မးသဲ 28
28
ယ့ၣ်ရှူးထာ်ပဳၤက့ၤတဲၤသံအကျဲ
(မၢ် ၁၆:၁-၁၀, လူၤ ၂၄:၁-၁၂, ယိၤ ၂၀:၁-၁၀)
1ဘ့မူၤနံၤဆီးဒဲဝှါ, တဆီးဒဲအအူဆူး တနံၤလူၤမူၤ ဂီၤသး ဘံနဳၤ, နီၢ်မၤရၱမၤကဒၤလ့ၣ် ကၱာ်နီၢ်မၤရၱအလဝ့ၤတပွဲၤလ့ၤကဲၤ ဒဳလူၢ် ခဳးနဳၤ. 2စာ်ပီၢ်, လၢ်ခဳးယံၤယၢ်တဲၤပဳၤကဲၤ, မၤနဲၢ်, ကဘၱာ်စဲာ် အပွဲၤဇဳၤတပွဲၤအီၣ်ဒဳမီၢ်ခဳးလၤကၱာ်လ့ၤဘိးထၱးဝှါဆး ဖျီးမံနံၤကဲၤလဳၤ, ကၱာ် ဆးနါလၤအီၣ်ဒဳအခဳးနဳၤ. 3စမူၢ်ကါမဲၤအစာ်ဘိလှါကဳၤလၱၤနဳၤကၱာ် စတဲၤကိတဲၤသီး မဲၤအစာ်ဘိတဲၤၡံးထံဖီနဳၤ. 4ဒဳတဲၤၡံးဆါနံၤ စလ့ၤအပူၤ, ကျံဖဳးအတိၤအံာ်လူၢ်တလၢ်မဲၤကဲၤ အစာ်ဘိအသံတစီာ်အခီ ဖးနဳၤ.
5မီၢ်ခဳးပွဲၤဇဳၤယၱၢ်ဘဲာ်ထာ်ကၱာ် ဒီၣ်ကဲၤ အမံၤမှူးတစီာ်, “ၡံး ဆါမဲး, မၤနဲၢ်ယသၱာ်ဟဲတပွဲးသံ ဝၢ်လှဲးယ့ၣ်ရှူး ထဲၢ်အဘဲာ်ထးလၤကျဳၤ သံကဲၤ တပွဲၤ နဳၤ. 6စတအီၣ်ဘ့ယဳၤနီး. မၤနဲၢ်, စထာ်ပဳၤက့ၤ ထဳ အစာ်ဘိစဒီၣ်နဳၤ. လ့ၤကၱာ်စာ်ပီၢ်အလ့ၤ အကျဲးထဲၢ် ယ့ၣ်ရှူးအီၣ်ဆီးမံ လါကဲၤနဳၤ. 7ကၱာ်က့ၤပျာ် ပျါ, ဒီဆးပီၢ်စပျဲၢ်စဘီၣ်တစီာ်ထဲၢ် စထာ်ပဳၤက့ၤထဳနဳၤ. ကၱာ်စာ်ပီၢ်, စလ့ၤကဲၤသံလှီမီၢ်ဒဳကၤလံၤလဲက့ၤပူၤ, ဒဳ နဳၤသံကစာ်ထၱးကီစဲာ်. စာ်ပီၢ်, ယဒီဆးတီၤလီၤထဳ သံ.”
8စဲာ်တစီာ်ဟဲးထာ်ပျာ်ပျါကဲၤလူၢ်ခဳး ဒဳ တဲၤၡံးဆါကၱာ်တဲၤ သးလဳၢ်သးလၤအံာ်အပူၤကၱာ် စွဲး လ့ၤကဲၤဒဳအပျဲၢ်အဘီၣ်တစီာ်အီၣ်, စာ်ဘိထဲၢ်စကဒီ ဆးလၢ်ဝၤတဲၤအဝၱၤအကဲအယဳၤနဳၤ.
9ကၱာ်စာ်ပီၢ်, ယ့ၣ်ရှူးထဲးကျဲၢ်နံၤစဲာ်တစီာ်, စဒီၣ်, “ဘဲာ်မီၤ.” စဲာ်တစီာ်လ့ၤကၱာ်ဖီးဘးယ့ၣ်ရှူး အခၣ်လှဲာ်ခဳး ကၱာ်သဘဲထာ်ကဲၤစဲာ်. 10ယ့ၣ်ရှူး ဒီၣ်စဲာ်တစီာ်, “ၡံးဆါပီၢ်မဲး. လ့ၤဒီဆးပီၢ်ယသဲပူၤဝ့ၤ တစီာ် အကလ့ၤဒဳကၤလံၤလဲက့ၤနဳၤ. ဒဳနဳၤစကစာ်ထၱး ကီယဲၤ.”
အတိၤအံၤတဲၤအတဲၤဒီဆးက့ၤ
11ဘ့နဳၤစဲာ်တစီာ်လ့ၤကိာ်ကျဲးနဳၤ, စာ်ပီၢ်, ကျံဖဳးအတိၤအံာ် လူၢ်အကျဲတစီာ်က့ၤနံၢ်အူးပူၤ ကၱာ် ဒီဆးကဲၤပၠၤလှူၣ်တဲၤအဓဳၤ တစီာ် တဲၤအဖၱထာ်ဝှါကဲၤ တစီာ်နဳၤ. 12စဲာ်တစီာ်လၤတ့ၢ်ပျဳာ်ဝှါအခဳး အန့ၤအသဳးပွ့ၤသးပွ့ၤတစီာ်, စအံာ်အီၣ်အဲးဝှါကျံဖဳး တစီာ်ဝှိဒဳၣ်, 13စမှဲးလၤလၢ်ဝၤ, “ဒီၣ်ပီၢ်ထဲၢ် စပျဲၢ်စဘီၣ်တစီာ်လ့ၤဘ့ကျါမဲလူၤမူၤဒဳၣ် အၣ်ဟူၣ် ကဲၤ စစဳးဘ့ဝၤဆီးမံသဗ့အခၠၱးနဳၤ. 14အကဖျီနံၢ် ဘ့ာ်မ့ မၢ်ဓဳၤအနံၤကူၤပူၤဒဳၣ်, ဝၤကဒီၣ်မီၤဒီဧဲၤစဲာ် စာ်ဘိထဲၢ်သံကလှိထာ်ပီၢ် တဲၤပၤနဳၤ.”
15စဲာ်တစီာ်ဖၱးဝှိကၱာ်မဲၤကဲၤအစာ်ဘိ စဘဲာ်တဲၤထူးလၤမှဲး လၤအဓ့နဳၤ. ကၱာ်ပၠၤတီၤတီၢ်တသီ အံာ်ကီဒဳယူဒၤဖဳးတစီာ်အကျဲ ထိဓဳၤ လၤခဳတနံၤယဳၤ နဳၤ.
ယ့ၣ်ရှူးဒဲလၱၢ်ထာ်အန့ၤ
(မၢ် ၁၆:၁၄-၁၈, လူၤ ၂၄:၃၆-၄၉, ယိၤ ၂၀:၁၉-၂၃, သဓဳဖဳး ၁:၆-၈)
16အပျဲၢ်အဘီၣ်ရှံးတပွဲၤ လ့ၤကဲၤဒဳ ကၤလံၤလဲ အက့ၤနဳၤ, ဒဳခီးလီတမဲအခဳး အစာ်ဘိ ယ့ၣ်ရှူးမှဲးလၤစဲာ်တစီာ်အဓ့နဳၤ. 17ကၱာ်ဒီဘ့ စဲာ်တစီာ်စာ်ထၱးစဲာ်နဳၤ, စကီၢ်လၤသဘဲထာ်လၢ်ဝၤ, ပရၤဆါတစီာ်စီာ်ထဲးနံၤဝံနံၤဝၤဝ့ၤတပွဲး. 18ယ့ၣ်ရှူးလ့ၤဘိးထၱးစဲာ် ကၱာ်စယၱၢ်ဘဲာ်ထၱးလၢ်ဝၤ, စဒီၣ်, “တဲၤဖျူတဲၤသရ့ာ်လဳစါစဲး ဒဳမီၢ်ခဳးကၱာ် လၢ်ခဳး ဘဲာ်အံာ်လၤကဲၤယဲၤ. 19မဲၤကနဳၤ, လ့ၤကၱာ် မဲၤဖၱ ထာ် ပၠၤခွံဖဳးလဳစါစဲးယပျဲၢ်ယဘီၣ်, ဖဳးစူပီၢ်စဲာ်ထံ ဒဳပာ်ကၱာ်ဖဳးကၱာ် သးစါထံအမံၤအပူၤနဳၤ. 20ကၱာ်သိၣ်အံာ်သီအံာ်စဲာ်အကမဲၤကိာ်လဳယမှဲးလၤ ကဲၤ သံတစီာ်နဳၤ. ကၱာ်စာ်ပီၢ်, ယအီၣ်ကိာ်သံကါ ကိအမူၤ နံၤထိမူၤ နံၤ လ့ၤဓူၢ်နဳၤ.”
ទើបបានជ្រើសរើសហើយ៖
မးသဲ 28: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
