SAHRUOTHUNA 42
42
Josef Uvnu Zaw Izipt Luo Ama Tlaw
1Izipt ruo liena sa a aw tapa kha Jakob ta a thyi tiyta, a sacapaa zaw kyihuo khata, “Khaapanakawma pakha hne pakha ca namaa mang? 2#Lct 7.12 Izipt liena sa a aw tapa tana i thyi, thiy li pata ma hring the riypata zuv ung la ma cuota sa ca za calyi tie ung,” a ta yi. 3Caacuonakawta Josef uvnu pahraa tie ca Izipt luo kha sa calyi riypata ama sibung. 4Ruvnaana a taw'a kie a ta nakawta Jakob ta Josef nuta Benjamin ca a uvnu zaw'a lie kha pathlie vyi. 5Kanaan ruo lie cakuo a tlung nakawta Israel sacapaa zaw ca a hrangpa tie zaw hne khata sa calyi riypata ama si.
6Josef ca capa ruo uvtuv byi cuo te, ruo chung cawsaa bangkhuo kha sa a zaatuv yi ta a cuo. Josef uvnu zaw ca a vaw yi te a hmiekunglie kha amaa vya bung. 7Josef ta a uvnu zaw kha a hmung tiy yi ta a pachang paluo yi, cuorasala maliepa haa khata a pa-aw sa te bie a hruosa pata a chaw yi. Ama ta, “Khaapa taata ma namaa vaw?” a ta yi. Iema ta, “Sa calyi riypa tana Kanaan taata imaa zuv,” ama ta. 8Josef ta a uvnu zaw kha a pachang raalaa pa yi ta iema ta pachang va yi. 9#Sah 37.5-10 Josef ta iema kaw muo a sapa zaw kha aa thyi. Ama ta iema kha, “Niema hing ma ruo thaacawnapa ngiepatlietuv tana nama cuo,” a ta yi. 10Cuo vyi, ma byipaapa; na changtaapa tie hing sa calyi riypa tana ma za chiy. 11Ma bangkhuo hingta pakha saata tah cuo pate, aa dangpa cawsaa tana ma cuo; khatiy ning hmuo ngiepatlietuv cuo buo vapuv,” ama ta. 12Cuorasala ama ta, “Cuo vyi, ma ruo thaacawnapa mangparuv riypa tana namaa zuv,” a ta yi. 13Iema ta, “Kiema, na changtaapa zaw hing uvcanu pahraa hlyihning ta pate, Kanaan ruo lie a awpa cawsaa pakha saata tana ma cuo, a syi cepa pakha ca ata hing ma paa'a lie aw te, pakha ca malie a thiyse tli,” ama ta. 14Cuorasala Josef ta iema kha, “Ica tapa haa yi ta nama cuo; ngiepatlietuv tana nama cuo. 15Hingpa hingna niema dyapasyana ta a cuo aa: nama nuta ca na hingpa luo hing a vaw va ta pata a cuo kieca, Faro a hringpa haata, hingpa hmang taa hingta pya'a va ung ciy. 16Nama bie hing a hmisipa ta a cuo ma cuo va ma tapa kha aa cie riypata, a hrangpa tie thaw chunglie nama aw chung hingta, niema chung taata pakha a pathlie ung la nama nuta ca zaa chiy se, caacuolikieca Faro a hringpa haata, niema ca ngiepatlietuv tana nama cuo hrahring,” a ta. 17Cakhutaata iema bangkhuo kha ning thung chung thaw a pathla yi.
18A ning thungnapa ta Josef ta iema kha, “Kama ca Khazing a ciyzaapa i cuo nakawta hingpa hing nama tue kieca nama hring aa. 19Aa dangpa cawsaa ta nama cuo kieca, niema uvcanu hraw taa hingta pakha hing hingpa thaw chunglie hing thuse tie ung. A hrangpa tie hingta ning riy a hnyi lipa nama ingchungkhue tie cuota nama calyipa sa hing phya ung la si tie ung, 20nama nuta ca kama'a luo za chiykhyi tie ung. Cahaacata nama bie ca paciepa cuo'a te thiyna taata nama law aa,” a ta yi. Cahaacata tue riypata ama palung a tling. 21Iema ta pakha hne pakha, “Ma nuta cunglie ma tuenapa muo khana ma pahriy. Paa malie a kie ningta a cuo pasazya kha ma hmung thluo ung, cuorasala naa za thlie va ung puv. Khapa a riethyina khana kiema'a luo a vya kaa,” amaa ta. 22#Sah 37.21,22 Cakhutaa cata Reuben ta palie yi te, “Satliepa cunglie hing hmang pha lipa tue khah ung la ca ta va yi ang ma? Cuorasala naathlie va ung ciy. Caacuonakawta ata hing ca a thiyse na malie a kaahning tli,” a ta yi. 23Josef ta a thyi diypa yi kha pachang va yi, tahematapakieca ryipalietuv hmuo te bie a chaw nakaw yi ta a cuo. 24Ama ca a hrang luo kha cakuo te a caa. Vya kaa te bie a rihne pakhaa yi. Cakhutaata Simeon kha a tlaw te ama hmungna lie kha a paciy sa yi. 25Josef ta ama chawkue lie a bisa pata sa rawpa riypa, ama chawkue cyicuo lie tuokaa pasuopa pakhaa riypa, hne luopuv lie ama ningle riypa zaw ama pi riypata bie a pi yi. Capa ca iema cuota a tuepa yi.
Josef Uvnu Zaw Kanaan Luo Ama Kaa
26Ama sa ca ama laa kha paphya sa yi te amaa tha. 27Amaa rina hmang lie kha pakha ta a laa sa pi riypata a chawkue kha a pahaw ca a chawkue dawlie ca a tuokaa kha a hmung. 28Ama ta a uvnu zaw kha, “I tuokaa na i chawkue chunglie ina pasuopa pakhaa yi,” a ta yi. Tuokaa kha ama hmung ca, ama thlaa zangsa te amaa cathangpuo pata pakha hne pakha kha, “Khazing ta ma cunglie a tuepa hing tuokhaapa tama a cuo?” amaa ta.
29Kanaan ruo lie ama paa Jakob'a luo kha ama kya chiy tiyta, ama cunglie a chiy a cuopa hmang zawdya kaw kha ama chang. 30“Izipt ruo uvtuvbyi ta kiema kha bie a hruosa pata malie chaw te, ma ruo chung a vya ngiepatliepa tana nama cuo ta pata malie a be. 31Cuorasala kiema ta, ‘Kiema ca aa dangpa cawsaa tana ma cuo, ngiepatlietuv cuo vapuv. 32Kiema ca paa pakha sacapaa uvcanu pahraa hlyihning cuo pate, pakha ca malie thiyse tli te, a syi cepa ca Kanaan ruo liena ma paa hneta a aw,’ ma ta, ama ta. 33Cakhutaata capa ruo uvtuvbyi ca ta, ‘Aa dangpa nama cuopa ca hingpa hingta pachang ang se: kama'a lie hing nama uvnu pakha chi siy ung la, ning riy a hnyi lipa nama chungkhue cawsaa tie cuota sa kha phya ung la si tie ung. 34Kama'a luo hing nama nuta a syi cepa ca za chiykhyi ung la, capa ca ta niema ca ngiepatlietuv cuo li pata aa dangpa nama cuopa kha ica pachang'a yi. Cakhutaa cata nama uvnupa hing ca pathliepa'a yi angte, hingpa ruo lie hing sung nama pali aa,’ malie a ta,” ama ta.
35Ama chawkue chungtaata sa kha ama patle tiyta, ama chawkue cyicuo taata ama tuokaa baw kha ama hmung kaluo. Iema hne ama paa ca ama tuokaa kha ama hmung tiyta ama thlaa ta a zangsa. 36Ama paa Jakob ta iema kyihuo khata, “I saata zaw na ina pahlipa diy tli ung ciy: Josef aw va tli, Simeon aw va tli, cakhutaata ata hing Benjamin nama sikhyi hyi aa. Hingpa bangkhuo hing i cunglie a tlung tli hing haw!” a ta. 37Cakhutaata Reuben ta a paa kha, “Benjamin hing nama'a luo i kya chiykhyi pakhaa li kieca i sacapaa zaw pahning hing thie lavuo yi ciy. I kuv chunglie hing chi la i kya chiykhyi pakhaa hrahring aa,” a ta. 38Cuorasala Jakob ta, “I sacapaa ca nama'a lie si ra khu vyi, tahematapakieca a uvta a thiy tli, ama dyina a ngaa tli. Nama sinapa luo lie thiylina a taw pathlyi sala, i suo paa cang hing tana ngiechina hne ina pathiy'a ung ciy,” a ta yi.
ទើបបានជ្រើសរើសហើយ៖
SAHRUOTHUNA 42: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.