JOHAN 20
20
Zingsuv Thupakhaana
(Mat 28.1-8; Mar 16.1-8; Luk 24.1-12)
1Zaa kha chunglie a ning khanapa ning mawdiy a zing kalie pata Mary Magdalin ca thluo luo kha vaa te thluokhaakhuv aa hnyipa kha a hmung. 2Caacuonakawta Piter hne, Zingsuv ta a duepa ziytuv hrangpa'a luo kha a ruo te, “Abyipa kha thluo chungtaata la yi te khaapaliema ama chi tapa kha pachang vapuv,” a ta. 3Piter hne a ziytuv hrangpa paa ca thu yi te thluo luo kha ama vaa. 4Ama pahning ta a ruole yi te a ziytuv hrangpa ta Piter kha law te thluo luo kha a chiy taa. 5A bung te a mang ca riyy catawnapa pawruo kha a hmung, cuorasala thluo chung luo kha a ngie vyi. 6Simon Piter ca a hnang ta vya pha te thluo chung luo kha aa ngie ca, a riyy catawnapa pawruo hne 7Zingsuv luv ama pahlawnapa pawruo a nanangta tah a za awpa kha a hmung. 8Cakhutaata a vya pha taapa ziytuv hrangpa zaw kha thluo chung luo ca a ngie te hmung te a zang. 9Thiyna taata a thu pakhaa aa ta pata Caapathe ta a ripa kha a ri khingnapa pachang khu valie yi. 10Cakhutaata ziytuv tie ca ing luo kha ama kaa.
Mary Magdalin'a Lie Zingsuv Aa Luo
(Mat 28.9-10; Mar 16.9-11)
11Mary ca thluo le lie kha a daa te a caa. A caapuo pata thluo chung luo kha a bung te a za mang ca 12caw ruopa a tuepa avuoming pahning kha Zingsuv riyy ama chinapa a luvluo kuo ta pakha, a phyichaaluo kuo ta pakha amaa tupa kha a hmung. 13Iema ca ta, “Cawsaanung, “Khaapanakawma na caa?” ama ta. Ama ta, “I byipaapa kha la yi te khaapaliema ama chi tapa pachang va ang,” a ta. 14Capa bie a ri diy pahne ta a hnangluo aa pali ca capa lieta Zingsuv aa daapa kha a hmung, cuorasala Zingsuv a cuopa kha pachang vyi. 15Zingsuv ta, “Cawsaanung, khaapanakawma na caa? Ahungma na huv?” a ta. Diedung a huopa paa ta ri te, “Abyipa, nama ta na la pata a cuo kieca na chinapa kha na chang la, vaa'a angte i va la aa,” a ta. 16Zingsuv ta, “Mary!” a ta ca a palihnue te Hebru ryi ta “Rabbouni,” a ta. (A siyluo ca saya tana ta a cuo). 17Zingsuv ta, “Na patuv khah, tahematapakieca Paa luo kha kie valie ang. Cuorasala i uvnu zaw'a luo kha vaa la, ‘I Paa hne nama Paa, i Khazing hne nama Khazing a cuopa'a luo khana i kie aa,’ a ta tapa kha va chang tie yi,” a ta. 18Mary Magdalin ca ziytuv tie'a luo kha cakuo te, “Abyipa na i hmung,” ta pata a pathyi sa yi. Cakhutaata Abyipa ta ama'a lie a changpa bie zaw kha a chang yi.
Zingsuv Ziytuv Tie'a Lie Aa Luo
(Mat 28.16-20; Mar 16.14-18; Luk 24.36-49)
19Zaa kha chunglie a ning khanapa zuoluo ta ziytuv tie ca Judah ming ama ciy nakawta ingchiy khaa yi te amaa pungnapa lie kha Zingsuv ca a vaw te iema hrawlie kha a daa te, “Nama cunglie thlaalungna aw mang sue,” a ta yi. 20Cahaacata a ri khutaata a kuv hne a vuo kha a pahmung yi. Ziytuv tie ca Abyipa kha ama hmung nakawta ama palung a tluosa. 21Zingsuv ta iema kha, “Nama cunglie thlaalungna aw mang sue a ta pakhaa yi. Paa ta ina pathliepa haata kama zaw ta ica pathlie ra yi,” a ta yi. 22Capa bie ca a ri khutaata, a huv ta hmung yi te, “Thlaapa Pathe kha hmung tie ung. 23#Mat 16.19; 18.18 Cawsaa suena kha namaa ngiethe kieca a ngiethe pata ama cuo aa; namaa ngiethe li kieca a ngiethe li pata ama cuo aa,” a ta yi.
Zingsuv Hne Thomas
24Ziytuv tie hlyihning hrawlie pakha a cuopa Thomas (Mingphie#20.24 Gk Didymus ama tapa) ca Zingsuv aa luo ning kha aw ra vyi. 25Caacuonakawta ziytuv hrangpa tie ta, “Abyipa na ma hmung,” ta pata ama chang. Cuorasala ama ta, “A kuv lie thaakhe ta ama khepuonapa a hmaa i hmung lipa'a nata i kuvdaw ta capa a hmaa hne a vuo kha i hrie hluo li ca zang'a va ang,” a ta yi.
26Zaa kha khutaata ziytuv tie ca ing chunglie kha aw pakhaa yi te, Thomas zaw a aw ra. Ingchiy kha ama khaa diy raalaa pata, Zingsuv ca zaa ngie te, iema hrawlie kha a daa te, “Nama cunglie thlaalungna aw mang sue,” a ta yi. 27Cakhutaata Thomas kyihuo khata, “I kuv hing vya mang la na kuvdaw ta vya hrie tie. Na kuv kha pazuo la i vuo hing hrie tie. Zang li pata aw khah tie, zang tie,” a ta. 28Thomas ta, “I Byipaapa hne i Khazing!” a ta. 29Zingsuv ta, “Ina hmung nakaw ca ta ma ina zang ciy? Kama kha hmung li pata naa zangpa tie ca thluechiypa tana ama cuo,” a ta.
Hingpa Caa-uv A Capetuv Tingna
30Hingpa caa-uv chunglie cape lipa Zingsuv ta ziytuv tie hmiekunglie a tuepa kharuehaa hmang a hluvsa a aw kalie. 31Cuorasala hing zaa hing capepa cuo te cape hnuochuopa ca, Zingsuv ca Messiah,#20.31 Khrih Khazing Sacapaa a cuopa kha zang ung cate capa zangna thue cata hringna nama hmungna riypa tana a cuo.
ទើបបានជ្រើសរើសហើយ៖
JOHAN 20: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.
