JOHAN 7
7
Zingsuv Uvnu Zaw Zang Lina Kaw
1Cakhutaata Zingsuv ca Galilee pe chung kha a tlaw. Judah ming ta ama kha ama thie khing nakawta Judea pe luo ca tlaw khing vyi. 2#Tbr 23.34; Pbp 16.13 Judah ming Thluodaa pyi kha aa ngie tli. 3Caacuonakawta a nuta zaw ta Zingsuv ca, “Na hmang tuepa hing caa ziytuv tie ta ama hmung riypata hingpa taa hingta pya la Judea pe luo si tie. 4Cawsaa ta na pachang yi se tapa a khingpa ta ca hmang kha a paruvta tah tue va yi. Hingpa hmang hing na tue kieca chuelyi hing a pahmung sa thluo tie,” ama ta. 5(A uvnu zaw tahmuo ama kha zang va yi.) 6Zingsuv ta, “I cuo tling valie, cuorasala hingpa lie hing ca niema cuota a cuo pari thluo. 7Niema ca chuelyi hingta ca hue khu va yi, cuorasala kama ca ina hue, tahematapakieca a hmang tuepa a pha li nakaw kha i ri pari nakawta a cuo. 8Niema kha pyi luo ca cakuo tie ung. Kama ca cakuo'a va ang, i cuo tling valie,” a ta yi. 9Hingpa hing ri te Galilee lie kha a aw thluo.
Thluodaa Pyi Luo Zingsuv A Cakuo
10A nuta zaw pyi luo ama cakuo khutaata Zingsuv zaw a cakuo ra; cadyiseca a luohuo ta cuo li pata a paruvta tah a cakuo ra pata a cuo. 11Pyi chunglie ca Judah ming ta huv yi te, “Khaapaliema a aw?” ta pata ama hiehriy. 12Cawsaazaapuv ta a kaw kha ri yi te amaa cie. Chekha ta, “Ama ca cawsaa phapa tana a cuo,” ta yi te, chekha ta, “Cuo vyi, cawsaazaapuv a dungviepa tana a cuo,” ama ta. 13Cuorasala Judah ming kha ama ciy nakawta ahungtahmuo a luohuo ta a kaw ri va yi.
14Capa pyi khingkhuo hraw taa khata Zingsuv ca Biena-ing chung luo kha va kie te pacuv hruo aa thu. 15Judah ming ca ama kharue haasa te, “Caa hmuo a cuv buo li pata tuokhaatama hing tluv nanaa hingta a the khu,” ama ta. 16Zingsuv ta iema kha palie yi te, “Ica pacuvpa yi hing kama'a taata cuo vyi, naa pathlietuv'a taa tana a cuo. 17Khazing khingna tue a khingpa mekaa ta ca i pacuvna hing Khazing'a taata ma a cuo kama khingna ta i pacuvpa ta ma a cuo tapa kha ama pachang aa. 18Ama khingna haata dyi bie a ripa ca ama rungnaana dyi a huvpa ta a cuo; cuorasala ama a pathlietuv huota rungnaana a huvpa ca aa dangpa ta cuo te a chunglie hanghiena aw vyi.
19“Moses ta phungbie ca pi va yi ma? Cuorasala ahungtahmuo ziy va ung ciy. Khaapanakawma ina thie khing ung ciy?” a ta yi. 20Cawsaazaapuv khata, “Khuevuo na na hnyi! Ahungma thie acaa nang?” ama ta. 21Zingsuv ta, “Hmang suokha tue angte nama bangkhuo ta nama kharue a haa. 22#Tbr 12.3; Sah 17.10 Moses ta vangdaw te riypata bie ca pi yi te (a pathutuv ca Moses cuo li pata mingpa tie zaw kha tana ama cuo) sabbath ning ta cawsaa kha vangdaw nama te. 23#Jhn 5.9 Moses phungbie para li riypata cawsaa pakha kha Sabbath ning ta vangdaw nama te kieca, khaapanakawma Sabbath ning ta cawsaa pangpa yalya kha i patluo sa tiyta i cunglie nama hi a haa? 24A cungphang cuona dyi mang pata bie chi khah ung, biedangpa kha mang ung la bie chi tie ung,” a ta yi.
Khrih Ta A Cuo Ma?
25Jerusalem khy ming chekha ta, “Thie amaa nangpa paa ca ama hing cuo va ma? 26A luohuo ta hingpa lie hing bie ri te khaapahmuo ta hyi tlung va yi. Messiah#7.26 Khrih tana a cuo tapa kha uvtuv tie ta ama pachang tli nakawta a cuo'a ma? 27Hingpa paa hing khaapa taata ma aa vaw tapa kha ma pachang; cuorasala Messiah aa vaw thueta ca ahungtahmuo khaapa taata ma aa vaw tapa kha pachang'a va yi,” ama ta. 28Zingsuv ta biena-ing chunglie a pacuv nguoluona lie kha khuopuv ta khi te, “Niema ta kama kha na pachang ung cate khaapa taata ma i vaw tapa zaw kha nama pachang. Kama ri ta a vaw va ang. Cuorasala naa pathlietuv hing a hmisipa ta cuo te niema ta pachang va ung ciy, 29Kama ta ca i pachang, tahematapakieca ama ta na pathlie te ama'a taata a vawpa ta i cuo,” a ta yi. 30Cakhutaata iema ta patuv amaa nang, cuorasala ahungtahmuo patuv va yi, tahematapakieca a cuo kha tling valie. 31Cawsaazaapuv chungtaata a hluvpuv ta zang yi te, “Messiah aa vaw thueta hingpa paa a tuepa laa hingta kharuehaa hmang a hluv vie a tue'a ma?” ama ta.
Zingsuv Patuv Riypata Cawsaa Ama Pathlie
32Cawsaazaapuv ta cahaacata a paruvta tah a kaw ama ripa kha Farasi tie ta ama thyi tiyta, tluobyi lepa tie hne Farasi tie ca ta Zingsuv patuv riypata biena-ing a huopa paliy tie kha ama pathlie. 33Zingsuv ta, “Niema'a lie cuo pachangta chung aw'a angte naa pathlietuv'a luo i si aa. 34Ina huv'a ung ciy, cuorasala na hmung'a va ung ciy, i awna luo zaw a vaw khu'a va ung ciy,” a ta. 35Judah ming ca pakha hne pakha kha, “Ima hmung khu li riypata khaapa luo ma vaa aa ting? Aa chepatlaapa Grik ming'a luo si pata va pacuv a ting kanaa? 36Na huv'a ung cate na hmung'a va ung ciy, ‘I awna luo zaw a vaw khu'a va ung ciy,’ a tapa ta a ri khingpa hing khaapatama a cuo aa?” amaa ta.
Hringna Cavaa
37 #
Tbr 23.36
Pyi chuo ningpa hne a biepuv cepa ning lieta kha Zingsuv ca a daa te, khuopuv ta khi te, “A tiy a hriepa mekaa ta kama'a luo a vaw ung la, 38#Ezk 47.1; Zek 14.8 kama naa zangpa mekaa ta vya dang yi se. Caapathe ta a ripa haata, ‘A zangtuv tie palung chungtaata hringna cavaa tiy kha a lang aa,’” a ta. 39Zingsuv ta hing haa hingta a ri tiyta, ama a zangtuv zaw ta ama hmung riypa Thlaapa kaw kha a ripa ta a cuo. Capa cuo ning ca Thlaapa kha pi pata cuo valie yi, tahematapakieca Zingsuv kha rungnaana pi pata cuo valie.
Cawsaa Amaa Che
40A ripa kha ama thyi tiyta cawsaazaapuv chung taa chekha ta, “Hingpa paa hing Profet ta a cuo hrahring,” ama ta. 41Chekha ta, “Messiah tana a cuo,” ama ta. Cuorasala chekha ta, “Messiah ca Galilee taata a puv riypata a cuo lipa puv. 42#2Sam 7.12; Mik 5.2 Caapathe ta Messiah ca David ciypathla cuo'a te David awna khy Bethlehem taa tana a cuo aa, a tapa kha,” ama ta. 43Caacuonakawta cawsaazaapuv ca Zingsuv kawlie amaa che. 44Chekha ta ama patuv khing, cuorasala ahungtahmuo patuv hmisi va yi.
Judah Uvthyi Tie Zang Lina
45Biena-ing paliy tie kha tluobyi lepa tie hne Farasi tie'a luo ama kaa tiyta, “Khaapanakawma nama patuv va?” ama ta. 46Paliy tie ta, “Ahungtahmuo hing haa hingta bie ri buo va yi,” ama ta. 47Farasi tie ta, “Niema te na aca dung ra tli yi ing! 48Ma uvthyi tie hne Farasi tie pakha chuo ta ama zangpa nama pachang ma? 49Cuorasala hingpa cawsaazaapuv, Moses phungbie a pachang lipa tie hing ca Khazing chiesapa tana ama cuo,” ama ta. 50#Jhn 3.1-2 Iema hrawlie pakha ta cuo te, a hluota Zingsuv'a luo a vawbuopa paa, Nikodemu ama tapa paa ta iema kha, 51“Ma phungbie ta ca, ahunghmuota a tuepa pachang riypata a bie naathlie taa li pata ca biechipana tue vyi cuo va ma?” a ta yi. 52Iema ta, “Nama zaw Galilee taata cuo ra kanaa ciy? Caapathe kha va ri la, Galilee taata profet pakha hmuo pya buo vyi tapa kha na hmung aa,” ama ta.
Nungvaathingsuena A Tue Ningta Ama Patuvpa Cawsaanung
[53Cakhutaata iema pakha cyicuo ca ing luo kha amaa diy.
ទើបបានជ្រើសរើសហើយ៖
JOHAN 7: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.
