SAHRUOTHUNA 27
27
Isak Ta Jakob Kha Thluechiy A Pi
1Isak ca macuosa tli te, a ming zing te a hmung the li tli taata a sacapaa uvthyi Esau kha ku te, “I sacapaa,” a ta. Esau ta, “Hingpa lie hingna i aw,” a ta. 2Isak ta, “Macuo tli angte i thiyna'apa ning hing pachang khu va ang. 3Caacuonakawta na cehre ta a cuopa, na lavaabya hne na liy kha a la lah ruo vaa khie la saa na va kapa tie. 4Cakhutaa cata i ning khingsa tawpa haa khata a pahuosa pata na changpa la na vya pi tie. I thiy hluo hingta thluechiy ca pi naase ang,” a ta.
5Isak ta a sacapaa Esau a changpa bie kha Rebekah ta naa a thlie paruv yi. Caacuonakawta Esau ruo a vaa khie chung khata, 6Rebekah ta a sacapaa Jakob kha, “Na paa ta na uvta Esau kyihuo ta, 7‘Saa na kapa la tiyhuo a pasisa pata chang la na vya pi tie, i thiy hluo hingta Khazing hmielie thluechiy ca pi naase ang, a tapa kha i thyi.' 8Caacuonakawta i sacapaa, i ri hing naa ngie tie. 9Mie hraw luo kha vaa la, a ningkhingsa tawpa tiyhuo a pasisa pata i changpa khu riypata a thukalypa mienuta sahning na pi tie. 10Na paa kha ning riypata pi'a cate a thiy hluota thluechiy ca pi naase,” a ta. 11Cuorasala Jakob ta a nung Rebekah kyihuo khata, “I uvta Esau ca a hming rungsapa cuo te, kama ca a vang mekalangpa ta i cuo. 12I paa ta na hrie pachiy biephung sala, i dungpa kha na pachang'a te thluechiy ca ta li pata chiesana tlaku i cunglie i patlung sa pali'a ma?” a ta. 13A nung ta, “Nama chiesana ca i cunglie tlung lavuo, i sacapaa; i ripa bie dyi hing ziy la, va la lah, mie ca na pi tie,” a ta. 14Caacuonakawta vaa te mie ca va la te a nung kha a vya pi. A nung ca ta a paa ta a tlechuo thepa, a pasisapa tiyhuo ca a changpa. 15Cakhutaa cata Rebekah ta a sacapaa uvthyi Esau caw a pha cepa kha la te Jakob ca a pahryi. 16A kuvbuo hne a hming a aw linapa a rue lie kha mie vang ta a pahlaw. 17Cakhutaa cata a pasisapa tiyhuo hne a pasupa viechuo ca a sacapaa Jakob kha a pi.
18Jakob ca a paa'a luo kha a ngie te, “I paa,” a ta. A paa ta, “Hingpa lie hingna i aw i sacapaa, ahungtama na cuo ca? a ta. 19Jakob ta a paa kha, “Na sacapaa uvthyi Esau tana i cuo,” a ta. Ina changpa ca kha i tue tli. A kya tu la ica changpapa saa hing na ningpa la thluechiy ca na pi tie,” a ta. 20Cuorasala Isak ta, “I sacapaa, tuokhaatama hing tluv a catli pata saa ca na ka khu?” a ta. Ama ta, “Nama Khazing Abyipa ta tena ina pi nakaw tana a cuo,” a ta. 21Cakhutaa cata Isak ta Jakob kha, “I sacapaa, naa vya ngie la ca hrie pachiy'a ang, i sacapaa Esau ta na cuo hmisi ma cuo hmisi va ca ma tapa kha ca pachang naase ang,” a ta. 22Caacuonakawta Jakob ta a paa kha vaa ngie te, a hrie pachiy khutaata, “Na ueryi ca Jakob ueryi ta a cuo, cuorasala na kuvbuo ca Esau kuvbuo ta a cuo tlung,” a ta. 23A kuvbuo ca a hming thue te Esau kuvbuo a lu nakawta pachang khu li pata, Jakob ca thluechiy a pi. 24“I sacapaa Esau ta na cuo hmisi ma?” a ta. Ama ta, “I cuo,” a ta. 25Cakhutaa cata Isak ta, “Vya cyi tie, i sacapaa, na changpa saa ca ning'a angte thluechiy ca pi naase ang,” a ta. Caacuonakawta va pi te a ning khutaata mingsuvtiy zaw kha pi te a dang. 26Cakhutaata a paa Isak ca ta, “I sacapaa naa vya ngie la na pahnuo tie,” a ta. 27#Heb 11.20 Jakob ta vaa ngie te a pahnuo. A paa ta a caw rang kha pahnuo te thluechiy a pi.
“I sacapaa rang hing
Abyipa ta thluechiy a pipa ruo rang na a pahnuo.
28 Abyipa ta avuo aduotiy ca pi sala,
na luruo kha alyi phapa ta cuo yi se,
sa hne mingsuvtiy a hluvsa ca pi se.
29 #
Sah 12.3
Cawsaa zaw ta na re hrie yi sala,
mingphang zaw kha na hmiekunglie a vya bung yi se.
Na uvnu zaw cunglie abyi cuo la,
na nung sacapaa zaw kha na hmiekunglie a vya bung yi se.
Nama chie caa sapa ca chiesapa cuo yi sala,
thluechiy caa pipa ahunghmuo thluechiypa ta cuo yi se!” a ta.
Esau Ta Thluechiy Aa Sung
30Isak ta Jakob kha thluechiy a pi khutaata a paa Isak hmiekung taata a pya khu pahne ta a uvta Esau ca ruo aa khiena taata a vya chiy. 31Ama zaw sa hne tiyhuo kha a pasisa pata chang te, a paa'a luo kha a vya cyi. A paa kyihuo khata, “I paa, kya thu la na sacapaa i vya phyapa saa ca ning la, thluechiy ca na pi naase ciy,” a ta. 32A paa Isak ta, “Ahungtama na cuo?” a ta. Ama ta, “Na sacapaa uvthyi Esau tana i cuo,” a ta. 33Ca khu pahne ca Isak ca a cathangsa te, “Nama naa vaw hluota hingta a kapa saa kama'a luo a vya cyipa kha ahungtama a cuo aa? A bangkhuo ta ning angte thluechiy i pi tlipa kha! A cuo, ama kha na, thluechiy ca a hmung aa,” a ta. 34Esau ta a paa bie kha a thyi tiyta ngiechisa pata khuopuv ta caa te, “I paa, kama zaw thluechiy na pi ra tie,” a ta. 35Cuorasala a paa ta, “Na nuta kha zyatesa pata a vaw te na thluechiy ca aa la tli,” a ta. 36#Sah 25.29-34 Esau ta, “Jakob tapa ming a phyapa hing aa hmuo hringhruo. Tahematapakieca ata hne hingta yi hning ina dung tli. Sa uvthyi i cuona kha ina chuv khutaata ata hing i thluechiy kha ina chuv hyi tli,” a ta. Cakhutaata, “I cuota thluechiy suokha chuo pangaa va ca ma?” a ta. 37Isak ta Esau kyihuo khata, “Ama ca nama byipaapa ta tue tli angte, a uvnu bangkhuo kha a changtaapa ta i pi diy tli. Sa hne mingsuvtiy zaw kha i pi diy tli. I sacapaa, khaapama ica tuepa khu'a tli?” a ta. 38#Heb 12.17 Esau ca ta a paa kyihuo khata, “Thluechiy suokha chuo hnyi va tli ca ma, i paa?” a ta. Cakhutaa cata Esau ca a ueriyliy khata a caa.
39 #
Heb 11.20
Cakhutaata a paa Isak ta,
“Na awna ruo ca alyi phapa ruo ta cuo'a vyi,
na ruo lie avuo aduotiy zaw tla'a vyi.
40 #
Sah 36.8; 2Sie 8.20 Na zueziy ta hring'a cate,
na nuta re khana na hrie aa.
Cuorasala naa du kieca#27.40 Hebru lie a ri khingna sie vyi ,
na ruetung lie ruekhang kha na thlipachung aa,” a ta.
Esau Hihaana Taata Jakob Aa Ruo
41Esau ta Jakob kha a paa ta a pipa thluechiy kawlieta a hue. Caacuonakawta a palung chunglie kha, “I paa hing vya thiy'a te muochie sa ma patlung pahne ta i nuta Jakob hing i thie aa,” a ta. 42Cuorasala a sacapaa uvthyipa Esau ta a ripa bie kha Rebekah ta a thyi tiyta, Jakob kha ku te, “Na uvta Esau na nama kha thie acaa nang. 43Caacuonakawta i sacapaa, i bie hing naathlie tie. Haran lie a awpa i caapaapa Laban'a luo kha atabala hingta a ruo la, 44na uvta hihaana a diena te, cuo kha chung va aw caw tie. 45Na uvta hihaana a diena te va aw caw la, a cunglie na tuepa hmang kha a maw thueta cawsaa vya pathlie'a angte ica vya paku sa pakhaa'a yi. Khaapanakawma ning kha chunglie nama pahning ta ina thiyse'a ung ciy?” a ta.
46Cakhutaa cata Rebekah ta Isak kyihuo khata, “Hit zaanung zaw hingna naa nangsa tli yi. Jakob zaw hingna ata haa hingta Hit zaanung a chiy ra tapa kieca, i hringpuopa aw va tli,” a ta.
ទើបបានជ្រើសរើសហើយ៖
SAHRUOTHUNA 27: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.