်တစီာ်, “သံဆရၣ်အၣ်အီပျဳာ်မၤပၠၤအတၤအံာ်တဲၤမှူ ကၱာ်တဲၤ ခီၣ်ဝဲၤဖဳးတစီာ်နဲၢ်.”
17ယ့ၣ်ရှူးသၱာ်ဟဲဘဲာ်ဒဳၣ်, စဒီၣ်ကဲၤ လၢ်ဝၤတစီာ်, “ပၠၤအီၣ် မိၢ်အီၣ်မှးတစီာ် တလဳၤပၤ တပွဲးတဝှံးဆရၣ်နီး, မၱာ်အရွှံးအဆဲတစီာ်တခီ. မၤနဲၢ်, တဘဲာ် ယလၤယဳၤအတၱၢ်အမှးတစီာ်နဳၤနီး. မၱာ်တဲၤခီၣ်ဝဲၤဖဳး တစီာ်နဳၤတခီ.” စဒီၣ်ကဲၤလၢ်ဝၤဓဳၤ.
တဲၤဒူၣ်အၣ်ဒူၣ်အီအစဲ
(မး ၉:၁၄-၁၇, လူၤ ၅:၃၃-၃၉)
18တပျာ်နဳၤ, စီၤယိၤဟၣ်အခၱအပွဲၤ ကၱာ်ဖၤရံၤၡဲဖဳးတစီာ်ဒူၣ် ကဲၤတဲၤအၣ်တဲၤအီ. မဲၤကနဳၤဒဳၣ်, စလ့ၤထၱးယ့ၣ်ရှူးကၱာ်ဒီၣ်လၢ်ဝၤ, “စီၤယိၤဟၣ် အခၱအပွဲၤကၱာ်ဖၤရံၤၡဲဖဳးအခၱအပွဲၤတစီာ်ဒူၣ်သဲတဲၤ အၣ် တဲၤအီနၱၢ်, မၱာ်နခၱနပွဲၤတစီာ်တဒူၣ်မၤနီးနဲၢ်.”
19ယ့ၣ်ရှူးဒီၣ်က့ၤစဲာ်တစီာ်, “အမံၤခဳ အဖၱးစူးတပွဲၤကအီၣ် ကိာ်ဝ့ၤစကါအသူသရ့နဳၤ, အလ့ၤပွဲးပူၤတစီာ်ကဒူၣ်အၣ်ဒူၣ်အီဒီစာ်တဲၢ်. စကအီၣ်ကိာ်ဝ့ၤလၢ်ဝၤတစီာ်အကါအသူသရ့နဳၤ, စတဒူၣ်ဇၤ မဲၤစဲာ်နီး. 20ပရၤဆါ မူၤနံၤကဘဲာ်ကီ တနံၤ ထဲၢ်အမံၤခဳအဖၱးစူးတပွဲၤကဘဲာ်ဖၱးကဲသံဝံၢ်ကီစဲာ်. ဘ့အနဳၤတနံၤနဳၤ, စဲာ်တစီာ်ကဒူၣ်ဘဲာ်ကီ.
21“ပၠၤတပီၤဒဲးအံာ်ၡံာ်ဒဳနှၱယၢ်အလံၤ ကၱာ်တကၱယၢ် အသဲ တခးနီး. တဘဲာ်နီးဒဳၣ်, တကၱယၢ်အသဲကဒးထဳးမၤတကၱယၢ်အလံၤဒဳၣ်, အကထဲးလဲးတပွဲး. 22ကၱာ်ပၠၤတလှီး နံၢ် သဳာ်ပၡံးထံအသဲဒဳတဲၤ ဖ့းအကဳအလံၤလၤအပူၤနဳၤနီး. တမၱာ်နီးဒဳၣ်, သဳာ်ပၡံးထံကအၣ်ဝူၢ် တဲၤ ဖ့းဒဳၣ် အကလၤကဲၢ်လဳၢ်တပွဲး, ကၱာ်တဲၤဖ့းအကဳမၱာ်မၱာ် ကကဲကပၠါတပွဲး. သဳာ်ပၡံးထံအသဲနဳၤကဘဲနံၢ် စဲာ်ဒဳတဲၤဖ့းအကဳအသဲပူၤနဳၤတခီ.”
မူၤနံၤဆီးဒဲအဘၱာ်စဲာ်
(မး ၁၂:၁-၈, လူၤ ၆:၁-၅)
23တပျာ်ဘ့မူၤနံၤဆီးဒဲနဳၤ, ယ့ၣ်ရှူး ကၱာ်စပျဲၢ်စဘီၣ် တစီာ် လ့ၤနံၢ်ကိာ်ကဲၤဒဳဟူးကျဲတလှ့း အပူၤ, ဒဳၣ်စခၱစပွဲၤတစီာ်လ့ၤ ကိာ်ကျဲးဖွ့း အၣ်ကဲၤ ဘူၣ်ဇဲၤလဲၢ်. 24ဖၤရံၤၡဲဖဳးတစီာ်ဒီၣ်ကဲၤစဲာ်, “စာ်စမးနဳၤ, စဲာ်တစီာ်မဲၤကဲၤမၤတဲၤအတမီၤမဲၤနီး, ဘ့မူၤနံၤဆီးဒဲနဳၤနဲၢ်.”
25ကၱာ်စဒီၣ်က့ၤကဲၤလၢ်ဝၤတစီာ်, “သံတဖးဘဲာ်ကဲၤတဲၤ အဝၱၤအကဲထဲၢ်စီၤဒၤဝံး ကၱာ်စခီစခဲးတစီာ်မဲၤကဲၤစာ်တဲၢ်ဘ့စသးဝံာ်ဆိးကဲၤ အခၠၱးနဳၤနီးဧါ. 26စလ့ၤနံၢ်ကဘၱာ်စဲာ်အၡံၣ်ပူၤ, ဘ့ပၠၤလှူၣ်တဲၤအဓဳၤစီၤအ့ဘယၤသၢ် အလဲၤတခဲနဳၤ, ကၱာ်အၣ်တဲၤလှူၣ်ထာ်တကဳာ်, ထဲၢ် အအၣ်ဇၤမၱာ်ကဲၤ ထ့ပၠၤလှူၣ်တဲၤအဓဳၤတပွဲၤလီၤတဓဲနဳၤ, ကၱာ်အံာ် ကဲၤစခီကလဳၢ်တစီာ်အၣ်ကိာ်ကဲၤတခီ.”
27ကၱာ်စဒီၣ်ဝ့ၤလၢ်ဝၤ, “မူၤနံၤဆီးဒဲမၱာ်ပၠၤအနံၤခံလီၤ. တဘဲာ်ပၠၤမၱာ် မူၤနံၤဆီးဒဲအနံၤခံနီး. 28မဲၤကနဳၤဒဳၣ်, ပၠၤအဖဳးမၱာ် မူၤ နံၤဆီၤဒဲအဘၱာ်စဲာ်စဲာ်.”
ទើបបានជ្រើសរើសហើយ៖
မၢ်ကူး 2: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.