LUKA 6
6
Sabbath Kaw Bie Hiehriyna
(Mat 12.1-8; Mar 2.23-28)
1 #
Pbp 23.25
Zingsuv ca Sabbath ning ta lu kha cahrawpaale te a si. Ziytuv tie ta sa-uv kha pahriy paale yi te ama kuvpazaa lie ama cariy khutaata a chuo kha ama baale. 2Farasi ming chekha ta, “Khaapanakawma phungbie ta a thlupa kha Sabbath ning ta nama tue?” ama ta. 3#1Sam 21.1-6 Zingsuv ta, “Ama hne a cawsaa zaw ama nang a diy ningta David ta khaapama a za tue tapa kha ri buo va ung ca ma? 4#Tbr 24.9 Khazing ingchung luo kha a ngie te tluobyi tie ta li pata ahungtahmuo ning hrue lipa, Phuovaa viechuo kha la te a ning khutaata a cawsaa zaw kha a pi yi cuo va ma?” a ta. 5Cakhutaata, “Cawsaa Sacapaa ca sabbath byi tana a cuo,” a ta yi.
A Kuv A Pakyapa Paa
(Mat 12.9-14; Mar 3.1-6)
6A ning hrangpa Sabbath ningta kha Zingsuv ca apungna-ing luo kha a ngie te a pacuv yi. Capa lie ca a cacuoluo kuv a pakyapa pakha a aw. 7Phungbie saya tie hne Farasi ming chekha ta Zingsuv kha a suena ama huv khing nakawta Sabbath ning hing vya patluo sa ma tapa kha ci li pata ama mangkhuo. 8Ama ruenapa kha a pachang thluo raalaa pata a kuv a pakyapa cawsaapa kha, “A vaw la hingpa lie hing a vya daa,” a ta. Cawsaapa ca thu te capa lie ca a vaa daa. 9Zingsuv ta iema kha, “Ica hiehriy yi, Sabbath ning hing hmang pha tue riypa ma, ruvnaana pi riypa? Hringna khuo riypa ma para riypa?” a ta yi. 10Iema kha mang paky yi te, cawsaapa kha, “Na kuv pazuo,” a ta. Pazuo te a kuv ca a tluo. 11Ama hi haa hringhruo te, Zingsuv hing tuokhaatama ma tue aa tapa kha pakha hne pakha amaa rue.
Zingsuv Ta Lucuotuv Pahraa Hlyihning Aa Tlaw Yi
(Mat 10.1-4; Mar 3.13-19)
12Capa cuo ning ca Zingsuv ca thlaachuo riypata tluocung luo kie te Khazing'a luo kha zuokhydyi thlaa a chuo. 13Khy a dyi tiyta ziytuv tie kha ku yi te hlyihning kha a tlaw yi te lucuotuv ta pata ming a pi yi. 14Ama ming ca: Simon (Piter ama tapa paa) hne a nuta Andru, Jeim hne Johan, Filip hne Bartholomew, 15Matthai hne Thomas, Alfeas sacapaa Jeim hne Simon (Phang a cuokhyituv ta pata ama upa), 16Jeim sacapaa Judas, hne Zingsuv a lyituv Judas Iskariot ta ama cuo.
Pacuv Yi Te A Patluo Sa Yi
(Mat 4.23-25)
17Zingsuv ca lucuotuv tie hneta tluocung taa khata za cung yi te, a se lie amaa daa. Judea ruo bangkhuo, Jerusalem khy hne riyliy kie khypuv ta a cuopa Tair hne Sidon khy taata cawsaa hluvpuv zaw ca capa lie ca ama aw. 18Iema ca a bie naathlie riypa hne ama pasana taata patluo sa riypata a vawpa cuo yi te, thlaapa pyalyipa ta a tuepa tie zaw kha ama tluo. 19Cawsaazaapuv yalya ta ama kha hrie khu amaa zue; tahematapakieca a chungtaata cahrana pya te a patluo sa diy nakaw yi ta a cuo.
Thluechiyna Hne Bawchiena
(Mat 5.1-12)
20Zingsuv ta ziytuv tie kha mang yi te,
“A siypasapa tie ca thluechiypa tana nama cuo,
tahematapakieca Khazing pena ca niema huopa tana a cuo.
21Ata lieta a nang a diypa tie ca thluechiypa tana nama cuo,
tahematapakieca nama riy pabi pata nama cuo aa.
Ata lieta a caapa tie ca thluechiypa tana nama cuo,
tahematapakieca nama pahnyi aa.
22 #
1Pit 4.14
“Cawsaa Sacapaa kawlieta, cawsaa ta aca hue yi, aca thaw yi, biechie ta ca ta yi te nama thuo aca pachi kie yi ca thluechiypa tana nama cuo. 23#2Chr 36.16; Lct 7.52 Capa ning lie ca nama palung tluo pata a cathlu tie ung, vuoruo lie nama cuota lawmuo ca a le hringhruo; tahematapakieca khapa haa kha tana ama mingchingmingvuo tie ta profet tie kha ama za tue.
24“Cuorasala niema a hnyirungpa tie ca
bawchie ciemuopa tana nama cuo,
tahematapakieca hring anuona ca nama hmung tli.
25Ata lie a riy a bipa tie ca
bawchie ciemuopa tana nama cuo,
tahematapakieca nangdiy pata na nama aw aa.
Ata lie a pahnyipa tie ca
bawchie ciemuopa tana nama cuo,
tahematapakieca a ngiy a phie'a ung cate nama caa aa.
26“Cawsaa bangkhuo ta nama thuophaa aca ri ning yi ca bawchie ciemuopa tana nama cuo, tahematapakieca capa ca ama mingchingmingvuo tie ta profet pakhipa tie'a lie ama za tuepa tana a cuo.
Carie Tie Duena
(Mat 5.38-48; 7.12a)
27“Cuorasala i bie naa a thliepa niema ca ica chang yi, nama carie tie kha due ung la niema caa huepa tie cunglie kha hmang phapa tue tie ung; 28chie caa sapa tie kha thluechiy pi ung la caa tuechiepa tie cuota thlaachuo tie ung. 29Cawsaa pakhakha ta na be aca cabe kieca, kuokhaluo zaw kha chawpa tie; pakhakha ta na buohryicungle kha aca chuv kieca na buohryi zaw kha va pi chiy vie tie. 30Ahung a cuo zaw ta na chechiy caa hiepa kha va pi la, cawsaa pakhakha ta na huopa ama la kieca va hie pakhaa khah tie yi. 31#Mat 7.12 Na tuepa yi se ta pata na khingpa kha malie cunglie va tuepa tie yi.
32“Niema caa duepa tie dyi kha nama due kie ca khaapa athungna ma na hmung aa? A suepa tie ta hmuo iema a duepa tie kha ama due the ra. 33Na cunglie phana a tuepa tie cunglie kyalya kha phana na tue kieca khaapa athungna ma na hmung aa? A suepa tie hmuo cahaacata ama tue ra cuo va ma? 34I hmung pakhaa aa ta pata naa nguopuopa tie kyalya kha ducyi na pi kie yi ca khaapa athungna ma na hmung aa? A suepa tie ta hmuo du ama cyipa zaa hmung pakhaa riypata a suepa tie kha ducyi ama pi. 35Cuorasala nama cariepa kha due ung la, phana kha tue ung la hmung pakhaa riypa kha a nguopuo li pata ducyi pi tie ung. Lawmuo a hluvsa hmung'a ung cate Cungnungce saata tah nama cuo aa. Tahematapakieca ama ca palungtluo a the lipa tie hne cawsaa pha lipa tie cunglie zaw a pha. 36Nama Paa ca nangdue a thepa a cuopa haata malie kha va nangdue tie ung.
Malie Bie Kha Va Chipa Khah
(Mat 7.1-5)
37“Malie kha bie va ripa khah, caacuokieca nama zaw bie ripa pata cuo'a vaciy; malie kha sue va phaw khah, caacuokieca nama zaw suebe pata cuo'a vaciy; malie kha vaa ngiethe la a ngiethe pata na cuo ra aa. 38Malie kha va pi la pi pata na cuo ra aa. A bikaluv pata, a khepuo pata, a carypuo pata hne a lepathlana te ta, pi pata na cuo aa. Malie cunglie na hmuopa panangna khata na nama zaw panangpa pata na cuo ra aa.”
39 #
Mat 15.14
Ama ta pakhingpuona suokha a chang vie yi: “Mingcue pakha ta a hrangpa mingcue pakha kha luo a chiy khu'a ma? Ama pahning ta khue luo tla'a va yi ma? 40#Mat 10.24-25; Jhn 13.16; 15.20 Ziytuv ca pacuvtuv laata le vie vyi, cuorasala aa cuv riypa pachuo te a the diypa ca a pacuvtuv tluv a ta aa. 41Na ming chunglie thingtung kha hmuo rue li pata tuokhaatama na uvnu ming chunglie mingbuo kha na mang? 42Tuokhaatama nama ming chunglie thingtung hmuo hmung the li pata na uvnu kha, ‘Uvnu, na ming chunglie mingbuo kha ca lapa'a ang,’ na ta the? Nama phahruocuo, na ming chunglie thingtung kha la taa la muo na uvnu ming chunglie mingbuo kha a siesa pata hmung'a cate na la the'a ta.
Thingkung Hne A Thyi
(Mat 7.16-20; 12.33-35)
43“Thingkung phapa ca thyi chiepa pathyi vyi; thingkung chiepa ta thyi phapa pathyi ra vyi; 44#Mat 12.33 tahematapakieca thingkung mekaa ca a thyi ta pachang khu pata a cuo. Ahling kung taata thyikuv lu pata cuo buo vyi, acuolikie sahming kung taata mingsuv lu pata cuo buo vyi. 45#Mat 12.34 Cawsaa phapa ta a palung chunglie a awpa hmang phapa kha papya te, cawsaa chiepa ta a palung chunglie a awpa hmang chiepa kha a papya ra; tahematapakieca pakaa ca pathiypalung chunglie a bipa khana a ri.
Inghruobang Suohning
(Mat 7.24-27)
46“Khaapanakawma niema ta, ‘Abyipa, Abyipa na ta ung cate ica changpa yi ca tue li pata nama aw? 47Kama'a luo a vaw te, i bie kha naathlie te a ziypa ca khaapama a lu tapa kha ca pahmung'a yi ang. 48Ama ca alung cunglie aa thuvsa pata khue cu te a tung kha thla te ing a sapa haa tana a cuo. Cavaa tiy za le te capa ing ca a za phaw raalaa pata a cusa pata sapa#6.48 Kuvtie caataw chekha tie lie ca alung cunglie sapa a ta a cuo nakawta cahang khu vyi. 49Cuorasala i bie kha thyi te a ziy lipa ca a hruo kha a cusa pata thla li pata ing a sapa haa tana a cuo. Tiy za le te a za phaw tiyta capa ing ca sungkha ta a lie te a rapatlaa diy,” a ta.
ទើបបានជ្រើសរើសហើយ៖
LUKA 6: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.
