သဓဳဖဳး 4
4
စီၤပ့းတရူးကၱာ်စီၤယိၤဟၣ် တဲၤလှူၣ်ရှံၣ်အခဳးအန့ၤအလှီမီၢ်
1ဘ့စဲာ်တစီာ်ယၱၢ်ဘဲာ်ထၱးဖါသးပၠၤနဳၤ, ပၠၤလှူၣ်တဲၤအဓဳၤတစီာ် ကၱာ်တဲၤလှူၣ်ရှံၣ်အခဳးအန့ၤ ကၱာ်ပၠၤစးဒူၤကဲတစီာ်လ့ၤဓဳၤကဲၤ. 2စဲာ်တစီာ် သဲးထဲးကဲၤ, မၤနဲၢ်ဒဳၣ်, အပျဲၢ်အဘီၣ်ကၠံၢ်ပွဲၤ သိၣ်အံာ် သီအံာ်ပၠၤကၱာ် ပီၢ်အံာ်ကဲၤအဘဲာ်ကၠးယ့ၣ်ရှူး အတဲၤ ထာ်ပဳၤက့ၤတဲၤသံ ကျဲအခဳးအစဲ နဳၤ, မၱာ်အဒဲလၱၢ်ထာ် ပၠၤ အသံတစီာ်ကထာ်ပဳၤက့ၤအဝၱၤ အကဲလီၤ. 3စဖီၣ်လၢ်ဝၤ ကၱာ်ထၱးနံၢ် လၢ်ဝၤတဲၤကၱတၱၢ်အပူၤ ထိဓဳၤအလ့ၤကါ တနံၤနဳၤ, မၤနဲၢ် တဲၤခံးတၱၢ်ကဲၤစဲာ် အခဳးအစဲနဳၤ. 4ပရၤဆါပၠၤအီၣ်အဲပွဲၤ အသၱာ် ဟဲဘဲာ် စတဲၤယၱၢ်ဘဲာ်တစီာ်ဘူၣ်ကဲၤ စဲာ် ကၱာ်ပၠၤအဘူၣ်တဲၤတစီာ် ဘးထာ်ကဲၤအပွဲၤယဲၢ်ထီးတခီ.
5အလ့ၤကါတနံၤ ယူဒၤဖဳးအခဳးအန့ၤ အန့ၤဓဳၤသးပွ့ၤတစီာ် ကၱာ် အဝှ့းစဲာ်တစီာ် လၤဓ့ၢ်ပျဳာ်ကဲၤလၢ်ဝၤဒဳယရူၤၡလ့ၣ်အူးပူၤ, 6ပျဳာ်ပျဳာ်ကၱာ် ပၠၤလှူၣ်တဲၤအဓဳၤအခဳးစီၤအၣ်နၣ်, စီၤကၤယါဖၤ, စီၤယိၣ် ဟၣ်, စီၤအလ့းစၣ်ဒြူး ကၱာ်ပၠၤအလဝ့ၤအီၣ်အဲးအီးအီး ထဲၢ်အမၱာ် ပၠၤလှူၣ်တဲၤအဓဳၤအခဳးအခွံအသလဲတစီာ်နဳၤ. 7စနှး ဆီထဳးအီၣ်ဝှါအပျဲၢ်အဘီၣ်ကၠံၢ်ပွဲၤဒဳ စဲာ်တစီာ် အလှီမီၢ်ကၱာ်ထိးစာ်ဒဲစာ်ကဲၤလၢ်ဝၤ, “သံ မဲၤကဲၤတဲၤ အယဳၤဒဳတၤအဖျူအသရ့ာ်အပူၤ, မၱတမၱာ်နီး ဒဳတၤအမံၤအပူၤနဲၢ်” စဒဲလၢ်ဝၤဓဳၤ.
8ဘ့နဳၤ, စီၤပ့းတရူး အီၣ်ပ့ထာ်ကဲၤကၱာ် သးစါထံ ကၱာ် စဒီၣ် လၢ်ဝၤတစီာ်, “ထံက့ၤအခဳး အန့ၤကၱာ်အသဳးပွ့ၤသးပွ့ၤတစီာ် 9ဘ့ာ်မ့ ခိတနံၤ ဝၤကဘဲာ်တဲၤစံးရးဒဳ ဝၤမဲၤတဲၤအအဲး ဒဳ အခၣ်ဒ့ာ်တပွဲၤ အနံၤခံ ကၱာ်ဝၤမဲၤမှးက့ၤစဲာ် စာ်တဲၢ် နဳၤဒဳၣ်, 10သံလဳစါစဲး ကၱာ် အံၣ်စရ့လးဖဳး လဳစါစဲးသၱာ်ဟဲပီၢ်စတဲၤမှးက့ၤအယဳၤနဳၤ မၱာ်ဒဳပၠၤနစၤရ့းဖဳး ယ့ၣ်ရှူးခရၱာ် အမံၤအပူၤ, စဲာ်ထဲၢ် သံ ထးလၤကျဳၤသံကဲၤတပွဲၤနဳၤ, ထဲၢ် ဒဳကဘၱာ်စဲာ်ဘးဝဲၢ် ထဳးက့ၤထဳစဲာ် တဲၤသံ အကျဲတပွဲၤအမံၤအပူၤပၠၤ အယဳၤတပွဲၤဆီထဳးအီၣ် သံလှီ မီၢ်ယဳၤနဳၤ, အီၣ်မှးသအူ သအဲးတပွဲး ယဳၤ. 11ယ့ၣ်ရှူးမၱာ် အဝၱၤအကဲ ဘဲာ်ဝှ့းလၤစဲာ်စါထံအပူၤ, အဒီၣ်,
‘လဳၤထဲၢ်သံထၱးဖျီးမံတဒဳနဳၤ,
ကဲာ်ထာ်ကဲၤလဳၤအန့ၤပူၤအကါဒီ ထဲၢ်စဲာ်အချဳနဳၤ တဲၤလှိထာ် က့ၤ တအီၣ်နီးနဳၤ.’
12ပၠၤအအံာ်လၤဇၤတဲၤလှိထာ်က့ၤမၱာ်ထ့ စဲာ်တပွဲၤလီၤ. ဒဳလၢ် ခဳးအခဳးယဳၤ, မံၤအလဝ့ၤထဲၢ် ဘၱာ်စဲာ်အံာ်လၤဒဳတဲၤလှိထာ်က့ၤအနံၤခံတအီၣ် တဓဲမဲၤနီး,” စဒီၣ်လၢ်ဝၤ တစီာ်ဓဳၤ.
13ဘ့ထံက့ၤအခဳးအန့ၤတစီာ်စာ်ထၱးကဲၤ စီၤပ့းတရူးကၱာ် စီၤ ယိၣ်ဟၣ်အတဲၤခူတဲၤဟဲ ကၱာ် သၱာ်ဟဲကဲၤစမၱာ်ပၠၤအတသၱာ်အိးသၱာ်စဲာ် နီး, ပၠၤအတပွဲးဖဳးတစီာ်လီၤဒဳၣ်စထဲးတမိၢ်တမှါကဲၤ. စကမဳၤထာ်နံၤကဲၤ စဲာ်တစီာ် အီၣ်ကိာ်နဲၤနီၤကဲၤ ယ့ၣ်ရှူးအကါနဳၤ. 14ဒဳၣ်ချဳမၱာ်စစာ်ထၱး အမှးက့ၤတပွဲၤဆီထဳး အီၣ်ပျဳာ် စဲာ်တစီာ်ဒဳၣ်, စဲာ်တစီာ် တဒီၣ်ရှံက့ၤဇၤကဲၤလၢ်ဝၤတမံနီး. 15မဲၤကနဳၤ ဒဳၣ်, စနှးဟဲးထာ်ဖျီမံလၢ်ဝၤတစီာ် တဲၤလၤဓ့ၢ်ပျဳာ် အချဳ, စလၤဒီၣ်ဘဲာ်ဆးဘဲာ်လၢ်ဝၤ, 16“ဝၤကကမဲၤဘဲာ်ပၠၤအယဳၤတစီာ် စာ်တဲၢ်. မၤနဲၢ်, စဲာ်တစီာ်မဲၤကဲၤတဲၤပီၤတဲၤပၤဒဳ ယရူၤၡလ့ၣ်အူးဖဳး လဳစါ စဲးအလှီမီၢ်ကၱာ်ဝၤတယၤဘံာ်ဇၤကဲၤနီး. 17ပရၤဆါစာ်ဘိထဲၢ်အကတဟဲးပြဲၤပၠၤတစီာ်အလှီမီၢ် နီး အနံၤခံနဳၤ, ဘဲာ်ကၱာ်ဝၤမဲၤဒၱာ်ဒါစဲာ်တစီာ် အကတယၱၢ်ဘဲာ်ထာ်အံာ် ယ့ၣ်ရှူးအမံၤအယဳၤ တမံၤဒဳ ပၠၤတစီာ်အလှီမီၢ်တပျါပ့ၤနီး,” စဒီၣ်လှဲးလၢ်ဝၤဓဳၤ.
18စယဳၤက့ၤဝှါလၢ်ဝၤ, မှဲးလၤလၢ်ဝၤအကတသိၣ်အံာ်သီ အံာ်ပံပံးဘဲာ်ယ့ၣ်ရှူးအမံၤနီးနဳၤ. 19ပရၤဆါ, စီၤပ့းတရူးကၱာ်စီၤ ယိၤဟၣ် ဒီၣ်ရှံ က့ၤစဲာ်တစီာ်, “ဒဳကဘၱာ်စဲာ်အလှီမီၢ်နဳၤ, အဘဲာ်မၱာ် ဝၤ ဆီးခ့န့းသံဧါ, ကဘၱာ်စဲာ်ဧါနဳၤကမဳၤဓီဒီဧဲၤသံအဲ. 20မၱာ်ဝၤနဳၤ, ကယါဝၤစာ်ထၱးဘဲာ် သၱာ်ဟဲဘဲာ် တစီာ် နဳၤ, ဝၤတဒီၣ်အံာ်နီး ဝၤတအီၣ် ကဲာ် ထာ်နီး,” စဒီၣ် ကဲၤလၢ်ဝၤတစီာ်ဓဳၤ. 21မၱာ်အခဳးအန့ၤတစီာ်အံာ် သဓံကြၱၢ်ပနၱးဒဳၣ်ချဳဝှါစဲာ်တစီာ်ကၱာ်နှးက့ၤကဲၤ လၢ်ဝၤ. ဒဳစကစံး ရးလၢ်ဝၤ တစီာ်အနံၤခံ, စတပးထၱး ကဲၤကျဲးသအီတမံနီး. ပၠၤလဳစါစဲး တစီာ်ထါ ထာ်အံာ် ကဲၤကဘၱာ်စဲာ်ဒဳ တဲၤဖၱထာ်ကဲၤတစီာ်အခဳးအစဲနဳၤ. 22မၤနဲၢ်, ပၠၤထဲၢ်အဘဲာ်မဲၤမှးက့ၤ ကၱာ်တဲၤပီၤ တဲၤပၤဖၱထာ်နံၤ ကဲၤတပွဲၤနဳၤ စသးအီၣ်ကဲၤအဒ့ာ် လွံၢ်ရှံ ဆဲး.
အဘူၣ်တဲၤတစီာ်တၤတဲၤခူတဲၤဟဲ
23စီၤပ့းတရူးကၱာ် စီၤယိၤဟၣ်ဘဲာ်နှးဟဲး ထာ်ဖျီးမံဝှါ, စလ့ၤ ထၱးကဲၤစခီတစီာ်ကၱာ်ဒီဆးကဲၤ လၢ်ဝၤပၠၤလှူၣ်တဲၤအဓဳၤတစီာ်ကၱာ်အန့ၤ ဓဳၤသးပွ့ၤ တစီာ်ဒီၣ်ကဲၤစဲာ်တစီာ်တၤနဲၢ်နဳၤ. 24ဘ့အဘူၣ်တဲၤတစီာ်သၱာ်ဟဲဘဲာ်တဲၤအယဳၤဒဳၣ်, စထဳထာ်ပျဳာ်ပျဳာ်စလ့ၢ်ဒဳဘၱာ်စဲာ်အပူၤကၱာ် စဒီၣ်ကဲၤ, “အဳဘၱာ်စဲာ်အဘီာ်လၤမီၢ်ခဳး, လၢ်ခဳး, ထံပဲာ်လဲာ် ကၱာ်တဲၤလဳစါ စဲးမၱာ်နဲၤ, 25ထဲၢ်ဒဳ သးစါထံအပူၤ, နဒီဆးကဲၤနဇိၤဖဳးစီၤဒၤဝံးအလှီမီၢ်နဳၤ,
‘ပွဲၤသူကူာ်ဖဳးတစီာ်အသဳးကဳၤသးကဲၢ်မၤနဲၢ်.
ပၠၤတစီာ်ကဳထာ်ကၠးလၤနှးနှါမၤနဲၢ်.
26လၢ်ခဳးအဆးဖြးတစီာ်ပြးနှဲးဆဲးနှဲး အန့ၤ,
ပၠၤအအူအံာ်ထံက့ၤတစီာ် လၤဓ့ၢ်ပျဳၤလၢ်ဝၤ
အကထာ်ခဳးကါဘၱာ်စဲာ်ကၱာ်စခရၱာ်,’ စဒီၣ်ကဲၤဓဳၤ.
27အသ့ပွ့ၤနဳၤ, ဒဳအူးပူၤနဳၤ, စဲာ်တစီာ်လၤ ဓ့ၢ်ပျဳာ်ကၱာ်ထာ်ခဳး ကါကဲၤယ့ၣ်ရှူးနထရိးကဲၤရှံးစါထံ တပွဲၤနဳၤ. စီၤဟ့ၣ်ရိၤကၱာ်စီၤပီၤတံၤပံၤ လး ပျဳာ်ပျဳာ်ကၱာ်ပွဲၤသူကူာ်ဖဳးကၱာ်အံၣ်စရ့လးဖဳးတစီာ် လၤဓ့ၢ်ပျဳာ်ကၱာ်ထာ် ခဳးကါကဲၤယ့ၣ်ရှူး, နဇိၤဖဳး အစါထံ, ထဲၢ်အကထာ်ခဳးကါကၱာ်ခရၱာ်. 28စဲာ်တစီာ်လၤတ့ၢ်ပျဳာ်လၢ်ဝၤ မၱာ်စာ်ဘိထဲၢ် စကမဲၤ တဲၤလဳစါစဲး, ထဲၢ်နထူးလၤမှဲးလၤဝှါထဳ အကဘဲာ် မဲၤအန့ၤ ဒဳနတဲၤစိသလဲကၱာ်အဘဲာ် နသးနဳၤ. 29အဳဘၱာ်စဲာ်, ခဳနူၤယဳၤမှါအံာ်ပီၢ်စဲာ်တစီာ်အတဲၤမဲၤ ရှံး ဆါဝၤတစီာ်နဳၤ, ကၱာ်အံာ်လၤပီၢ်ဝၤ နဇိၤဖဳးတစီာ် အကဒီဆးခူသကျး ပီၢ်ပၠၤနလ့ၢ်နဝှဲးနဳၤ. 30ဘ့နတဒါထာ်နစူးခီးဒဳတဲၤမဲၤမှးက့ၤကၱာ် တဲၤပီၤတဲၤပၤဒဳ နဇိၤဖဳးအစါထံယ့ၣ်ရှူးအမံၤအပူၤနဳၤ,” စဒီၣ်ဓဳၤ.
31ဘ့စသဘဲထာ်ဝှါနဳၤ, စဆီထဳးအီၣ် အလ့ၤကမ့ၤကၱာ်ကျ့ၤ ကျၢ်ကဲၤ, ကၱာ်စဲာ်တစီာ် ပ့ထာ် ကဲၤ သးစါထံကၱာ် ဒီၣ်အူဆးအူကဲၤ ကဘၱာ်စဲာ် အလ့ၢ်အဝှဲးဒဳတဲၤခူတဲၤဟဲအပူၤနဳၤ.
အဘူၣ်တဲၤတစီာ်အီၣ်အံာ်မဲၤအံာ်ပျဳာ်လၢ်ဝၤ
32အဘူၣ်တဲၤတစီာ် လဲၢ်လၤအသဳးအသး တမဲလီၤကၱာ် တဒီၣ် အအီၣ်အံာ် အတၱၢ် အတဲၤနီး, မၱာ်အီၣ်အံာ်မဲၤအံာ်ပျဳာ်လဳလၢ်ဝၤ လီၤ. 33ဒဳတဲၤဖျူတဲၤသရ့းဓဳၤအပူၤ, အပျဲၢ်အဘီၣ်တစီာ် ခးဝၤ ဘၱာ်စဲာ်ယ့ၣ်ရှူးအတဲၤ ထာ်ပဳၤက့ၤ အသဲသၱးကၱာ် ကဘၱာ်စဲာ်လှီးလၤကဲၤ အလှူၣ်အတါဓဳၤ ဒဳစဲာ်လဳစါစဲး အလီၤ. 34ဒဳအဘူၣ်တဲၤတစီာ်အကျဲ အဆဲးညဲပီၤတီၤ, အအီၣ်ပၤအီၣ်ဆဲ တအီၣ်ကဲၤနီး. မၤနဲၢ်အလၢ်ခဳး ဓဳၤကျဲ, အရှံၣ်အဖါအီၣ်တစီာ် ဆဲကဲဝှါအအဲ, 35စလ့ၤပူးလၤအပွၱၤဒဳသဓဳဖဳး တစီာ်အခၣ်ထၱးနဳၤ, ကၱာ်သဓဳဖဳးတစီာ်ပ့ၤလၤ နံၤပၠၤ ဒဳအအဲ တအီၣ်နီးတစီာ်ပွ့အလဳၤပၤစနံၤခံနဳၤ.
36ကၱာ်ဒီစီၤယိၤစ့ၣ်ထဲၢ် သဓဳဖဳးအမံၤမၱာ် စီၤဘၤနါဘၤ (အထာ်ပဳၤထာ်ဘါမၱာ် တဲၤမဲၤလှိထာ် က့ၤအဖဳး) ထဲၢ်ပၠၤလ့ၤဝံဖဳးအအီၣ်ဒဳ ကူပြူးက့ၤ တပွဲၤနဳၤ, 37ဆဲကဲဝှါ စချီၣ်စလဲၤ ဒဳၣ် လ့ၤဘဲလါ ကဲၤအပွၱၤဒဳ သဓဳဖဳးတစီာ်အခၣ်ထၱးနဳၤ.
ទើបបានជ្រើសរើសហើយ៖
သဓဳဖဳး 4: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
