SAHRUOTHUNA 30
30
1Rachel ta Jakob saata a sapa khu lipa kha a pachang tiyta a uvtanung kha hietlie te Jakob kyihuo khata, “Haatiy na pi tie; ca lipa kieca i thiy aa,” a ta. 2Jakob ta Rachel cunglie kha a hi haa hringhruo te, “Nama kha saata caa pi lipa Khazing a daa hmang lie ca i aw the'a ma?” a ta. 3Cakhutaa cata Rachel ta, “Hingpa lie hing i siicanung a aw hing, a ziehne tie, ama ta i pakhuv cunglie hing saata na sapa'a te ama thueta kama zaw saata i hnyi khu ra aa,” a ta. 4Cahaacata a siicanung Bilhah ca a napuv riypata pi te Jakob ta aa ziekhyi. 5Bilhah ca nu phya te Jakob kha sacapaa a sapa. 6Rachel ta, “Khazing ta kamaluo kuo taata bie na ripa te, i ueryi zaw kha ina thyi nakawta sacapaa pakha ina pi ta te, Dan ta pata ming a paphya. 7Rachel siicanung Bilhah ca nu hnyi pakhaa te Jakob kha sacapaa pahningnapa a sapa pakhaa. 8Rachel ta, “I uvtanung hne khuosa ta a zue pate i te tli,” ta te, Naftali ta pata ming a paphya.
9Leah ta saata sa khu va tli ang tapa kha a pachang tiyta, a siicanung Zilpah ca Jakob kha napuv riypata a pi. 10Leah siicanung Zilpah ta Jakob kha sacapaa pakha a sapa. 11Leah ta, “Vuophaa tana a cuo,” ta te Gad ta pata ming a sa. 12Leah siicanung Zilpah ta Jakob kha sacapaa pahningnapa a sapa. 13Leah ca ta, “Kha tluv tama i palung a tluo! Canung zaw ta palungtluo nung ina ta'a yi,” ta te Asher ta pata ming a sa.
14Jungsacuo uo cuo ning kha Reuben ca lu luo kha si te, mandarek kha hmung te a nung Leah kha a pi. Rachel ta Leah kyihuo khata, “Na sacapaa huopa mandarek chekha kha na pi ra thi tie,” a ta. 15Cuorasala ama ta, “I navaapa ina chuvpa ca hing hmang taata tah ri kanaa ciy? I sacapaa huopa mandarek zaw te ma ina chuv khing ciy?” a ta. Rachel ta, “Na sacapaa huopa mandarek kha ina pipa cata a cuo kieca ata zuo nama hne aa vya zie aa,” a ta. 16Zuoluocaw ta Jakob kha lu taata a vya chiy ca, Leah ta vaa hladaw te, “Kama'a liena naa zie aa, tahematapakieca i sacapaa huopa khingna ca-ie thyi tana icaa hluo tli,” a ta. Caacuonakawta capa zuo ca Leah'a lieta aa ri. 17Leah thlaachuona ca Khazing ta naathlie te, nu phya te Jakob kha sacapaa papangaanapa a sapa. 18Leah ta, “I siicanung kha i navaapa i pina muo na Khazing ta ina pi,” ta te, Issakhar ta pata ming a sa. 19Cakhutaa cata Leah ca nu phya pakhaa te Jakob kha sacapaa pacaruvnapa a sapa pakhaa. 20Leah ta, “Khazing na lasaw sungnaapa naa pi, tahematapakieca sacapaa pacaruvnapa kha i sapa mangtli,” ta te Zebulun ta pata ming a sa. 21Cakhutaa cata sacanung pakha sa te Dinah ta pata ming a paphya.
22Cakhutaata Khazing ta Rachel kha a thyi te, a thlaachuona kha naathlie te saata sa khuna kha a pi. 23Nu kha hnyi te sacapaa pakha a sa. Ama ta, “Ese hyalyapa i cuonapa khana Khazing ta ina thawpa tli, 24Abyipa ta sacapaa hrangpa zaw na pi kalie se,” ta te Josef ta pata ming a sa.
Laban Ta Jakob A Pahnyirung Sa
25Rachel ta Josef kha a sa khutaata, Jakob ta Laban kha, “I khyruo hne i ing luo i kaa thena riypata na pathlie paa tie. 26Nama'a lie re i hrienapa, i napuv hne i saa zaw kha na pi yi la si paatie ang se; na re a phasa pata i hriepa kha na pachang,” a ta. 27Cuorasala Laban ta, “Bie na pari sa ra thi tie. Nama thue tana Abyipa ta thluechiy ina pi tapa hing hmungdawluna ta i pachang; 28na hrie muo ca ri la ica pi aa,” a ta. 29Jakob ta, “Tuokhaatama na re i hrie tapa hne kama mangchiyna rawlie na sahring kha tluv tama a pung tapa ca nama na a pachang ciy. 30Tahematapakieca i vya chiy hluota ca a cawta dyi za hnyi cate, ata hing ca pungzaa te a hluv hringhruo. I tuehriepa bangkhuo taata Abyipa ta thluechiy aca pi. Cuorasala ata hing ca i ingchungkhue i mangchiy a hu ra va tli ma?” a ta. 31Laban ta, “Khaapama ica pi aa?” a ta. Jakob ta, “Khaapahmuo na pi'a vaciy; i ripa hing na tue kieca, na sahring kha a la pi'a angte ica kingpa pakhaa aa: 32Ataning hingta na sahring hraw luo hing vaa khie'a angte, a pecipa, a cikarypa hne a vawpa tuv hne tuvtaata bangkhuo cuose, a pecipa hne a cikarypa mie bangkhuo kha a hrang ta pache'a angte, capa ca i re hrie muo ta a cuo aa,” a ta. 33Ningthlaahezuo thue a vaw'a cate i hrie muo hing na vya mang tiyta i dangnapa hingta kama cuota bie a ri aa. A pecipa hne a cikarypa a cuo lipa mie hne a vawpa a cuo lipa tuv kha kama'a lie na hmung kieca aparuvpa na a cuo ta pata rue tie,” a ta. 34Laban ta, “A pha, na ripa haa cata cuo se,” a ta. 35Cuorasala capa ning cata Laban ta mietungpa a pecipa hne a cikarypa bangkhuo, miepuvnung a pecipa hne a cikarypa bangkhuo, a peruopa bangkhuo, hne tuv a vawpa bangkhuo kha pache diy te a sacapaa zaw kha a pakhie sa yi. 36Jakob hne ning thung luosi aa hlanapa luo kha a va chi yi. Jakob ca aa ngaapa Laban sahring ca a king.
37Cakhutaata Jakob ca poplar kung, almond kung hne ahre kung a hringpa nge kha la te, a haw kha khaw buo te aa capepa ta a tue. 38Thingnge cikarypa tie ca sahring tiydangnapa hraky zaw athaalie, sahring zaw hmiekunglie kha caby te a chi. Sahring ca tiydangna luo amaa vaw ning kha sapaa ama kie the nakawta a cuo. 39Thingnge cikarypa hmielieta sapaa a kie nakawta a taata a pachuo tiyta a pecipa, a cikarypa hne a peruopa kha ama pachuo. 40Jakob ta tuv zaw kha a hrang ta che te, Laban sahring a pecipa, a vaw diypa sahring tie'a luo kha pahyi te a chi. Ama sahring phuv kha a nanang ta chi te Laban sahring phuv hne khata chi pakhaw vyi. 41A thaaruv viepa sahring tie sapaa a kie tiyta, thingnge cikarypa tie hrawlie sapaa a kie riypata Jakob ta thingnge kha sahring tiy dangnapa hraky athaalie, sahring zaw hmiekunglie kha a chi. 42Cuorasala a thaa dyapa sahring zaw cuota ca thingnge kha chi vyi. Caacuonakawta a thaa dyapa tie ca Laban huopa ta cuo te, a thaaruvpa tie ca Jakob huopa ta ama cuo. 43Cahaacata Jakob ca a hnyirungsale paluo. Tuv hne mie a hluvsa, siicapaa hne siicanung, kala-uv hne laa zaw kha a hluvsa a hnyi.
ទើបបានជ្រើសរើសហើយ៖
SAHRUOTHUNA 30: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.