SAHRUOTHUNA 25
25
Abraham Ta Keturah Aa Hlaw
(1Chr 1.32-33)
1Abraham ta Keturah ama tapa napuv hrangpa pakha a chiy. 2Keturah ca ta Zimran, Jokshan, Medan, Midian, Ishbak hne Shuah a sa yi. 3Jokshan ca Sheba hne Dedan paa ta a cuo. Dedan sacapaa zaw ca Asshurim, Letushim hne Leummim ta ama cuo. 4Midian sacapaa zaw ca Efah, Efer, Hanok, Abida, hne Eldaah ta ama cuo. Hingpa zaw bangkhuo hing Keturah ciypathla zaw ta ama cuo. 5Abraham ca a hnyipa zaw bangkhuo kha Isak a pi. 6Cuorasala a nungthangnung sacapaa zaw ca a hring chung khata lasaw pi yi te Isak'a taata aa hlanapa ruo, ningchiy ruo luo kha a pasi sa yi.
Abraham Thiyna
7Abraham ca zakha sawsariy kung pangaa a hring. 8A macuosana te ta, a chuo tlungsa pata hring te a thiy khutaata a cawsaa zaw'a luo kha pahlaw pata a cuo. 9A sacapaa Isak hne Ishmael ta Mamre taata ningchiyluo kuo ta a awpa Hit ming Zohar sacapaa Efron lu chunglie, Makpelah lungkhue lie kha ama paby. 10#Sah 23.3-16 Capa ca Abraham ta Hit ming'a taata a calyipa tana a cuo. 11Abraham a thiy khutaata a sacapaa Isak kha Khazing ta thluechiy a pi. Isak ca Beer-lahai-roi lieta khy a sa.
Ishmael Ciypathla Zaw
(1Chr 1.28-31)
12Hingpa tie hing Sarah siicanung, Izipt zaanung Hagar ta Abraham hne ama sapa Ishmael ciypathla zaw ta ama cuo. 13Ishmael sacapaa zaw a uvthyi ce taata aa paziy pata ama ming ca: Nebaioth, Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Nafish hne Kedemah ta ama cuo. 16Hingpa tie hing ama khy hne ama awna hmang hne ama mingphang ziy pata ming pipa Ishmael sacapaa siepahruo pahraa hlyihning tie ta ama cuo. 17(Ishmael ca zakha sawthung kung sariy a ta pata thiy te a cawsaa zaw'a luo kha pahlaw pata a cuo.) 18Iema ca Izipt ruo taata ningchiyluo kuo, Assiria luo sinapa luopuv, Havilah taata Shur alala ruo lie kha khy ama sa.
Esau Hne Jakob Ama Puvna Hne Ama Haatiy Ning
(Rom 9.10-12)
19Abraham sacapaa Isak ciypathla ca hing haa hing tana a cuo: Abraham ca Isak paa ta a cuo, 20Isak ca kung sawliy a ta pata Paddan-aram ruo lie Aramean mingphang Bethuel sacanung, Laban sietanung Rebekah kha aa hlaw. 21Isak ca a napuvnung kha saata a hnyi khu li nakawta Abyipa'a luo kha thlaachuo te Abyipa ta a thlaachuona kha palie te a napuvnung Rebekah ca nu a phya. 22A riy chunglieta haatiy ca pakha hne pakha kha amaa nuo byalya nakawta, “Hing haa hingta a cuo kieca khaapama i hringpuopa a aw aa,” a ta. Caacuonakawta Abyipa'a luo hiehriy riypata a si. 23#Rom 9.12 Abyipa ta,
Na chunglie hing mingphang phanghning aw yi te,
na sapa cawsaa pahning hing amaa che aa.
Pakha hing a hrangpa pakha laata a thaa ruv vie'a te,
a uvthyipa ca a syipa rehrietuv tana a cuo aa,” a ta.
24A ningthlaa tling te nu a za puv tiyta mingphie ta ama cuo. 25Zaa puv taapa ca se te a pangpa bangkhuo ca pang hming thuepa haata a hming ta a pahlaw nakawta a ming ca Esau ama ta. 26Cakhutaata a nuta ca Esau lidu kha a cusa pata a patuvpuo pata a za puv nakawta Jakob ta pata ming ama sa. Rebekah ta iema a sa ning yi kha Isak ca kung sawcaruv a ta tli.
27Haatiy zaw ca kya le yi te Esau ca saa a ka thesapa, ruo si a khingsapa ta a cuo. Jakob ca a ryi sungsapa, ing lie dyi a awpa ta a cuo. 28A saa kapa saa kha a ce taw nakawta Isak ta Esau kha a due, cuorasala Rebekah ta Jakob kha a due.
Esau Ta Sacapaa Uvthyi Cuona Kha A Zaa
29Ning kha ca Jakob ta sa a chang nguoluo ning kha Esau ca ruo taata vya chiy te a nang a diy hringhruo. 30Caacuonakawta Jakob kyihuo khata, “I nang na a diy hringhruo, na tiyhuo sepa kha ning buo thi'a ang,” a ta. (Caacuonakawta ama ca Edom ta pata upa a cuo.) 31Jakob ta, “Sacapaa uvthyi na cuonapa kha na zaa taa tie,” a ta. 32Esau ta, “I thiy tyalya tli hing; sacapaa cuona ca khaapama i tuena aa?” a ta. 33#Heb 12.16 Jakob ta, “Bie ca naa kuo taa tie,” a ta. Caacuonakawta bie ca a kuo te a sacapaa uvthyi cuona ca Jakob'a luo ca a zaa. 34Cakhutaa cata Jakob ta Esau ca viechuo hne abie sepa tiyhuo ca pi te a ning khutaata thu te a cakuo. Cahaacata Esau ta a sacapaa uvthyi cuona kha siysaa ri li pata a aw.
ទើបបានជ្រើសរើសហើយ៖
SAHRUOTHUNA 25: LNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Lutuv Holy Bible © Bible Society of Myanmar, 2023.