သဓဳဖဳး 27
27
စီၤပီလူးလ့ၤဘးရိမ့ၤ
1ဘ့တဲၤပ့ၢ်ဖးဝၤနံၤခံအကလ့ၤဘး အံၤတလံဝှါနဳၤ, စီၤပီလူးကၱာ်တဲၤကၱတၱၢ်ဖဳးတစီာ် ဘဲာ်အံာ်လၤနံၤကဲၤဒဳကျံဗဳၤအမံၤမၱာ် စီၤ ယူၤလံ တပွဲၤအစူးခီးပူၤနဳၤ, စမၱာ်ကျံဖဳးတကယဲၤ အခဳး အအီၣ်အစာ်ဘိ “ဆးဖြးဓဳၤအကျံ” အတဲၤစာ်အံာ်တပွဲၤနဳၤ. 2ဝၤဒီၣ်ထာ်သဲပီၤ ထဲၢ်အသးမီဟဲးထာ်တဓဲၢ်ကဲၤတဘဲာ်နဳၤ, ဘ့ အဒြၤမူးတ့ၣ်အူးကၱာ်လ့ၤကဲၤဒဳ အၤစံခီမူၤဓဳၤ အခီတဝဲၢ်တခီနဳၤ. အလ့ၤကိာ်ဝၤကါမှၱာ် မၤက့ၤ ဒနံက့ၤ, သ့းစၤလနံဖဳးအမံၤမၱာ် စီၤအရံစတၢ် ဃူး တပွဲၤနဳၤ. 3အလ့ၤကါတနံၤဝၤဓဳၤ ဝှါစံဒိၣ်အူးဒဳၣ်, စီၤယူၤလံခီၣ်ဝဲၤကဲၤစီၤပီလူးအစဲ, စနှးလ့ၤတပွဲးလၢ်ဝၤဒဳ စခီစသီၣ်တစီာ် အီၣ်စာ်ဘိထဲၢ် အကစာ်အံာ်ခွဲးအံာ်ပီၢ်စဲာ်နဳၤ. 4ဝၤအီၣ်ဒဳနဳၤကၱာ်ဒီၣ်ထာ်ကဲၤသဲပီၤတပျာ်ပ့ၤ, မၱာ်ကလံၤအူးတပ့ၤဘးက့ၤဝၤအစဲဒဳၣ်, ဝၤလ့ၤ ကိာ်ကဲၤဒဳကူပြူးခီထံအတဝဲၢ်လီၤကလံၤတဘၱ တခီဧဳၢ်နဳၤ. 5အလ့ၤကါဝၤလ့ၤကဲၤဒဳကံၤလံၤကံက့ၤကၱာ်ပၣ်ဖူၤလံက့ၤတစီာ်အီၣ်တခီနဳၤ. ဝၤ လ့ၤဓဳၤကီမူရၤအူးဒဳလူၤကံက့ၤနဳၤ. 6ဒဳ နဳၤကျံဗဳၤပာ်ထၱးကဲၤ အလ့းစၣ်ဒြ့း အသဲပီၤ အကလ့ၤဒဳအံၤတလံက့ၤတခဳးဒဳၣ်, စဘဲထာ်နံၢ် ကဲၤဝၤသဲပီၤအပူၤ.
7မူၤနံၤမူၤသဲပွ့တမံၤဝၤတဖျီး ဇၱၢ်ကဲၤနီး, ဝၤဓဳၤလ့ၤပၤပၤဆဲဆဲကဲၤဒဳ ကနံဒူး အူးနဳၤ. ကလံၤတပဳၢ်ခဳးကါကဲၤဝၤအခဳးအစဲ ဝၤတလ့ၤဇၤကဲၤအလှီမီၢ်နီးဒဳၣ်, ဝၤက့ၤလၤကိာ် ကဲၤအဘိးထၱးလၤစဲအူး ခီဆွဲးကြ့တ့ၤခီထံခဳးအတဝဲၢ်လီၤကလံၤတဘၱတခီနဳၤ. 8ဝၤလ့ၤ ကိာ်ပၤဓဳၤဆဲဓဳၤဒဳ အဘိးထၱးခီတဝဲၢ်ကၱာ် ဓဳၤလ့ၤ ကဲၤဒဳ “တဲၤလ့ၤဒါ” အအီၣ်ဘိးထၱးလၤစဲအူးနဳၤ.
9ဝၤအီၣ်ကဲၤဘ့နဳၤအနံၤအသဲ အီၣ် ယၱၢ်ကဲၤ, ထိဝၤကလ့ၤအလှီမီၢ်အနံၤခံ တဲၤဘဲာ် ရှဳဘဲာ်မၤအီၣ်ကဲၤပွ့တမံၤ, မၤနဲၢ်, တဲၤဘါပျဲး တဲၤခီၣ်ဝဲၤအပွဲလ့ၤတလိးကဲၤဝၤ. စီၤပီလူးဒီ ဆးဝဳၤအံာ်တီၤလီၤကဲၤပၠၤ, ကၱာ်စဒီၣ်, 10“အသီၣ်တစီာ်, ယစာ်ထၱးတပွဲးထဲၢ် ကဟဲးကျဲး အယဳၤတဘီမၱာ် တဲၤဘဲာ်ရှဳအီၣ် ပွ့အစာ်ဘိ ကဆူးကပးဇၤတဲၤထီတဲၤလၤကၱာ် သဲပီၤအချဳ ဝၤ သးသမိပာ်ပာ်,” စဒီဆးပၠၤဓဳၤ. 11ပရၤ ဆါကျံဗဳၤတဆီးခ့န့းကဲၤ အမှီးသဲပီၤကၱာ် သဲပီၤ အဘၱာ်စဲာ်အလ့ၢ်အစာ်ဘိစီၤပီလူးဒီဆးတီၤလီၤ ကဲၤနဳၤနီး. 12မၱာ်လ့ၤကဲၤအလှီမီၢ် အကလ့ၤအီၣ်ဒါဒဳ ဖံၤနံက့ၤအူး, ကြ့တ့ၤအခီဇၤဝၤ အဒးဘးဒဳလူၤမူၤလၤလီၢ်ခံကၱာ်လီၢ်ထဲးတခီနဳၤ.
ကလံၤမူၤဒဳပဲာ်လဲာ်ပူၤ
13ကလံၤမူၤအီၣ်လီၢ်ထဲး စာ်ထာ်တပဳၢ်ထာ်ကဲၤ, မၱာ်အမှီးသဲပီၤတစီာ် ကမဳၤမၱာ်စဓဳၤ ဒဳစလ့ၤစကျဲးဒဳၣ်, စစွံးထာ်က့ၤသဲပီၤအလဳၤဆူး ထးလးကၱာ်လ့ၤဘိးထၱးကြ့တ့ၤခီထံခဳးအဝဳၢ်လီၤ ဘ့အသၱးအဇၤနဳၤ. 14တအီၣ်ယၱၢ်နီၤ, ကလံၤမဳၢ်ဘံ ပၠၤယဳၤအမံၤ “လီၢ်ခံမူၤထာ်,” အအီၣ်ဒဳခီခဳးတပဳၢ်လၤကဲၤ. 15ကလံၤမဲၤ ဘဲာ်ဒိသဲပီၤဒဳၣ်, သဲပီၤခွဲအကဳာ်တနံၤဇၤပ့ၤနီး. မဲၤကနဳၤဒဳၣ်, ဝၤတမဲၤဇၤပ့ၤတမံနီး, မၱာ်အံာ်ကလံၤဟဲဘံအံာ်ဝၤဒဳသဲပီၤအပူၤပ့ၤလီၤ. 16ဝၤ လ့ၤခဳးအံာ်ဝၤနဲၤဒဳ ခီထံခဳး, ပၠၤယဳၤအမံၤကျီၤဒ့ၤတမဲ အချဳနဳၤ, ဝၤခွဲးအံာ်ဘဲာ်သဲပီၤအကျံဖဳးစာ်ဘိထဲၢ်အကတကဲတအိးပီၢ်နီး အနံၤခံပၤပၤဆဲဆဲဒဳးလီၤ. 17ပၠၤတစီာ်စွံးထာ်ဝှါချံဖဳး ဒဳသဲပီၤခဳးကၱာ်ဘဲလါကဲၤဒဳ သဲပီၤအကာ်ဒဲနဳၤ ကၱာ်စဳကျဳၤကၠၱၢ်ကျဳၤအံာ် သရီာ်ပံၤခွဲ ခွဲးဒဳး. စဲာ်တစီဘဲာ်ရှဳကဲၤ သဲပီၤကဓီၤထာ်အီၣ်တၤဒဳ လ့ဘယၢ်က့ၤအခီတဝဲၢ်ခဳးဒဳၣ်, စဘ့းထာ်ဝှါလဳၤဆူး ထးလးကၱာ်အံာ်ကဲၤကလံၤဟဲးဇၢ်အံာ်သဲပီၤဒဳထံခဳးနဳၤ. 18ဝှဲထံကလံၤဆိးဒဳၣ်, အလ့ၤကါတနံၤ, ပၠၤ ထၱးလၤဓ့ၢ်ကဲၤတဲၤထီတဲၤလၤဒဳထံလဲၢ်နဳၤတစီာ်, 19ကၱာ်သဳနံၤတနံၤနဳၤ ပၠၤစွံးတဟိးကၱာ်ထၱးလၤဓ့ၢ် ကဲၤသဲပီၤအကြဳၢ်အဘူတစီာ်နဳၤ. 20မူၤနံၤမူၤ သဲ ပွ့တမံၤအပူၤ, ကတစာ်ထၱးဇၤပ့ၤလူၤမူၤ, လှဲ, ဆဲၣ်တပျါနီး. ကၱာ်ဒီကလံၤအူးတပဳၢ်ဆိးကဲၤ. ဝၤကအီၣ်သမိဘဲာ်အနံၤခံတဲၤဆးရှံအံာ်တအီၣ်ပ့ၤနီး.
21ပၠၤတစီာ်အီၣ်ဆီတအၣ်အီၣ်ယၱၢ်ကဲၤ, စီၤပီလူးဆီထဳးအီၣ်ပၠၤအပဳၤကျဲကၱာ် စဒီၣ်, “အသီၣ် တစီာ်, သံကဆီးခ့န့းဝှါယလ့ၢ်ကၱာ် ကတဟဲးထာ်မၤ ကြ့တ့ၤသံသးအလဳၢ်နီးနဳၤ, သံကတဆီးဝဲကၱာ်ခးဘဲာ် တၤဆူးတဲၤပးပွ့ကယဳၤနီး. 22ပရၤဆါခဳနဳၤ ယဳၤ, ယတၤမီၤဘဲာ်သံ အကတသးပျဲၢ်ပီၢ်နီးနဳၤ. သံ တသံတလှဲမဲၢ်ဘဲာ်တပွဲးတဗွဲနီး, အကကဲကအိးမၱာ် သဲပီၤတခဳးလီၤ. 23မူၤနဲၤတနဲၤနဳၤ, ကဘၱာ်စဲာ် ထဲၢ်အစာ်အံာ်ယဲၤကၱာ်ယသဘဲကဲၤတပွဲၤအမီၢ်ခဳးပွဲၤဇဳၤ ဆီထဳးအီၣ်သီကြီၢ်ယဲၤ, 24ကၱာ်စဒီၣ်, ‘ရှံးဆါ ပီၢ်မဲး, စီၤပီလူး, နကဆီထဳးအီၣ်ဘဲာ်ရိမ့ၤအဆးဖြးဓဳၤ အလှီမီၢ် အယဳၤအခဳးအစဲ, ကဘၱာ်စဲာ်ကမဲၤလှိထာ်နဲၤ ကၱာ် အဒီၣ်ယံၢ်ပျဳာ်နဲၤသဲပီၤလဳစါစဲးတစီာ်နဳၤ.’ 25မဲၤကနဳၤ, အသီၣ်တစီာ်, သးခူပီၢ်, ယဆးရှံအံာ်တပွဲး ကဘၱာ်စဲာ် ကၱာ်တဲၤကဖၱထာ်တပွဲး အစာ်ဘိတဲၤဒီဆး ကဲၤယဲၤနဳၤ. 26ပရၤဆါဒဳၣ်, ဝၤကအီၣ်တၤ မီၤဗ့ဒဳ ခီထံခဳးတချဳးချဳးအခဳးနဳၤ.”
27ဘ့ရှံးလွံၢ်သဲတသဲ, လူၤမူၤနဲၤခဲနဳၤ, ကလံၤမဳၤဘံအူးတပဳၢ်ကၱာ် ဝၤသဲပီၤထဲးဘံတဝ့ၤဝၢ်ကဲၤဒဳ မဲဒံးထဲၣ်ရ့နယၣ်ပဲာ်လဲာ်ပူၤနဳၤ. ကၱာ်ဘ့ကျါမဲလူၤမူၤ နဳၤ, သဲပီၤတဲၤမဲၤဖဳးတစီာ်သၱာ်ဟဲကဲၤထဲၢ်ဝၤဓဳၤဘိး ထၱးထဳခီခဳးနဳၤ. 28စထိးစါထံအလၤယီၢ်ကၱာ် စာ်ထၱးကဲၤအအီၣ်အပျ့ၤအရှံလွံၢ်သိး, ကၱာ်တဒဳးပ့ၤ စထိးစာ်ဒီတပျာ်ပ့ၤ အအီၣ်အပျ့ၤအရှံသါသိးပ့ၤလီၤ. 29စဲာ်တစီာ်ဘဲာ်ရှဳသဲပီၤကတးကျဳၤခီ ဇၤဝၤ ခဳးဒဳၣ်, စစူလၤဓ့ၢ်ကဲၤလဳၤဆူးလွံၢ်ဓဲ ဒဳသဲပီၤအကါကၱာ် သဘဲထာ်ကဲၤစာ်ဘိထဲၢ်တဲၤကလှၱပျါပီၢ်နဳၤ. 30သဲပီၤဖဳးတစီာ်မဲၤမိၤမၢ်အန့ၤ အစာ်ဘိစဇဲၤလၤလဳၤဆူး ဒဳသဲပီၤအကဳာ်တခီနဳၤကၱာ် စဲာ်တစီာ်ဇၤလၤဓ့ၢ်ကဲၤ ကျံဖဳးဒဳထံကျဲကၱာ်သးအဲးဟဲးတပီၤကဲၤသဲပီၤ. 31ပရၤဆါ စီၤပီလူးဒီၣ်ကဲၤကျံဗဳၤဓဳၤကၱာ် စပၠၤတစီာ်, “သဲပီၤဖဳးတစီာ်ကတအီၣ်မၤသဲပီၤပူၤနီးဒဳၣ်, ကတဆးရှံဇၤစဲာ်တစီာ်ကလှိထာ်ဘဲာ်နီး.” 32မဲၤကနဳၤဒဳၣ်, ကျံဖဳးတစီာ်ပ့ၢ်ထဲဓူၢ်ကဲၤချံအပံၤကၱာ် စဘါ ယိၤလၤကိာ်ကဲၤထံ.
33တချူကၱာ်တဲၤလှၱထာ်နှၱနီးနဳၤ, စီၤပီလူး တၤမီၤကဲၤစဲာ်တစီာ် အကအၣ်တဲၤအၣ်, ကၱာ်စဒီၣ်, “ရှံးလွံၢ်သဲအဓၢ်ပူၤသံအီၣ်ကဲၤတဲၤဘဲာ်ရှဳဘဲာ်မၤအကျဲ, ဆီတအၣ်ပၤတအီကဲၤ. 34ယတၤမီၤသံ အကအၣ်ကအီပီၢ်တကၱာ်. သံခူၣ်လူတဘီနှီနူၤမၤအတပျိာ် ဘဲာ်နီး.” 35စဒီၣ်ဝှါလၢ်ဝၤတစီာ်ကနဳၤ, စဖၱးတကဳာ်, စထါထာ်အံာ်ဘၱာ်စဲာ်, စဘၱာ်ဖးကၱာ်အၣ်ကဲၤ. 36ပၠၤကိအပွဲၤအသးခူထာ်ကၱာ် အၣ်ကဲၤတကဳာ်. 37ဝၤအအီၣ်ဒဳသဲပီၤပူၤတစီာ်အီၣ်ကဲၤ အပွဲၤကၠံၢ်ကယဲၤသါသိးတရှံကၱာ်အပွဲၤသါသိး. 38ပၠၤတစီာ်အၣ်ကဳးအီကဳးဝှါဒဳၣ်, ထၱးလၤဓ့ၢ်ကဲၤ ဟူကိဓိၤဒဳထံကျဲ စာ်ဘိထဲၢ်အကဖံပီၢ်သဲပီၤနဳၤ.
သဲပီၤလၤဖြး
39တဲၤလှၱထာ်တပျာ် စတမှါအံာ်ပ့ၤစလ့ၤ နီး, ပရၤဆါ စဲာ်တစီာ်စာ်ထၱး ပဲာ်လဲာ်တကွ့ၤအလ့ၤတကျၤဒဳၣ်, စသးအဲးဒီၣ်ထာ်သဲပီၤဒဳခီးဓဳခဳးနဳၤ, မၱာ်စတကဲာ်ထာ်ကဲၤနီး. 40စပ့ၢ်ထဲဓူၢ်ဝှါလဳၤဆူးဒဳၣ်, စထၱးလၤဓ့ၢ်ကဲဒဳပဲာ်လဲာ်ပူၤနဳၤ. ကၱာ်တပျာ်ခါလီၤနဳၤ, စဘါပျဲးကဲ သဲပီၤဒ့ာ်ဝၢ်အပံၤ, ဘါလှဲးလၤကဲတကၱ ယၢ် ထဲၢ်အအီၣ်ဒဳ သဲပီၤအလှီမီၢ်နဳၤ, စာ်ဘိထဲၢ်ကလ့ၤကအူးဝဲၢ်သဲပီၤဒဳ ခီးဓဳအနံၤခံနဳၤ. 41ပရၤ ဆါဒဳၣ်, အဓဳၤလ့ၤကဲၤထံဒးအလ့ၤဒဳၣ်, သဲပီၤထာ်တး ကျဳၤကဲၤခီးဓဳ. သဲပီၤအကဳာ်တီၤကျဳၤမှ့းတ့းကျ့း ကဲၤ ဟၣ်ပး, မၱာ်အကါတခီထဲဓူၢ်ကၱာ် ထံချဳးထံချးဟဲးဇၢ် အံာ်ကဲၤ.
42ကျံဖဳးတစီာ်ဘဲာ်ရှဳတဲၤကၱတၱၢ်ဖဳးတစီာ် ကဝၤထံကၱာ်ဟဲးဖျီးဒဳၣ်, စသးအဲးမဲၤသံလဳတပွဲး လၢ် ဝၤတစီာ်. 43ပရၤဆါ ကျံတကယဲၤအဗဳၤတပွဲၤနဳၤ, စသးအဲးမဲၤလှိထာ်စီၤပီလူးအစဲဒဳၣ်, စတအံာ် တပွဲးကျံဖဳးတစီာ်ကမဲၤသံစဲာ်တစီာ်နီး. စနှးပၠၤအပီၢ်ဇၤ ထံတစီာ် စွဲးလၤဓ့ၢ်ထံကျဲကၱာ်ဝၤလ့ၤထံဒဳအလဝ့ၤ တခီဝ့ၢ်နဳၤ. 44အလဝ့ၤတစီာ်ကဒီၣ်ဒီဧဲၤ သဳာ်ဘၱာ် ကၱာ်သဲပီၤအကါကိးကါကျဲး, လ့ၤကိာ်ကီစဲာ်တစီာ်အလ့ၤကါနဳၤ. မဲၤကနဳၤ, ပၠၤဓဳၤဝဲၢ်သအူသအဲးကဲၤဒဳ ခီခဳး ကိအပွဲၤလီၤ.
ទើបបានជ្រើសរើសហើយ៖
သဓဳဖဳး 27: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
