သဓဳဖဳး 23
23
1စီၤပီလူးစာ်တကြၱၢ်နၱၢ်ဝှါအစံးရး တဲၤတစီာ်ဒဳၣ်, စယၱၢ်ဘဲာ်ထာ်ကဲၤ, “သဲပူၤဝ့ၤတစီာ်, ထိဓဳၤခဳတနံၤယဳၤ, ယအီၣ်ကဘၱာ်စဲာ်အလှီ မီၢ်ဒဳတဲၤသဳးလှၱသးလှၱအပူၤ,” စဒီၣ်လၢ်ဝၤဓဳၤ. 2ဘ့နဳၤလီၤ, ပၠၤလှူၣ်တဲၤအဓဳၤစီၤအနၤနံ နှးကဲၤပၠၤဆီထဳးအီၣ်ဘိးထၱးစဲာ်တစီာ် ဒဲးစလီၤ မီၤ. 3စီၤပီလူးဒီၣ်က့ၤစဲာ်, “ကဘၱာ်စဲာ် ကဒဲးကီနဲၤ, သရိာ်ဒဲးအဘဲာ်သဖြိးဘိာ်သါ. နဆးနါအီၣ်အကစံးရးယဲၤအစာ်ဘိတဲၤမှဲးလၤ အီၣ်အဓ့နဳၤ, မၱာ်နခဲဘးမၤ တဲၤမှဲးလၤဒဳနနှးပၠၤ ဒဲးယဲၤနဳၤနဲၢ်,” စဒီၣ်ကဲၤလၢ်ဝၤဓဳၤ.
4ပၠၤအအီၣ်ဘိးထၱးစဲာ်တစီာ်ဒီၣ်, “နဒီၣ်နံၤနှးကဲၤကဘၱာ်စဲာ်အပၠၤလှူၣ်ထာ်တဲၤအဓဳၤ,” စဒီၣ်လၢ်ဝၤဓဳၤ.
5စီၤပီလူးဒီၣ်က့ၤစဲာ်တစီာ်, “အဳသဲ ပူၤဝ့ၤတစီာ်, ယတသၱာ်ဟဲကဲၤစဲာ်မၱာ်ပၠၤလှူၣ်ထာ် ဘၱာ်စဲာ်နီး, မၤနဲၢ်ဒဳၣ်, စဲာ်စါထံဒီၣ်, ‘နတဟိး ကၱကဲာ်ဘဲာ်ပွဲၤစာ်အံာ်အူအံာ်နပၠၤတစီာ်နီးနဳၤ’ စဒီၣ်ကဲၤဓဳၤ.”
6ဘ့စီၤပီလူးစာ်ထၱးကဲၤပၠၤကၠံၢ်ဖဳး ဒဳၣ်, တဖဳးမၱာ်စးဒူၤကဲဖဳး, အလဝ့ၤတဖဳးမၱာ် ဖၤရံၤရှဲဖဳးဒဳၣ်, စယဳၤထာ်ကဲၤအစံးရးတဲၤတစီာ်, စဒီၣ်, “သဲပူၤဝ့ၤတစီာ်, ယမၱာ်ဖၤရံၤရှဲဖဳးတပွဲၤ, ကၱာ်ဖၤရံၤရှဲအဖဳးတပွဲၤပွဲၤ. ဒဳဝၤတဲၤဆးရှံအံာ် တဲၤထာ်ပဳၤက့ၤအခဳးအစဲ, ခဳနူၤယဳၤ ယဘဲာ်ကဲၤ တဲၤစံးရး,” စဒီၣ်ထာ်ကဲၤဓဳၤ.
7ဘ့နဳၤတဲၤတရၤအီၣ်ထာ်ကဲၤ ဖၤ ရံၤရှဲဖဳး ကၱာ်စးဒူၤကဲဖဳးတစီာ်အဇဳၤ, ကၱာ်တဲၤ လၤဓ့ၢ်ပျဳာ်ပ့ၢ်ဖးကဲၤအန့ၤကၠံၢ်ကီလၢ်. 8စးဒူၤကဲဖဳးတစီာ်အနံၤခံတဲၤထာ်ပဳၤက့ၤတအီၣ်နီး, မီၢ်ခဳးပွဲၤဇဳၤကၱာ်နှဲးတအီၣ်နီးနီၤ. မၱာ်ဖၤရံၤရှဲဖဳး တစီာ်ဘူၣ်သဳမဳၤလဳၢ်လဳၢ်. 9တဲၤကဲာ်ဧဳၤ ထဳဖူးအလ့ၢ်သဲာ်ထာ်ဆိးတရ့ၤတရ့ၤကဲၤ, မၱာ်ဒဳ အဝှ့းစဲာ် အအီၣ်ဖၤရံၤရှဲဖဳးအပဳၤ ပူၤတစီာ်ဝဲၢ်ဆီထဳးတရၤဆိးကဲၤတဲၤကၱာ်ဒီၣ်, “ဝၤတပာ်ထၱးပၠၤအယဳၤတပွဲၤအတဲၤကမဲာ်တမံ နီး. မဲၤတဘဲာ်နီးသးစါထံတဓဲမၱတမၱာ်နီး မီၢ်ခဳး ပွဲၤဇဳၤယၱၢ်ဘဲာ်ထၱးကဲၤစဲာ်လီၤမီၢ်,” စဒီၣ်ဓဳၤ.
10ပၠၤတစီာ်သဳးမရိၤသးမရဲၤဆိး ကဲၤဒဳၣ်, ကျံဗဳၤဓဳၤ ဘဲာ်ရှဳမၱာ်စဲာ်တစီာ်ကထဳး ပျ့ထဳးခၣ်စီၤပီလူးဒဳၣ်, စသဓဳကဲၤစကျံဖဳးတစီာ် လၤဖၱးထာ်က့ၤလၢ်ဝၤဒဳၣ် က့ၤအံာ်စဲာ်ဒဳတဲၤဒဳးဝဲၢ် အံာ်အလ့ၤနဳၤ.
11အနဳၤတဟဲးမီၢ်ခဳးပွဲၤဇဳၤဆီထဳး အီၣ် စီၤပီလူးအခၣ်ထၱးကၱာ်ဒီၣ်ကဲၤလၢ်ဝၤ, “လဲၢ်ခူပီၢ်နသး, နခးထဳယနံၤခံ သဲသၱးဒဳယရူၤ ရှလ့ၣ်အူးပူၤနဳၤ. ခဳနူၤယဳၤနကမဲၤဘဲာ်ကီကနဳၤဒဳ ရိမ့ၤအူးပူၤနဳၤနဳၤ,” စဒီၣ်လၢ်ဝၤဓဳၤ.
တဲၤသးအဲးမဲၤသံစီၤပီလူး
12ဘ့တဲၤလှၱထာ်နဳၤယူဒၤဖဳးတစီာ် မဲၤကဲၤတဲၤလၤဓ့ၢ်ပျဳာ်အဟူၣ်အဇီၤကၱာ်အီၣ်ကၱာ် တဲၤအၣ်မါခးအံာ်ထဲၢ် စတမဲၤသံနံၤစီၤပီလူးနီး အသူသရ့ စကတအၣ်တအီနီးနဳၤ. 13ပၠၤအမဲၤကယဳၤအီၣ်အပွဲၤလွံၢ်ရှံဆဲး. 14ဝှါဒဳၣ်, စဲာ်တစီာ်လ့ၤထၱးကဲၤပၠၤလှူၣ်တဲၤ အဓဳၤ ကၱာ်အဓဳၤအပွ့ၤတစီာ်ကၱာ်ဒီဆးကဲၤလၢ်ဝၤတစီာ်, “ဝၤမဲၤထဳတဲၤအၣ်မါခးအံာ်ထဲၢ်တၤတမံတဖျီးနံၢ် ဘဲာ်ဝၤဧီၢ်ဗူနီး ထိဝၤမဲၤသံနံၤဘဲာ်စီၤပီလူးနဳၤ. 15ခဳနူၤယဳၤအအီၣ်ဒဳသံအစံးရး တဲၤတစီာ်အစူးခီးပူၤ, အကလ့ၤဒဳရိမ့ၤအကျံဗဳၤဓဳၤ အကလၤအံာ်စီၤပီလူးဒဳသံစူးခီးပူၤ, မဲၤစာ်ဘိ သံ ကစံးရးလၤတံၤလၤဆ့းပီၢ်တဲၤမှူနဳၤ, မၱာ်ဝၤတခီ ဝၤကမဲၤသံစဲာ် တချူးကၱာ်စဓဳၤထၱးသံနှၱနီးနဳၤ,” စဒီဆးလၢ်ဝၤတစီာ်ဓဳၤ.
16ပရၤဆါစီၤပီလူးအပၱးကီမံၤမှူးတပွဲၤအဖဳးသၱာ်ဟဲဘဲာ်ပၠၤဇီၤအိးစီၤပီလူးဒဳၣ်, စလ့ၤ ဝှါဒဳတဲၤဒဳးဝဲၢ်အလ့ၤဒဳၣ်ဒီဆးကဲၤစီၤပီလူး. 17စီၤပီလူးယဳၤဝှါမၢ်ဓဳၤတပွဲၤဒဳၣ်, စဒီဆး လၢ်ဝၤ, “ယဳၤလ့ၤပီၢ်အဘီာ်လီာ်ဖဳးတပွဲၤယဳၤဒဳ ကျံဗဳၤဓဳၤအီၣ်နဳၤ. စမီၤဒီဆးလၢ်ဝၤအဝၱၤအကဲ အီၣ်တဓဲ,” စဒီၣ်လၢ်ဝၤဓဳၤ. 18မၢ်ဓဳၤ ယဳၤလ့ၤဝှါအဘီာ်လီာ်ဖဳးဒဳ ကျံဗဳၤဓဳၤအီၣ်ဒဳၣ်, စဒီၣ်လၢ်ဝၤ, “တဲၤကၱတၱၢ်ဖဳးစီၤပီလူးယဳၤ ဝှါ ယဲၤဒဳၣ် စနှးလ့ၤအံာ်ကဲၤယဲၤ အဘီာ်လီာ်ဖဳးအယဳၤတပွဲၤဒဳနအီၣ်နဳၤ. စသးအဲးဒီဆးနဲၤတဲၤ အဝၱၤအကဲတကၱာ်,” စဒီၣ်လၢ်ဝၤဓဳၤ.
19ကျံဗဳၤဓဳၤ စွံးတပီၤဝှါစဲာ်ဒဳၣ်, စဒဲ ကဲၤလၢ်ဝၤ, “နသးအဲးဒီဆးယဲၤတၤနဲၢ်,” စဒီၣ်လၢ်ဝၤဓဳၤ.
20စဒီၣ်ရှံက့ၤလၢ်ဝၤ, “ယူဒၤဖဳးတစီာ်လၤကျၤလၢ်ဝၤအကနှးနလၤအံာ်စီၤပီလူးဒဳ တဲၤစံးရးအလ့ၤမီၤဗ့တနံၤ, မဲၤအစာ်ဘိစကထိး စာ်ဒဲစာ်လၤတံၤလၤဆ့းလၢ်ဝၤနဳၤ. 21အံာ်ပီၢ်မဲးစဲာ်တစီာ် နှးနဳၤနှးပဲၤနဲၤမဲး. မၤနဲၢ်ဒဳၣ်, ပၠၤတိၤအံာ်စကျဲးအပွဲၤလွံၢ်ရှံထဲၢ်အဝှိးဒါအန့ၤ အကတမဲၤသံနံၤစီၤပီလူးနီးအသူသရ့, အကတအၣ်တအီတမံနီးနဳၤ. စဲာ်တစီာ်အီၣ်ဆိဧိၢ်အံာ် နတဲၤမှဲးလၤလီၤ,” စဒီၣ်လၢ်ဝၤဓဳၤ.
22ကျံဗဳၤဓဳၤနှးဟဲးဝှါအဘီာ်လီာ်ဖဳး, စနှးဝဳၤအံာ်လၢ်ဝၤ, စဒီၣ်, “နဒီဆးယဲၤတဲၤအယဳၤနဳၤ, အံာ်ပီၢ်မဲၤပၠၤသၱာ်ဟဲကိာ်တပွဲမဲး,” စဒီၣ် လၢ်ဝၤဓဳၤ.
စီၤပီလူးဒဳကဲၤစါရံၤအူးနဳၤ
23ကျံဗဳၤဓဳၤယဳၤဝှါကျံဗဳၤကၠံၢ်ပွဲၤ ဒဳၣ်, စဒီၣ်လၢ်ဝၤတစီာ်, “နှးအီၣ်တီၤလီၤပီၢ် ကျံ ဖဳးအပွဲၤကၠံၢ်ကယဲၤအကလ့ၤဒဳကဲၤစါရံၤအူးဘ့လူၤ မူၤဟဲးလွံၢ်သိးတနၣ်ရၱၣ်အခၠၱးနဳၤ, ပျဳာ်ပျဳာ်ကၱာ် သရၱာ်အကျံဖဳးသါသိးတရှံကၱာ်ကျံဖဳးအချဳအပွဲၤ ကၠံၢ်ကယဲၤပ့ၤ. 24ဝၢ်လှဲးနံၤပီၢ် စီၤပီလူး သရၱာ်တဒဳ, ကၱာ်သဲလ့ၤမီၤမီၤဝၱၤဝၱၤပီၢ်စဲာ်ဒဳ မၢ်ဓဳၤစီၤဖ့လံးအီၣ်နဳၤ,” စမှဲးလၤလၢ်ဝၤဓဳၤ. 25ကျံဗဳၤဓဳၤ ဝှ့နံၤစီၤဖ့လံးစဲာ်တဘဲာ်, စဒီဆး လၢ်ဝၤကယဳၤ, 26“ယဲၤ, စီၤကျီၤဒံလူၤစံ နှူဆဲးယာ်ဘဲာ်မၢ်ဓဳၤစီၤဖ့လံး, 27ယူဒၤဖဳး တစီာ်သးအဲးဖီၣ်ကၱာ်မဲၤသံကဲၤ ပၠၤအယဳၤတပွဲၤ ယဳၤ, ယသၱာ်ဟဲကဲၤစမၱာ်ရိမ့ၤဖဳးအခဳးအစဲနဳၤ, ယလ့ၤဖၱးထာ်ဖျီးကဲစဲာ်ကၱာ် ယကျံဖဳးတစီာ်နဳၤ. 28ယသးအဲးသၱာ်ဟဲပၠၤတစီာ် မဲၤစဲာ်တၤ တဲၤမှူနဲၢ်ဒဳၣ်, ယလ့ၤအံာ်စဲာ်ဒဳ ယူဒၤဖဳးအတဲၤ စံးရးအလ့ၤနဳၤ. 29ယသၱာ်ဟဲဘဲာ်ကီ ပၠၤမဲၤစဲာ်တဲၤမှူမၱာ် အဘဲာ်ကၠး ‘တဲၤမှဲးလၤ,’ ပရၤဆါ အတတးနံၤမဲၤ တဲၤသံမၱတမၱာ်နီးတဲၤ ကၱတၱၢ်နီးနဳၤ. 30ပၠၤဒီဆးယဲၤမၱာ် ပၠၤတစီာ်သးအဲးမဲၤသံစဲာ်, မဲၤကနဳၤဒဳၣ်, ယသဲလ့ၤပျာ် ပျါကီစဲာ်ဒဳနအီၣ်နဳၤ. ကၱာ်ယဒီဆးထဳပၠၤတစီာ် အကလ့ၤမဲၤတဲၤမှူဒဳနလှီမီၢ်နဳၤ.”
31ကျံဖဳးတစီာ်မဲၤကဲၤအစာ်ဘိတဲၤ မှဲးလၤအီၣ်စခဳးနဳၤ. စလ့ၤအံာ်ခံးလ့ၤအံာ်သါကဲၤ စီၤပီလူးဒဳအၣ်တံၤပၤတြံအူးနဳၤ. 32အလ့ၤကါတနံၤစနှးကဲၤအဒီၣ်သရၱာ်တစီာ် လ့ၤအံာ် ဟူစီၤပီလူးအလှီမီၢ်, ကၱာ်စဲာ်တစီာ်က့ၤဘးက့ၤ ဒဳစတဲၤတိၤအံာ်အလ့ၤနဳၤ. 33အလ့ၤသဲ စီၤပီလူးတစီာ်ဓဳၤဒဳကဲၤစါရံၤအူးနဳၤဒဳၣ်, စလ့ၤသဲ ကဲၤစဲာ်ပရဳကၱာ်စီၤပီလူးဒဳမၢ်ဓဳၤအစူးခီးပူၤနဳၤ. 34မၢ်ဓဳၤဖးဝှါစဲာ်ဒဳၣ်, စဒဲကဲၤစီၤပီလူးစအီၣ်အလ့ၤအကျဲး. စသၱာ်ဟဲဘဲာ်လၢ်ဝၤအီၣ်ဒဳ ကံၤလံၤကံက့ၤနဳၤဒဳၣ်, 35စဒီၣ်ဝှါလၢ်ဝၤ, “ပၠၤအမဲၤနဲၤတဲၤမှူတစီာ် ကဓဳၤပျဳာ်လဳလၢ်ဝၤ ဒဳၣ်, ယကဆီးခ့န့းတနၢ်တပွဲးသံတဲၤမှူ,” စဒီၣ် လၢ်ဝၤဓဳၤ. မဲၤဝှါစမှဲးလၤပၠၤအကလ့ၤအံာ် စီၤပီလူးဒဳဆးဖြးဟ့ၤရိာ်အတဲၤစံးရးအလ့ၤနဳၤ.
ទើបបានជ្រើសរើសហើយ៖
သဓဳဖဳး 23: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.
