LUKA 14
14
Zingsuv Ta A Pasapa A Patluo Sa
1Luo kha ca Sabbath ning ta Zingsuv ca Farasi tie uvthyi pakha ing luo kha sa ning riypata vaa te, capa lie ca aa ngieta tah ama mangpathliy. 2A kuv hne a phyi a thlingpa cawsaa pakha ca Zingsuv hmielie kha a aw. 3Zingsuv ta phungbie saya tie hne Farasi tie kha, “Phungbie ta Sabbath ning ta a pasapa patluo sa riypa a pa-aw ma pa-aw va ma?” ta pata a hiehriy yi. 4Cuorasala iema ta khaapahmuo ri va yi. Caacuonakawta Zingsuv ta cawsaapa ca ku te, patluo sa te, a cakuo sa. 5#Mat 12.11 Cakhutaata iema kha, “Niema hrawlieta pakhakha hing a saata ma acuolikie a cue ma Sabbath ning ta takhue chung luo tla sala Sabbath ning a cuo nakawta thue paluo li pata nama aw'a ma?” a ta yi. 6Hingpa kawlie hingta khaapahmuo palie khu va yi.
Rawcanawna Hne Khyche Mangsangna
7Zingsuv ca khyche zaw ta a tuna hmang pha cepa amaa tlawpa kha a hmung tiyta, hing pakhingpuona hing a chang yi. 8#Ptb 25.6-7 “Pakhakha ta napuv chiynapa pyi luo aca ku tiy yi ta a tuna pha cepa lie kha a tu khah ung. Nama laata cawsaa le viepa zaw kha ku ra biephung yi sala, 9caa kutuvpa paa yi ta nama kha, ‘Ama hing tlyi thi tie,’ aca vya ta kieca nangzaahmiechi pata aa ne cepa luo naa tuna a hu aa. 10Cuorasala sa ning aca ku tiy yi ta, aa ne cepa lie kha vaa tu la caa kutuvpa paa kha a vaw'a te, ‘Liechung, kya kie la a tuna aa suo viepa lie hing a kya tu tie,’ aca ta aa. Ca tiyta nama hne cabya lie a tuhnepa kupa cawsaazaapuv hmielie kha hmiephaa na cu aa. 11#Mat 23.12; Luk 18.14 Tahematapakieca iema hne iema a cyicalangpa bangkhuo ca pachung pata cuo'a yi te, iema hne iema a panepa bangkhuo ca cyicalang pata ama cuo aa,” a ta.
12Cakhutaata Zingsuv ta sa ning a kutuvpa paa kha, “Ningchung sa ning cuose zuoluo sa ning cuose na ku tiy yi ta, na viesaa, na uvnu, na tieriy hne a hnyirungpa na ingpaa kha ku khah yi; tahematapakieca iema ca nama kha ca ku hriy'a yi te, cahaacata na tuepa kha thung pata na cuo aa. 13Cuorasala pyi na tue tiyta, a siypasapa, kuvsaw phyisawpa, hne mingcuepa tie kha ku tie yi. 14Iema ta aca ku hriy khu li nakaw'a yi ta thluechiy na hmung aa, tahematapakieca aa dangpa tie thiyna taata ama thu pakhaa ning kha thung pata na cuo aa,” a ta.
Saduona Pyi Lepa Pakhingpuona
(Mat 22.1-10)
15Zuo sa ning ama ku rapa pakha ta capa bie ca vya thyi te, Zingsuv kha, “Khazing pena chung saduona pyi lie a tu ra riypa tie ca thluechiypa tana ama cuo!” a ta. 16Zingsuv ta ama kha, “Cawsaa pakha ta saduona pyi lepuv tue te cawsaa a hluvsa a ku yi. 17Saduona cuo aa de tiyta, a sii zaw kha a kupa tie'a luo pathlie yi te, ‘A vaw paa tie ung; zezaw bangkhuo pachie ciepa tana a cuo tli,’ a pata sa yi. 18Cuorasala ama bangkhuo ta ama cuo the linapa kha ama ri kaluo diy. A pakhanapa paa ta ama kha, ‘Luruo suokha calyi angte i va mang na a hu, naa ngiethe thi tie,’ a ta. 19A hrangpa pakha ta, ‘Cuetungpa tue pangaa calyi angte ata hing a chie a pha mangna ta re pahrie sa pachiy naase ang i ta ning cuo te naa ngiethe thi tie,’ a ta. 20A hrangpa pakha ta, ‘Napuv i chiy khupa tahne ta cuo te a vaw hmuo'a va ang,’ a ta. 21Caacuonakawta a changtaapa ca a byipaapa'a luo kha kaa te capa kaw ca a chang. A byipaapa ca a hi haasa te a changtaapa kyihuo khata, ‘Khychung luopuv lepa hne luopuv cawta zaw luo kha a catli pata vaa la a siypasapa, kuvsaw phyisawpa, hne mingcuepa tie kha a vya chiy tie yi,’ a ta. 22A changtaapa ca ta, ‘Abyipa, na ripa haa khata i tue diy tli, cuorasala a khuo ca a tlaw kalie,’ a ta. 23Cakhutaata a byipaapa ta a changtaapa kha, ‘Luopuv lepa hne luopuv cawta zaw luo kha vaa la, i ing a bi hluo li cawsaa kha a vya chiy tie yi. 24Ica chang, i za ku ciepa tie ahunghmuo i zuosa duopa hing a pacuo'a va yi,’” a ta.
Ziytuv Cuona Muo
(Mat 10.37-38)
25Cawsaazaapuv ta ama ziyle nguoluo pata Zingsuv ca a pali te iema kha, 26#Mat 10.37 “Ahunghmuo cuose kama'a luo a vawpa ca a nung hne a paa, a napuv hne a saata zaw, a uvnu hne a sieta zaw kha hue te, ama hne ama a hringna zaw kha aa hue li kieca naa ziytuv cuo khu'a vyi. 27#Mat 10.38; 16.24; Mar 8.34; Luk 9.23 Ahunghmuo cuose vieluotung kha a puv pata kama hnang naa ziy lipa ca kama naa ziytuv cuo khu'a va yi. 28Niema chung taa pakha ta ingsuo suokha sa aa ting kieca i palangna te i tuokaa ta aa de'a ma a de'a va ma tapa pachang riypata a tu pata a chuo riypa kha tue taa li pata a aw'a ma? 29Cahaacata a tue taa li kieca inghruo kha a bang khutaata palang li pata aw'a te, a hmungpa bangkhuo ta ama pahnyisue aa. 30‘Hingpa paa hing ing sa ca pathu raalaa te a palang khu va hing haw,’ a ma ta aa, a ta. 31Siepahruo pakhakha ta a hrangpa siepahruo pakha kha rie aa du'a nang kieca, ama a du riypata rieka thawkiy hne a vya sipa siepahruo kha rieka thawhraa ta i du khu'a ma, a du khu'a va ang ma tapa kha a tu pata rue taa li pata a aw'a ma? 32A du khu li riypata a cuo kieca, siepahruo hrangpa luohlaa lie a aw kalie ning kha, arena tue riypata luosituv kha a pathlie riypata a cuo. 33Cahaacata, niema zaw hing nama hnyipa bangkhuo nama thuse li kieca pakha hmuo naa ziytuv cuo khu'a va ung ciy.
Paciy Kaw
(Mat 5.13; Mar 9.50)
34“Paciy ca a pha, cuorasala a iena kha a vie kieca tuokhaatama pa-ie sa pakhaa khu pata a cuo aa? 35Alyi cuota thlahnena hnyi vyi, aphuvlyi ta zaw hmuo thepa cuo'a vyi; thaw riypa dyi tana a cuo tli. Thyina naa a hnyipa ta thyi tie ung!” a ta yi.
ទើបបានជ្រើសរើសហើយ៖
LUKA 14: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.
