လူၤကၣ် 17
17
တဲၤခီၣ်ဝဲၤ
(မး ၁၈:၆-၇,၂၁-၂၂, မၢ် ၉:၄၂)
1ယ့ၣ်ရှူးဒီၣ်ကဲၤစပျဲၢ်စဘီၣ်တစီာ်, “တဲၤဒဲလၱၢ်ကျဲးအတအဲး နီးအီၣ်ထာ်နဲၤနီၤ. ပရၤဆါ ပၠၤထဲၢ်အဒဲလၱၢ်ကျဲးအတအဲးနီၤတပွဲၤနဳၤအနံၤ ခံ တဲၤကပၤကီပွ့းတဲၢ်လီၤ. 2အအဲးဒဳၣ်ချဳမၱာ် တဲၤကစဳဝဲၢ်ဝှါစကီၢ် လီၤၡံးဆဳးလဳၤတဒဳ ကၱာ်ကဆး လၤတ့ၢ်နံၢ်စဲာ်ဒဳပဲာ်လဲာ်ပူၤနဳၤ ဒဳၣ်လံ ကၱာ်စကမဲၤလၤခူး ပၠၤဒဳအၡံးဖဳးအကျဲတပွဲၤပွဲၤတဲၤခီၣ်ဝဲၤနဳၤတခီ. 3ဆီးအံာ်ဝဳၤအံာ်ပီၢ်သံန့ၤ.
“နသဲပူၤဝ့ၤတပွဲၤ ကမဲၤကမဲာ်မၤနဲၤဒဳၣ်, ဟီပီၢ် စဲာ်. စကပယၤလၤ က့ၤစန့ၤဒဳၣ်, ဘါပျဲးပီၢ်စဲာ်. 4တနံၤအပူၤစကမဲၤကမဲာ်ဝှါနဲၤသါ သိးတပျာ်, က့ၤဘး ထၱးနဲၤကၱာ်ဒီၣ်, ယယၤယလ့ၤသါသိးတပျာ်ဒဳၣ်, ဘါ ပျဲး ပီၢ်စဲာ်” စဒီၣ်လၢ်ဝၤတစီာ်ဓဳၤ.
တဲၤဘူၣ်တဲၤနဲၢ်
5အပျဲၢ်အဘီၣ်တစီာ်ဒီၣ်ဘၱာ်စဲာ်, “မဲၤဓဳၤထာ်ပီၢ်ဝၤတဲၤဘူၣ် တဲၤနဲၢ်တကၱာ်.”
6ကၱာ်ဘၱာ်စဲာ်ဒီၣ်ၡံက့ၤစဲာ်, “သံတဲၤဘူၣ်ကအီၣ်မၤထ့သပျဲးဖျဳးလီၤနှီနူၤ, သံကဒီၣ်ဘ့ာ်မ့ နှးဖဳးဆဲၣ်အမူၤ, ၡးဖျီးထာ်နန့ၤ, ကၱာ်လ့ၤ ဆဳးလၤ ပီၢ်ဒဳပဲာ်လဲာ်ပူၤနဳၤ, ဒဳၣ်အကဆီးခ့န့းတပွဲးသံလ့ၢ်” စဒီၣ်လၢ်ဝၤ တစီာ်ဓဳၤ.
တဲၤမဲၤဖဳးအလဳၢ်အထး
7“ဒဳသံကျဲနဳၤ, တဲၤမဲၤဖဳးတပွဲၤကလ့ၤ ထ့လ့ၤကိၢ်ဝှါ, မၱတမၱာ်နီးအဟဲးစာ်အံာ်ဝှါ တဲၤဖဳးတဲၤဝ့ၤဒဳၣ် ဘ့စဓဳၤက့ၤနဳၤ, အကဒီၣ်စဲာ်, လ့ၤပျါပီၢ်ဒဳဒၱဝၢ်ထၱးယဳၤ, ကအီၣ်ပီၢ်တပွဲၤပွဲၤဧါ, 8အကတအီၣ် မဲၤနီး. မၱာ်သံဒီၣ်စဲာ်, ပြးတီၤလီၤပီၢ်ယနံၤခံ လူၤမူၤဟဲးအတဲၤအၣ်, ကၱာ် အီၣ်ဆိဧိၢ်ထိယကအၣ်ကအီဝှါဒဳၣ် အၣ်ကီပီၢ်နနံၤခံ, သံတဒီၣ်ပီၢ်စဲးဓဳၤ နီးဧါ. 9ကၱာ်ဒဳ စမဲၤကိာ်သံတဲၤထူးလၤမှဲးလၤအခဳးအစဲ စနံၤဘဲာ် ပီၢ်သံတဲၤထါအံာ်ဧါ. စတနံၤဘဲာ်မဲၤနီး. 10စာ်ဘိကနဳၤအခီ, သံ ကမဲၤဝှါလဳတဲၤထူးလၤ မှဲးလၤအီၣ်သံခဳးတစီာ်နဳၤဒဳၣ်, ‘ဝၤမၱာ်တဲၤမဲၤဖဳးတစီာ်, ကၱာ်ဝၤမဲၤပ့ထာ်ဝၤလဳၢ်ဝၤထးလီၤ,’ ဒီၣ်ပီၢ်ဓဳၤ,” ယ့ၣ်ရှူးဒီဆးကဲၤပၠၤ တစီာ်ဓဳၤ.
အကလးကၠံးအပွဲၤၡံး
11ဘ့ယ့ၣ်ရှူးလ့ၤဒဳယရူၤၡလ့ၣ်အူး, ဒဳကျဲး လီၤ စဝှါဓူၢ်ဘဲာ် ၡမၤရၱက့ၤကၱာ်ကၤလံၤလဲက့ၤအကူ ဆဳ. 12ဘ့စလ့ၤနံၢ်ဒဳတဒဳးဆီ အပူၤနဳၤ, စထဲး ကျဲၢ်နံၤကဲၤပၠၤအကလးကၠံးအပွဲၤၡံး. စဲာ်တစီာ်ဆီထဳး အီၣ်ဒဳအယၱၤနဳၤ, 13ကၱာ်စထဳထာ်စလ့ၢ်, စဒီၣ်, “ယ့ၣ်ရှူး, ဆရၣ်, ခီၣ်ဝဲၤပီၢ်ဝၤတကၱာ်” စကဲာ် ဧဳၤထာ်ဓဳၤ.
14ဘ့ယ့ၣ်ရှူးစာ်ထၱးစဲာ်တစီာ်နဳၤ, စဒီၣ်လၢ်ဝၤ, “လ့ၤ, ဒဲလၱၢ် ပီၢ်သံန့ၤဒဳပၠၤလှူၣ်တဲၤအဓဳၤတစီာ် အီၣ်နဳၤ” စဒီၣ်လၢ်ဝၤတစီာ်ဓဳၤ.
ဘ့စလ့ၤကိာ်ကျဲးအခၠၱးနဳၤ, စဘဲာ်မဲၤပျၱမဲၤစါ က့ၤကဲၤ.
15ဒဳစဲာ်တစီာ်အကျဲတပွဲၤစာ်ထၱးစဘဲာ် မဲၤပျၱမဲၤစါက့ၤဒဳၣ်, စက့ၤဘးဝှါစလ့ၤကါ, စထါထာ်အံာ်ဆိးတကျဲးကဲၤကဘၱာ်စဲာ်. 16စကီၢ်လၤဘၱးတဒဲးဒဳယ့ၣ်ရှူးအခၣ်ထၱးကၱာ် ဒီၣ်လှူၣ် ဒီၣ်တါကဲၤဘၱာ်စဲာ်. ပၠၤအယဳၤတပွဲၤမၱာ်ကဲၤၡၤမရံဖဳး. 17ယ့ၣ်ရှူးဒီၣ်က့ၤစဲာ်, “အကလးကၠံးအဘဲာ် မဲၤစါ က့ၤအီၣ်အပွဲၤၡံးတဘဲာ်နီးဧါ. အလဝ့ၤလွံၢ်သိး တပွဲၤအီၣ်ဒီဒီၣ်လဲၢ်. 18တၱတမဲအယဳၤတပွဲၤ ကဝှါ, ပၠၤအက့ၤဘးအလ့ၤကါ ကၱာ်အသၱာ်ဟဲထာ် က့ၤကဘၱာ်စဲာ်အလှူၣ်အတါတအီၣ်ကဲၤတပွဲ နီးဧါ” စဒဲကဲၤလၢ်ဝၤဓဳၤ. 19မဲၤဝှါစဒီၣ်လၢ်ဝၤ, “ဝဲၢ်ထဳးကၱာ်လ့ၤ ပီၢ်နကျဲး, နတဲၤဘူၣ်မဲၤလှိထာ်က့ၤ ကဲၤနဲၤ,” စဒီၣ်လၢ်ဝၤဓဳၤ.
ကဘၱာ်စဲအထံအက့ၤအတဲၤဓဳၤလ့ၤ
(မး ၂၄:၂၃-၂၈,၃၇,၄၁)
20ဖၤရဲၤၡဲဖဳးတစီာ်ဒဲကဲၤယ့ၣ်ရှူး, ထဲၢ်ကဘၱာ်စဲာ်အထံအက့ၤ ကဓဳၤတၤအခဲနဲၤနဳၤ. ဒဳၣ်စဒီၣ်ၡံက့ၤကဲၤလၢ်ဝၤတစီာ်ကယဳၤ, “ကဘၱာ်စဲာ် အထံအက့ၤတဓဳၤလ့ၤအစာ်ဘိပၠၤ ကစာ်ထၱးဇၤအနံၤခံနီး. 21အအီၣ်ဒဳယဳၤ, အအီၣ်ဒဳနဳၤ, ပၠၤတဒီၣ်ဇၤဓဳၤနီး. ကဘၱာ်စဲာ်အထံ အက့ၤမၱာ် အအီၣ်ဒဳသံပူၤလီၤ,” စဒီၣ်လၢ်ဝၤတစီာ်ဓဳၤ.
22ဝှါဒဳၣ် စဒီၣ်ကဲၤစပျဲၢ်စဘီၣ်တစီာ်, “အခၠၱးကဘဲာ်ကီထဲၢ် သံကသးအဲးစာ်ထၱးပၠၤအဖဳး အမူၤနံၤနဳၤ, မၱာ်သံကတစာ်ထၱးဘဲာ်ကီနီး. 23ပၠၤတစီာ်ကဒီၣ်ကီသံ, ‘စာ်ပီၢ်, စအီၣ်ဘ့ယဳၤ,’ ‘စအီၣ်ဒဳနဳၤ,’ ဒဳၣ် ဘူၣ်မဲး. လိၤကိာ်မဲး စဲာ်တစီာ်အကါ မဲး. 24မၤနဲၢ်, အစာ်ဘိ လှါကဳၤလၱၤဒဳမီၤထၱး ကါတခီဘဲာ်ဒဳၣ်အလှၱလၤဘဲာ်ဒဳအလဝ့ၤတခီဘဲာ် အခီ နဳၤ, ပၠၤအဖဳးကမၱာ်ကီကနဳၤဒဳစမူၤနံၤအပူၤနဳၤ. 25ပရၤဆါအအူဆူး စကခးဘဲာ်ပွ့တမံၤကၱာ်ပၠၤအယဳၤ တရူၢ်ကလဲၢ်တၤကဲကီစဲာ်,” စဒီၣ်လၢ်ဝၤတစီာ်ဓဳၤ. 26အစာ်ဘိတဲၤဖၱထာ်ကဲၤလှ့စီၤနိအၤအလဲၤ သၱာ်ခဲနဳၤ, ဒဳပၠၤအဖဳးအမူၤနံၤတစီာ်အပူၤမၱာ်မၱာ်ကမဲၤ ကီကနဳၤနဳၤ. 27ပၠၤတစီာ်အၣ်, အီ, ဖၱးစူးလှဲး လၢ်ဝၤ, ထိဓဳၤစီၤနိအၤလ့ၤနံၢ်သဲပီၤပူၤ နဳၤ, ကၱာ်ထံ ထာ်ဟၣ်လၤကၱာ်အမဲၤကဲမဲၤလှဲမဲၢ်လဳတပွဲးကဲၤစဲာ်တစီာ်. 28အကမဲၤကီအန့ၤ အစာ်ဘိစီၤလိာ်အလဲၤ သၱာ်ခဲနဳၤ. ပၠၤတစီာ် အၣ်, အီ, ပွၱၤတဲၤ, ဆဲတဲၤ, ဆဳးလၤပၢ်လၤကၱာ် ပြးရှံၣ်ပြးဖါတပွဲး. 29ဘ့မူၤနံၤဒဳ စီၤလိာ်ဟဲးထာ်ကဲၤစဒိၣ်အူးတပျာ်ဒဳၣ်, မှၱး ကၱာ်ကးအီၣ်ဒဳ မီၢ်ခဳးလဲၢ်ဇူၤလၤစခဳး ကၱာ်မဲၤကဲမဲၤလှဲ မဲၢ်လဳတပွဲးကဲၤစဲာ်တစီာ်နဳၤ. 30ဒဳ ပၠၤအဖဳးကလၤတပျာ်နဳၤ တဲၤကမဲၤကီအန့ၤကနဳၤလီၤလီၤ.
31“ဘ့နဳၤအခၠၱးနဳၤ, ပၠၤအအီၣ်ဒဳရှံၣ်ခဳး တပွဲၤကတက့ၤလၤ ဖၱးက့ၤဒီဧဲၤအတဲၤဒဳရှံၣ်ပူၤနဳၤနီး. ကနဳၤအခီ, ပၠၤအအီၣ်ဒဳချီၣ်လဲၤအပူၤ ကတက့ၤဘး ဒီဧဲၤအရှံၣ်နီး. 32ကမဳၤထာ်နံၤပီၢ်စီၤလိာ်အမှဲ. 33ကယါပၠၤ အသးမဲၤလှိ ထာ်အသးသမိ တပွဲၤနဳၤ, ကဆူးကပး ကီအအဲ, ကၱာ်ကယါပၠၤအဆူး အပးအသးသမိတပွဲၤနဳၤ, ကအီၣ်အံာ် ဘဲာ်ကီအအဲ. 34ယဒီဆးသံ, ဘ့အနဳၤတနဲၤနဳၤ, ဒဳပၠၤအအီၣ် လ့ၤ မံခဳးကၠံၢ်ပွဲၤအကျဲ, တပွဲၤကဘဲာ်ဖၱးကဲ ကၱာ် တပွဲၤကအီၣ်တၤကီ. 35အမံၤမှူးအယၢ် ဘူၣ် ကၠံၢ်ပွဲၤအကျဲတပွဲၤကဘဲာ်ဖၱးကဲ ဝှါတပွဲၤကအီၣ် တၤကီ. 36အမံၤခဳအအီၣ်ဒဳဟူးတ့ၤဖးကျဲ အပူၤကၠံၢ်ပွဲၤအကျဲတပွဲၤကဘဲာ်ဖၱးကဲဝှါ တပွဲၤကအီၣ် တၤကီ,” စဒီၣ်လၢ်ဝၤတစီာ်ဓဳၤ.
37ကၱာ်စဲာ်တစီာ်ဒီၣ်ၡံက့ၤစဲာ်အလံၢ်, “ဒဳဒီၣ်လဲၢ်, အဳဘၱာ်စဲာ်.”
စဒီၣ်က့ၤလၢ်ဝၤတစီာ်, “ဒဳအစဳးအပ့ၤအီၣ်အလ့ၤနဳၤ, လၤဓၢ်တစီာ် ကလၤဆီလါပျဳာ်ကီ” စဒီၣ် ကဲၤလၢ်ဝၤတစီာ်ဓဳၤ.
ទើបបានជ្រើសរើសហើយ៖
လူၤကၣ် 17: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
