LUKA 24
24
Zingsuv Thupakhaana
(Mat 28.1-10; Mar 16.1-8; Jhn 20.1-10)
1Zaapuv ning mawdiy ta canung zaw ca ziyhmyi ama pachiepa kha a cyi yi te thluo luo ama vaa. 2Thluo khaakhuvlung a zaa hnyipa kha ama hmung, 3cuorasala a chung luo amaa ngie tiyta, Zingsuv riyy kha hmung va yi. 4Ama nang dyi a uo ning ta pang ruopa a buvpa cawsaa pahning kha sungkha ta amaa thaalie amaa vya daa. 5Canung tie ca ama ciysa nakawta alyi luo kha amaa bung, cuorasala cawsaa tie ca ta, “Khaapanakawma a hringpa kha a thiypa zaw hrawlie nama huv? 6#Mat 16.21; 17.22-23; 20.18-19; Mar 8.31; 9.31; 10.33-34; Luk 9.22; 18.31-33 Ama ca hingpa lie hing aw vyi, a thu pakhaa tli. Galilee lie a aw ningta khaapama aca chang yi tapa kha a thyi tie ung, 7Cawsaa Sacapaa ca a suepa tie kuv luo kha pi pata cuo'a te, vieluo cunglie ama thie aa, ning thungna lieta a thu pakhaa aa,” a tapa kha, a ta yi. 8Cakhutaata canung zaw ca a bie kha a kya thyi pakhaa yi te, 9thluo taa cata vya kaa yi te, capa bangkhuo ca ziytuv hlyikha hne a hrangpa tie kha ama chang. 10Capa kaw kha ziytuv tie a changpa tie ca Mary Magdalin, Joanna, Jeim nung Mary, hne iema'a lie a aw rapa canung hrangpa tie khata ama cuo. 11Cuorasala capa bie ca ziytuv tie ta bie laliy lipa ta rue yi te zang li pata ama aw. 12Cuorasala Piter ca a daa te thluo luo kha aa ruo; a bung te thluo chung luo kha a mang ca riyy catawnapa pawruo dyi a hmung; hmang a cuopa cunglie kha nang-uosana cangta ing luo a kaa.#24.12 Kuvtie caataw chekha tie lie ca tluo 12 hing aw vyi.
Emmaus Khy Luo Sina
(Mar 16.12-13)
13Capa ning ngiethie lie ca ta ziytuv pahning ca Jerusalem taata me sariy#24.13 Gk stadia sawcaruv kuvtie caataw chekha tie lie ca stadia zakha sawcaruv a ta hraw aa hlapa Emmaus ama tapa khy luo kha si yi te, 14hmang a cuopa kaw kha amaa ruele. 15Cahaacata bie amaa ruele nguoluo ning kha Zingsuv ta a vya ngie yi te iema hne khata a si rale, 16cuorasala ama hmung raalaa pata pachang va yi. 17Zingsuv ta iema kha, “Khaapa kaw ma nama cakuopuo pata namaa ruele?” a ta yi. Iema ca ngiechina hmiephya hneta a maa daa. 18Cakhutaata iema chungtaata pakha, Kleopas ama tapa paa khata, “Jerusalem lie khyche na cuopa ta ata zaw chunglieta capa lie a chiy a cuopa hmang a pachang lipa ca nama dyi hingna a cuo thlu'a ciy?” a ta. 19Ama ta, “Khaapa hmang ma?” ta pata a hiehriy. Iema ta, “Khazing hmielie hne cawsaa bangkhuo hmielie a ripa hne a tuepa hmang bangkhuo lie cahrana a hnyi ama tapa profet Nazareth Zingsuv cunglie a tlungpa hmang, ama ta. 20Ma tluobyi lepa tie hne uvthyi tie ta thie riypata pi yi te vieluo cunglie ama thie. 21Cuorasala kiema ta ca Israel ming malie a thlatuv riypa tana a cuo aa ta pata maa nguopuopa tana a cuo. Capa hmang a cuo khutaata ataning hing a ning thungnapa tana a cuo. 22Ca hlyitaw taata, kiema phuv chungtaata canung chekha ta kiema kha a ca-ang ta malie ama ca-ang sa. Ata maw mawdiy ta thluo luo vaa yi te, 23a riyy kha ama hmung li tiyta vya kaa yi te, avuoming kha muocuo ta hmung yi pate, iema ca ta, ama ca a hring, malie ama ta,’ ta pata malie ama chang. 24Kiema phuv taata chekha ca thluo luo kha vaa yi te canung tie ama ripa dala haa khata ama va hmung; cuorasala ama ca hmung va yi,” ama ta. 25Cakhutaata Zingsuv ta, “Nama ngaa hringhruo ing, profet tie ta ama ri ciepa zang hing namaa paruvsa hringhruo de! 26Messiah#24.26 Khrih ca hingpa bangkhuo hing a rungnaana luo aa ngie hluota a ang siy diy aa hu cuo va ma?” a ta. 27Cakhutaata Moses taata pathu pata profet tie bangkhuo ta Caapathe chunglieta ama kaw ama capepa bangkhuo kha a changpasie yi.
28Ama chiyna riypa khy ama pha tyalya caw ta Zingsuv ca a caluole riypa haa khata aa pa-aw sa. 29Cuorasala khuosa ta thlu yi te, “Kiema'a lie hing a ri ra thluo tie, zuoluo cuo tli te a zing zaw a zing'a nang tli,” ama ta. Caacuonakawta iema'a lie tlung ra riypata a paziy yi. 30Sa dung pakhaw riypata iema'a lie kha a tu te, viechuo kha la te, thlaa a chuo khutaata chechi te a pi yi. 31Cakhutaa cata ama ming kha kya vuo te ama a cuopa kha ama pachang, cuorasala ama ming hmungna lieta a vie. 32Pakha hne pakha kha, “Luopuv lie bie malie aa ruepa hne Caapathe siyluo malie a chang ning kha ma chunglie myi kuo ta malie kuo tlarya va ma kha?” a maa ta. 33Sungkha ta thu yi te Jerusalem luo kha ama kaa pakhaa ca ziytuv hlyikha hne ama viesaa tie zaw amaa zaa pungpa kha ama va hmung. 34“Abyipa ca a thu pakhaa hmisi, Simon'a liena aa luo!” ta pata ama za ri nguoluo. 35Cakhutaata iema ta luopuv lie hmang a cuopa kaw hne Abyipa ta viechuo chechi te aa pachangsanapa yi kaw kha ama chang.
Ziytuv Tie'a Lie Zingsuv Aa Luo
(Mat 28.16-20; Mar 16.14-18; Jhn 20.19-23; Lct 1.6-8)
36Capa kaw ca ama ri nguoluo pata iema hrawlie kha Zingsuv ca a vya daa te, “Niema'a lie thlaalungna aw mang sue,” #24.36 Kuvtie caataw chekha tie lie ca niema'a lie thlaalungna aw mang sue, a ta yi, tapa hing aw vyi. a ta yi. 37Athlaa na ma hmung ta pata rue yi te ama thlaa zang te amaa pahlusa. 38Cuorasala iema kha, “Khaapanakawma ciy ung cate nama palung a luolue? 39I kuv hne i phyi hing mang tie ung; kama ta i cuo thluopa hing. Na hrie ung la na mang tie ung; a thlaa ca kama haa hingta ruv hne saa a hnyi tlung li,” a ta yi. 40Cahaacata ri te a kuv hne a phyi zaw ca a pahmung yi.#24.40 Kuvtie caataw chekha tie lie ca tluo 40 hing aw vyi. 41Ama palung a tluosa thluo pata zang khu tange lipa yi ta ama kharue a haasa ngiethie nakawta, iema kyihuo khata, “Ning riypa suokha chuo nama hnyi ma?” a ta yi. 42Iema ta ngaa e ciepa pi yi te, 43ama hmiekunglie kha la te a ning.
44Cakhutaata iema kha, “Niema'a lie i aw ningta i za ripa bie kha hingpa hingta tli hing a cuo, Moses phungbie chung, profet tie capepa chunglie hne Salm chunglieta kama kaw ama za capepa bangkhuo ca a tling diy riypa tana a cuo,” a ta. 45Ama palung kha pavuo sa yi te Caapathe ta a ripa kha ama kya pachang the. 46Iema kha, “Ama capepa ca hingpa hing tana a cuo, Messiah ca ruvnaana kha ang'a te ning thungna lie a thu pakhaa aa, 47cakhutaata ama ming ta sue a ngiepachiyna hne sue angiethena kaw kha Jerusalem taata pathu pata mingphang bangkhuo kha chang pata ama cuo aa. 48Niema ca hingpa hmang bangkhuo a pachangkhyituv tana nama cuo. 49#Lct 1.4 Cakhutaata i Paa ta bie a kuo ciepa kha nama cung luo i za pathlie aa; caacuonakawta cungluo taata cahrana nama cung luo a za tlung hluo li khypuv chunglie hing aw tie ung,” a ta yi.
Zingsuv Vuoruo Luo Kiena
(Mar 16.19-20; Lct 1.9-11)
50 #
Lct 1.9-11
Cakhutaata Bethani khy te kha sikhyi yi te, a kuv kha pazu te thluechiy a pi yi. 51Thluechiy a pi nguoluopa yi ta, iema'a taata a che te vuoruo luo calang pata a cuo.#24.51 Kuvtie caataw chekha tie lie ca vuoruo luo calang pata a cuo tapa hing aw vyi. 52Ama kha abie yi te palung tluosa pata Jerusalem luo ama kaa. 53Biena-ing chunglie kha aa pazue pata aw yi te Khazing ama pathuosa.
ទើបបានជ្រើសរើសហើយ៖
LUKA 24: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.
