ယိၤဟၣ် 4
4
ယ့ၣ်ရှူးကၱာ်ရှၤမရၱမဳၤ
1ဖၤရၱၤရှဲဖဳးတစီာ်သၱာ်ဟဲဘဲာ်ယ့ၣ်ရှူးဖဳးစူ ပၠၤထံကၱာ်မဲၤနံၤအပျဲၢ်အဘီၣ်အီၣ်အဲးဒဳၣ်လံကၱာ် စီၤယိၤဟၣ်နဳၤ. (2အနှဲးနှဲးနဳၤ, ယ့ၣ်ရှူးသဲန့ၤ တဖဳးစူကဲၤပၠၤထံတဗွဲနီး, မၱာ်စပျဲၢ်စဘီၣ်တစီာ်လီၤ.) 3ဘ့စသၱာ်ဟဲဝှါတဲၤဝၱၤတဲၤကဲနဳၤဒဳၣ်, စဟဲး ထာ်ကဲၤယူဒၤက့ၤ ကၱာ် လ့ၤကဲၤဒဳကၤလံလဲက့ၤ, 4စဝှါဓူၢ်ဘဲာ်ရှၤမရၱက့ၤအပူၤ.
5စလ့ၤဓဳၤဒဳစံဃၢ်အူး, ထဲၢ်အအီၣ်ဒဳ ရှၤမရၱအက့ၤပူၤ, အအီၣ်ဘိးထၱးလဲၤထဲၢ်စီၤယၤကိာ် အံာ်လၤနံၤကဲၤအဖဳး စီၤယိၤသးတကျး ဝးနဳၤ. 6စီၤယၤကိာ်အထံပီၤမၱာ်မၱာ်အီၣ်ကဲၤဒဳနဳၤနဳၤ. ယ့ၣ်ရှူး လ့ၤ ကိာ်ကျဲး, လၤဘူးလၤဓၢ်ကဲၤဒဳၣ်, စဆးနါလၤ အီၣ်ကဲၤဒဳထံပီၤအဇၤဝၤ နဳၤ. ဘ့နဳၤမၱာ်လူၤမူၤထံးထာ် အခၠၱး.
7ရှၤမရၱမဳၤတပွဲၤလ့ၤဒာ်ကဲၤထံ, ဒဳၣ် ယ့ၣ်ရှူးဒီၣ်စဲာ်, “အံာ်ယအီထံတကၱာ်” စဒီၣ် လၢ်ဝၤဓဳၤ. 8စပျဲၢ်စဘီၣ်တစီာ်လ့ၤဒဳအူးပူၤ စာ်ဘိထဲၢ်စကပွၱၤတဲၤအၣ်တဲၤအီနဳၤ.
9ရှၤမရၱမဳၤဒီၣ်ကဲၤစဲာ်, “နဲၤယူဒၤဖဳးတပွဲၤ တၤအီယဲၤထံမၱာ်ဒီ စာ်တဲၢ်” စဒဲလၢ်ဝၤဓဳၤ. မၤနဲၢ်ကဒီၣ်ဓဳၤဒဳၣ်, ယူဒၤဖဳးတစီာ်ကၱာ်ရှၤမရၱဖဳး တစီာ်တအၣ်လဲၢ်အီလဲၢ်လၢ်ဝၤတခးနီးအခဳးအစဲနဳၤ.
10ယ့ၣ်ရှူးဒီၣ်ရှံက့ၤစဲာ်, “နကသၱာ်ဟဲမၤ ကဘၱာ်စဲာ်အတဲၤ အံာ်လၤကၱာ်ပၠၤအဒီၣ်နဲၤ, ‘အံာ် ယအီထံတကၱာ်,’ တပွဲၤနဳၤဒဳၣ်, နကတၤ အီတပ့ၤ ကါတပွဲးစဲာ်ထံကၱာ် စကအံာ်တပွဲးနအီထံထဲၢ် အအံာ်တဲၤ သမိ လီၤမီၢ်” စဒီၣ်လၢ်ဝၤဓဳၤ.
11အမံၤမှူးဒီၣ်ကဲၤစဲာ်, “ဆရၣ်, နဒာ်အံာ် ထံအနံၤခံ နအဲထံ ကဳတအီၣ်နီး, ကၱာ်ထံပီၤမၱာ် အလၤယီၢ်. နထံထဲၢ်အအံာ်တဲၤသမိကအီၣ် ဒီ ဒီၣ်လဲၢ်” စဒဲက့ၤလၢ်ဝၤဓဳၤ. 12“နဓဳၤဒဳၣ်လံ ဝၤပာ်စီၤယၤကိာ် ထဲၢ်အခူးနံၤဝၤထံပီၤကၱာ်အအီ အအဲ, အဘဳာ်အီကဲာ်ထာ်ဝၤအဖဳးအလံၤ တစီာ် ကၱာ် အတဲၤဖဳးတဲၤဝ့ၤတစီာ်ထံနဳၤဧါ” စဒဲကဲၤယ့ၣ်ရှူးဓဳၤ.
13ယ့ၣ်ရှူးဒီၣ်ရှံက့ၤစဲာ်, “ကယါပၠၤအအီ ထံအယဳၤတစီာ်နဳၤ, စသးအီဝ့ၤတပွဲး. 14မၱာ် ပၠၤထဲၢ်အကအီထံယအံာ်စဲာ်တစီာ်နဳၤ, တသးအီ ဘဲာ်တခးပ့ၤနီး. ထံထဲၢ်ယအံာ်စဲာ်နဳၤ အကမၱာ်ကီ ထံပၢ်စါထဲၢ် ထံထာ်ပူၢ်ဒဳတဲၤအီၣ်အလၤထူလၤပျဳၤ အပူၤနဳၤ,” စဒီဆးလၢ်ဝၤဓဳၤ.
15အမံၤမှူးဒီၣ်ကဲၤစဲာ်, “ဆရၣ်, အံာ်ပီၢ် ယဲၤထံအနဳၤ စာ်ဘိ ထဲၢ် ယကတသးအီပီၢ်တခါ နီး, ကၱာ်ကလ့ၤဒာ်ဘဲာ်ပ့ၤပီၢ်ထံတပျါပ့ၤနီး နဳၤ” စဒီၣ်လၢ်ဝၤဓဳၤ.
16ယ့ၣ်ရှူးဒီၣ်စဲာ်, “လ့ၤယဳၤနဝၤကၱာ်လ့ၤ ဘ့ယဳၤ” စဒီၣ်လၢ် ဝၤဓဳၤ.
17အမံၤမှူးဒီၣ်ရှံက့ၤယ့ၣ်ရှူး, “ယဝၤတအီၣ်နီး” စဒီၣ်ဓဳၤ.
ယ့ၣ်ရှူးဒီၣ်စဲာ်, “ယဝၤတအီၣ်နီး, နဒီၣ်ဓဳၤနဳၤ အဘဲာ်ဟဳ. 18မၤနဲၢ်, နဝၤအီၣ်ကဲၤယဲၢ်ပွဲၤကၱာ် နအီၣ်ကိာ်အကါခဳနူၤယဳၤတပွဲၤတဘဲာ်နဝၤနီး, ကၱာ် နဒီၣ်တပွဲးတဲၤအဘဲာ်လီၢ်” ယ့ၣ်ရှူးဒီၣ်စဲာ်ဓဳၤ.
19အမံၤမှူးဒီၣ်ရှံက့ၤစဲာ်, “ဆရၣ်, ယသၱာ် ဟဲထဳတပွဲးထဲၢ်နမၱာ်ဝံနဳၤ. 20ဝၤရှၤမရၱဖဳး, ဝၤ ဖံ, ဝၤဖူတစီာ်သဘဲထာ်ဒဳခီးလီအယဳၤတမဲအခဳးနဳၤ, ပရၤဆါ, သံယူဒၤဖဳးဒီၣ်ဝ့ၤကလ့ၤသဘဲ ထာ်ဒဳ ယရူၤ ရှလ့ၣ်အူးပူၤနဳၤ” စဒီဆးလၢ်ဝၤဓဳၤ.
21ယ့ၣ်ရှူးဒီၣ်စဲာ်, “အမံၤမှူး, ဘူၣ်ပီၢ်ယဲၤ ထဲၢ်အခၠၱးအကျၤကဘဲာ်ကီ သံတဘဲာ်သဘဲထာ် အပာ်ဒဳခီးလီအခဳးနဳၤနီးကၱာ်ယရူၤၡလ့ၣ် အူးနီးနီး. 22သံရှၤမရၱဖဳးတစီာ် သံသဘဲထာ်ကဲၤထဲၢ် သံတသၱာ် ဟဲနီး, မၱာ်ဝၤယူဒၤဖဳးတစီာ်နဳၤဝၤသဘဲ ထာ်ကဲၤဝၤသၱာ်ဟဲနဳၤ, မၤနဲၢ်ဒဳၣ်, တဲၤလှိထာ် က့ၤအီၣ် ဒဳယူဒၤဖဳးတစီာ်အီၣ်နဳၤ. 23ပရၤဆါ အခၠၱး အကျၤဘဲာ်ထဳ ဘ့ယဳၤလီၤထဲၢ်အတဲၤသဘဲ အတၱၢ်အမှး တစီာ်နဳၤ ကသဘဲကီပာ်ဒဳသိးသးကၱာ်တဲၤတၱၢ်တဲၤမှး အပူၤနဳၤ. မၤနဲၢ်ဒဳၣ်ပာ်သးအဲးနံၤ ပၠၤထဲၢ်အသဘဲ ထာ် စဲာ်အစာ်ဘိကနဳၤလီၤ. 24ဘၱာ်စဲာ်မၱာ်တဲၤသး ကၱာ် ပၠၤထဲၢ်အသဘူၣ်သဘဲစဲာ်တစီာ်နဳၤ ကဘဲာ် သဘဲစဲာ်ဒဳသဳးသးကၱာ်ဒဳ တဲၤတၱၢ်တဲၤမှးလီၤ,” စဒီၣ်ကဲၤလၢ်ဝၤဓဳၤ.
25အမံၤမှူးဒီၣ်ရှံစဲာ်, “ယသၱာ်ဟဲထဳတပွဲး ထဲၢ်မ့ၤရှံအၤနဳၤစလၤထဳကၱာ်ဘ့စဓဳၤလ့ၤနဳၤ, စကဒီ ဆးကီဝၤတဲၤလဳစါစဲး” စဒီၣ်ဓဳၤ.
26ယ့ၣ်ရှူးဒီဆးစဲာ်, “ယမၱာ်စဲာ်ထဲၢ် အယၱၢ်ဘဲာ်ထၱးနဲၤတပွဲၤ ယဳၤ” စဒီၣ်လၣ်ဝၤဓဳၤ.
27ဘ့နဳၤစပျဲၢ်စဘီၣ်တစီာ်ဓဳၤက့ၤကၱာ်စဲာ် တစီာ်ထဲးနံၤဝံနံၤဝၤ ကဲၤထဲၢ် “ယ့ၣ်ရှူးဒီဆးကဲၤ အမံၤမှူးတပွဲၤတၤအဝၱၤအကဲနဲၢ်” နဳၤ. ပရၤ ဆါ ပၠၤတဒီၣ်ကဲၤစဲာ်, “နသးအဲးနံၤတၤနဲၢ်” ကၱာ် “နယၱၢ်ဘဲာ်ထၱးမၤစဲာ် နဲၢ်” တဗွဲနီး.
28အမံၤမှူးလဲၢ်တၤဝှါအထံကပဳၤ, က့ၤ ဘးနံၢ်အူးပူၤကၱာ် ဒီ ဆးကဲၤပၠၤ, 29“လ့ၤစာ်ပီၢ် ပၠၤတပွဲၤထဲၢ်အဒီဆးလဳယမဲၤကဲၤ တၤနဲၢ်, တၤ နဲၢ် တပွဲၤနဳၤ. စကမၱာ်ခရၱာ်လီၤမီၢ်” စဒီဆးပၠၤဓဳၤ. 30ပၠၤတစီာ်ဟဲးထာ်ကဲၤအူးအချဳကၱာ်လ့ၤထၱးကဲၤယ့ၣ်ရှူး.
31ဘ့နဳၤ စပျဲၢ်စဘီၣ်တစီာ်နှးအၣ်အီစဲာ် ကၱာ်စဒီၣ်, “ဆရၣ်, အၣ်မီၢ်ကိာ်ပီၢ်.”
32ပရၤဆါစဒီၣ်လၢ်ဝၤတစီာ်, “ယနံၤခံ တဲၤအၣ်ထဲၢ်သံတသၱာ်ဟဲနီးနဳၤအီၣ်တပွဲး” စဒီၣ်ဓဳၤ.
33မဲၤကနဳၤဒဳၣ်, စပျဲၢ်စဘီၣ်တစီာ် ဒဲလှဲး လၢ်ဝၤ, “ပၠၤတပွဲၤ ပွဲၤလ့ၤအံာ်ကဲၤစဲာ်တဲၤအၣ်တမံၤ မံၤဧါ” စဒဲလှဲလၢ်ဝၤဓဳၤ.
34ယ့ၣ်ရှူးဒီၣ်စဲာ်တစီာ်, “ယတဲၤအၣ်မၱာ် အကမဲၤအသဓဳ လ့ၤယဲၤတပွဲၤ အတဲၤသးအဲးနံၤ ကၱာ်အကမဲၤပ့ထာ်စတဲၤမဲၤနဳၤ” စဒီဆး ကဲၤ လၢ် ဝၤတစီာ်ဓဳၤ. 35“သံတဒီၣ်ပီၢ်သဲ အလှီမီၢ် လွံၢ်လှဲဗ့, ပၠၤကကဲာ်ကဲၤဘူၣ် နဳၤနီးဧါ. ပရၤဆါ ယဒီဆးသံ, ယ့ၤထာ်သံကဳာ် ကၱာ် စာ်ပီၢ်ဟူးတ့ၤဖးကျဲ, ဘူၣ်ဘါလဳၢ်ကဲၤ ကၱာ်အမဳၤကဲာ်ဘူၣ်ကဲာ်ဟူထဳ. 36ပၠၤအကဲာ်ဘူၣ်တပွဲၤနံၤဘဲာ်ထဳစဆိးစလှဲ, ကၱာ်စဓံ နံၢ်တီးနံၢ်တပွဲး တဲၤအီၣ်အလၤထူလၤပျဳၤအပူၤ စာ်ဘိ ထဲၢ်အဆဳးဘူၣ်တပွဲၤကၱာ်အကဲာ်ဘူၣ်တပွဲၤကသး ကနၢ်အံာ်ပျဳာ်ဘဲာ်ပီၢ်နဳၤ. 37မၤနဲၢ်, တဲၤဒီၣ် တမှိ မၱာ်အဘဲာ်, ထဲၢ်အဆဳးမၱာ်တပွဲၤ, အကဲာ်မၱာ်တပွဲၤနဳၤ. 38ယသဓဳလ့ၤသံ အကလ့ၤကဲာ်ဘူၣ်ထဲၢ်ဟူး ကျဲဒဳသံတထီးဘဲာ်တဖွဲးဘဲာ်ကဲၤ နီးနဳၤ, ပၠၤအလဝ့ၤ တစီာ်ထီးလၤဖွဲးလၤ, ကၱာ်သံနံၤဘဲာ်စဲာ်တစီာ် အတဲၤ မဲၤအဖီအသဲာ်” စဒီၣ်ကဲၤလၢ်ဝၤတစီာ် နဳၤ.
39ဒဳအမံၤမှူးတပွဲၤ အတဲၤခးသဲသၱးအခဳး အစဲ, ရှၤမရၱဖဳးအီး အဲးအီးအီးဘူၣ်ကဲၤယ့ၣ်ရှူး ထဲၢ်ဘ့ စဒီၣ်, “စဒီဆးလဳကဲၤထဲၢ် ယမဲၤ ကဲၤတၤနဲၢ်, တၤ နဲၢ်” တမှိနဳၤ. 40ဘ့ရှမၤရၱဖဳးတစီာ် ဓဳၤလ့ၤ ယ့ၣ်ရှူး အလှီမီၢ်နဳၤဒဳၣ်, စဲာ်တစီာ်တမီၤစဲာ် အကအီၣ်ကိာ် စကါဒဳၣ်, ယ့ၣ်ရှူးအီၣ်ကိာ်ကဲၤစကါကၠံၢ်သဲ.
41စဲာ်တစီာ်ဘူၣ်ချဳဝ့ၤလၢ်ဝၤဒဳစတဲၤဒီၣ် အူဆးအူအခဳးအစဲ, 42ကၱာ်ဒီၣ်ကဲၤအမံၤမှူး, “ခဳနူၤယဳၤဝၤဘူၣ်မၱာ်တဘဲာ်နဒီဆးဝၤအခဳးအစဲနီး, မၱာ်ဝၤသဲန့ၤ သၱာ်ဟဲဘဲာ်အခဳးအစဲ ဝၤသၱာ်ဟဲလၤတံၤ လၤဆ့း ထဳထဲၢ်စမၱာ်အမဲၤလှိထာ်က့ၤလၢ်ခဳးဖဳး, ခရၱာ် တပွဲၤနဳၤ” စဲာ်တစီာ်ဒီၣ်ကဲၤ ဓဳၤ.
ယ့ၣ်ရှူးမဲၤမှးက့ၤမၢ်ဓဳၤတပွဲၤအဖဳး
43အလ့ၤကါကၠံၢ်သဲဝှါ, ယ့ၣ်ရှူးဟဲးထာ် ကဲၤဒဳနဳၤကၱာ် လ့ၤ ကဲၤဒဳ ကၤလံၤလဲအက့ၤနဳၤ, 44မၤနဲၢ်, ယ့ၣ်ရှူးခးကဲၤသဲသၱး ထဲၢ်, “ဝံတပွဲၤ တနံၤဘဲာ် အဟံအထဲဒဳ စဒဳလၤဖါပူၤနီး” နဳၤ. 45မဲၤကနဳၤဒဳၣ်, ဘ့ယ့ၣ်ရှူးလ့ၤနံၢ်ကၤလံၤလဲ အက့ၤအခၠၱးနဳၤ, ကၤလံၤလဲ ဖဳးတစီာ်လ့ၤရှံကဲၤ စကျဲးဒဳစဲာ်တစီာ်စာ်ထၱးကဲၤယ့ၣ်ရှူးအတဲၤဖၱး တဲၤမဲၤ ဒဳယရူၤၡလ့ၣ်အူးပူၤဘ့ တဲၤဟဲးတလိးပွဲ အခၠၱးအခဳးအစဲနဳၤ.
46ယ့ၣ်ရှူးက့ၤဘးကဲၤဒဳကၤလံၤလဲက့ၤ, ကၤနါအူးထဲၢ်စမဲၤဖၱ ထာ်ကဲၤထံကၱာ်သဳာ်ပရှံးထံနဳၤ. ဘ့နဳၤ, မၢ်ဓဳၤတပွဲၤအဖဳးရွှံးဆိးကၱာ် သးမီ သံကဲၤ ဒဳကပ့းရနီၣ်အူးပူၤနဳၤ. 47ဘ့စသၱာ်ဟဲ ယ့ၣ်ရှူးအီၣ်ဒဳယူ ဒၤက့ၤကၱာ် လ့ၤကဲၤဒဳ ကၤလံၤ လဲက့ၤနဳၤဒဳၣ်, စလ့ၤတၤမီၤယ့ၣ်ရှူးအကလ့ၤ မဲၤမှးက့ၤလၢ်ဝၤ, မၤနဲၢ်, စသးမီသံကဲၤအစဲနဳၤ. 48မဲၤကနဳၤ ဒဳၣ်, ယ့ၣ်ရှူးဒီၣ်စဲး, “သံတစာ်ထၱး တဲၤဟိကလဲၤနီး, ကၱာ်တဲၤစီးကျၱးစီးရှဲ နီးနဳၤ သံတဘူၣ်ကဲၤတဲၤနီး” စဒီၣ်လၢ်ဝၤဓဳၤ.
49မၢ်ဓဳၤ ဒီၣ်ကဲၤစဲာ်, “ဆရၣ်, လ့ၤပီၢ်ဘ့ ယဖဳးတသံနှၱနီး နဳၤ” စဒီၣ်လၢ်ဝၤဓဳၤ.
50ယ့ၣ်ရှူးဒီၣ်ရှံက့ၤစဲာ်, “က့ၤပီၢ်နကျဲး, နဖဳးအီၣ်သမိတပွဲး” စဒီၣ်လၢ်ဝၤဓဳၤ.
မၢ်ဓဳၤဘူၣ်ဝှါယ့ၣ်ရှူးအတဲၤယၱၢ်ဘဲာ်ဒဳၣ်စက့ၤ ကဲၤ. 51ဘ့စက့ၤကိာ်ကျဲးအခၠၱးနဳၤ, စဇိၤစပွဲၤ တစီာ်လ့ၤရှံစကျဲးကၱာ် စဒီဆးလၢ်ဝၤ ထဲၢ်စဖဳးအီၣ် သမိက့ၤထဳနဳၤ.
52မဲၤကနဳၤဒဳၣ်, စဒဲစာ်ကဲၤလၢ်ဝၤတစီာ် ထဲၢ်စဖဳးဖံးလၤက့ၤ လှ့ကာ်တဲၢ်နဳၤ. စဲာ်တစီာ်ဒီဆး လၢ်ဝၤ, “မဳဟဲးတနံၤ, သါသိးတနၣ်ရၱၣ် အခၠၱးနဳၤ တဲၤဆဲဘါပျဲးကဲၤစဲာ်” စဒီဆးလၢ်ဝၤဓဳၤ. 53အပာ်တပဲၤ သၱာ်ဟဲတနၢ်ထဲၢ် အနဳၤမၱာ်ဘ့ ယ့ၣ်ရှူး ဒီၣ်စဲာ်, “နဖဳးအီၣ်သမိတပွဲး” အခၠၱးနဳၤ. စဲာ်ကၱာ် စဖဳးစမှဲသဒဲကူၤမူၤဘူၣ်ကဲၤယ့ၣ်ရှူး.
54အယဳၤမၱာ် ယ့ၣ်ရှူးမဲၤကဲၤတဲၤပီၤတဲၤပၤ ကၠံၢ်ပျာ်တပျာ် ဘ့စအီၣ်ယူဒၤက့ၤကၱာ်လ့ၤဒဳ ကၤလံၤ လဲက့ၤအခၠၱးနဳၤ.
ទើបបានជ្រើសរើសហើយ៖
ယိၤဟၣ် 4: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
