သဓဳဖဳး 20

20
စီၤ​ပီ​လူး​လ့ၤ​ဒဳ​မၤ​က့ၤ​ဒ​နံ​က့ၤ​ကၱာ် အ​ဃါ​ယၤ​က့ၤ
1ဘ့​တဲၤ​က​သီ​က​ရီၤ​လၤ​ပွဲး​ဝှါ​နဳၤ, စီၤ​ပီ​လူး​ယဳၤ​ဝှါ​အ​ပျဲၢ်​အ​ဘီၣ်​တ​စီာ်, စ​အံာ်​ခဳး​အံာ် အါ​လၢ်​ဝၤ​ကၱာ်​စ​နှူ​ဆဲး​ဝှါ​လၢ်​ဝၤ​တ​စီာ် စ​လ့ၤ​ကဲၤ ဒဳ​မၤ​က့ၤ​ဒ​နံ​က့ၤ​နဳၤ. 2ဒဳ​ကျဲး​ခဳး​ကျဲး​လီၤ နဳၤ, စ​အံာ်​ခဳး​အံာ်​အါ​ဝှါ​ပၠၤ​တ​စီာ်​စ​လ့ၤ​နံၢ်​ကဲၤ​အ​ဃါ​ယၤ​က့ၤ​ပူၤ, 3ကၱာ်​စ​အီၣ်​ကဲၤ​ဒဳ​နဳၤ သဳ​လှဲ​အ​ဓၢ်​ပူၤ. ဘ့​စ​ပြး​နှဲး​တီၤ​လီၤ​အ​က​ဒီၣ်​သဲ​ပီၤ ကၱာ်​လ့ၤ​ဒဳ​စူၤ​ရံ​က့ၤ​နဳၤ, စ​သၱာ်​ဟဲ​ကဲၤ​ထဲၢ်​ယူ​ဒၤ ဖဳး​တ​စီာ်​သး​အဲး​မံၤ​သံ​စဲာ်​နဳၤ​ဒဳၣ်, စ​ပဲၢ်​လၤ​ကဲၤ​စ​သး​အ​က​က့ၤ​ဘး​အ​လ့ၤ​ကါ​ဒဳ​မၤ​က့ၤ​ဒ​နံ​တ​ခီ​နဳၤ. 4အ​ဟဲး​ကိာ်​စ​ကါ​မှၱာ်​စီၤ​ပူ​ရူး​အ​ဖဳး​စီၤ​စိ​ပၤ​တြူး ထဲၢ်​အ​အီၣ်​ဒဳ​ဘ့း​ရံၤ​အူး​အ​လ့ၤ​တ​ပွဲၤ​နဳၤ​ကၱာ် စီၤ​အ​ရၱ​စ​တၤ​ဃူး​ကၱာ်​စီၤ​စ့း​ကူၣ်​ဒူး အ​အီၣ်​ဒဳ သ့း စၤ​လ​နံ​အူး​အ​လ့ၤ​ကၠံၢ်​ပွဲၤ​ထဲၢ် စီၤ​ကါ​ယူး​အ​အီၣ် ဒဳ ဒ့ၢ်​ဘ့ၤ​အူး, ကၱာ်​စီၤ​တံၤ​မ​သ့း, စီၤ​တူ​ဃံၤ​ကူး, စီၤ​တြီၤ​ဖံး​မူး​အ​အီၣ်​ဒဳ​အၤ​စံ​က့ၤ​တ​စီာ်​နဳၤ. 5စဲာ်​တ​စီာ်​လ့ၤ​တီၤ​လီၤ​လဳ​ဒဳ​တြိၤ​အါ​အူး​နဳၤ​ကၱာ်​အီၣ် ဆိ​ဧိၢ်​ကဲၤ​ဝၤ​ဒဳ​နဳၤ. 6ဘ့​တ​ကဳာ်​က​မံၤ တ​ပာ်​နီး​အ​ပွဲ​ဘဲာ်​ဝှါ​အ​လ့ၤ​ကါ​တ​နံၤ​နဳၤ, ဝၤ​ဒီၣ် ထာ်​သဲ​ပီၤ, ဝၤ လ့ၤ​ကဲၤ​ဒဳ​ဖံ​လံး​ပံၤ​အူး​ကၱာ်​လ့ၤ ကဲၤ​အ​လှီ​မီၢ်​ယဲၢ်​သဲ, ဝၤ​ဓဳၤ​လ့ၤ​ကၱာ်​စာ်​ထၱး​ကဲၤ စဲာ်​တ​စီာ်​ဒဳ တြိၤ​အါ​အူး​ပူၤ​နဳၤ. ဝၤ​အီၣ်​ဆီ​ဓူၢ်​ဆီး ဒဲ ဒဳ​နဳၤ​တ​ဆီး​ဒဲ​အ​ဓၢ်​ပူၤ.
စီၤ​ပီ​လူး​လ့ၤ​ဒဳ​တြိၤ​အါ​အူး​အ​က​ဓူၤ​လါ​တ​ပျာ်
7ဘ့​မူၤ​နံၤ​ဆီ​ဒဲ​အ​နံၤ လူၤ​မူၤ​လၤ​နဳၤ ဝၤ​လၤ​ဓ့ၢ်​ပျဳာ်​လၢ်​ဝၤ​အ​ခၠၱး​ဝၤ​ဘၱာ်​ဖး​တ​ကဳာ်. အ​လ့ၤ​ကါ​တ​နံၤ​စီၤ​ပီ​လူး​က​ဟဲး​ကဲၤ​ကျဲး​ဒဳၣ်, စ​ဒီ​ထိး နံၤ​ကဲၤ​ပၠၤ​ထိ​ဓဳၤ​ကျါ​မဲ​လူၤ​မူၤ​နဳၤ. 8ပၠၤ​ဓဳၤ လၤ​အီၣ်​အဲး​အီး​အီး​ကဲၤ​မှၱး​အူ​ဒဳ ဒဳ​အ​ကီၢ်​ထာ်​တ​တီၤ​ထဲၢ် ဝၤ​လၤ​ဓ့ၢ်​ယံၢ်​ပျဳာ်​ကဲၤ​လၢ်​ဝၤ​နဳၤ. 9ကၱာ်​ဒီ​ဘ့​စီၤ​ပီ​လူး​ဒီ​ထိး​ဖါ​သး​နဳၤ, အ​ဘီာ်​လီး ဖဳး​အ​မံၤ​မၱာ် စီၤ​အူ​တူၤ​ဃူး​တ​ပွဲၤ​နဳၤ​ဆး​နါ​လၤ​အီၣ် ကဲၤ​ဒဳ​ဖီ​ပူၤ​တဲာ်​လီၤ​အ​ခဳး​နဳၤ, ဆီ​မံ​ခ့​ကၱာ်​စ​လၤ​ဓ့ၢ် ဒဳ သဳ​တီၤ​တ​တီၤ​နဳၤ​ဓဳၤ​ဒဳ​ရှံၣ်​လဲၢ်​နဳၤ. ပၠၤ​လ့ၤ​ဇၢ် ထာ်​က့ၤ​စဲာ်​ဒဳၣ် စ​သံ​ကဲၤ. 10စီၤ​ပီ​လူး​လၤ လၢ်​ခဳး​ကၱာ်​ဇၢ်​ထာ်​က့ၤ​အ​ပံၤ​စ​ဖဳး​ကၱာ်​ဒီၣ်, “​သံ​မီၤ ဘဲာ်​ရှဳ​အ​လ့ၤ​တ​အီၣ်​နီး, စ​သး​သ​မိ​အီၣ်​ဝ့ၤ​တ​ပွဲး,” စ​ဒီၣ်​ပၠၤ​ဓဳၤ. 11စ​က့ၤ​ထာ်​ဝှါ​ဒဳ​ရှံၣ်​ခဳး နဳၤ​ဒဳၣ်, စ​ဘၱး​ဖး​ဝှါ​တ​ကဳာ်, စ​အၣ်​ကဲၤ​တ​စီာ်. မဲၤ ဝှါ​စ​တီၤ​တီၢ်​ထၱး​ဝ့ၤ​ဒီ​လၢ်​ဝၤ​တ​စီာ်​ထိ​တဲၤ​လှၱ​ထာ်​နဳၤ, ကၱာ်​စ​ဟဲး​ကဲၤ​စ​ကျဲး. 12ပၠၤ​က့ၤ​အံာ် အ​ပံၤ​စ​ဖဳး​အ​သး​အီၣ်​သ​မိ ဒဳ​တဲၤ​သး​ခူ​သး​က​နၢ်​အံာ် အ​ပူၤ​နဳၤ.
ဒဳ​တြိၤ​အါ​ဓဳၤ​ဒဳ​မံ​လ့ၤ​တူး​နဳၤ
13ခဳ​နူၤ​ယဳၤ​ဝၤ​လ့ၤ​ကဲၤ​အ​လှီ​မီၢ်, မဲၤ က​နဳၤ​ဝၤ​ဒီၣ်​လ့ၤ​ကဲၤ​သဲ​ပီၤ​ဒဳ​အၣ်​စူး​အူး​နဳၤ, ထဲၢ်​ဝၤ က​ယဳၤ​ထာ်​ဘဲာ်​စီၤ​ပီ​လူး​ဒဳ​သဲ​ပီၤ​ပူၤ​နဳၤ. အ​ယဳၤ​မၱာ် ဝၤ​တဲၤ​ပြး​တီၤ​လီၤ, မၤ​နဲၢ်​ဒဳၣ်, စ​သး​အဲး​ဟဲး​ကဲၤ စ​ခၣ်​ခီး​အ​စဲ​နဳၤ. 14ဘ့​စ​လ့ၤ​ထၱး​ဝှါ​ဒဳ အၣ်​စူး​အူး​နဳၤ, ဝၤ​ယဳၤ​ထာ်​နံၢ်​ဝှါ​စဲာ်​သဲ​ပီၤ​အ​ပူၤ ဒဳၣ်, ဝၤ​လ့ၤ​ကဲၤ​ဒဳ မံ​လ့ၤ​တူး​အူး​နဳၤ. 15အ​လ့ၤ​ကါ​တ​နံၤ​ဝၤ​ဒီၣ်​သဲ​ပီၤ​ကၱာ် လ့ၤ​ဓဳၤ​ကဲၤ​ဒဳ ဃံ​အူး​ခီ​ထံ​ခဳး​အီၣ်​နဳၤ. ကၠံၢ်​နံၤ​တ​နံၤ ဝၤ​ဓဳၤ​လ့ၤ ကဲၤ​ဒဳ​စါ​မူး​ခီ​ထံ​ခဳး​အီၣ်​နဳၤ​ကၱာ်​အ​လ့ၤ​ကါ​တ​နံၤ​ဝၤ လ့ၤ​အ​လှီ​မီၢ်​ထိ​ဓဳၤ​မံ​လ့ၤ​တူး​အူး​နဳၤ. 16စီၤ​ပီ​လူး​သး​အဲး​ဟဲး​တ​ကိ​ကဲၤ​အ့း​ဖ့း​စူး​အူး စာ်​ဘိ ထဲၢ်​စ​က​တ​ဆီး​ဒဲ​အီၣ်​တၤ​ပီၢ်​ဒဳ အၤ​စံ​နီၤ​နဳၤ. မၤ နဲၢ်​ဒဳၣ်, စ​သး​အဲး​ဓဳၤ​လ့ၤ​ပျါ​ကဲၤ​ယ​ရူၤ​ၡ​လ့ၣ် အူး စာ်​ဘိ​ထဲၢ်​စ​က​ဓဳၤ​လ့ၤ​ချူး​ပီၢ်​ဘူၣ်​ယဲၢ်​ရှံ​အ​နံၤ နဳၤ.
တဲၤ​ဟဲး​ပၢ်​အ့း​ဖ့း​စူး​အူး​ဖဳး​အ​ဓဳၤ​အ​ပွ့ၤ​တ​စီာ်
17စီၤ​ပီ​လူး​အီၣ်​ဒဳ​မံ​လ့ၤ​တူး​အူး သ​ဓဳ လ့ၤ​ကဲၤ​ပၠၤ​အ​က​ဒီ​ဆး​တဲၤ​အီၣ်​ပျဳာ်​အ​ဓဳၤ​အ​ပွ့ၤ​အ​အီၣ်​ဒဳ​အ့း​ဖ့း​စူး​အူး​တ​စီာ်​က​လ့ၤ​ထၱး​စဲာ်​ဒဳ​နဳၤ. 18ဘ့​စဲာ်​တ​စီာ်​ဓဳၤ​လ့ၤ​ထၱး​စဲာ်​နဳၤ, စ​ယၱၢ်​ဘဲာ် တ​တီၤ​ထၱး​ကဲၤ​လၢ်​ဝၤ​တ​စီာ်​ကၱာ်​ဒီၣ်, “​သံ​သၱာ် ဟဲ​တ​ပွဲး​လှ့​ယ​ခဲ​နံၢ်​အၤ​စံ​အ​လၢ်​ခဳး​ပူၤ​လီၤ​နဳၤ, ယ​မဲၤ​ယ​အၣ်​ကဲၤ​စာ်​တဲၢ်​နဳၤ. 19ယ​ခး​ဇိၤ ကဲၤ​က​ဘၱာ်​စဲ​စ​ဒဳ​တဲၤ​ပဲၢ်​ဘိး​လၤ​အ​န့ၤ​ကၱာ်​တဲၤ ကၢ်​ဓူ​ထံ​လၤ​အ​ပူၤ​နဳၤ, ယ​ခး​ဘဲာ်​ကဲၤ​တဲၤ​အဳး​သဳး အဳး​သး​ကၱာ်​တဲၤ​ပၤ​တဲၤ​ဆဲ​ဒဳ​ယူ​ဒၤ​ဖဳး​တ​စီာ်​အ​စူး​ခီး ပူၤ​နဳၤ. 20ယ​က​မဲၤ​ဘဲာ်​သံ​နံၤ​ခံ တဲၤ​အဲး တဲၤ​အီ​နဳၤ ယ​ထဲး​နံၤ​ဝံ​နံၤ​ဝၤ တ​ကး​နီး, မၱာ်​ယ​ဒီ ထိး​လၤ​နံၤ​ကဲၤ​သံ, ယ​သိၣ်​အံာ်​သီ​အံာ်​ကဲၤ​သံ ဒဳ​ပၠၤ​အ​ပဳၤ​အ​ဟီး​အ​ကျဲ​မၱာ်​ဝၱၤ, ဒဳ​သံ​ရှံၣ်​သံ​ဖါ​ပူၤ နဳၤ​မၱာ်​ဝၱၤ​လီၤ. 21ယ​နှး​နဳၤ​နှး​ပဲၤ​ကဲၤ ယူ​ဒၤ ဖဳး​တ​စီာ်​ကၱာ် ကြံးခ်​ဖဳး​တ​စီာ်​အ​က​က့ၤ​ဘး​ထၱး က​ဘၱာ်​စဲာ်​ကၱာ် အ​က​ဘူၣ်​ဝၤ​ဘၱာ်​စဲာ် ယ့ၣ်​ရှူး ခ​ရၱာ်​နဳၤ. 22ခဳ​နူၤ​ယဳၤ​သံ​စာ်​ထၱး​ထဳ​ယဲၤ အ​စာ်​ဘိ​တဲၤ​သး​အ​တဲၤ​ကၱ​တၱၢ်​ဖဳး​တ​ပွဲၤ​နဳၤ ယ​လ့ၤ​ဒဳ​ယ​ရူၤ​ၡ​လ့ၣ်​အူး​နဳၤ. ပ​ရၤ​ဆါ​ဒဳ​နဳၤ တၤ​က​ဖၱ​ထာ်​ကီ​ယဲၤ​နဲၢ်​နဳၤ ယ​တ​သၱာ်​ဟဲ​မဲၤ​နီး. 23မၱာ်​သး​စါ​ထံ​မဲၤ​သၱာ်​ဟဲ​ကဲၤ​ယဲၤ ထဲၢ်​တဲၤ​ကၱ​တၱၢ် အ​လ့ၤ​ကၱာ်​တဲၤ​လိၤ​မဲၤ​ဆဲး​ညဲ​အီၣ်​ဆိ​ဧိၢ်​အံာ်​ယ​ကျဲး တ​အူး​ဝှါ​တ​အူး​အ​ပူၤ​နဳၤ. 24ပ​ရၤ​ဆါ​ယ​နံၤ​ခံ​တဲၤ​လိၤ​မဲၤ​ဆဲး​ညဲ​ယ​တဲၤ​အီၣ်​သ​မိ​အ​ယွံၢ်​အ​မဳၤ​ယ​နံၤ​ခံ​နီး, မၱာ်​ယ​က​မဲၤ​ဝှါ​ဘဲာ်​ယ​တဲၤ​မဲၤ ထဲၢ် ဘၱာ်​စဲာ်​ယ့ၣ်​ရှူး​အံာ်​လၤ​နံၤ​ယဲၤ, ထဲၢ်​အ​မၱာ်​တဲၤ သး​လဳၢ်​သး​လၤ​အံာ်​အ​ဝၱၤ​အ​ကဲ​အ​ဘဲာ်​ကၠး က​ဘၱာ်​စဲာ်​အ​လှူၣ်​အ​တါ​နဳၤ.
25“​ဒဳ​သံ​ကျဲ​နဳၤ ယ​ဟဲး​ဒီ​ထိး​လၤ​ထဳ က​ဘၱာ်​စဲာ် အ​ထံ​အ​က့ၤ​အ​ဝၱၤ​အ​ကဲ​နဳၤ. ခဳ​နူၤ​ယဳၤ ယ​သၱာ်​ဟဲ​လၤ​တံၤ​လၤ​ဆ့း​ထဳ ထဲၢ်​သံ​က​တ​စာ် ထၱး​ဘဲာ်​ပ့ၤ​ကီ​ယ​မူၢ်​ကါ​တ​ဗွဲ​နီး. 26မဲၤ က​နဳၤ, ဘ့​ယဳၤ​ကၱာ်​ခဳ​နူၤ​ယဳၤ​လီၤ ယ​ဝှိး​ဒါ​ထဲၢ် အ​ဘဲာ်​ကၠး​သံ​နဳၤ, ယ​သး​ပူၤ​အီၣ်​လှၱ​အီၣ်​ပျါ​ထဳ. 27မၤ​နဲၢ်​ဒဳၣ်, ယ​မဲၤ​လှၱ​ထာ်​ထဳ က​ဘၱာ်​စဲာ် အ​တဲၤ​သး​အဲး​နံၤ​အ​ခဳး​အ​စဲ​နဳၤ. 28ဝဳၤ​အံာ် ဆီး​အံာ်​ပီၢ်​သံ​န့ၤ​ကၱာ်​သဳ​ဖဳး​တ​စီာ် ထဲၢ်​အ​မၱာ်​သး စါ​ထံ​လဲၢ်​လၤ​နံၤ​ကဲၤ​သံ​တ​စီာ်​နဳၤ. ဘဳာ်​အၣ်​ဘဳာ် အီ​ပီၢ်​က​ဘၱာ်​စဲာ်​အ​တဲၤ​အီၣ်​ပျဳာ်​တ​စီာ်​ထဲၢ်​စ​ပွၱၤ အံာ်​က့ၤ​ကဲၤ​စ​ဖဳး​ခဳ​အ​သွံၣ်​နဳၤ. 29ယ​သၱာ် ဟဲ​သ​အူ​သ​အဲး​တ​ပွဲး​ထဲၢ် ထွံၣ်​မံၤ​က​ယၤ​ဘိာ် အ​မီၤ​ရှံး​ဆါ​တ​စီာ်​လှီ​ဝဲၢ်​စ​လီၤ​ကၱာ် စ​က​တ​ခီၣ် ဝဲၤ​ကီ​စဲာ်​တ​စီာ်​တ​ကၱ​နီး​နဳၤ. 30ဒဳ​သံ​ကျဲ နှီ​နူၤ​အ​လှီ​လှၱ​လှီး​ပျဲာ်​ဝှါ​တဲၤ​အ​က​စွံး​နံၢ်​ကီ​အ​ပျဲၢ် အ​ဘီၣ်​တ​စီာ် စာ်​ဘိ​ထဲၢ် စ​က​လိၤ​ကိာ်​ပီၢ်​လၢ်​ဝၤ အ​လ့ၤ​နဳၤ. 31မဲၤ​က​နဳၤ​ဒဳၣ်, ဝဳၤ​လၤ​ခး​လၤ အံာ်​ပီၢ်​သံ​န့ၤ, က​မဳၤ​ထာ်​နံၤ​ပီၢ်​သဳ​ဒ့ာ်​အ​ဓၢ်​ပူၤ, ယ​သိၣ်​အံာ်​သီ​အံာ်​သံ သဲ​မူၤ​ဆဲ​မူၤ​နဲၤ​ကၱာ် ယ​ကၢ်​ဓူ​ထံ​လၤ​ကဲၤ​သံ​နံၤ​ခံ တ​ပွဲၤ​တ​ပွဲၤ​လၤ​ဓူၢ် အ​ခဳး​နဳၤ.
32“​ခဳ​နူၤ​ယဳၤ​ယ​အံာ်​လၤ​သံ​ဒဳ​က​ဘၱာ် စဲာ်​အ​စူး​ခီး​ပူၤ​နဳၤ, ကၱာ်​ဒီ​စ​တဲၤ​ယၱၢ်​ဘဲာ်​ကၱာ် စ​တဲၤ​လှူၣ်​တဲၤ​တါ​အ​ခဳး​အ​အါ​အ​ပူၤ​နဳၤ, စာ်​ဘိ​ထဲၢ် သံ​က​ဘဲာ်​ဘီာ်​ထာ်​ပီၢ်​ကၱာ်​က​နံၤ​ဘဲာ်​ကိာ်​ပီၢ်​အ​ဘဲာ် မဲၤ​စါ​ထံ​တ​စီာ်​အ​ကါ​တဲၤ​အံာ်​လၤ​နံၤ​နဳၤ. 33ယ​တ​တၤ​ကဲၤ​ပၠၤ​ဝှိ​ထဲ, ပံ​ဒဳ​ပံ​ဆး​ကၱာ်​တဲၤ​ကိ တဲၤ​သီး​တ​ဗွဲ​နီး. 34သံ​သၱာ်​ဟဲ​တ​ပွဲး​ထဲၢ် ဒဳ​ယ​တဲၤ​ဖၱး​တဲၤ​မဲၤ​အ​ပူၤ​ယ​မဲၤ​ကဲာ်​ထာ်​တ​ပွဲး​တၱၢ် တဲၤ​ဒဳ​အ​လဳၤ​ပၤ​ယ​နံၤ​ခံ​ကၱာ် ယ​ခီ​ယ​ခဲး​တ​စီာ် အ​နံၤ​ခံ​နဳၤ. 35ယ​မဲၤ​တဲၤ​အ​ယဳၤ​မၱာ် အ​က​ဘဲာ်​ဒဲ​လၱၢ်​သံ​ကျဲး အ​က​ထဳး​ခဳး​ထဳး​အါ, အ​က​မဲၤ ဇဳၤ​အ​ခဳး​ဇ့ၤ​အါ​ဇ့ၤ​တ​စီာ်​နဳၤ, က​မဳၤ​ထာ်​နံၤ​ပီၢ်​ဘၱာ် စဲာ်​ယ့ၣ်​ရှူး​အ​တဲၤ​ယၱၢ်​ဘဲာ်​ထဲၢ်​စဲာ်​သဲ​န့ၤ​ဒီၣ်​ကဲၤ, ‘​တဲၤ​သး​က​နၢ်​အံာ်​အီၣ်​ဒဳ​တဲၤ​အံာ်​အ​ပူၤ​ဒဳၣ်​လံ ကၱာ်​တဲၤ​ဖၱး​အ​ပူၤ,’ နဳၤ.”
36စ​ယၱၢ်​ဘဲာ်​ဝှါ စ​ဓဳၢ်​နှဳ​လါ​ပျဳာ်​ပျဳာ် လၢ်​ဝၤ​တ​စီာ်​ကၱာ်​သ​ဘဲ​ကဲၤ. 37ဘ့​နဳၤ ပၠၤ​တ​စီာ်​အ​ကၢ်​ဓူ​ထံ​လၤ​လဳၢ်​ကဲၤ. စ​ဖီး​ဘး​ဝှါ လၢ်​ဝၤ​အ​ကီၢ်, စ​စွၱး​ကဲၤ​လၢ်​ဝၤ. 38တဲၤ​အ​မဲၤ​အဳး​သဳး​အဳး​သး​က​ဓူ​စဲာ်​တ​စီာ်​မၱာ် ဒဳ​စ​ဒီၣ် လၢ်​ဝၤ​တ​စီာ် က​တ​စာ်​ထၱး​ဘဲာ်​ပံ​ပံး ပ့ၤ​စ​မူၢ်​ကါ နီး​နဳၤ. အ​လ့ၤ​ကါ စဲာ်​တ​စီာ်​လ့ၤ​သဲ​ထာ်​ကဲၤ စီၤ​ပီ​လူး ဒဳ​သဲ​ပီၤ​အ​ပူၤ​နဳၤ.

ទើបបានជ្រើសរើសហើយ៖

သဓဳဖဳး 20: GBA

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល