JOHAN 13
13
Zingsuv Ta Ziytuv Tie Phyi A Pasiy
1Lawsena Pyi hluota, Zingsuv ca hingpa chuelyi hing sise pata a Paa'a luo si riypa cuo a vya chiy tli tapa kha a pachang. Chuelyi lieta a awpa ama huopa a cuopa tie kha due pari yi te a chuona te ta a due yi. 2Zingsuv kha lyi riypata khachie ta Simon Iskariot sacapaa Judas palung chunglie kha ruena a chi mangtli. Zuosa ama ning nguoluopa khata, 3Zingsuv ca i Paa ta hmangting bangkhuo kha i kuv cung luo ina pi diy tli tapa hne, Khazing'a taata a vaw angte Khazing'a luo na i kaa pakhaa aa tapa kha a pachang nakawta, 4cabya taa khata thu te a buohryi pasiypa kha a thlie khutaata pavya ta a se kha aa ri. 5Cakhutaata zalungpakaa lie kha tiy patle te ziytuv tie phyi kha pasiy te a se lie aa ripa pavya khata a hruv yi. 6Simon Piter luo a vya chiy tiyta ama ta, “Abyipa, nama ma i phyi naa pasiy'a ciy? a ta. 7Zingsuv ta, “Khaapama i tue tapa kha ata hing ca pachang vaciy, cuorasala a hnang taata ca na pachang aa,” a ta. 8Piter ta, “I phyi ca na pasiy buo hluo'a vaciy,” a ta. Zingsuv ta, “Na phyi ica pasiy li kieca kama'a lie aw ra the'a va tli ciy,” a ta. 9Simon Piter ta, “Abyipa, i phyi dyi cuo li pata i kuv hne i luv zaw hing na pasiy puo tie,” a ta. 10Zingsuv ta, “Tiy a siy tlipa ca a pathe diy tli nakawta a phyi ta li pata#13.10 Kuvtie caataw chekha tie lie ca a phyi ta li pata tapa hing aw vyi a hrang luo pasiy a hu vyi. Nama palang ta nama pathe, pakha ta li pata ca,” a ta yi. 11Ama ta ca ahungma naa lyi aa tapa kha a pachang nakawta, “Nama palang ta ca pathe va ung ciy,” a ta pata a cuo.
12 #
Luk 22.27
Ama phyi a pasiy khutaa yi ta, a buohryi pasiypa kha a hryi te cabya luo kha vaa tu pakhaa te, “Niema'a lie i tuepa hmang hing a siyluo nama pachang ma? 13Niema ta, Saya hne Abyipa ina tapa ungca hing namaa hmuo, tahematapakieca ina tapa haa ung cata i cuo sasaw. 14Nama Byipaapa hne Saya ta a cuopa kama ta nama phyi kha ica pasiy kie yi ca niema zaw pakha hne pakha kha nama phyi namaa pasiy riypata a cuo. 15Niema cuota a mangpuo riypa ica tuepa tli yi, niema cuota i tuepa haa khata niema zaw nama tue riypata a cuo. 16#Mat 10.24; Luk 6.40; Jhn 15.20 Biehmisi tana ica chang yi, changtaapa#13.16 Gk sii tie ca ama byipaapa laata le vie va yi, biephyatuv tie zaw a pathlietuv laata le vie va yi. 17Hingpa hmang hing pachang ung cate nama tue kieca thluechiypa tana nama cuo. 18#Slm 41.9 Hingpa i ripa hing nama palang ta ica ta khingpa yi ta cuo vyi; i tlawpa ca i pachang thluo yi. Cuorasala Caapathe ta, ‘I sa a ningpa paa na hekhuo naa khuo, a tapa ca a tling aa hu,’ a ta. 19Hmang hing a vya cuo sasaw tiyta kama hing ama ca tana i cuo tapa kha nama zang khu the riypata a cuo hluota ica chang pacie yi. 20#Mat 10.40; Mar 9.37; Luk 9.48; 10.16 Biehmisi tana ica chang yi, kama ta i pathliepa a cuhluopa ca kama naa cuhluopa ta cuo te, kama kha naa cuhluopa ca naa pathlietuv a cuhluopa tana a cuo,” a ta.
Zingsuv Ta Ama Lyi Riypa A Rilu
(Mat 26.20-25; Mar 14.17-21; Luk 22.21-23)
21Capa bie a ri khutaata Zingsuv ca a palung rie thyisa te, “Biehmisi tana ica chang yi, niema chung taa pakha ta ina lyi'a ung ciy,” ta pata a ri pathla. 22Ziytuv tie ca pakha hne pakha kha a mang yi te, ahung hing ma malie a ta khing a ta yi te nang-uosa pata ama aw. 23Ziytuv tie chungtaata pakha ta a cuopa, Zingsuv ta a duepa paa kha Zingsuv a vaa pha pata aa tu. 24Simon Piter ta a kuv a kyipa te, a ripa hing ahungma a ta khing hnuochuopa ta a cuo tapa kha a pahiehriy sa. 25Caacuonakawta Zingsuv kha a hnyi chiy vie te, “Abyipa, ahungma?” a ta. 26Zingsuv ta, “Viechuo hing tiyhuo pakaa luo naw'a angte i pipa paa hing tana a cuo aa,” a ta. Viechuo kha naw te Simon Iskariot sacapaa Judas kha a pi. 27Viechuo kha a cuhluo khutaata a chung luo kha Setaa aa ngie. Zingsuv ta, “Na tue riypa ca a catli pata tue tie,” a ta. 28Khaapanakawma cahaacata a ri tapa kha cabya cunglie a tupa ahungtahmuo pachang va yi. 29Ziytuv tie chekha ta ca, Judas ca tuokaa baw a patuvpa a cuo nakawta, Zingsuv ta, “Pyi lie hmuo riypa ma a calyi sa,” acuolikie, siypasa tie kha ma suokhakha a papi sa yi, ta pata ama rue. 30Judas ca viechuo a cuhluo khu pahne ta a pya paluo. Capa cuo ca zuo ta a cuo.
Nawbie Thaapa
31Judas a pya khu pahne ta Zingsuv ta, “Ata ca Cawsaa Sacapaa hing rungnaana pi pata a cuo tli; Khazing zaw kha Cawsaa Sacapaa thueta rungnaana a hmung tli. 32Khazing ca Sacapaa thueta rungnaana a hmung kieca, Khazing ama hrahring ta Cawsaa Sacapaa kha rungnaana a pi paluo aa. 33#Jhn 7.34 I saa zaw, kama ca niema'a lie a syi aw'a va tli ang. Ina huv'a ung ciy; cuorasala, ‘I sina luo ca vya si ra khu'a va ung ciy,’ ta pata Judah ming i chang pahaa yi khata niema zaw ica chang yi. 34#Jhn 15.12,17; 1Jhn 3.23; 2Jhn 5 Phungbie thaapa na ica pi yi, pakha hne pakha a due tie ung. Kama ta ica duepa haa yi hingta pakha hne pakha namaa due riypa tana a cuo. 35Pakha hne pakha namaa due kieca, khapa thue khata cawsaa bangkhuo ta kama naa ziytuv nama cuopa kha aca pachang'a yi,” a ta yi.
Piter Ta A Thaw Riypa Kha Zingsuv Ta A Rilu
(Mat 26.31-35; Mar 14.27-31; Luk 22.31-34)
36Simon Piter ta, “Abyipa, khaapa luo ma na vaa aa?” a ta. Zingsuv ta, “Ata hing ca i cakuona luo kha na ziy the'a valie ciy; cuorasala a hnang vie taata ina ziy'a ciy,” a ta. 37Piter ta, “Abyipa, khaapanakawma ata hingta ica ziy khu'a va? I hringna hmuo na cuota i pi'a muo” a ta. 38Zingsuv ta, “Kama cuota na hringna na pi'a ma? Biehmisi tana ica chang, aa a khang hluota yi thung ina thaw'a ciy,” a ta.
ទើបបានជ្រើសរើសហើយ៖
JOHAN 13: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.
